Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza (Nkandziyiso Wa Vandlha)  |  June 2017

Seketela Vuhosi bya Yehovha!

Seketela Vuhosi bya Yehovha!

“Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo.”NHLAV. 4:11.

TINSIMU: 112, 133

1, 2. I yini leswi hinkwerhu hi faneleke hi tiyiseka ha swona? (Vona xifaniso lexi nga eku sunguleni ka xihloko lexi.)

HILAHA hi dyondzeke hakona exihlokweni lexi hundzeke, Diyavulosi u vula leswaku Yehovha a nga fumi hi ndlela leyinene ni leswaku vanhu va nga tiphina loko va tifuma. Xana Sathana u tiyisile? A hi nge vanhu lava hlawuleke ku tifuma a va ta hanya hilaha ku nga heriki. Xana swilo a swi ta va fambela kahle loko va nga fumiwi hi Xikwembu? Xana a wu ta tsaka loko u hanya hilaha ku nga heriki kambe u nga fumiwi hi Xikwembu?

2 A nga kona loyi a nga ku hlamulelaka swivutiso sweswo. Un’wana ni un’wana wa hina u fanele a anakanyisisa hi mhaka leyi. Hi ku endla tano, swi ta swi veka erivaleni leswaku vuhosi bya Xikwembu byi lulamile naswona byi tlula vuhosi hinkwabyo. Kutani hi fanele hi byi seketela hi timbilu ta hina hinkwato. Bibele yi boxa swivangelo leswi endlaka hi tiyiseka. Hi xikombiso, anakanya hi leswi Matsalwa ma hi byelaka swona hi mfanelo ya Yehovha yo fuma.

YEHOVHA U NI MFANELO YO FUMA

3. Hikwalaho ka yini Yehovha ku ri yena ntsena a nga ni mfanelo yo fuma?

3 Yehovha hi yena ntsena a nga ni mfanelo yo fuma vuako hinkwabyo hikwalaho ka leswi a nga Xikwembu xa matimba hinkwawo ni hi leswi a nga Muvumbi. (1 Tikr. 29:11; Mint. 4:24) Eka Nhlavutelo 4:11,  lava nga ta fuma na Kreste etilweni va 144 000 va huwelela exivonweni va ku: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” Hakunene, leswi Yehovha a tumbuluxeke swilo hinkwaswo u ni mfanelo yo fuma vanhu ni tintsumi.

4. Hikwalaho ka yini ku lwisana ni mfanelo ya Xikwembu yo fuma swi kombisa ku nga wu tirhisi kahle ntshunxeko wa ku tihlawulela?

4 Sathana a nga tumbuluxanga nchumu. Hikwalaho a nga na yona mfanelo yo fuma vuako hinkwabyo. Sathana ni vatekani vo sungula va kombise leswaku va tikukumuxa hi ku xandzukela vuhosi bya Yehovha. (Yer. 10:23) I ntiyiso leswaku leswi a va ri ni ntshunxeko wo tihlawulela a va ta tihlawulela ku hanya handle ko fumiwa hi Xikwembu. Kambe xana sweswo a swi va nyika ntshunxeko wo endla tano? Doo! Ntshunxeko wo tihlawulela wu endla leswaku vanhu va kota ku tiendlela swiboho leswinene siku ni siku. Hambiswiritano, a wu va nyiki ntshunxeko wa ku xandzukela Muvumbi wa vona ni Munyiki wa Vutomi. Swi le rivaleni leswaku ku xandzukela Yehovha swi kombisa ku nga wu tirhisi kahle ntshunxeko wo tihlawulela. Hina vanhu hi fanela hi ku fumiwa hi Yehovha tanihi leswi a nga mufumi lonene.

