Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

Xana Ndzi Fanele Ndzi Tshika Xikolo?

Xana Ndzi Fanele Ndzi Tshika Xikolo?

Leswi u faneleke u anakanyisisa ha swona

Nawu wa le tikweni ra ka n’wina wu lava leswaku u fika eka ntangha yihi exikolweni? Xana se u fikile eka ntangha yoleyo? Loko u honisa ndzayo ya Bibele ya ku “[tiveka] ehansi ka valawuri lava tlakukeke,” ivi u tshika xikolo u nga si fika eka ntangha yoleyo, swi ta vula leswaku u lan’wa xikolo.—Varhoma 13:1.

Xana u ti fikelerile tipakani ta wena ta dyondzo? Hi tihi tipakani leti u lavaka leswaku dyondzo ya wena yi ku pfuna ku ti fikelela? Xana a wu ti tivi? U fanele u ti tiva. Loko swi nga ri tano, u fana ni munhu la khandziyeke xitimela la nga ku tiviki laha a lavaka ku ya kona. Kutani tshama ni vatswari va wena ivi mi vulavula hi nhloko-mhaka leyi nga laha hansi leyi nge “Tipakani Ta Mina Ta Dyondzo.” Loko wo tshika xikolo u nga si fikelela tipakani ta dyondzo leti wena ni vatswari va wena mi pfumelelaneke ha tona, swi ta vula leswaku u lan’wa xikolo.

Ku tshika xikolo swi fana ni ku tlula exitimeleni u nga si fika laha u yaka kona

Ha yini u lava ku tshika? U nga ha va u lava ku khathalela ndyangu wa ka n’wina kumbe ku nghenela ntirho wa ku tirhandzela. Kasi swivangelo swa vutianakanyi swi nga ha va ku balekela ku tsala swikambelo kumbe ntirho-kaya. Ntlhontlho wa kona i ku kumisisa xivangelo-nkulu lexi ku tshikisaka xikolo nileswaku xa twala kumbe i xa vutianakanyi. Loko u tshika xikolo hi xikongomelo xo balekela swiphiqo ntsena, u ta tisola.

Ku tshika xikolo swi fana ni ku tlula exitimeleni u nga si fika laha u yaka kona. Swi nga ha endleka u nga tshamanga kahle exitimeleni naswona vakhandziyi va kona va nga ri na musa, kambe loko u tlula exitimeleni, a wu nge fiki laha u yaka kona naswona u nga ha vaviseka swinene. Hilaha ku fanaka, loko u tshika xikolo, swi nga ha ku tikela ku kuma ntirho. Nakambe loko wo wu kuma swi nga ha endleka wu ku hakela mali yitsongo ku tlula lowu a wu ta wu kuma loko a wu lo heta xikolo.

Ematshan’weni yo tshika xikolo, lehisa mbilu u kuma ndlela yo langutana ni swiphiqo swa le xikolweni. Loko u endla tano, u ta dyondza ku tiyisela naswona u ta lunghekela swiyimo leswi fanaka loko se u tirha.

Tipakani Ta Mina Ta Dyondzo

Xikongomelo-nkulu xa dyondzo i ku ku hlomisela ku kuma ntirho lowu nga ta ku pfuna leswaku u tikhathalela ni ku wundla ndyangu lowu u nga ha vaka na wona. (2 Vatesalonika 3:10, 12) Xana se u wu hlawurile ntirho lowu u wu lavaka ni ndlela leyi xikolo xi nga ku pfunaka ha yona leswaku u lunghekela ntirho wolowo? Leswaku u kota ku vona loko dyondzo ya wena yi ku kongomisa entirhweni lowu u wu lavaka, hlamula swivutiso leswi landzelaka:

  • Hi byihi vuswikoti lebyi ndzi nga na byona? (Hi xikombiso, xana wa swi kota ku tirhisana ni vanhu van’wana? Xana wa swi rhandza ku endla mintirho ya mavoko, ku endla swilo kumbe ku swi lunghisa? Xana wa swi kota ku kumisisa swiphiqo ni ku swi tlhantlha?)

  • Hi yihi mintirho leyi nga ndzi pfunaka ku tirhisa vuswikoti bya mina?

  • Hi yihi mintirho leyi nga kona endhawini ya ka hina?

  • Hi tihi tidyondzo leti ndzi ti dyondzaka sweswi leti ndzi hlomiselaka ku kuma ntirho?

  • Hi tihi tidyondzo leti ndzi nga ti hlawulaka sweswi leti nga ndzi pfunaka leswaku ndzi fikelela tipakani ta mina hi ku olova?

Tsundzuka leswaku pakani ya wena i ku heta xikolo u ri ni dyondzo leyi u nga yi tirhisaka. Kutani u nga hlawuli tidyondzo leti tikaka swinene leti u nga ta ka u nga ti heti, xisweswo u va xichudeni lexi “nga chikiki exitimeleni” leswaku xi balekela ku byarha vutihlamuleri bya ku va munhu lonkulu.

 

DYONDZA SWO TALA

Swivutiso Leswi Vantshwa Va Swi Vutisaka, Vholumo 1

Mhaka ya byala ni swidzidziharisi, ku tikhoma lokunene hi tlhelo ra rimbewu ni ku rhandzana, swi katsiwile.