“Rirhandzu ra vo tala ri ta hola hikwalaho ka ku engeteleka ka ku kala nawu.”​—MAT. 24:12.

TINSIMU: 60, 135

1, 2. (a) Marito ya Yesu lama nga eka Matewu 24:12 a ma byeriwa vamani? (b) Buku ya Mintirho yi swi kombisa njhani leswaku Vakreste vo tala vo sungula a va rhandza vanhu van’wana? (Vona xifaniso lexi nga eku sunguleni ka xihloko lexi.)

XIN’WANA xa swikombiso leswi Yesu a swi vuleke malunghana ni “makumu ya mafambiselo ya swilo” hileswaku “rirhandzu ra vo tala [a] ri ta hola.” (Mat. 24:3, 12) Enkarhini wa vaapostola, Vayuda lava a va titeka va ri vanhu va Xikwembu, va pfumelele leswaku ndlela leyi a va rhandza Xikwembu ha yona yi tsana.

2 Nakambe, enkarhini wolowo Vakreste vo tala a va ya mahlweni va “vula mahungu lamanene hi ta Kreste” ni ku kombisa leswaku va rhandza Xikwembu, Vakreste kulobye ni vanhu lava nga riki Vakreste. (Mint. 2:44-47; 5:42) Hambiswiritano, valandzeri van’wana va Yesu va le nkarhini wakwe va tshike rirhandzu ra vona ri tsana.

3. I yini leswi nga ha vaka swi endle leswaku rirhandzu ra Vakreste van’wana ri tsana?

3 Endzhaku ka loko Yesu Kreste a pfuxiwile, u byele vandlha ra Efesa a ku: “Ndzi ni mhaka na wena, ya leswaku u lahle rirhandzu leri a  wu ri na rona eku sunguleni.” (Nhlav. 2:4) I yini lexi nga ha vaka xi endle leswaku va lahla rirhandzu rero? Swi nga ha endleka leswaku valandzeri volavo va Kreste, a va kuceteriwa hi vanhu lava a va tikhome hi ndlela yo biha hi nkarhi wolowo. (Efe. 2:2, 3) Ku fana ni madoroba yo tala ya namuntlha, doroba ra Efesa a ri tele hi vanhu lava a va tikhome hi ndlela yo biha. A ri ri doroba leri fuweke laha vanhu va kona a va tibuma hi ku va ni swilo swa xiyimo xa le henhla, lava a va rhandza ntsako ni ku hanya emafurheni. Leswi a va rhandza ku titsakisa, swi endle leswaku va nga ha vi na mhaka ni vanhu van’wana. Ku engetela eka sweswo, vunghwavava ni vudlakuta a swi famba emahlweni.

4. (a) I yini leswi kombisaka leswaku rirhandzu ra vo tala ri tsanile namuntlha? (b) Hi swihi swiyenge swinharhu leswi rirhandzu ra hina ri nga tsanaka eka swona?

4 Vuprofeta bya Yesu lebyi vulavulaka hi ku tsana ka rirhandzu bya hi khumba na hina namuntlha. Vanhu vo tala namuntlha a va ha xi rhandzi Xikwembu. Loko va ri ni swiphiqo, va tsutsumela eka minhlangano ya vanhu ematshan’weni yo titshega hi Xikwembu. Ku engetela kwalaho, rirhandzu ra vanhu lava nga n’wi gandzeriki Yehovha Xikwembu ri ya ri tsana. Hambiswiritano, leswi endlekeke evandlheni ra Efesa, swi kombisa leswaku Vakreste va ntiyiso namuntlha, loko va nga tivoneli rirhandzu ra vona ri nga tsana. Sweswi hi ta bula hi swiyenge swinharhu leswi rirhandzu ra hina ri nga tsanaka eka swona: (1) Ku rhandza Yehovha, (2) ku rhandza ntiyiso lowu nga eBibeleni (3) ni ku rhandza vamakwerhu.

