Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

VANTSHWA VA VUTISA

Ndzi Nga Ku Lawula Njhani Ku Hlundzuka Ka Mina?

Ndzi Nga Ku Lawula Njhani Ku Hlundzuka Ka Mina?

 Tikambele

  • U hlundzuka kangani?

    • a ndzi tali ku hlundzuka

    • minkarhi yin’wana

    • siku ni siku

  • Ku hlundzuka ka wena ku njhani?

    • ndzi hlundzuka katsongo

    • ndzi hlundzuka ngopfu

    • ndzi bava ndzi khalakhasa

  • U tala ku hlundzukela mani?

    • mutswari

    • makwavo

    • munghana

Loko u vona xilaveko xo lawula ku hlundzuka ka wena, xihloko lexi xi ta ku pfuna! Xo sungula, xiya swivangelo leswi endlaka leswaku swi va swa nkoka ku tshama u rhulile loko u hlundzukisiwa.

 Ndlela leyi swi nga swa nkoka ha yona

Rihanyo ra wena. Swivuriso 14:30 yi ri: “Mbilu yo rhula i vutomi bya xivumbiwa xa nyama lexi hanyaka.” Magazini wa Journal of Medicine and Life wu vula leswaku “ku hlundzuka ku nga endla munhu a khomiwa hi vuvabyi bya mbilu.”

Vanghana. Bibele yi ri: “U nga vi nakulobye wa loyi a voyameleke eku hlundzukeni; naswona u nga ngheni ni munhu la karihaka ngopfu.” (Swivuriso 22:24) Loko u tshamela ku hlundzuka, u nga hlamali loko vanhu va nga swi lavi ku tshama na wena. Nhwanyana un’wana la vuriwaka Jasmine u ri: “Loko u nga lawuli ku hlundzuka ka wena, a wu nge vi na vunghana lebyi enerisaka.”

Ndhuma ya wena. Ethan loyi a nga ni malembe ya 17 u ri: “Loko u nga swi koti ku lawula ku hlundzuka ka wena, vanhu va ta swi xiya naswona a va nge vi na langutelo lerinene hi wena.” Kutani tivutise, ‘Xana ndzi lava ku tiviwa tanihi munhu loyi a rhuleke kumbe la tshamelaka ku hlundzuka?’ Bibele yi ri: “Loyi a hlwelaka ku hlundzuka u ni ku twisisa lokukulu, kambe loyi a helaka mbilu u engetela vuphukuphuku.”—Swivuriso 14:29.

A ku na munhu loyi a tsakelaka ku va ni munghana loyi a tshamelaka ku hlundzuka

 Leswi u nga swi endlaka

Xiya matsalwa ni rungula leri landzelaka kutani u tivutisa swivutiso leswi fambisanaka na swona.

  • Swivuriso 29:22: “Munhu la talaka ku hlundzuka u pfuxa mholovo, naswona un’wana ni un’wana la voyameleke evukarhini u wu tlula ngopfu nawu.”

    “Loko ndza ha ri xinhwanyatana, a swi ndzi tikela ku lawula ku hlundzuka ka mina. Maxaka ya le ka va papa ma ni xiphiqo lexi fanaka. Swo va engatini. Swa hi tikela ku lawula ku hlundzuka!”—Kerri.

    Xana ku hlundzuka ka ndzi lawula? Xana swa twala ku vula leswaku ndzi endla matshalatshala hinkwawo leswaku ndzi va ni timfanelo letinene kambe loko swi ta emhakeni yo lawula ku hlundzuka swa ndzi tsandza?

  • Swivuriso 15:1: “Loko nhlamulo yi olova, yi tlherisa vukarhi, kambe rito leri tlhavaka ri pfuxa ku hlundzuka.”

    “Xa nkoka i ku lawula ndlela leyi u titwaka ha yona. Loko u tikarhatela ku va munhu wo rhula ni ku va ni langutelo lerinene, swi ta ku olovela ku lawula ku hlundzuka ka wena.”—Daryl.

    Ndzi ta hlamula njhani loko ndzi hlundzukisiwa?

  • Swivuriso 26:20: “Laha tihunyi ti nga riki kona, ndzilo wa timeka.”

    “Loko ndzi hlamula hi ndlela leyinene, swi endla leswaku munhu un’wana a vohlisa vukarhi kutani hi kota ku vulavula kahle.”—Jasmine.

    Xana marito kumbe swiendlo swa mina swi hlundzukisa van’wana?

  • Swivuriso 22:3: “U tlharihile la voneke khombo kutani a tumbela, kambe la nga riki na ntokoto u ye emahlweni kutani u fanele a xupuriwa.”

    “Minkarhi yin’wana ndzi lava ku ya beriwa hi moya, ndzi ehleketisisa hi leswi humeleleke kutani loko se ndzi rhulile ndzi swi lunghisa.”—Gary.

    Hi loko swi te yini laha u nga fambaka u ya beriwa hi moya handle ko va loyi u tlulaneke na yena milenge a anakanya leswaku wa n’wi papalata?

  • Yakobo 3:2: “Hinkwerhu ha khunguvanyeka minkarhi yo tala.”

    “Hi fanele hi tisola hi swihoxo swa hina kambe hi tlhela hi dyondza eka swona. Hi fanele hi lulamisa swihoxo swa hina hi ku hatlisa naswona hi tiyimisela ku endla leswinene enkarhini lowu taka.”—Kerri.

Xiringanyeto: Tivekele pakani. Endla xiboho xo tshama u rhulile ku ringana nkarhi wo karhi—kumbexana n’hweti. Kambela nhluvuko lowu u wu endlaka u tlhela u wu tsala ehansi.

DYONDZA SWO TALA

XALAMUKA!

Ndlela Yo Lawula Ku Hlundzuka Ka Wena

Magoza ya Ntlhanu lama sekeriweke eBibeleni lama nga ku pfunaka ku lawula ku hlundzuka ka wena.

XIHONDZO XO RINDZA

“Ku Twisisa Ka Munhu Ku Vohlisa Ku Hlundzuka Kakwe”

Leswi endlekeke evuton’wini bya Davhida hosi ya Israyele, swi nga ku pfuna leswaku u kota ku lawula vukarhi loko u hlundzukisiwile.

SWIVUTISO LESWI HLAMURIWAKA HI BIBELE

Xana Xikwembu Xi Ta Ndzi Pfuna Loko Ndzi Khongela?

Xana Xikwembu xa khathala hi swiphiqo swa hina?