Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

VANTSHWA VA VUTISA

I Yini Leswi Ndzi Faneleke Ndzi Swi Tiva Hi Ku Rhumela Ti-SMS?

I Yini Leswi Ndzi Faneleke Ndzi Swi Tiva Hi Ku Rhumela Ti-SMS?
  • :-) Ku rhumela ti-SMS ku nga va ndlela leyinene yo burisana ni vanghana loko ntsena swi endliwa hi ndlela leyinene.

  • :-( Loko swi nga tirhisiwi hi ndlela leyinene, swi nga onha vuxaka bya wena ni van’wana—swin’we ni ndhuma ya wena.

 Lava u va rhumelaka ti-SMS

Vantshwa vo tala va teka ku rhumelelana ti-SMS tanihi ndlela ya nkoka yo vulavurisana ni van’wana. Ku rhumela ti-SMS swi endla leswaku u kota ku vulavurisana ni munhu un’wana ni un’wana loyi u nga ni nomboro ya yena—handle ka loko vatswari va wena va nga ku pfumeleli.

“Tatana a nga swi lavi leswaku mina ni ndzisana ya mina hi vulavula ni vafana. Loko hi vulavula na vona, hi fanele hi tirhisa riqingho ra le ndlwini, ekamareni ro dyela naswona loko ku ri ni vanhu van’wana.”—Lenore.

Leswi u faneleke u swi tiva: Loko u nyika un’wana ni un’wana nomboro ya wena, u ta tinghenisa ekhombyeni.

“Loko u nga ri na mhaka leswaku nomboro ya wena u yi nyika mani, u nga ha rhumeleriwa ti-SMS kumbe swifaniso leswi u nga swi laviki.”—Scott.

“Loko nkarhi na nkarhi u rhumela munhu wa rimbewu rin’wana ti-SMS, hi ku hatlisa u nga tikuma se u n’wi rhandza.”—Steven.

Bibele yi ri: U tlharihile la voneke khombo kutani a tumbela.” (Swivuriso 22:3) Loko u va ni vuxiyaxiya, u nga ha papalata makhombo yo tala.

Mhaka ya xiviri: Mina ni jaha rin’wana a hi ri vanghana naswona a hi tshamela ku rhumelelana ti-SMS. A ndzi tibyela leswaku a hi ri vanghana ntsena. A ndzi nga swi voni swi hoxile ku fikela loko a ndzi byela leswaku wa ndzi rhandza. Ndzi sungule ku swi vona leswaku a ndzi nga fanelanga ndzi dzumba na yena ni ku n’wi rhumelela ti-SMS hilaha a ndzi endla hakona.”—Melinda.

Ehleketisisa ha yona. Xana u ehleketa leswaku vunghana bya Melinda ni jaha leri byi khumbeke njhani loko ri vule ndlela leyi ri titwaka ha yona?

Tlhela u ehleketisisa ha yona: I yini leswi Melinda a a ta swi endla leswaku yena ni jaha leri va va vanghana ntsena ku nga ri na swin’wana?

 Leswi u swi rhumelaka eka ti-SMS

Swa olova ku rhumela ti-SMS naswona swa tsakisa ku rhumeriwa tona—kambe u nga rivali leswaku vanhu va nga ha twisisa leswi u swi tsaleke hi ndlela leyi hoxeke.

Leswi u faneleke u swi tiva: Leswi u swi tsaleke swi nga ha twisisiwa hi ndlela leyi hoxeke.

“Loko u tsaleriwe SMS a wu nge swi koti ku twa ndlela leyi munhu wa kona a titwaka ha yona, rito ra yena ni ku vona ndlela leyi munhu wa kona a a languteka ha yona loko a tsala. Swi nga ha vanga ku nga twisisani.”—Briana.

“Ndzi tiva vanhwanyana lava tionheke vito naswona va dumeke hi ku tlanga hi rirhandzu hikwalaho ka ti-SMS leti va ti rhumeleke majaha.”—Laura.

Bibele yi ri: Munhu wo lulama, u sungula a ehleketa a nga si hlamula.” (Swivuriso 15:28, Bibele—Mahungu Lamanene) Hi dyondza yini? Tlhela u hlaya SMS ya wena u nga si yi rhumela.

 Nkarhi lowu u rhumelaka ti-SMS ha wona

Wena n’wini u nga tivekela swipimelo malunghana ni ku rhumela ti-SMS.

