Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

VANTSHWA VA VUTISA

U Nga Endla Yini Loko U Weriwe Hi Khombo?

U Nga Endla Yini Loko U Weriwe Hi Khombo?

Khombo ri nga wela un’wana ni un’wana. Bibele yi ri: “Lava va nga ni rivilo lerikulu a va hluli emphikizanweni, hambi ku ri lava va nga ni matimba a va hluli enyimpini, . . . xiendlakalo lexi nga languteriwangiki [xa] va wela hinkwavo.” (Eklesiasta 9:11) Sweswo swi katsa ni vantshwa van’wana lava weriweke hi khombo. Va langutane na rona njhani? Xiya swikombiso swimbirhi.

 REBEKAH

Vatswari va mina va dlaye vukati loko ndzi ri ni malembe ya 14.

Ndzi tibyele leswaku vatswari va mina a va nga dlayanga vukati, papa a lava ku va yexe swa xinkarhana. A a n’wi rhandza mhani—a a ta n’wi tshikela yini? Ha yini a a fanele a ndzi sukela?

A swi ndzi tikela ku vulavula hi mhaka leyi. A ndzi nga lavi na ku ehleketa hi yona. Minkarhi yin’wana a ndzi hlundzuka ndzi nga swi xiyanga. Ndzi sungule ku vilela naswona ni vurhongo a byi nga khomi.

Loko ndzi ri ni malembe ya 19, mhani u dlayiwe hi khensa. A a ri munghana wa mina lonkulu. Rifu rakwe ri ndzi hete matimba swinene ku tlula loko vatswari va mina va dlaya vukati. Swa ha ndzi karhata na sweswi. Vurhongo a byi khomi naswona swa ha ndzi vilerisa.

Hambiswiritano, ndzi kume swilo swi nga ri swingani leswi ndzi pfunaka. Hi xikombiso, Swivuriso 18:1 ya hi lemukisa leswaku hi nga tihambanisi ni van’wana, kutani ndzi ringeta ku tirhisa ndzayo yoleyo.

Nakambe, tanihi Mbhoni ya Yehovha, ndzi ringeta ku hlaya minkandziyiso ya hina leyi khutazaka leyi sekeriweke eBibeleni. Lowu ndzi pfuneke ngopfu loko vatswari va mina va dlaya vukati hi lowu nge Swivutiso Leswi Vantshwa Va Swi Vutisaka—Tinhlamulo Leti Tirhaka. Ndzi tsundzuka ndzi hlaya ndzima yin’wana leyi nga ni nhlokomhaka leyi nge “Xana Ndzi Nga Tsaka Hambiloko Ndzi Kurisiwa Hi Mutswari Un’we?” eka Vholumo 2.

Rin’wana ra matsalwa lawa ndzi ma rhandzaka lama ndzi pfunaka ku langutana ni ku vilela i Matewu 6:25-34. Eka ndzimana 27, Yesu u vutise a ku: “I mani eka n’wina loyi a nga engetelaka xisungunu * xin’we eka mpimo wakwe wa vutomi hikwalaho ka ku vilela?”

Swilo swo biha swa hi humelela hinkwerhu, kambe ndzi dyondze eka xikombiso xa mhani leswaku ndlela leyi hi langutanaka ni miringo yoleyo ha yona i ya nkoka. U langutane ni swilo swo tala, swo tanihi ku dlaya vukati ni ku khomiwa hi vuvabyi lebyi nga tshungulekiki, kambe u tshame a a ri ni langutelo lerinene ni ripfumelo leri tiyeke eka Xikwembu ku fikela loko a fa. A ndzi nge pfuki ndzi swi rivarile swilo leswi a ndzi dyondziseke swona hi Yehovha.

Anakanya hi leswi: Ku hlaya Bibele ni minkandziyiso leyi sekeriweke eka yona swi nga ku pfuna njhani ku langutana ni khombo?Pisalema 94:19.

CORDELL

 Loko ndzi ri ni malembe ya 17, ndzi vone loko papa a fa. A ndzi si tshama ndzi humeleriwa hi nchumu wo vava swinene wo fana ni lowu. A ndzi hele matimba.

A ndzi twa onge papa a nga fanga loko ntsumbu wakwe wu funengetiwe hi malakani. Ndzi tibyele ndzi ku, ‘U ta pfuka mundzuku.’ Ndzi titwe ndzi lahlekeriwile.

Mina ni ndyangu wa ka hina hi Timbhoni ta Yehovha naswona vamakwerhu va le vandlheni ra ka hina va hi seketele swinene loko papa a file. Va hi nyike swakudya ni ku tshama na hina nkarhi wo leha. Sweswo swi ndzi endle ndzi kholwa leswaku hakunene Timbhoni ta Yehovha i Vakreste va ntiyiso.Yohane 13:35.

Tsalwa leri ndzi khutazeke swinene i 2 Vakorinto 4:17, 18. Ri ri: “Hambileswi nhlomulo wu nga wa nkarhinyana naswona wu vevukaka, wu hi tisela ku vangama loku nga ni ntikelo lowukulu swinene ni loku nga heriki; hi ri karhi hi veka mahlo ya hina, ku nga ri eka swilo leswi voniwaka, kambe eka swilo leswi nga voniwiki. Hikuva swilo leswi voniwaka i swa nkarhinyana, kambe swilo leswi nga voniwiki i swa hilaha ku nga heriki.”

Ndzimana yo hetelela yi ndzi pfune swinene. Ku xaniseka ka papa a ku ri ka nkarhinyana kambe leswi Xikwembu xi hi tshembisaka swona enkarhini lowu taka i swa hilaha ku nga heriki. Ku fa ka papa ku endle leswaku ndzi anakanyisisa hi ndlela leyi a ndzi hanya ha yona ni ku antswisa tipakani ta mina.

Anakanya hi leswi: Ku weriwa hi khombo swi nga ku pfuna njhani leswaku u kambisisa tipakani ta wena?1 Yohane 2:17.

^ ndzim. 13 Xisungunu xin’we i mpimo lowu ringanaka ni tisentimitara ta kwalomu ka 45 kumbe 0,48 wa timitara.

DYONDZA SWO TALA

Ntshembo Wa Xiviri Hi Varhandziwa Va Wena Lava Feke

Xana u tshame u feriwa hi munhu loyi u n’wi rhandzaka? Xana swa koteka leswaku hi tlhela hi va vona? Dyondza leswi Bibele yi swi vulaka malunghana ni ku pfuxiwa ka vafi.