5. I yini lexi nga hi tiyisekisaka leswaku swiboho leswi Xikwembu xi swi endlaka swi lulamile?

5 Ku ni xivangelo xin’wana lexi endlaka leswaku Yehovha a fanelekela ku fuma vuako hinkwabyo. Vulawuri byakwe u byi tirhisa hi vululami lebyi hetisekeke. U ri: “Hi mina Yehovha, Loyi a kombisaka musa wa rirhandzu, vululami ni ku tshembeka emisaveni; hikuva swilo leswi ndza swi tsakela.” (Yer. 9:24) Yehovha a nga titsheganga hi milawu leyi endliweke hi vanhu lava nga hetisekangiki leswaku yi n’wi pfuna ku tiva swilo leswi lulameke. Ku ri na sweswo, hi yena loyi a nyikeke vanhu milawu leyi nga va pfunaka ku hambanisa leswi lulameke ni leswi nga lulamangiki. Kutani hi nga tiyiseka leswaku milawu, misinya ya milawu ni swiboho leswi a swi endlaka swi lulamile hikuva “ku lulama ni vuavanyisi i ndhawu ya xiluvelo xa [yena].” (Ps. 89:14; 119:128) Ku hambana ni sweswo, hambileswi Sathana a soleke mfanelo ya Yehovha yo fuma vuako hinkwabyo, u tsandzekile ku endla leswaku misava leyi yi va ni ku rhula.

6. Hi xihi xivangelo xin’wana lexi endlaka leswaku Yehovha a faneleka ku fuma misava?

6 Yehovha u ni mfanelo yo fuma hikuva u ni vutivi ni vutlhari byo kota ku khathalela vuako hinkwabyo. Hi xikombiso, anakanya hi ndlela leyi Xikwembu xi pfuneke N’wana wa xona ha yona leswaku a tshungula vanhu mavabyi lawa madokodela a ma nga swi koti ku ma tshungula. (Mat. 4:23, 24; Mar. 5:25-29) Eka Yehovha sweswo a ku nga ri singita. U yi tiva kahle ndlela leyi mimiri ya hina yi endliweke ha yona naswona u ni matimba yo hi horisa. Swi tano ni hi vuswikoti bya yena byo pfuxa lava feke ni byo sivela timhangu ta ntumbuluko.

7. Vutlhari lebyi Yehovha a nga na byona byi tlakuke hi ndlela yihi eka bya vanhu lava fumiwaka hi Sathana?

7 Vanhu lava fumiwaka hi Sathana va ha lava ndlela yo tlhantlha swiphiqo leswi matiko ma nga na swona. Yehovha hi yena ntsena loyi a nga ni vutlhari byo endla leswaku ku va ni ku rhula laha misaveni. (Esa. 2:3, 4; 54:13) Loko hi ri karhi hi dyondza hi vutivi ni vutlhari lebyi Yehovha a nga na byona, hi ta titwa hi ndlela leyi muapostola Pawulo a titweke ha yona loko a tsala a ku: “Mawaku ku enta ka rifuwo ni vutlhari ni vutivi bya Xikwembu! Vuavanyisi bya xona a byi lavisiseki, ni tindlela ta xona a ti landzeleriseki!”—Rhom. 11:33.

YEHOVHA U FUMA HI NDLELA LEYINENE

8. I yini leswi ku tsakisaka hi ndlela leyi Yehovha a fumaka ha yona?

8 Bibele yi swi veka erivaleni leswaku Yehovha hi yena a nga ni mfanelo yo fuma. Yi kombisa leswaku hikwalaho ka yini a ri mufumi lonene ku  tlula vafumi van’wana. Xin’wana lexi endlaka a va mufumi lonene hi leswi a fumaka hi rirhandzu. Swa hi tsakisa ku vona ndlela leyi Yehovha a fumaka ha yona. U ni ‘tintswalo ni nsovo, u hlwela ku hlundzuka, u tele musa wa rirhandzu ni ntiyiso.’ (Eks. 34:6) Xikwembu xi ma komba xichavo naswona xa ma xixima malandza ya xona. Xi hi khathalela ku tlula ndlela leyi hi nga tikhathalelaka ha yona. Ku hambana ni leswi Diyavulosi a swi vuleke, Yehovha a nga va tsoni nchumu vagandzeri vakwe vo tshembeka. U kale a nyikela hi N’wana wakwe wa risima leswaku hi ta va ni ntshembo wo hanya hilaha ku nga heriki!—Hlaya Pisalema 84:11; Varhoma 8:32.

