Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza (Nkandziyiso Wa Vandlha)  |  May 2017

Ku Hanya Vutomi Byo Olova Swi Tisa Ntsako

Ku Hanya Vutomi Byo Olova Swi Tisa Ntsako

DANIEL NA MIRIAM va tekane hi September 2000 kutani va ya tshama edorobeni ra Barcelona eSpain. Daniel u ri: “A hi hanya vutomi bya vulovolovo, a hi hola mali yo nyawula lerova a hi kota ku dya etirhesiturente, hi ya beriwa hi moya ematikweni man’wana ni ku ambala swiambalo swo durha. Nakambe a hi tinyika nkarhi wo ya ensin’wini.” Kambe vutomi bya hina byi cincile.

Loko a ri enhlengeletanweni hi 2006, Daniel u khumbiwe mbilu swinene hi nkulumo leyi a yi ri ni xivutiso lexi nge: “Xana hi endla hinkwaswo leswi hi nga swi kotaka leswaku hi ‘kutsula lava va yisiwaka eku feni’ leswaku va kuma vutomi lebyi nga heriki?” (Swiv. 24:11) Nkulumo leyi, yi kandziyise leswaku hi ni vutihlamuleri byo chumayela mahungu lamanene lama ponisaka vutomi bya vanhu. (Mint. 20:26, 27) Daniel u ri, “A ndzi twa onge Yehovha u vulavula na mina hi ku kongoma.” Nkulumo yoleyo yi tlhele yi vula leswaku ntirho wo chumayela wu hi tisela ntsako. Daniyele a a swi tiva leswaku sweswo i ntiyiso tanihi leswi se Miriam a ri phayona naswona a a ri ni ntsako lowukulu hikwalaho ka mikateko leyi humaka eka Yehovha.

Daniel u ri: “Ndzi endle xiboho xo cinca vutomi bya mina.” Naswona u endle tano. U hungute tiawara leti a ti tirha, kutani a sungula ku phayona naswona u sungule ku anakanya hi ndlela leyi yena na Miriam va nga kumaka ntsako ha yona loko vo rhurhela laha ku nga ni xilaveko lexikulu xa vahuweleri va Mfumo.

VA VE NI SWIPHIQO EKU SUNGULENI KUTANI ENDZHAKU VA KUME MAHUNGU YO TSAKISA

Hi May 2007, Daniel na Miriam va tshike mitirho ya vona ya ku tihanyisa kutani va ya chumayela ePanama laha ku nga tiko leri va tshameke va ri endzela. Nsimu ya vona leyintshwa a ku ri swihlala swo hlayanyana leswi a swi ri eBocas del Toro eArchipelago ekusuhi ni Lwandle ra Kharibiya laha ku vulavuriwaka Xiguaymi. Loko Daniel na Miriam va kambisisa mali leyi a va ri na yona va kume leswaku va nga kota ku tshama ePanama tin’hweti ta nhungu.

A va famba hi xikepe ni hi xikanyakanya loko va ya eswihlaleni leswi a va chumayela eka swona, naswona loko va ya eswihlaleni ro sungula va fambe riendzo ro ringana tikhilomitara ta 32 hi xikanyakanya, a va famba hi le tintshaveni laha dyambu a ri vavula swinyawula. Sweswo swi endle leswaku Daniel a lava ku titivala hikwalaho ka ku karhala. Kambe vanhu va kwalaho va va amukele hi malwandla, ngopfungopfu loko se va dyondze marito ma nga ri mangani ya ririmi ra kwalaho. Swi nga si ya kwihi se a va ri na tidyondzo ta Bibele ta 23.

Loko se swimalana leswi a va ri na swona swi herile, ntsako wu herile ku sala mbitsi. Daniel u ri: “A hi tengatenga mihloti, hi ri karhi hi anakanya hi ku tlhelela eSpain. A swi hi twisa mbilu ku vava loko hi ehleketa leswaku hi ta hambana ni swichudeni swa hina swa Bibele.” Kambe endzhaku ka n’hweti va kume papila, leri a ri ri ni mahungu yo tsakisa. Miriam u ri: “Hi averiwe ku va maphayona yo hlawuleka. A hi tsake ngopfu hikuva hi kote ku ya emahlweni ni xiavelo lexi hi xi rhandzaka!”

LESWI VA TSAKISEKE

Daniel na Miriam va komberiwe ku va maphayona ya nkarhi hinkwawo hikwalaho ka ku cinca loku veke kona hi 2015. A va ta endla yini? Va tshembe marito lama kumekaka eka Pisalema 37:5 leyi nge, “Andlala ndlela ya wena eka Yehovha, U n’wi tshemba, yena u ta teka goza.” Va kume ntirho wo tihanyisa lowu endleke leswaku va ya emahlweni ni ntirho wa vuphayona naswona namuntlha va tirha evandlheni leri nga exifundzheni xa Veraguas ePanama.

Daniel u ri: “Loko hi nga si suka eSpain, a hi nga tiyiseki loko hi ta swi kota ku hanya vutomi byo olova. Kambe namuntlha hi hanya byona naswona a hi pfumali nchumu.” I yini lexi va tsakiseke swinene? Va ri: “Ku pfuna vanhu lava titsongahataka leswaku va dyondza hi Yehovha i ntsako lowu nga pimanisiwiki na nchumu!”