Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Xana Ndzi Fanele Ndzi Khongela Eka Vakwetsimi?

Xana Ndzi Fanele Ndzi Khongela Eka Vakwetsimi?

Nhlamulo ya Bibele

E-e. Bibele yi vula leswaku hi fanele hi khongela eka Xikwembu ntsena hi ku tirhisa vito ra Yesu. Yesu u byele vadyondzisiwa vakwe leswi: “N’wina ke, khongelani hi mukhuva lowu, mi ku: ‘Tata wa hina la nge matilweni, vito ra wena a ri hlawuleke.’” (Matewu 6:9, Bibele—Mahungu Lamanene) A nga si tshama a byela vadyondzisiwa vakwe leswaku va khongela eka vakwetsimi, tintsumi kumbe munhu un’wana handle ka Xikwembu.

Yesu u tlhele a byela vadyondzisiwa vakwe leswi: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” (Yohane 14:6, Bibele—Mahungu Lamanene) I Yesu ntsena a nga pfumeleriwa hi Xikwembu leswaku a va muhlanganisi wa hina na xona.—Vaheveru 7:25.

Ku vuriwa yini loko ndzo khongela eka Xikwembu ni le ka vakwetsimi?

Eka yin’wana ya Milawu ya Khume, Xikwembu xi te: “Mina HOSI, Xikwembu xa wena, ndzi Xikwembu xa vukwele.” (Eksoda 20:5 New American Bible, Revised Edition) Xikwembu xi ni “vukwele” hi ndlela yihi? Nhlamuselo ya le hansi ya Bibele leyi vuriwaka New American Bible yi vula leswaku xi “lava leswaku ku gandzeriwa xona ntsena.” Xikwembu xi lava leswaku swiendlo swin’wana ni swin’wana leswi fambisanaka ni vugandzeri—ku katsa ni xikhongelo—swi ya eka xona ntsena.—Esaya 48:11.

Hi ta va hi khungavanyisa Xikwembu loko hi khongela eka munhu un’wana, hambi ku ri eka vakwetsimi kumbe tintsumi to kwetsima. Ntsumi yin’wana yi arise muapostola Yohane leswaku a yi gandzela, yi ku: “Tivonele! U nga endli sweswo! Mina ndzo va hlonga-kuloni swin’we ni vamakwenu lava nga ni ntirho wa ku nyikela vumbhoni hi Yesu. Gandzela Xikwembu.”—Nhlavutelo 19:10, Bibele—Mahungu Lamanene.

 

DYONDZA SWO TALA

XALAMUKA!

Xana Swi Fanerile Ku Khongela Eka Vakwetsimi?

Xana swi fanerile ku khongela eka vakwetsimi leswaku va hi vulavulela na Xikwembu? Xiya leswi Bibele yi swi vulaka.