Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Vukhongeri Bya Ntiyiso Ndzi Nga Byi Kuma Njhani?

Vukhongeri Bya Ntiyiso Ndzi Nga Byi Kuma Njhani?

Nhlamulo ya Bibele

Loko Bibele yi kombisa ku hambana exikarhi ka lava va nga eka vukhongeri bya ntiyiso ni lava nga riki eka byona, yi vula leswi: “Mi ta va vona hi mihandzu ya vona. A swi endleki leswaku vanhu va kha madiriva emitweni kumbe makuwa eswigatlwini, a hi swona ke?” (Matewu 7:16) Tanihi leswi u nga kotaka ku hambanisa murhi wa madiriva eka wa mitwa hi ku ya hi mihandzu ya kona, u nga swi kota ku hambanisa vukhongeri bya ntiyiso eka bya mavunwa hi mihandzu ya byona kumbe hi ku ya hi tinhla leti landzelaka.

  1. Vukhongeri bya ntiyiso byi dyondzisa ntiyiso lowu sekeriweke eBibeleni, ku nga ri tifilosofi ta vanhu. (Yohane 4:24; 17:17) Leswi swi katsa ntiyiso malunghana ni moyaxiviri ni ntshembo wo hanya vutomi lebyi nga heriki eparadeyisini laha misaveni. (Pisalema 37:29; Esaya 35:5, 6; Ezekiyele 18:4) Naswona a byi kanakani ku paluxa tidyondzo ta mavunwa ta vukhongeri.—Matewu 15:9; 23:27, 28.

  2. Vukhongeri bya ntiyiso byi pfuna vanhu leswaku va tiva Xikwembu, ku katsa ni ku va dyondzisa vito ra xona, ku nga Yehovha. (Pisalema 83:18; Esaya 42:8; Yohane 17:3, 6) A byi va dyondzisi swona leswaku Xikwembu a xi twisiseki kumbe leswaku xi le kule na vona; kambe byi dyondzisa leswaku xi lava leswaku hi va ni vuxaka na xona.—Yakobo 4:8.

  3. Vukhongeri bya ntiyiso byi paluxa leswaku Xikwembu xi ponisa vanhu hi ku tirhisa Yesu Kreste ntsena. (Mintirho 4:10, 12) Swirho swa byona swi yingisa swileriso swa Yesu swi tlhela swi tikarhatela ku landzela xikombiso xa yena.—Yohane 13:15; 15:14.

  4. Vukhongeri bya ntiyiso byi kandziyisa leswaku Mfumo wa Xikwembu hi wona ntsena lowu nga ta tlhantlha swiphiqo swa vanhu. Swirho swa byona swa gingiriteka eku tiviseni vanhu van’wana hi Mfumo wolowo.—Matewu 10:7; 24:14.

  5. Vukhongeri bya ntiyiso byi ni rirhandzu leri nga riki na vutianakanyi. (Yohane 13:35) Byi dyondzisa ku xixima vanhu va tinxaka, mindhavuko, tindzimi ni swiyimo hinkwaswo ni ku va rhandza. (Mintirho 10:34, 35) Hi ku susumetiwa hi rirhandzu, swirho swa byona a swi hlanganyeli etinyimpini.—Mikiya 4:3; 1 Yohane 3:11, 12.

  6. Vukhongeri bya ntiyiso byi hava vafundhisi lava holeriwaka naswona a byi nyiki swirho swa byona swithopo swa vukhongeri.—Matewu 23:8-12; 1 Petro 5:2, 3.

  7. Vukhongeri bya ntiyiso a byi hlanganyeli hilaha ku heleleke eka swa tipolitiki. (Yohane 17:16; 18:36) Hambiswiritano, swirho swa byona swi xixima ni ku tlhela swi yingisa vafumi va le matikweni lawa swi tshamaka eka wona hi ku fambisana ni xileriso xa Bibele lexi nge: “Tlheriselani swilo swa Khezari eka Khezari [leswi yimelaka vulawuri bya tiko], kambe swilo swa Xikwembu eka Xikwembu.”—Marka 12:17; Varhoma 13:1, 2.

  8. Vukhongeri bya ntiyiso i ndlela leyi munhu a faneleke a hanya ha yona, ku nga ri mukhuva wo karhi. Swirho swa byona swi namarhela milawu leyi tlakukeke ya Bibele etimhakeni hinkwato ta vutomi bya swona. (Vaefesa 5:3-5; 1 Yohane 3:18) Ematshan’weni yo va swirho swa byona swi tshama swi tshikilelekile, swi kuma ntsako hi ku gandzela “Xikwembu lexi tsakeke.”—1 Timotiya 1:11.

  9. Lava nga eka vugandzeri bya ntiyiso va ta va vatsongo hi nhlayo. (Matewu 7:13, 14) Hi xitalo swirho swa vukhongeri bya ntiyiso swi tekeriwa ehansi, swa hlekuriwa ni ku xanisiwa hikwalaho ko endla ku rhandza ka Xikwembu.—Matewu 5:10-12.

Vukhongeri bya ntiyiso a byo va ntsena ‘lebyi ndzi vonaka byi lulamile’

Swi ni khombo ku hlawula vukhongeri hi xivangelo xa leswaku bya ku tsakisa ntsena. Bibele yi profete hi nkarhi lowu vanhu a va ta “tihlengeletela vadyondzisi [va vukhongeri] leswaku tindleve ta vona ti ta nyangalatiwa.” (2 Timotiya 4:3) Ku hambana ni sweswo, Bibele yi hi khutaza ku landzela “vugandzeri lebyi baseke ni lebyi nga nyamangiki hi ku ya hi langutelo ra Xikwembu tlhelo Tata wa hina,” hambiloko vugandzeri byebyo byi nga rhandziwi hi vanhu vo tala.—Yakobo 1:27; Yohane 15:18, 19.

DYONDZA SWO TALA

SWIVUTISO LESWI HLAMURIWAKA HI BIBELE

I Yini Leswi Nga Ku Pfunaka Ku Twisisa Bibele?

Ku nga khathariseki leswaku u dyondzekile kumbe a wu dyondzekanga, u nga swi kota ku twisisa rungula ra Xikwembu leri nga eka Matsalwa yo Kwetsima.

XIHONDZO XO RINDZA

Ha Yini U Fanele U Kambisisa Vukhongeri?

Loko u ri eka vukhongeri byo karhi, vutomi bya wena ni ntshembo wa wena wa ku ponisiwa swi va swi ri eka vukhongeri byebyo.