Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

VANTSHWA VA VUTISA

Ndzi Nga Langutana Njhani Ni Ku Vilela?

Ndzi Nga Langutana Njhani Ni Ku Vilela?

 U vilerisiwa hi yini?

Xana rungula leri landzelaka ri hlamusela ndlela leyi u titwaka ha yona minkarhi yin’wana?

“Ndzi tshamela ku tivutisa leswaku: ‘Loko ho tshuka hi humeleriwa hi swo karhi ke . . . ?’ ‘Loko ho tshuka hi humeleriwa hi mhangu ya movha ke?’ ‘Loko ho tshuka hi wa hi xihahampfhuka ke?’ Ndzi vilerisiwa hi swilo leswi vanhu van’wana va nga ta ka va nga vileli ha swona.”—Charles.

“Ndzi tshamela ku vilela hi swilo leswi nga pfuniki nchumu. Ndzi tirha hi matimba kambe a ku na vuyelo lebyi ndzi byi kumaka.”—Anna.

“Loko vanhu va ndzi byela leswaku ndzi na nkateko leswi ndza ha riki exikolweni, ndzi tibyela leswaku, ‘Loko a vo swi tiva leswaku xikolo xi ni ntshikilelo wo tanihi hi kwihi a va nga ta vula sweswo!’”—Daniel.

“Ndzi tshama ndzi tshikilelekile. Ndzi tshamela ku vilela hi leswi nga ta endleka kumbe hi leswi ndzi faneleke ndzi swi endla.”—Laura.

Ntiyiso wa mhaka: Hi hanya eminkarhini leyi Bibele yi vulaka leswaku i “minkarhi ya mangava leyi swi nonon’hwaka ku langutana na yona.” (2 Timotiya 3:1) Hikwalaho ka sweswo, ku vilela swi nga karhata vantshwa hilaha swi karhataka vanhu lavakulu hakona.

 Xana ku vilela swi bihile?

Doo! Kahlekahle, Bibele yi vula leswaku i swinene leswaku vanhu va vilela hi ndlela leyi va nga ta tsakisaka lava va va rhandzaka.—1 Vakorinto 7:32-34; 2 Vakorinto 11:28.

Ntiyiso wa mhaka hi leswaku ku vilela swi nga ku khutaza. Hi xikombiso, a hi nge u ya tsala xikambelo vhiki leri taka. Ku vilela swi nga ku susumetela leswaku u hlaya vhiki leri naswona sweswo swi nga ku pfuna leswaku u pasa kahle!

Ku vilela swi nga ha tlhela swi ku lemukisa hi khombo. Nhwanyana la vuriwaka Serena u ri: “U nga ha vilela loko u endla swilo swo biha naswona i xilemukiso xa leswaku u fanele u swi tshika leswaku ripfalo ra wena ri nga ku karhati.”—Ringanisa Yakobo 5:14.

Ntiyiso wa mhaka: Ku vilela swi nga ku vuyerisa—ntsena loko swi ku susumetela ku endla swilo leswinene.

Kambe ku vuriwa yini loko ku vilela swi ku endla u anakanya swilo leswi nga riki swinene?

Ku vilela swi nga ku endla u vona onge a wu na ndlela yo huma, kambe munhu loyi a nga ni vonelo lerinene a nga ku pfuna leswaku u kuma ndlela yo huma

Hi xikombiso: Richard wa malembe ya 19 u te: “Ndza vilela loko ndzi anakanya hi tindlela leti xiyimo lexi tshikilelaka xi nga endlekaka ha yona. Ndzi anakanya hi xiyimo xexo hi ku phindhaphindha ku fikela laha ndzi vilelaka ngopfu.”

Bibele yi ri: “Mbilu yo rhula i vutomi bya xivumbiwa xa nyama.” (Swivuriso 14:30) Hi hala tlhelo, ku vilela swi nga ha ku vangela mavabyi, yo tanihi ku pandza hi nhloko, sululwana, ku vava ka khwiri ni mbilu leyi baka hi ku hatlisa.

U nga endla yini loko ku vilela swi nga ku pfuni?

