Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Xana Diyavulosi I Wa Xiviri?

Xana Diyavulosi I Wa Xiviri?

Nhlamulo ya Bibele

Ina, Diyavulosi i wa xiviri. Hi yena “mufumi wa misava,” xivumbiwa xa moya lexi veke xo homboloka xi tlhela xi xandzukela Xikwembu. (Yohane 14:30; Vaefesa 6:11, 12) Bibele yi paluxa vumunhu bya Diyavulosi hi ku ya hi mavito lama landzelaka ni tinhlamuselo ta wona:

Sathana a ko va nsusumeto wo biha lowu nga endzeni ka munhu

Van’wana va teka Sathana Diyavulosi tanihi nsusumeto wo biha lowu nga endzeni ka munhu. Hambiswiritano, Bibele yi tamele rungula laha Xikwembu xi vulavulaka na Sathana. Xikwembu xi hetisekile, xisweswo a xi nge vulavuli hi xiphemu xa xona lexi nga ni vubihi. (Deteronoma 32:4; Yobo 2:1-6) Hilaha ku fanaka, Sathana u ringe Yesu, loyi a nga riki na xidyoho. (Matewu 4:8-10; 1 Yohane 3:5) Xisweswo, Bibele yi kombisa leswaku Diyavulosi i wa xiviri ku nga ri ximunhuhatwa xa vubihi.

Xana swi fanele swi hi hlamarisa loko vanhu vo tala va nga kholwi leswaku Sathana u kona hakunene? Nikatsongo, Bibele yi vula leswaku Sathana u tirhisa vuxisi ku hetisisa swikongomelo swakwe. (2 Vatesalonika 2:9, 10) Rhengu rin’wana leri a ri tirhisaka i ku pfala vanhu vo tala matihlo leswaku va nga swi voni leswaku u kona.—2 Vakorinto 4:4.

Swilo swin’wana leswi nga riki ntiyiso malunghana na Diyavulosi

Mavunwa: Lucifer i vito rin’wana ra Diyavulosi.

Ntiyiso: Rito ra Xiheveru leri eka Tibibele tin’wana ri hundzuluxeriweke ri va “Lucifer” ri vula “la voningaka.” (Esaya 14:12) Mongo wa rito leri wu kombisa leswaku ri kombetela eka nxaxamelo wa vafumi kumbe tihosi ta Babilona leti Xikwembu xi nga ta ti khomisa tingana hikwalaho ka ku tikurisa ka tona. (Esaya 14:4, 13-20) Xiga lexi nge, “la voningaka” a xi tirhiseriwa ku vungunya vafumi va Babilona endzhaku ka loko va hluriwile.

Mavunwa: Sathana u tirhela Xikwembu leswaku xi hetisisa xikongomelo xa xona xo avanyisa vanhu.

Ntiyiso: Diyavulosi i nala wa Xikwembu, a hi nandza wa xona. Sathana Diyavulosi i mukaneti naswona u hehla vanhu lava tirhelaka Xikwembu.1 Petro 5:8; Nhlavutelo 12:10.

 

DYONDZA SWO TALA

Xana Bibele Yi Dyondzisa Yini Hakunene?

Xana Lexi Hi Xona Xikongomelo Xa Xikwembu?

U nga ha tivutisa leswaku ha yini ku ri ni swiphiqo swo tala namuntlha. Xana a wu swi tiva leswaku Bibele yi vula leswaku swiyimo swi ta cinca naswona u nga vuyeriwa?