Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

Ndzi Nga Tirhisana Njhani Ni Mudyondzisi Wa Mina?

Ndzi Nga Tirhisana Njhani Ni Mudyondzisi Wa Mina?

Yimanyana, u ehleketa!

Twana ntokoto wa Rachel. Minkarhi hinkwayo loko swikolo swi pfala a a va a pasele ehenhla. Kutani loko a fika eka ntangha ya ntlhanu swilo swi cincile. Rachel u ri: “Mudyondzisi wa mina u ringete hi matimba ku ndzi feyirisa.” Ha yini? Mudyondzisi yoloye u byele Rachel ni mana wa yena leswaku a a nga byi rhandzi vukhongeri bya vona.

Vadyondzisi va fana ni maribye lama nga ku pfunaka ku tsemakaya ematini kambe wena u fanele u teka gora ro ma khandziya

Ku humelele yini? Rachel u ri: “Nkarhi hinkwawo loko ndzi vona leswaku mudyondzisi wa mina u ndzi feyirise hileswi a ndzi vengaka, Manana a a ya na mina exikolweni leswaku a ya vulavula na yena hi mhaka leyi. Eku heteleleni u tshike ku ndzi tikisela vutomi.

Loko u langutana ni xiphiqo lexi fanaka, vana ni xivindzi xo vulavula ni vatswari va wena ha xona. A swi kanakanisi leswaku va ta tsakela ku vulavurisana ni mudyondzisi wa wena hambi ku ri nhloko ya xikolo leswaku ku tlhantlhiwa xiphiqo xexo.

I ntiyiso leswaku swiphiqo swin’wana leswi u langutanaka na swona exikolweni a swi nge tlhantlhiwi hi ku olova. Minkarhi yin’wana u fanele u tiyisela. (Varhoma 12:17, 18) Tanya u ri: “Un’wana wa vadyondzisi va mina a a nga hi rhandzi hina swichudeni swa yena. A a hi tseketsela a vula leswaku hi swiphukuphuku. Eku sunguleni a ndzi rila, kambe ndzi dyondze ku swi ba hi makatla. Ndzi dzikise mianakanyo ya mina entirhweni wa mina wa xikolo naswona a ndzi tiyimisela etlilasini ya yena. Hikwalaho, a a nga ha ndzi karhati ngopfu naswona a ndzi ri un’wana wa swichudeni swi nga ri swingani leswi paseke kahle. Endzhaku ka malembe mambirhi, mudyondzisi yoloye u hlongoriwile.

Mhaka ya nkoka: Dyondza ku tirhisana ni mudyondzisi la karhataka naswona u ta va ni vutshila bya nkoka evuton’wini—lebyi nga ta ku pfuna loko u ri ni muthori la karhataka. (1 Petro 2:18) U ta tlhela u dyondza ku tlangela vadyondzisi lavanene loko wo tshuka u va na vona.