Leswi u faneleke u swi tiva: Loko u nga yi xalamukeli ndlela leyi u rhumelaka ti-SMS ha yona, u nga ha vonaka u delela naswona u hetelela u nga ha ri na vanghana.

“Swa olova ku rivala swipimelo leswi u tivekeleke swona emhakeni yo rhumela ti-SMS. Ndzi tikuma ndzi ri eku rhumeleni ka ti-SMS loko ndzi ri karhi ndzi vulavula ni munhu kumbe loko hi tshamile etafuleni hi ri eku dyeni.”—Allison.

“Swi ni khombo swinene ku rhumela SMS u ri eku chayeleni. Loko u chayela u nga langutanga laha u yaka kona, u nga ha tlumba.”—Anne.

Bibele yi ri: Xin’wana ni xin’wana xi ni nkarhi wa xona lowu vekiweke, . . . nkarhi wa ku miyela ni nkarhi wa ku vulavula.” (Eklesiasta 3:1, 7) Xitsundzuxo lexi xa tirha ni le mhakeni yo rhumela ti-SMS.

 Switsundzuxo malunghana ni ku rhumela ti-SMS

Lava u va rhumelaka ti-SMS

  • ;-) Yingisa nkongomiso wa vatswari va wena.—Vakolosa 3:20.

  • ;-) U nga nyiki un’wana ni un’wana nomboro ya wena. Loko hi vutlhari u ala ku nyika vanhu rungula ra wena ra xihundla—ku katsa ni nomboro ya wena ya riqingho—u hlakulela vuswikoti lebyi nga ta ku pfuna loko se u kurile.

  • ;-) U nga tolovele munhu ku tlula mpimo hi ku n’wi rhumela ti-SMS to tlanga hi rirhandzu. Loko u titwa se u sungula ku n’wi rhandza, swi tive leswaku u tivangela swiphiqo ni ku pfilunganyeka.

“Ndzi tiendlele vito lerinene eka vatswari va mina emhakeni yo tirhisa selfoni ya mina, hikwalaho va ndzi tshemba leswaku ndzi ta tirhisa vutlhari loko ndzi teka tinomboro ta vanhu leti ndzi nga ta ti hlayisa eka selfoni ya mina.”—Briana.

Leswi u swi rhumelaka eka ti-SMS

  • ;-) Loko u nga si sungula ku tsala SMS, tivutise, ‘Xana swi kahle ku vulavula hi mhaka leyi ni munhu loyi hi ku tsala SMS?’ Swi nga endleka swi antswa ku n’wi fonela kunene kumbe ku rindza leswaku u vulavula na yena mi langutanile.

  • ;-) U nga rhumeli swilo leswi a wu nga ta swi vula loko a wu ri ni munhu wa kona. Sarah loyi a nga ni malembe ya 23 u ri, “Loko mhaka ya kona a wu nga ta n’wi byela u n’wi langutile, u nga n’wi rhumeli yona hi SMS.

“Loko munhu a ku rhumela swifaniso leswi nga basangiki, byela vatswari va wena. Sweswo swi ta ku sirhelela naswona swi ta endla leswaku vatswari va wena va ku tshemba.”—Sirvan.

Nkarhi lowu u rhumelaka ti-SMS ha wona

  • ;-) Tivekele swipimelo swa leswaku a wu nge yi tirhisi selfoni ya wena hi nkarhi wo karhi. Nhwanyana la vuriwaka Olivia u ri: “Selfoni ya mina a ndzi yi tirhisi loko hi tshamile etafuleni hi ri eku dyeni kumbe loko ndzi ri eku hlayeni. Ndza yi tima hi nkarhi wa minhlangano ya Vukreste leswaku ndzi nga ringeki ku yi tirhisa.

  • ;-) Anakanyela van’wana. (Vafilipiya 2:4) U nga rhumeli ti-SMS loko u ri eku vulavuleni ni munhu.

“Ndzi tivekele swipimelo swa leswaku a ndzi nge rhumeli vanhu ti-SMS loko ndzi ri ni vanghana va mina handle ka loko swi boha. Nakambe vanhu lava ndzi nga va tolovelangiki, a ndzi va nyiki nomboro ya mina.”—Janelly.

 

DYONDZA SWO TALA

VANTSHWA

Swivutiso Leswi Vantshwa Va Swi Vutisaka, Vholumo 1

Mhaka ya byala ni swidzidziharisi, ku tikhoma lokunene hi tlhelo ra rimbewu ni ku rhandzana, swi katsiwile.