9. Hi swi tiva njhani leswaku Xikwembu xa khathala hi un’wana ni un’wana wa hina?

9 Yehovha a nga khathaleli vanhu vakwe tanihi ntlawa ntsena. U khathala swinene hi un’wana ni un’wana wa hina. Hi xikombiso, anakanya hi ndlela leyi Yehovha a tirhiseke vaavanyisi ha yona ku ringana malembe ya 300 leswaku a kutsula tiko ra Israyele eka vatshikileri va rona. Enkarhini wolowo Yehovha u kombise leswaku wa khathala hi Rhuti loyi a nga ri Muisrayele. Rhuti u titsone swo tala leswaku a va mugandzeri wa Yehovha. Yehovha u katekise Rhuti hi nuna ni n’wana wa jaha. Kambe a swi helelanga kwalaho. Loko Rhuti a ta pfuxiwa u ta tiva leswaku n’wana wakwe a a ri wa rixaka leri Mesiya a humeke eka rona. Nakambe anakanya ndlela leyi a nga ta titwa ha yona loko a kuma leswaku mhaka ya vutomi byakwe yi kumeka ebukwini yin’wana ya Bibele leyi vitaniwaka hi vito rakwe!—Rhu. 4:13; Mat. 1:5, 16.

10. Ha yini hi nga vulaka leswaku Yehovha a nga va tikiseli vanhu lava a va fumaka?

10 Yehovha a nga va tikiseli lava a va fumaka. U endla leswaku va va ni ntshunxeko ni ntsako. (2 Kor. 3:17) Davhida u swi veke hi ndlela leyi: “Xindzhuti ni ku vangama swi le mahlweni ka [Xikwembu], ntamu ni ntsako swi le ndhawini [ya xona].” (1 Tikr. 16:7, 27) Nakambe mupisalema Ethani u tsale a ku: “Va tsaka vanhu lava tivaka ku huwelela ka ku tsaka. Oho Yehovha, va hambeta va famba hi ku landza ku vonakala ka xikandza xa wena. Va tsaka siku hinkwaro evitweni ra wena naswona va tlakusiwa hi ku lulama ka wena.”—Ps. 89:15, 16.

11. I yini lexi nga endlaka leswaku hi ya hi tiyiseka leswaku Yehovha i mufumi lonene?

11 Loko hi tshama hi ri karhi hi anakanyisisa hi swilo leswinene leswi Yehovha a hi endleleke swona, hi ta ya hi tiyiseka leswaku i Mufumi lonene. Na hina hi ta titwa ku fana ni mupisalema loyi a nga te: “Siku rin’we eswivaveni swa wena ri tlula gidi endhawini yin’wana.” (Ps. 84:10) I yini lexi nga endlaka hi titwa hi ndlela yoleyo? Leswi Yehovha a nga Muvumbi wa hina, wa swi tiva leswi nga hi tsakisaka naswona u hi nyika swona hi mpimo lowukulu. Leswi a swi languteleke eka hina swi vuyerisa hina swi tlhela swi hi endla hi tsaka swinene. Hambiloko swi lava hi titsona swo karhi leswaku hi n’wi yingisa, hi ta tshama hi tsakile.—Hlaya Esaya 48:17.

12. Hi xihi xivangelo lexikulu lexi endlaka leswaku hi seketela vuhosi bya Yehovha?

12 Bibele yi kombisa leswaku endzhaku ka Malembe ya Gidi ya ku Fuma ka Kreste, vanhu van’wana va ta hlawula ku xandzukela vuhosi bya Yehovha. (Nhlav. 20:7, 8) I yini lexi nga ta endla leswaku va byi xandzukela? A swi kanakanisi leswaku Diyavulosi loyi a nga ta va a ntshunxiwile ekhotsweni naswona a tiyimisele ku hambukisa vanhu, u ta tirhisa vutianakanyi. Ku ta va ku nga ri ro sungula a endla sweswo. U ta ringeta ku khorwisa vanhu leswaku va nga swi kota ku hanya hilaha ku nga heriki handle ko yingisa Yehovha. Kambe sweswo a swi nge koteki. Hi nga tivutisa leswi: Xana hi ta tshemba mavunwa wolawo? Loko hi rhandza Yehovha hi tlhela hi n’wi tirhela hikwalaho ka leswi a nga lonene ni leswi a fanelekaka ku va Mufumi wa vuako hinkwabyo, a hi nge ma tshembi mavunwa wolawo ya Diyavulosi. A hi nge swi tsakeli ku hanya hi nga lawuriwi hi Yehovha loyi a nga ni mfanelo yo fuma naswona a fumaka hi rirhandzu.

