Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Xana Vukhongeri Bya Fana? Xana Hinkwabyo Bya Amukelaka Eka Xikwembu?

Xana Vukhongeri Bya Fana? Xana Hinkwabyo Bya Amukelaka Eka Xikwembu?

Nhlamulo ya Bibele

Doo, vukhongeri a byi fani. Bibele yi ni swikombiso swo tala swa vukhongeri lebyi nga amukelekiki eka Xikwembu. Xiya swiyenge swimbirhi swa vukhongeri byebyo.

Xiyenge 1: Ku gandzela swikwembu swa mavunwa

Loko Bibele yi hlamusela ku gandzela swikwembu swa mavunwa yi tirhisa marito yo tanihi “moya,” “vuhava” ni ‘swilo leswi nga pfuniki nchumu.’ (Yeremiya 10:3-5; 16:19, 20) Yehovha * Xikwembu u lerise Israyele wa khale a ku: “U nga tshuki u gandzela swikwembu swin’wana, kambe gandzela mina ntsena.” (Eksoda 20:3, 23; 23:24, Bibele—Mahungu Lamanene) Loko Vaisrayele va gandzela swikwembu swin’wana, ‘Yehovha a a hlundzuka ngopfu.’—Tinhlayo 25:3; Levhitika 20:2; Vaavanyisi 2:13, 14.

Xikwembu xa ha titwa hi ndlela yoleyo loko swi ta eku gandzeleni ka leswi “vuriwaka swikwembu.” (1 Vakorinto 8:5, 6; Vagalatiya 4:8) Loko xi lerisa lava lavaka ku xi gandzela leswaku va tshika ku tihlanganisa ni vukhongeri bya mavunwa, xi ri: “Humani exikarhi ka vona, mi tihambanisa.” (2 Vakorinto 6:14-17) Ha yini Xikwembu xi va lerise ku endla tano loko ku ri leswaku vukhongeri hinkwabyo bya fana naswona bya amukeleka eka xona?

Xiyenge 2: Ku gandzela Xikwembu xa ntiyiso hi ndlela leyi nga xi tsakisiki

Minkarhi yin’wana, Vaisrayele a va gandzela Xikwembu hi ku tirhisa tidyondzo ni mikhuva leyi a yi tirhisiwa ku gandzela swikwembu swa mavunwa kambe Xikwembu a xi swi pfumelelanga leswaku vukhongeri bya ntiyiso byi hlanganisiwa ni bya mavunwa. (Eksoda 32:8; Deteronoma 12:2-4) Yesu u sole varhangeri va vukhongeri va le nkarhini wa yena hikwalaho ka ndlela leyi a va gandzela Xikwembu ha yona. A va lava ku voniwa leswaku va gandzela Xikwembu kambe hi vukanganyisi va “honise timhaka ta ntikelo lowukulu ta Nawu, ku nga vululami, tintswalo ni vutshembeki.”—Matewu 23:23.

Hilaha ku fanaka ninamuntlha, i vukhongeri bya ntiyiso lebyi pfunaka vanhu leswaku va va ni vuxaka lebyinene na Xikwembu. Ntiyiso lowu wu kumeka eBibeleni. (Yohane 4:24; 17:17; 2 Timotiya 3:16, 17) Vukhongeri lebyi dyondzisaka tidyondzo leti lwisanaka na Bibele byi hambanisa vanhu ni Xikwembu. Tidyondzo to tala leti vanhu va anakanyaka leswaku ti huma eBibeleni leti katsaka dyondzo ya Vunharhuun’we, ku nga fi ka moyaxiviri ni ku xanisiwa hilaha ku nga heriki—ti huma eka vanhu lava a va gandzela swikwembu swa mavunwa. Vugandzeri lebyi dyondzisaka tidyondzo teto i bya “hava” kumbe a byi pfuni nchumu hikuva byi rhangisa mindhavuko ya vukhongeri ematshan’weni ya milawu ya Xikwembu.—Marka 7:7, 8.

Xikwembu xa byi venga vukhongeri lebyi nga ni vukanganyisi. (Tito 1:16) Leswaku vukhongeri byi pfuna vanhu va va ni vuxaka lebyinene ni Xikwembu, byi fanele byi khumba vutomi bya vona bya siku na siku ku nga ri ku endla mihivahivani. Hi xikombiso, Bibele yi ri: “Loko munhu un’wana ni un’wana a tivona a ri mugandzeri wa xiviri kambe a nga lawuli ririmi ra yena, a tama a xisa mbilu ya yena n’wini, muxaka wa vugandzeri bya munhu loyi i wa hava. Muxaka wa vugandzeri lebyi baseke ni lebyi nga nyamangiki hi ku ya hi langutelo ra Xikwembu tlhelo Tata wa hina hi lowu: ku khathalela lava nga riki na vatswari ni tinoni enhlomulweni wa tona, ni ku va munhu a tihlayisa a nga ri na xivati xa misava.” (Yakobo 1:26, 27) Bibele Ya Mahungu Lamanene yi hlamusela vukhongeri lebyi baseke lebyi nga riki na vukanganyisi tanihi “vukhongeri lebyi tengeke.”

DYONDZA SWO TALA

Hi Wahi Mahungu Lamanene Hi Vukhongeri?

Xana wu ta kala wu va kona nkarhi lowu vanhu hinkwavo va nga ta gandzela Xikwembu xi ri xin’we xa ntiyiso hi vun’we

Xana Vukhongeri Byin’wana Ni Byin’wana Byi Faneriwa Hi Ku Tshembiwa?

Xana u tshame u khomisiwa tingana hi vukhongeri? Loko swi ri tano, swi nga tika ku tshemba vukhongeri byin’wana ni byin’wana. Xana ku dyondza Bibele swi nga ku pfuna njhani?