KU RHANDZA YEHOVHA

5. Hikwalaho ka yini hi fanele hi rhandza Xikwembu?

5 Emahlweni ko va Yesu a lemukisa vanhu hi mhaka ya ku tsana ka rirhandzu, u vulavule hi loyi hi faneleke hi n’wi rhandza ku tlula swilo hinkwaswo. U te: “‘U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.’ Lexi hi xona xileriso lexikulu ni xo sungula eka hinkwaswo.” (Mat. 22:37, 38) Loko hi rhandza Yehovha hi timbilu ta hina hinkwato, swi ta endla leswaku hi yingisa milawu yakwe, hi kota ku tiyisela ni ku venga swilo swo biha. (Hlaya Pisalema 97:10.) Hambiswiritano, Sathana ni vanhu vakwe va tiyimisele ku hi tshikisa ku rhandza Xikwembu.

6. I yini lexi endlekaka loko hi nga ha xi rhandzi Xikwembu?

6 Vanhu vo tala namuntlha va ni vonelo leri hoxeke hi rirhandzu. Vanhu va ‘tirhandza’ ngopfu ku ri ni ku rhandza Muvumbi. (2 Tim. 3:2) Misava leyi, leyi fumiwaka hi Sathana yi hlohlotela “ku navela ka nyama ni ku navela ka mahlo ni ku bombisa rifuwo ra munhu ra vutomi.” (1 Yoh. 2:16) Loko muapostola Pawulo a lemukisa Vakrestekulobye hi ku navela ka nyama, u te: “Ku anakanya swa nyama swi vula rifu . . . hikuva ku anakanya hi swa nyama swi vula vulala ni Xikwembu.” (Rhom. 8:6, 7) Vanhu lava hetaka nkarhi wo tala va ri karhi va tikarhatela ku kuma rifuwo kumbe lava tikhomaka ku biha hi timhaka ta masangu, va kuma vuyelo byo vava ngopfu.—1 Kor. 6:18; 1 Tim. 6:9, 10.

7. Hi wihi ntlhontlho lowu valandzeri va Kreste va langutanaka na wona namuntlha?

7 Ematikweni man’wana, vanhu lava nga pfumeriki leswaku Xikwembu xi kona, lava nga tiyisekiki leswaku xi kona ni lava tshembaka leswaku swilo swi lo tiendlekela, va kucetela vanhu leswaku va nga ha xi rhandzi Xikwembu. Va byela vanhu vo tala leswaku munhu un’wana ni un’wana loyi a pfumelaka leswaku ku ni Muvumbi i xiphukuphuku. Hi hala tlhelo, vanhu va tshemba van’wasayense swinene ku tlula Muvumbi. (Rhom. 1:25) Loko ho yingisa tidyondzo to tano, ndlela leyi hi rhandzaka Yehovha ha yona yi nga ha sungula ku tsana ivi vuxaka bya hina na yena byi fa.—Hev. 3:12.

8. (a) Hi swihi swiyimo leswi hetaka matimba leswi vanhu va Yehovha va langutanaka na swona namuntlha? (b) I xitiyisekiso xihi lexi hi xi kumaka eka Pisalema 136?

8 Loko hi pfumelela swilo swo karhi swi hi heta  matimba, ripfumelo ra hina ni ndlela leyi hi rhandzaka Xikwembu ha yona swi nga tsana. Emisaveni leyi yo homboloka leyi lawuriwaka hi Sathana, hinkwerhu mikarhi yin’wana hi langutana ni swiyimo leswi hetaka matimba. (1 Yoh. 5:19) Swi nga ha endleka leswaku sweswi hi karhatiwa hi swiphiqo swa ku dyuhala, mavabyi kumbe swiphiqo swa timali. Kumbexana hi karhatiwa hi ku titwa hi nga pfuni nchumu, ku nga hetiseki ka ku navela ka hina kumbe hi ku tsandzeka ku hetisisa swo karhi. Kambe a hi fanelanga hi pfumelela swiyimo swo tano, swi endla hi rivala leswaku Yehovha wa khathala hi hina. Ku ri na sweswo, hi fanele hi anakanyisisa hi marito lama hi tiyisekisaka leswaku Yehovha u ta tshama a hi rhandza. Marito wolawo ma kumeka eka Pisalema 136:23 leyi nge: “Loyi a hi tsundzukeke loko hi ri exiyin’weni xa le hansi, hikuva musa wakwe wa rirhandzu i wa hilaha ku nga riki na makumu.” Ndlela leyi Yehovha a ma rhandzaka ha yona malandza yakwe a yi cincacinci. Xisweswo, hi nga tiyiseka leswaku wa swi twa ‘swikombelo swa hina’ naswona wa swi hlamula.—Ps. 116:1; 136:24-26.

