“Hikwalaho, tivekeni ehansi ka voko ra matimba ra Xikwembu leswaku xi ta mi tlakusa hi nkarhi lowu faneleke, mi ri karhi mi lahlela ku vilela ka n’wina hinkwako eka xona, hikuva xa khathala hi n’wina.”—1 Petro 5:6, 7, Bibele—Matsalwa Yo Kwetsima Ya Misava Leyintshwa.

 “Hikokwalaho, titsongahateni ehansi ka voko ra matimba ra Xikwembu, leswaku hi nkarhi wa kona xi ta mi tlakusa. Rhulani ku karhateka hinkwako ka n’wina eka xona, hikuva xi tikarhatela n’wina.—1 Petro 5:6, 7, Bibele Ya Mahungu Lamanene.

Leswi 1 Petro 5:6, 7 Yi Vulaka Swona

 Loko Muapostola Petro a tsala marito lawa, a tiyisekisa Vakreste leswaku va nga khongela eka Xikwembu hi swiphiqo swa vona ni hi leswi va vilerisaka. Xikwembu xi rhandza vanhu lava titsongahataka naswona xi ta va katekisa hi ndlela leyikulu.

 “Tivekeni ehansi ka voko ra matimba ra Xikwembu.” Mikarhi yo tala loko Bibele yi vulavula hi vito ra Xikwembu, yi kombetela eka matimba ya xona yo ponisa ni ku sirhelela. (Eksoda 3:19; Deteronoma 26:8; Ezra 8:22) Vakreste va kombisa leswaku va titsongahatela voko ra Xikwembu loko va titshega hi xona. Va swi xiya leswaku ku ni leswi va nga koteki ku swi endla nileswaku a va nge swi koti ku ti hlulela miringo hi voxe. (Swivuriso 3:5, 6; Vafilipiya 4:13) Va tiyiseka leswaku Xikwembu xi ni matimba yo va pfuna hi nkarhi lowu faneleke ni hi ndlela leyinene ku tlula hinkwato.—Esaya 41:10.

 “Leswaku xi ta mi tlakusa hi nkarhi lowu faneleke.” Lava tiyiselelaka miringo va nga tiyiseka leswaku Xikwembu xi ta hetelela xi va tlakusile kumbe ku va katekisa. Phela xi nge pfumeli leswaku vagandzeri va xona va ringiwa hilaha ku nga heriki kumbe hi ndlela leyi va nga kotiki ku yi tiyisela. (1 Vakorinto 10:13) Ku ri na sweswo, xi ta va hakela “hi nkarhi lowu faneleke,” loko va ya emahlweni va endla leswinene.—Vagalatiya 6:9.

 “Mi ri karhi mi lahlela ku vilela ka n’wina hinkwako eka xona, hikuva xa khathala hi n’wina.” Vakreste va nga lahlela kumbe ku rhula leswi va vilerisaka eka Xikwembu hi ku khongela eka xona hi ku titsongahata. Nhlamuselo yin’wana yi vula leswaku riendli leri nge, ku lahlela ri vula ku cukumeta nchumu wo karhi ekule na wena. Ri hlamusela xiendlo lexi endliwaka hi ku tiyimisela. Loko Mukreste a lahlela ku vilela kakwe eka Xikwembu, swi endla leswaku a nga vileli ngopfu ni ku va ni “ku rhula ka Xikwembu.” (Vafilipiya 4:6, 7). Wa swi tiva leswaku xa swi lava ku n’wi pfuna hikuva xa khathala hi yena naswona xi nga tirhisa matimba ya xona lamakulu leswaku xi n‘wi seketela.—Pisalema 37:5; 55:22.

Mongo wa 1 Petro 5:6, 7

 Ndzima 5 yi gimeta papila leri Muapostola Pawulo a ri tsaleleke Vakreste. (1 Petro 1:1) Vagandzeri va Yesu va le nkarhini wolowo a va langutane ni swilo leswi ringeke ripfumelo ra vona naswona swi endle leswaku va vilela hilaha swi nga hakona ninamuntlha. (1 Petro 1:6, 7) Leswi Petro a swi xiya leswaku wa tikeriwa, u tsale papila leri khumbaka mbilu ni ku khutaza hi va 62 ku ya eka 64 C.E.—1 Petro 5:12.

 Petro u gimete papila rakwe hi xitsundzuxo lexi khutazaka lava langutanaka ni miringo hikwalaho ka ripfumelo ra vona. Loko va ya emahlweni va titsongahata ni ku titshega hi Xikwembu, va nga tiyiseka leswaku xi ta va pfuna va tshama va tiyile. (1 Petro 5:5-10) Marito ya Petro ma nga tlhela ma khutaza Vakreste lava xanisiwaka namuntlha.

 Hlalela vhidiyo leyi yo koma leswaku u vona leswi buku ya 1 Petro yi vulavulaka ha swona.