Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

I Yini Xidyoho?

I Yini Xidyoho?

Nhlamulo ya Bibele

Xidyoho i xiendlo xin’wana ni xin’wana kumbe mianakanyo leyi lwisanaka ni milawu ya Xikwembu. Xi katsa ku tlula milawu ya Xikwembu hi ku endla leswi nga riki swinene emahlweni ka xona. (1 Yohane 3:4; 5:17) Nakambe Bibele yi hlamusela swidyoho tanihi ku tsandzeka ku endla leswi nga swinene.Yakobo 4:17.

EBibeleni, rito xidyoho ri hlamuseriwa tanihi “ku hupa” kumbe ku ba etlhelo. Hi xikombiso, ntlawa wa masocha ya le Israyele wa khale a ma ri ni vutshila bya ku hoxa maribye hi xipelupelu lerova ‘a ma nga hupi.’ Loko xiga xexo xi hundzuluxeriwa hi ku kongoma xi nga vula “ku nga dyohi.” (Vaavanyisi 20:16) Hikokwalaho, ku dyoha i ku tsandzeka ku landzela milawu leyi hetisekeke ya Xikwembu.

Tanihi Muvumbi, Xikwembu xi ni mfanelo ya ku vekela vanhu milawu. (Nhlavutelo 4:11) Hi ta tihlamulela eka xona hikwalaho ka swiendlo swa hina.Varhoma 14:12.

Xana swa koteka ku papalata ku dyoha hi ku helela?

Doo! Bibele yi vula leswaku “hinkwavo va dyohile, naswona va kayivela ku vangama ka Xikwembu.” (Varhoma 3:23; 1 Tihosi 8:46; Eklesiasta 7:20; 1 Yohane 1:8) Ha yini swi ri tano?

Vanhu vo sungula, Adamu na Evha, a va nga ri na xidyoho eku sunguleni. Sweswo swi vangiwe hileswi va vumbiweke va hetisekile, hi xifaniso xa Xikwembu. (Genesa 1:27) Hambiswiritano, a va xi yingisanga Xikwembu kutani va ve lava nga hetisekangiki. (Genesa 3:5, 6, 17-19) Loko va va ni vana, va hundzisele xidyoho ni ku nga hetiseki eka vona. (Varhoma 5:12) Hilaha Hosi Davhida wa le Israyele a vuleke hakona, “Ndzi velekiwe ndzi ri ni xidyoho.”Pisalema 51:5.

Xana swidyoho swa ringana?

Doo! Hi xikombiso, Bibele yi vula leswaku vanhu va le Sodoma wa khale a va “bihile” naswona a va endla ‘swidyoho leswikulu.’ (Genesa 13:13; 18:20) Xiya swilo swinharhu leswi kombisaka ntikelo wa xidyoho.

  1. Muxaka wa xidyoho. Bibele yi hi lemukisa leswaku hi papalata swidyoho leswikulu swo tanihi ku tikhoma loko biha ka rimbewu, ku gandzela swifaniso, ku yiva, vudakwa, ku dyelela van’wana ni vungoma. (1 Vakorinto 6:9-11; Nhlavutelo 21:8) Bibele yi hambanisa swidyoho sweswo ni swidyoho swo tanihi ku vulavula handle ko anakanya ni ku dyoha u nga tiyimiselanga, ku nga ha va hi marito kumbe hi swiendlo leswi nga vavisaka van’wana. (Swivuriso 12:18; Vaefesa 4:31, 32) Hambiswiritano, Bibele yi hi khutaza leswaku hi nga xi tekeli ehansi xidyoho xin’wana ni xin’wana, hikuva swi nga endla leswaku hi lwisana ni milawu ya Xikwembu.Matewu 5:27, 28.

  2. Ku dyoha hi vomu. Swidyoho swin’wana swi vangiwa hikwalaho ko honisa milawu ya Xikwembu. (Mintirho 17:30; 1 Timotiya 1:13) Bibele yi hambanisa swidyoho leswi eka swidyoho leswi katsaka ku tlula milawu ya Xikwembu hi vomu. (Tinhlayo 15:30, 31) Munhu u dyoha hi vomu hikwalaho “mbilu yakwe yo biha.”Yeremiya 16:12.

  3. Ku dyoha hi ku phindhaphindha. Nakambe Bibele yi kombisa ku hambana eka ku dyoha kan’we ni ku dyoha hi ku phindhaphindha ku ringana nkarhi wo leha. (1 Yohane 3:4-8) Lava endlaka “xidyoho hi vomu,” endzhaku ko dyondza ku endla leswi nga swinene, Xikwembu xi ta va avanyisa.Vaheveru 10:26, 27.

Lava nga ni nandzu wa xidyoho va nga tikeriwa hi swidyoho swa vona. Hi xikombiso, Hosi Davhida u tsale a ku: “Swidyoho swa mina swi hundze nhloko ya mina; swa ndzi tikela ku fana ni ndzhwalo wo tika.” (Pisalema 38:4) Kambe Bibele yi nyikela ntshembo lowu: “Lowo homboloka a a siye ndlela yakwe, ni munhu wo biha a siya miehleketo yakwe; a a tlhelele eka Yehovha, loyi a nga ta n’wi komba tintswalo, ni le ka Xikwembu xa hina, hikuva xi ta rivalela hi ndlela leyikulu.”Esaya 55:7.

DYONDZA SWO TALA

U Nga Swi Kota Ku Hlula Ndzingo!

Magoza manharhu lama nga ku pfunaka ku hlula ndzingo.

Xana Xikwembu Xi Ta Ndzi Pfuna Loko Ndzi Khongela?

Xana Xikwembu xa khathala hi swiphiqo swa hina?

Milawu Ya Xikwembu Yi Hi Pfuna Njhani?

Yesu u hlamusele leswaku ha yini hi lava nkongomiso ni leswaku hi yihi milawu ya Bibele leyi nga ya nkoka.