9. I yini lexi endleke leswaku Pawulo a hambeta a rhandza Xikwembu?

9 Ku fana ni mupisalema, Pawulo u tiyisiwe hi ku anakanyisisa hi ndlela leyi Yehovha a n’wi seketela ha yona. U tsale a ku: “Yehovha i mupfuni wa mina; ndzi nga ka ndzi nga chavi. Xana munhu a nga ndzi endla yini?” (Hev. 13:6) Leswi Pawulo a tshemba Yehovha swi endle leswaku a kota ku tiyisela swiphiqo leswi a a langutana na swona. A nga swi pfumelelanga swiphiqo sweswo swi n’wi heta matimba. Loko a ri ekhotsweni, u tsale mapapila yo hlayanyana lawa a ma khutaza swinene. (Efe. 4:1; Filp. 1:7; Film. 1) Hambiloko a langutane ni miringo yo tika, Pawulo a nga tshikanga ku rhandza Xikwembu. U pfuniwe hi yini? A a titshege hi “Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.” (2 Kor. 1:3, 4) Hi nga n’wi tekelela njhani Pawulo, leswaku hi tshama hi ri karhi hi rhandza Yehovha?

Kombisa leswaku u rhandza Yehovha hi ku khongela (Vona ndzimana 10)

10. I yini leswi nga hi pfunaka leswaku hi tshama hi ri karhi hi rhandza Yehovha?

10 Pawulo u vule nchumu wun’wana lowu nga hi pfunaka swinene leswaku hi tshama hi ri karhi hi rhandza Yehovha. U tsalele vapfumerikulobye a ku: “Khongelani minkarhi hinkwayo.” Nakambe u te: “Mi phikelela exikhongelweni.” (1 Tes. 5:17; Rhom. 12:12) Ku khongela swi ta hi pfuna leswaku hi va ni vuxaka lebyinene ni Xikwembu. (Ps. 86:3) Loko hi tinyika nkarhi wo phofulela Yehovha ndlela leyi hi titwaka ha yona, swi ta endla leswaku hi va ni vuxaka lebyinene ni Tata wa hina wa le tilweni loyi a nga “Mutwi wa xikhongelo.” (Ps. 65:2) Ku engetela kwalaho, loko hi xiya leswaku Yehovha wa swi hlamula swikhongelo swa hina, sweswo swi ta endla leswaku hi ya hi n’wi rhandza swinene. Hi ta swi xiya leswaku “Yehovha u le kusuhi ni hinkwavo lava n’wi vitanaka.” (Ps. 145:18) Loko hi tshemba Yehovha swi ta endla leswaku hi kota ku tiyisela miringo.

KU RHANDZA NTIYISO LOWU NGA EBIBELENI

11, 12. I yini lexi nga hi pfunaka leswaku hi rhandza ntiyiso lowu nga eBibeleni?

