“Kambe lava tshembaka Yehovha va ta tlhela va va ni matimba. Va ta haha hi timpapa ku fana ni magama. Va ta tsutsuma va nga heli matimba; Va ta famba va nga karhali.”—Esaya 40:31, Bibele—Matsalwa Yo Kwetsima Ya Misava Leyintshwa.

 “Kambe lava tshembaka HOSI Xikwembu, va ta engeteriwa matimba,va ta tsutsuma va nga karhali, va ta famba va nga heleli hi ntamu.”—Esaya 40:31, Bibele ya Mahungu Lamanene.

Leswi Esaya 40:31 Yi Vulaka Swona

 Yehovha a Xikwembu u tiyisekisa vagandzeri vakwe leswaku u ta va nyika matimba lawa va ma lavaka leswaku va hlula ni ku tiyiselela swiphiqo hinkwaswo leswi va nga langutanaka na swona.

 “Lava tshembaka Yehovha va ta tlhela va va ni matimba.” Lava va tshembaka vuswikoti ni ku navela ka Xikwembu ko pfuna vanhu va xona, va nga titshega hi nseketelo wa xona. (Swivuriso 3:5, 6) Ndlela yin’wana leyi Xikwembu xi nyikaka vagandzeri va xona matimba, i ku tirhisa matimba ya xona ku nga moya wo kwetsima.—Luka 11:13.

 “Va ta haha hi timpapa ku fana ni magama.” Marito lawa ma kombisa vuyelo lebyi matimba ya Xikwembu ma nga vaka na byona eka munhu. Gama ri titshega hi moya lowu yaka wu kufumela lowu vuriwaka thermals leswaku ri haha ni ku ya ematlhelo. Loko gama ri kuma moya wolowo wo kufumela (thermal), ri pfula timpapa ta rona naswona ri rhendzeleka hi wona ri ya ri ya henhla swinene. Loko ma ri karhi ma suka eka moya lowun’wana ma ya eka un’wana, magama ma nga tshama emoyeni tiawara to tala swinene, ma tirhisa matimba matsongo leswaku ma haha ma ya laha ma yaka kona.

 “Va ta tsutsuma va nga heli matimba.” Swiphiqo swa vutomi swi nga hi tsanisa emirini ni le ka ndlela leyi hi titwaka hayona kambe hi nga ya emahlweni hi tiyisela hi ku pfuniwa hi matimba lawa Xikwembu xi hi nyikaka wona. Ma nga hi pfuna leswaku hi endla swilo leswinene ku nga khathariseki swiphiqo leswi hi langutanaka na swona. Muapostola Pawulo loyi a langutaneke ni miringo yo tika, u te: “Eka hinkwaswo ndzi ni matimba hikwalaho ka loyi a ndzi nyikaka matimba.”—Vafilipiya 4:13.

Mongo wa Esaya 40:31

 Xikwembu xi huhutele muprofeta Esaya ku tsala marito lawa eka malembe ya kwalomu ka 2 700 lama hundzeke. Hambileswi tsalwa leri ri tirhaka eka malandza hinkwawo yo tshembeka ya Xikwembu, swi nga endleka Yehovha a vule marito lawa ku khutaza Vayuda lava a va ta yisiwa eBabilona ku ringana malembe ya 70. Loko Vayuda va tlhelela etikoxikaya ra vona va huma evuhlongeni byebyo, va vone ku hetiseka ka marito ya Xikwembu. (Esaya 40:1-3)  bXikwembu xi va nyike matimba yo famba riendzo rero ro leha leri tikaka ku sukela eBabilona ku ya eYerusalema hi 537 B.C.E.—Esaya 40:29.