 SEKETELA VUHOSI BYA YEHOVHA HI KU TSHEMBEKA

13. Ku tekelela Yehovha swi swi kombisa njhani leswaku ha n’wi seketela?

13 Hi fanele hi seketela vuhosi bya Yehovha hi timbilu ta hina hinkwato. Hilaha se hi swi voneke hakona, u ni mfanelo yo fuma naswona u fuma hi ndlela leyinene. Hi nga seketela vuhosi bya Yehovha hi ku tshama hi tshembekile ni hi ku n’wi tirhela hi ku tshembeka. I yini swin’wana leswi hi nga swi endlaka ku kombisa leswaku hi seketela vuhosi bya Yehovha? Hi nga endla tano hi ku endla swilo hi ndlela leyi n’wi tsakisaka. Loko hi endla swilo hi ndlela leyi nga ta tsakisa Yehovha, hi kombisa leswaku hi rhandza ndlela leyi a fumaka ha yona hi tlhela hi yi seketela.—Hlaya Vaefesa 5:1, 2.

14. Vakulu ni tinhloko ta mindyangu va nga n’wi tekelela njhani Yehovha?

14 EBibeleni hi dyondza leswaku Yehovha u fuma hi ndlela ya rirhandzu. Kutani loko tinhloko ta mindyangu ni vakulu va rhandza vuhosi byakwe, a va nge sindzisi leswaku swilo swi endliwa hi ndlela ya vona. Ku ri na sweswo, va ta tekelela Yehovha. Pawulo na yena u tekelele Xikwembu ni N’wana wa xona. (1 Kor. 11:1) Pawulo a a nga khomisi van’wana tingana kumbe ku va sindzisa leswaku va endla swilo hi ndlela yakwe. Ku ri na sweswo a a va kombela hi rirhandzu. (Rhom. 12:1; Efe. 4:1; Film. 8-10) Yoleyo i ndlela leyi Yehovha a endlaka swilo ha yona. Kutani hinkwavo lava rhandzaka ni ku seketela vuhosi byakwe va fanele va n’wi tekelela.

15. Ku xixima lava rhangelaka evandlheni swi swi kombisa njhani leswaku ha yi rhandza ndlela leyi Yehovha a fumaka ha yona?

15 Hi wu teka njhani nkongomiso lowu lava rhangelaka va hi nyikaka wona? Loko hi tirhisana na vona hi ndlela ya xichavo, hi kombisa leswaku hi seketela vuhosi bya Yehovha. Hambiloko hi nga xi twisisi xiboho lexi va xi endlaka kumbe hi nga pfumelelani na xona, hi ta ya emahlweni hi yingisa nkongomiso lowu va hi nyikaka wona. Hambileswi vanhu lava nga riki Timbhoni va nga endliki tano kambe hina hi kombisa leswaku hi seketela vuhosi bya Yehovha hi ku yingisa nkongomiso.  (Efe. 5:22, 23; 6:1-3; Hev. 13:17) Leswi Xikwembu xi hi navelelaka leswinene ha vuyeriwa loko hi endla tano.

16. Lava seketelaka vuhosi bya Xikwembu va swi endla njhani swiboho?

16 Hi nga kombisa leswaku hi seketela vuhosi bya Xikwembu hi ndlela leyi hi endlaka swiboho swa hina ha yona. Yehovha a nga hi nyiki nawu lowu hi faneleke hi wu landzela eka xiyimo xin’wana ni xin’wana. Ku ri na sweswo, loko a hi kongomisa u kombisa ndlela leyi a titwaka ha yona emhakeni yo karhi. Hi xikombiso, a nga hi nyiki milawu ya muxaka wa swiambalo leswi hi faneleke hi swi ambala tanihi Vakreste. Ku ri na sweswo, u tirhisa Rito rakwe leswaku ri hi pfuna ku hlawula swiambalo leswi fanelekaka ni ku tisasekisa hi ndlela leyi fanelaka Vakreste. (1 Tim. 2:9, 10) Nakambe u hi tsundzuxa leswaku hi anakanya hi ndlela leyi swiboho swa hina swi nga ta va khumba ha yona van’wana hi nga si swi endla. (1 Kor. 10:31-33) Loko hi endla swiboho hi ku landza nkongomiso wa Yehovha, ku nga ri leswi tsakisaka hina, hi kombisa leswaku hi seketela ndlela leyi a fumaka ha yona.

