Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

VANTSHWA VA VUTISA

Ndzi Nga Swi Papalata Njhani Ku Nyuhela Ngopfu?

Ndzi Nga Swi Papalata Njhani Ku Nyuhela Ngopfu?

Bibele yi khutaza ku “ringanisela emikhuveni.” (1 Timotiya 3:2) Sweswo swi katsa ndlela leyi u dyaka ha yona. Ha yini u nga ringeti ku endla leswi landzelaka?

Yingisa khwiri ra wena. Julia wa malembe ya 19 u ri: “A ndzi hamba ndzi hlayela leswaku swakudya leswi ndzi swi dyaka swi ta ndzi nyika matimba yo tanihi kwihi, kambe sweswi ndzi tshika ku dya loko se ndzi xurhe.

Papalata swakudya leswi nga riki na rihanyo. Peter wa malembe ya 21 u ri: “Hi n’hweti yin’we ntsena ndzi hungute miri hi tikhilogiramu ta ntlhanu hileswi ndzi tshikeke ku nwa khodirinki!

Papalata ku dya ngopfu. Erin wa malembe ya 19 u te: “Ndzi ringeta ku nga kombeli ku tlhela ndzi phameriwa loko ndzi hete swakudya leswo sungula.

Leswi Nga Ku Pfunaka: U nga tshiki ku dya swakudya hi nkarhi lowu ku faneleke ku dyiwa ha wona! Loko u nga dyi, u ta khomiwa hi ndlala swinene naswona u ta ringeka kutani u dya ku tlula mpimo.

I ntiyiso leswaku vanhu van’wana lava nge, “Ndzi fanele ndzi hunguta miri,” va ehleketa leswaku va nyuherile kambe swi nga ri tano. Va va va ri kahle. Kambe, xana ku vuriwa yini loko u lava ku hunguta miri? Vona leswi pfuneke nhwanyana la vuriwaka Catherine.

“Loko ndzi ri emalembeni ya kondlo-a-ndzi-dyi a ndzi nyuhele ku tlula mpimo, ku nga nchumu lowu a ndzi nga wu lavi nikatsongo. A yi nga ndzi tsakisi nikatsongo ndlela leyi a ndzi languteka ni ku titwa ha yona!

“Nkarhi na nkarhi a ndzi ringeta ku hunguta miri hi ku dya swakudya swo karhi swo hlawuleka kambe minkarhi hinkwayo a ndzi tlhela ndzi nyuhela. Kutani loko ndzi ri ni malembe ya 15, ndzi endle xiboho xa leswaku a ndzi nga ha lavi ku nyuhela naswona a ndzi fanele ndzi endla mindzulamiso yo karhi evuton’wini bya mina. A ndzi lava ku hunguta miri hi ndlela leyi faneleke—leyi a yi ta ndzi pfuna leswaku ndzi nga ha tlheli ndzi nyuhela vutomi bya mina hinkwabyo.

“Ndzi xave buku leyi vulavulaka hi swakudya leswinene ni tindlela letinene to endla vutiolori, naswona ndzi swi tirhisile leswi a ndzi swi hlaya eka yona. A ndzi tiyimiserile leswaku hambiloko ndzo tshika ku dya swakudya leswinene ni ku endla vutiolori ku ringana nkarhinyana, a ndzi nga ta hela matimba.

“Xana wa swi tiva leswaku ku humelele yini? Leswi ndzi swi hlayeke swi tirhile! Ku nga si hela lembe, ndzi hungute miri hi tikhilogiramu ta kwalomu ka 27. Se ndzi ni malembe mambirhi ndzi nga si tlhela ndzi nyuhela. A ndzi nga tshembi nikatsongo leswaku ndzi nga swi kota!

“Ndzi ehleketa leswaku leswi ndzi pfuneke hileswi ndzi nga dyangiki ntsena swakudya leswinene—kambe ndzi cinceke ni ndlela leyi a ndzi hanya ha yona.”—Catherine, la nga ni malembe ya 18.

 

DYONDZA SWO TALA

XALAMUKA!

Ku Hlula Xiphiqo Xa Ku Nyuhela Ka Vantshwa

Twana ndlela leyi munhu un’wana loyi a a rhandza ku dya swakudya leswi nga riki na rihanyo a cinceke madyelo yakwe ha yona.