11 Leswi hi nga Vakreste hi amukele ntiyiso naswona ha wu rhandza. Rito ra Xikwembu i xihlovo xa ntiyiso. Loko a khongela eka Tata wakwe, Yesu u te: “Rito ra wena i ntiyiso.” (Yoh. 17:17) Hikokwalaho, leswaku hi rhandza ntiyiso hi fanele hi sungula hi dyondza Bibele. (Kol. 1:10) Kambe ku dyondza Bibele ntsena a swi enelanga. Xiya ndlela leyi mutsari wa Pisalema 119 a hi pfunaka ha yona ku twisisa leswi vulaka swona ku rhandza ntiyiso. (Hlaya Pisalema 119:97-100.) Xana loko hi hlaya Matsalwa ha tinyika nkarhi wo anakanyisisa ha wona? Ndlela leyi hi wu tlangelaka ha yona ntiyiso lowu nga eBibeleni yi ta kula loko hi anakanyisisa hi tindlela leti hi nga tirhisaka rungula rero ha tona evuton’wini bya hina.

12 Mupisalema u ye emahlweni a ku: “Marito ya  wena a ma nandziha swinene emalakeni ya mina, ku tlula vulombe enon’wini wa mina!” (Ps. 119:103) Hilaha ku fanaka, na hina hi nga tiphina hi ku hlaya rungula leri sekeriweke eBibeleni leri humaka enhlengeletanweni ya Xikwembu. Hi nga ri pfumelela ri khumba timbilu ta hina leswaku hi ta tsundzuka “marito lama tsakisaka” ya ntiyiso ni leswaku hi ta kota ku pfuna van’wana ha wona.—Ekl. 12:10.

13. I yini leswi pfuneke Yeremiya leswaku a rhandza ntiyiso lowu humaka eMatsalweni naswona sweswo swi n’wi khumbe njhani?

13 Yeremiya a rhandza ntiyiso lowu humaka eMatsalweni. Xiya ndlela leyi Rito ra Xikwembu ri n’wi khumbeke ha yona. U te: “Marito ya wena ma kumekile, hiloko ndzi ma dya; kutani eka mina, rito ra wena ri va ku khana ni ku tsaka ka mbilu ya mina; hikuva vito ra wena ri vitaniwe ehenhla ka mina, Oho Yehovha Xikwembu xa mavuthu.” (Yer. 15:16) Yeremiya u dye marito ya Xikwembu ni ku ma gayela hi ndlela yo fanekisela hi ku va a anakanyisisa ha wona. Xisweswo, u sungule ku tlangela lunghelo ro tiviwa tanihi nandza wa Xikwembu. Xana ku rhandza ntiyiso lowu nga eBibeleni swi endla leswaku hi tlangela lunghelo ro hlawuleka ro vitaniwa hi vito ra Xikwembu ni ku chumayela hi Mfumo wa xona enkarhini lowu wa makumu?

Kombisa leswaku u rhandza Bibele hi ku yi hlaya (Vona ndzimana 14)

14. Hi nga yi kurisa njhani ndlela leyi hi wu rhandzaka ha yona ntiyiso lowu nga eBibeleni?

14 Handle ko hlaya Bibele ni minkandziyiso leyi sekeriweke eBibeleni, i yini swin’wana leswi nga hi pfunaka leswaku hi rhandza ntiyiso? Hi nga kurisa ndlela leyi hi wu rhandzaka ha yona ntiyiso hi ku va kona nkarhi ni nkarhi eminhlanganweni ya vandlha. Dyondzo ya Xihondzo xo Rindza leyi hi vaka na yona vhiki ni vhiki, hi yin’wana ya tindlela leti hi dyondzisiwaka ha tona. Leswaku hi vuyeriwa hi leswi nga ta dyondziwa hi fanele hi swi lunghiselela kahle swihloko leswi dyondziwaka. Ndlela yin’wana leyi hi nga endlaka sweswo ha yona, i ku kambisisa Matsalwa lama kombisiweke. Namuntlha hi nga swi kota ku kopa Xihondzo xo Rindza eka website ya hina ya jw.org ni le ka JW Library hi tindzimi to tala. Ti app tin’wana ti endla leswaku hi kota ku pfula Matsalwa lama kombisiweke hi ku hatlisa eka xihloko lexi dyondziwaka. Kambe ku nga  khathariseki ndlela leyi hi yi tirhisaka, ku hlaya matsalwa lama kombisiweke ni ku anakanyisisa ha wona swi ta endla leswaku hi wu rhandza swinene ntiyiso lowu nga eBibeleni.—Hlaya Pisalema 1:2.

