“U ta sirhelela lava tshembelaka eka wena hi mbilu hinkwayo; u ta va nyika ku rhula hi masiku, hikuva va tshembe wena.”—Esaya 26:3, Bibele—Matsalwa Yo Kwetsima Ya Misava Leyintshwa.

“Eka lowa mbilu leyi tiyeke wa n’wi nyika ku rhula, ku rhula hikuva u tshembile wena.”—Esaya 26:3, Bibele Ya Xitsonga.

Leswi Esaya 26:3 Yi Vulaka Swona

Hi marito lawa ya xitiyisekiso, muprofeta Esaya u kombisa leswaku Xikwembu xi sirhelela lava xi tshembaka hi ku helela. Xi endla tano hi ku va pfuna va titwa va sirhelelekile ni ku tlhela va va ni ku rhula.

“U ta sirhelela lava tshembelaka eka wena hi mbilu hinkwayo.” Marito lawa ma hlamusela lava tiyimiseleke hi timbilu ta vona hinkwato ku tshemba Yehovha a Xikwembu mikarhi hinkwayo. Lava tshembaka Xikwembu, va swi xiya leswaku va fanele va titshega hi xona. Hi xikombiso, a va titshegi hi ku twisisa ka vona loko va endla swiboho swa nkoka. Ku ri na sweswo, va titshega hi mianakanyo ya Xikwembu eka hinkwaswo leswi va swi endlaka. (Swivuriso 3:5, 6) Va lavisisa langutelo ra Xikwembu hi mhaka yo karhi hi ku kambisisa rito ra xona ku nga Bibele ni ku anakanyisisa hi leswi va swi hlayeke. (Pisalema 1:2; 119:15) Loko va langutana ni swiyimo swo tika, va kombela Yehovha hi xikhongelo leswaku a va pfuna. (Pisalema 37:5; 55:22) Loko va endla tano, va kombisa leswaku va xi tshemba Xikwembu, hikwalaho ka sweswo xi va nyika ku rhula.

“U ta va nyika ku rhula hi masiku.” Eka matsalwa ya Xiheveru, rito leri nge “ku rhula” ri humelela ka mbirhi ku kombisa nkoka wa rona; hikwalaho, ku kandziyisa sweswo, xiga lexi xi nga hundzuluxeriwa xi va “ku rhula loku nga heriki,” “ku rhula loku hetisekeke” kumbe “ku rhula loku heleleke.” Hi marito man’wana, lava tshembaka Yehovha hi ku helela va tiphina hi ku rhula ka le mbilwini swi nga ri na mhaka leswaku va langutana ni swiyimo swa njhani. (Pisalema 112:7; 119:165) Munhu a nga kuma ku rhula loku, loko a va ni vuxaka lebyikulu na Yehovha ni ku tikarhatela ku endla leswi n’wi tsakisaka.—Swivuriso 3:32; Esaya 48:18.

Ku va ni “ku rhula loku nga heriki” a swi vuli swona leswaku malandza ya Xikwembu a ma nge langutani na swiphiqo kumbe ku vilela. (1 Samuwele 1:6, 7; Yobo 6:1, 2; Pisalema 31:9) Ku ri na sweswo, xa va pfuna leswaku va langutana ni swiphiqo swa vona. (Esaya 41:10, 13) Xa swi hlamula swikhongelo swa vona, xi va nyika vutlhari, matimba ni nchavelelo. (Pisalema 94:19; Swivuriso 2:6; Esaya 40:29) Hikwalaho, va nga tshama va ri ni ku rhula hambiloko swi nga fambi kahle.—Vafilipiya 4:6, 7.

Mongo wa Esaya 26:3

Muprofeta Esaya u hanye kwalomu ka va 2 800 wa malembe lama hundzeke. Vayuda vo tala hi nkarhi wolowo ni le ka malembe lama landzeleke, a va n’wi gandzelanga hi ku tshembeka Yehovha Xikwembu. Hikwalaho ka sweswo, Yehovha u pfumelele leswaku muti wa vona ku nga Yerusalema wu lovisiwa hi lembe ra 607 B.C.E.

Hambiswiritano, loko ka ha sele malembe yo tlula dzana leswaku muti wolowo wu lovisiwa, Esaya u dzunise Yehovha hi risimu ra vuprofeta leri tsariweke eka ndzima 26. (Esaya 26:1-6) Risimu rero ri vulavule hi vumundzuku laha muti wa Yerusalema lowu nga etikweni ra Yuda, a wu ta akiwa hi vuntshwa.

Muti wa Yerusalema wu pfuxetiwile endzhaku ka lembe ra 537 B.C.E. Loko se wu pfuxetiwile, Vayuda lava tlheleleke eka wona a va titwa va sirhelelekile ivi va ku: “Hi ni muti lowu tiyeke.” (Esaya 26:1) Hambiswiritano, makhumbi lama tiyisiweke ya muti wolowo a ku nga ri wona lama wu endleke wu tiya. Ku ri na sweswo, a wu ta sirheleleka ntsena loko wu tiyisiwa hi Yehovha ni ku wu sirhelela.—Esaya 26:2.

Swi tano ninamuntlha. Lava tshembaka Yehovha hi ku helela, va titwa va sirhelelekile hikuva i “Ribye” kumbe vutumbelo bya vona.—Esaya 26:4.

Hlalela vhidiyo leyi yo koma leswaku u vona leswi buku ya Esaya yi vulavulaka ha swona.