“Xi endle swilo hinkwaswo swi saseka hi nkarhi wa swona. Xi tlhele xi endla leswaku vanhu va navela ku hanya hilaha ku nga heriki; nilokoswiritano vanhu a va nge pfuki va wu twisisile ntirho lowu Xikwembu xa ntiyiso xi wu endleke ku sukela eku sunguleni ku ya fika emakumu.”—Eklesiasta 3:11, Bibele—Matsalwa Yo Kwetsima Ya Misava Leyintshwa.

 “Xi endlile hinkwaswo swi sasekile hi nkarhi wa swona, xi vekile ku anakanya ka vutomi lebyi nga heriki etimbilwini ta vona; hambiswiritano, a ku na munhu la twisisaka mitirho leyi endliweke hi Xikwembu eku sunguleni ka yona ku yisa eku heteleleni.”—Eklesiasta 3:11, Bibele Ya Xitsonga.

Leswi Eklesiasta 3:11 Yi Vulaka Swona

 “Xi endle swilo hinkwaswo swi saseka hi nkarhi wa swona.” Rito ra Xiheveru leri tirhisiweke laha leri nge, ku “saseka” a ro kombetela eka nchumu lowu vonakaka wu sasekile ntsena. Ri nga tlhela ri vula swilo “leswi hlelekeke” kumbe “leswi langutekaka.” (Eklesiasta 3:11) Mitirho ya Xikwembu yo saseka yi katsa hinkwaswo leswi xi swi tumbuluxeke ni hinkwaswo leswi xi swi endlaka ku hetisisa ku rhandza ka xona.—Daniyele 2:21; 2 Petro 3:8; Nhlavutelo 4:11.

 “Xi tlhele xi endla leswaku vanhu va navela ku hanya hilaha ku nga heriki.” Loko Xikwembu xi tumbuluxa vanhu, a xi lava leswaku va hanya hilaha ku nga heriki. (Pisalema 37:29) Xi tlhele xi endla leswaku va swi navela ku hanya hilaha ku nga heriki. Hambiswiritano, vanhu vo sungula ku nga Adamu na Evha, a va xi yingisanga Xikwembu naswona sweswo swi endle leswaku vona ni vatukulu va vona va fa. (Genesa 3:17-19; Varhoma 5:12) Nilokoswiritano, Xikwembu xi tshembisa ku “enerisa ku navela ka swivumbiwa hinkwaswo leswi hanyaka,” ku katsa ni ku navela ka vanhu ko hanya hilaha ku nga heriki. (Pisalema 145:16) Bibele yi hlamusela ndlela leyi Yehovha a endleke swi koteka hayona leswaku vanhu va tlhela va kuma vutomi lebyi nga heriki.—Varhoma 6:23.

 “Vanhu a va nge pfuki va wu twisisile ntirho lowu Xikwembu xa ntiyiso xi wu endleke ku sukela eku sunguleni ku ya fika emakumu.” Vutlhari bya Xikwembu i byikulu swinene naswona byi entile, lerova Bibele yi vula leswaku “a byi lavisiseki.” (Varhoma 11:33) Hambiswiritano, Xikwembu xi tiyimisele ku paluxa swikongomelo swa xona eka lava lavaka ku xi tsakisa.—Amosi 3:7.

Mongo wa Eklesiasta 3:11

 Buku ya Eklesiasta yi tsariwe hi Hosi Solomoni wa le Israyele wa khale naswona a a dume hi ku va ni vutlhari bya Xikwembu. Buku leyi yi ni switsundzuxo swo tiva leswi nga swa nkoka ni leswi nga pfuniki nchumu evuton’wini. (Eklesiasta 1:2, 3; 2:1, 17; 7:1; 12:1, 13) Eka ndzima 3, Solomoni u hlamusele swin’wana swa swiendlakalo leswi tolovelekeke evuton’wini. U tlhele a vulavula hi mitirho yo hambanahambana. (Eklesiasta 3:1-8, 10) Xikwembu xi nyike vanhu ntshunxeko wo tihlawulela leswaku va lava ku endla yini nileswaku va nga swi endla rini. (Deteronoma 30:19, 20; Yoxuwa 24:15) Solomoni u vule leswaku loko ntsena vanhu va hanya hi ku pfumelelana ni milawu ya Xikwembu ni ku xixima “nkarhi wa xona” lowu vekiweke, hi kona va nga ta tiphina hi vuyelo bya mitirho ya vona leyinene. U vule leswaku vuyelo byebyo i “nyiko leyi humaka eka Xikwembu.”—Eklesiasta 3:1, 12, 13.

 Hlalela vhidiyo leyi yo koma leswaku u vona nkatsakanyo wa buku ya Eklesiasta.