KU RHANDZA VAMAKWERHU

15, 16. (a) Hi xihi xileriso lexi hi xi kumaka eka Yohane 13:34, 35? (b) Xana ndlela leyi hi rhandzaka vamakwerhu ha yona yi fambisana njhani ni ndlela leyi hi rhandzaka Xikwembu ni Bibele ha yona?

15 Hi vusiku byakwe byo hetelela a ri laha misaveni, Yesu u byele vadyondzisiwa vakwe a ku: “Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.”—Yoh. 13:34, 35.

16 Ndlela leyi hi rhandzaka vamakwerhu ha yona ya fambisana ni ndlela leyi hi rhandzaka Yehovha ha yona. Entiyisweni, a hi nge swi koti ku rhandza Yehovha loko hi nga va rhandzi vamakwerhu. Muapostola Yohane u tsale a ku: “Loyi a nga rhandziki makwavo, la n’wi vonaka, a nge swi koti ku rhandza Xikwembu lexi a nga si tshamaka a xi vona.” (1 Yoh. 4:20) Ku engetela kwalaho, ndlela leyi hi rhandzaka Yehovha ni vamakwerhu ha yona ya fambisana ni ndlela leyi hi rhandzaka Bibele ha yona. Ha yini? Hikuva loko hi rhandza ntiyiso lowu nga eBibeleni, swi ta endla leswaku hi swi yingisa hi mbilu hinkwayo swileriso leswi vulaka leswaku hi rhandza Xikwembu ni vamakwerhu.—1 Pet. 1:22; 1 Yoh. 4:21.

Kombisa leswaku u rhandza vamakwerhu hi ku va pfuna (Vona ndzimana 17)

17. Hi tihi tindlela tin’wana leti hi nga kombisaka rirhandzu ha tona?

17 Hlaya 1 Vatesalonika 4:9, 10. Hi tihi tindlela tin’wana leti hi nga kombisaka vamakwerhu evandlheni leswaku ha va rhandza ha tona? Vamakwerhu lava dyuhaleke va nga ha lava ku pfuniwa hi swo famba loko va ya eminhlanganweni ya vandlha. Makwerhu loyi a nga noni a nga ha lava ku pfuniwa hi swin’wana ekaya rakwe. (Yak. 1:27) Vamakwerhu hinkwavo lava tshikilelekeke ni lava langutaneke ni miringo, va lava ku khutaziwa ni ku chaveleriwa. (Swiv. 12:25; Kol. 4:11) Hi swi kombisa hi marito ni swiendlo leswaku hi va rhandza hi mbilu hinkwayo vamakwerhu “lava nga swin’we na hina eripfumelweni.”—Gal. 6:10.

18. I yini leswi nga hi pfunaka leswaku hi ti ba hi makatla timholovo leti nga nyawuriki leti hi vaka na tona ni vamakwerhu?

18 Bibele yi vula leswaku ‘masiku yo hetelela’ ya mafambiselo lawa ya swilo ma ta vonaka hi ku va vanhu va kona va nga khathali hi vanhu van’wana ni ku va ni makwanga. (2 Tim. 3:1, 2) Kutani hina Vakreste, hi fanele hi tikarhata leswaku hi ya hi xi rhandza swinene Xikwembu, ntiyiso lowu nga eBibeleni ni vamakwerhu. I ntiyiso leswaku minkarhi yin’wana hi ta pfa hi tlulana milenge. Hambiswiritano, hi katekile hinkwerhu evandlheni hikuva rirhandzu ri hi susumetela leswaku hi lulamisa timholovo hi ndlela leyinene. (Efe. 4:32; Kol. 3:14) Hikokwalaho, a hi fanelanga hi pfumelela rirhandzu ra hina leswaku ri tsana. Ku ri na sweswo, a hi hambeteni hi rhandza Yehovha, Rito rakwe ni vamakwerhu hi mbilu hinkwayo.