“Musa wa mina lowukulu wu enele eka wena, hikuva matimba ya mina ma endliwa lama hetisekeke eku tsaneni.”—2 Vakorinto 12:9, Bibele—Matsalwa Yo Kwetsima Ya Misava Leyintshwa.

 “Tintswalo ta mina eka wena ti ringene, hikuva matimba ya mina ma hetiseka laha ku nga ni ku tsana kona.”—2 Vakorinto 12:9, Bibele Ya Mahungu Lamanene.

Leswi 2 Vakorinto 12:9 Yi Vulaka Swona

 Xikwembu xi tshembise muapostola Pawulo ku n’wi nyika matimba lawa a a ma lava ku langutana ni miringo ni swihoxo swakwe.

 “Musa wa mina lowukulu wu enele eka wena.” Loko Xikwembu xi hlamula swikhongelo swa Pawulo leswi phindaphindiweke, a swi fana ni loko xi ku “ndzi ta ku nyika musa wa mina ntsena.” Hi marito man’wana, musa lowukulu wa Xikwembu a wu ringene leswaku wu pfuna Pawulo ku langutana ni miringo. Njhani? Rito leri hundzuluxeriweke ri va ‘musa lowukulu’ kumbe “tintswalo,” ri hlamusela nyiko ya mahala kumbe leyi nga bohiki leyi nyikiwaka hi Xikwembu hi ku swi rhandza. Mapapila ya Pawulo ma kombisa leswaku Xikwembu xi n’wi kombe musa lowukulu naswona u vuyeriwile eka wona. Hambileswi Pawulo a xaniseke Vakreste, Xikwembu xi n’wi nyike matimba lawa a a ma lava leswaku a cinca mahanyelo yakwe, ni ku pfuna van’wana leswaku va va Vakreste. (1 Vakorinto 15:9, 10; 1 Timotiya 1:12-14) Pawulo a a tiyiseka leswaku loko a titshega hi Xikwembu xi ta n’wi pfuna leswaku a hlula swiphiqo ni mitlhontlho leyi a a langutana na yona.

 “Matimba ya mina ma endliwa lama hetisekeke eku tsaneni.” Hi marito lawa, Yehovha a a a tsundzuxa Pawulo leswaku matimba Yakwe ma vonaka hi loko A pfuna vanhu hambileswi va nga hetisekangiki. (2 Vakorinto 4:7; 12:8) Loko Vakreste va swi xiya leswaku va endla swihoxo ivi kombela mpfuno eka Yehovha, va pfumelela matimba ya yena leswaku ma tirha eka vona. (Vaefesa 3:16; Vafilipiya 4:13) Hi ndlela yoleyo, hi kota ku vona matimba ya Xikwembu loko vanhu va endla swihoxo.

Mongo wa 2 Vakorinto 12:9

 Pawulo u tsalele Vakorinto papila leri huhuteriweke kwalomu ka va 55 C.E. Eku heleni ka papila rero, u hlamusele leswaku u ni mfanelo ya ku va muapostola. A swi fanela leswaku a vula tano hikuva vadyondzisi lava a va titekela ehenhla a va n’wi vonela ebodlheleni, kumbexana hikwalaho ka ndlela leyi a a languteka hayona kumbe leyi a a vulavula hayona.—2 Vakorinto 10:7-10; 11:5, 6, 13; 12:11.

 Loko a tibasisa vito, Pawulo u hlamusele leswaku a a ta va a nga swi kotanga hi matimba yakwe ku hetisisa ntirho wakwe ni ku tiyisela miringo yo hambanahambana. (2 Vakorinto 6:4; 11:23-27; 12:12) Eka ndzima 12, u vule leswaku u ni “mutwa enyameni,” lowu swi nga endlekaka leswaku a a vulavula hi swiphiqo leswi a swi endla a twa ku vava emirini kumbe embilwini. (2 Vakorinto 12:7) Hambileswi Pawulo a nga vulangiki leswaku u karhatiwa hi yini, a a tiyiseka leswaku Xikwembu xi ta n’wi pfuna a tiyisela.

 Namuntlha, Vakreste na vona va nga langutana ni mitlhontlho ni ku xanisiwa. Kambe va chaveleleka hi ku tiva leswaku matimba ya Xikwembu ma nga va pfuna ku tiyiselela swiphiqo hinkwaswo leswi va langutanaka na swona. Ku fana na Pawulo, va nga vula va nga tipfinyingi va ku: “Hikuva loko ndzi tsanile, hi kona ndzi nga ni matimba.”—2 Vakorinto 12:10.

 Hlalela vhidiyo leyi yo koma leswaku u vona nkatsakanyo wa buku ya 2 Vakorinto.