 Leswi u nga swi endlaka

  • Tivutise leswaku ha yini u vilela. “A swi hoxanga ku vilela hi vutihlamuleri bya wena kambe ku vilela ngopfu a swi nge ku vuyerisi. Swi ndzi tsundzuxa marito lama nge, Ku vilela swi fana ni ku rimela endzhaku. Swi ku endla u anakanya ngopfu kambe a swi ku pfuni hi nchumu.”—Katherine.

    Bibele yi ri: “I mani eka n’wina loyi a nga engetelaka xisungunu xin’we eka mpimo wakwe wa vutomi hikwalaho ka ku vilela?”—Matewu 6:27.

    Leswi swi vulaka swona: Loko ku vilela ku nga ku pfuni, ku nga ku vangela swiphiqo.

  • Tinyike nkarhi wo anakanyisisa. “Dyana marhambu ya nhloko. Xana leswi swi ku vilerisaka swi ta va swa nkoka mundzuku kumbe enkarhini lowu taka?”—Anthony.

    Bibele yi ri: “Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona. Vubihi bya siku rin’wana ni rin’wana byi enele rona.”—Matewu 6:34.

    Leswi swi vulaka swona: A swi twali ku vilela hi swiphiqo swa nkarhi lowu taka leswi swin’wana swa swona swi nga ta ka swi nga humeleli.

  • Tshika ku vilela hi swilo leswi u nga taka u nga swi cinci. “Leswi u nga swi endlaka i ku tilunghiselela ku langutana ni swiyimo leswi tikaka kambe hi hala tlhelo u tsundzuka leswaku swiyimo swin’wana a wu nge swi lawuli.”—Robert.

    Bibele yi ri: “Lava va nga ni rivilo lerikulu a va hluli emphikizanweni, . . . hambi ku ri lava twisisaka a va na rona rifuwo, hikuva nkarhi ni xiendlakalo lexi nga languteriwangiki swa va wela hinkwavo.”—Eklesiasta 9:11.

    Leswi swi vulaka swona: Minkarhi yin’wana a wu nge swi cinci swiyimo swa wena kambe u nga kota ku cinca ndlela leyi u swi langutaka ha yona.

  • Vana ni langutelo lerinene hi swiphiqo swa wena. “Ndzi xiya leswaku swa ndzi pfuna ku anakanya hi swilo leswi pfunaka ematshan’weni yo tidyisa mbitsi hi swilo leswi nga nyawuriki. Matimba ya mina ndzi ma tirhisela ku endla swilo swa nkoka.”—Alexis.

    Bibele yi ri: “Tiyiseka hi swilo swa nkoka swinene.”—Vafilipiya 1:10.

    Leswi swi vulaka swona: Vanhu lava nga ni langutelo lerinene hi swiphiqo swa vona, va tala ku swi hlula.

  • U nga vi mafanato. “Loko ndza ha ri eka gredi ya vutsevu, a ndzi vuya exikolweni ndzi karhateke ngopfu hi siku ra mundzuku. Mhani na papa a va ndzi yingisela loko ndzi va phofulela ta le mbilwini. A ndzi tsaka swinene loko va ri kona. A ndzi va tshemba ni ku vulavula na vona ndzi ntshunxekile. Sweswo ndzi pfunile leswaku ndzi nga karhateki hi siku ra mundzuku.”—Marilyn.

    Bibele yi ri: “Ku vilela embilwini ya munhu hi kona loku nga ta yi tshova, kambe rito lerinene ra yi tsakisa.”—Swivuriso 12:25.

    Leswi swi vulaka swona: Mutswari kumbe munghana a nga ha ku nyika switsundzuxo leswi tirhaka leswi nga ku pfunaka leswaku u hunguta ku karhateka ka wena.

  • Xikhongelo. “Loko ndzi khongela hi rito leri twalaka swa ndzi pfuna. Swi endla ndzi vula leswi ndzi karhataka ematshan’weni yo miyela. Swi tlhela swi ndzi pfuna ku xiya leswaku Yehovha a nga ndzi pfuna.”—Laura.

    Bibele yi ri: “Mi lahlela ku vilela hinkwako ka n’wina eka [Xikwembu], hikuva xa mi khathalela.”—1 Petro 5:7.

    Leswi swi vulaka swona: Xikhongelo a xi tlhantlhi swiphiqo swa hina. I ndlela yo vulavurisana na Yehovha Xikwembu hi ku kongoma loyi a hi tshembisaka a ku: “U nga [vileli], hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna.”—Esaya 41:10.