Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Masungulo Ya Halloween—Xana Bibele Yi Ri Yini Hi Wona?

Masungulo Ya Halloween—Xana Bibele Yi Ri Yini Hi Wona?

Nhlamulo ya Bibele

Bibele a yi yi boxi Halloween. Kambe, masungulo ya khale ya Halloween ni ya sweswi ma kombisa leswaku minkhuvo leyi yi huma eka tidyondzo ta mavunwa malunghana ni lava feke ni mimoya leyi nga vonakiki kumbe madimona.—Hlaya “Matimu ni mikhuva ya Halloween.”

Bibele yi lemukisa yi ku: “Ku nga tshuki ku kumiwa eka wena munhu un’wana ni un’wana la . . . loyaka van’wana kumbe un’wana ni un’wana la vutisaka mungoma kumbe muvhumbhi lonkulu wa swiendlakalo kumbe un’wana ni un’wana la vutisisaka lava feke.” (Deteronoma 18:10-12) Hambileswi van’wana va tekaka Halloween yi nga ri na khombo, Bibele yi kombisa leswaku mikhuva leyi fambisanaka na yona yi ni khombo. Eka 1 Vakorinto 10:20, 21, Bibele yi ri: “A ndzi lavi leswaku mi va lava hlanganyelaka ni madimona. A mi nge nwi xinwelo xa Yehovha swin’we ni xinwelo xa madimona.”

Matimu ni mikhuva ya Halloween

  1. Samhain: Buku leyi nge The World Book Encyclopedia yi vula leswaku masungulo ya Halloween ma nga kumiwa eka “nkhuvo lowu wa khale wa vuhedeni lowu a wu tlangeriwa hi vanhu va Macelt eka malembe yo tlula 2 000 lama hundzeke. Macelt ma pfumela leswaku lava feke va nga famba exikarhi ka lava hanyaka. Hi nkarhi wa Samhain, lava hanyaka va nga endzeriwa hi lava feke.” Kambe, Bibele yi dyondzisa leswaku lava feke “a va tivi nchumu nikatsongo.” (Eklesiasta 9:5) Hikokwalaho a va nge swi koti ku vulavula ni lava hanyaka.

  2. Swiambalo swa Halloween ni swiwitsi: Hi ku ya hi buku leyi nge, Halloween—An American Holiday, An American History, Macelt man’wana a ma ambala swiambalo swa mikhuva ya wona leswaku mimoya leyi tsendzelekaka yi ta ka yi nga va tivi kutani yi va sukela. Van’wana a va yi nyika swiwitsi leswaku va ta yi tsakisa. Hi malembe ya le xikarhi eYuropa, mufundhisi wa Khatoliki u tekelele mikhuva ya vuhedeni bya kwalaho naswona u endle leswaku valandzeri va yena va famba hi yindlu ni yindlu va ambale swiambalo swa mikhuva ya vona va kombela tinyiko. Kambe Bibele a yi pfumelelani na swona ku hlanganisiwa ka mikhuva ya vukhongeri bya mavunwa ni vugandzeri bya Xikwembu.—2 Vakorinto 6:17.

  3. Swipuku, swin’wanakaji ni valoyi: I khale swilo leswi swi fambisana ni moya wo biha wa misava. (Halloween Trivia) Bibele yi swi veka erivaleni leswaku hi fanele hi papalata nkucetelo wa mimoya yo biha, hambi ku ri ku tlangela na yona.—Vaefesa 6:12.

  4. Makwembe ya Halloween: Hi malembe ya le xikarhi eBritain, “vakomberi a va famba hi yindlu ni yindlu va kombela swakudya loko va nyikiwile a va khongela eka vafi,” naswona a va va va khome “mbhandzu wa thenipi lowu susiweke swa le ndzheni, ivi ku nghenisiwa makhandlela lama lumekiweke leswaku ma humesa mimoya leyi phasiweke epagatori.” (Halloween—From Pagan Ritual to Party Night) Van’wana va vula leswaku timboni a ti tirhiseriwa ku hlongola mimoya yo biha. Hi va-1800 eNorth America, makwembe ma sive thenipi hikuva a ma tele naswona a ma olova ku susa leswi nga endzeni ni ku makovotla. Tidyondzo leti kuceteriwaka hi mukhuva lowu to tanihi, ku nga fi ka moya-xiviri, pagatori ni ku khongela lava feke, a ti sekeriwanga eBibeleni.—Ezekiyele 18:4.

 

DYONDZA SWO TALA

Ntiyiso Malunghana Ni Nkhuvo Wa Halloween

Tiva masungulo yo biha ya Halloween ni minkhuvo yo fana na yona.

Xana Hi Fanele Hi Tlangela Tiholideyi?

Hi wahi masungulo ya tiholideyi to tala leti tolovelekeke ta laha u tshamaka kona? Nhlamulo ya kona yi nga ha ku hlamarisa.