Seketela vuhosi bya Yehovha loko u endla swiboho ni loko u lulamisa swiphiqo evukatini (Vona tindzimana 16-18)

17, 18. Hi tihi tindlela tin’wana leti vatekani va nga kombisaka ha tona leswaku va seketela vuhosi bya Yehovha?

17 Xiya ndlela yin’wana leyi vatekani lava nga Vakreste va nga kombisaka ha yona leswaku va seketela tindlela ta Yehovha ni vuhosi bya yena. I yini leswi vatekani va nga swi endlaka loko va va ni swiphiqo leswikulu leswi a va nga swi langutelanga evukatini bya vona? Kumbexana va nga ha vona onge a swi nge lulamiseki. Loko swi ri tano i swinene ku anakanya hi ndlela leyi Yehovha a tirhisaneke ni Vaisrayele ha yona. Yehovha u tivitane nuna wa tiko rolero ra khale ra Israyele. (Esa. 54:5; 62:4) A swi kanakanisi leswaku lebyi a ku ri “vukati” byo tika swinene! Kambe Yehovha a nga hatliselanga ku ri tshika tiko ra Israyele. U hambete a ri komba musa ni ku hetisisa ntwanano lowu a wu endleke na rona. (Hlaya Pisalema 106:43-45.) Hakunene rirhandzu ro tano ri endla leswaku hi lava ku va ni vuxaka na yena.

18 Hilaha ku fanaka, vatekani lava rhandzaka tindlela ta Yehovha va tikarhatela ku n’wi tekelela. Loko va ri ni swiphiqo evukatini, a va lavi tindlela leti nga sekeriwangiki eMatsalweni to herisa vukati bya vona. Va swi tiva leswaku i Yehovha loyi a va paneke swin’we naswona u lava leswaku va ‘namarhelana.’ Xivangelo xin’we ntsena xa Matsalwa lexi pfumelelaka munhu ku dlaya vukati a tlhela a fanelekela ku nghenela vukati byin’wana hiloko munghana wakwe wa vukati a endle vuoswi. (Mat. 19:5, 6, 9) Loko vatekani va endla hinkwaswo leswi va nga swi kotaka leswaku va lulamisa swiphiqo swa vona, va kombisa leswaku va seketela ndlela leyinene leyi Yehovha a fumaka ha yona.

19. I yini leswi hi faneleke hi swi endla loko hi vona onge hi tsandzeke ku seketela vuhosi bya Yehovha?

19 Leswi hi nga hetisekangiki, mikarhi yin’wana hi ta endla swilo leswi nga n’wi tsakisiki Yehovha. Leswi a swi tivaka leswaku hi ta pfa hi endla swihoxo u hi lunghiselele gandzelo ra nkutsulo ra Kreste. Kutani, loko ho tshuka hi endla swihoxo hi fanele hi kombela Yehovha leswaku a hi rivalela. (1 Yoh. 2:1, 2) Ematshan’weni yo tshamela ku tivona nandzu, hi fanele hi dyondza eka swihoxo swa hina. Loko hi va ni vuxaka lebyinene na Yehovha, u ta hi rivalela a tlhela a hi pfuna leswaku hi rivala hi swihoxo sweswo ni ku swi papalata enkarhini lowu taka.—Ps. 103:3.

20. Hikwalaho ka yini hi fanele hi seketela vuhosi bya Yehovha namuntlha?

20 Emisaveni leyintshwa, hinkwerhu hi ta fumiwa hi Yehovha naswona u ta hi dyondzisa tindlela takwe letinene. (Esa. 11:9) Ninamuntlha u hi dyondzisa swo tala hi tindlela takwe. Mhaka ya leswaku i mani loyi a fanelekaka kahle ku fuma yi ta lulamisiwa ku nga ri khale. Sweswi i nkarhi wa ku kombisa leswaku hi seketela vuhosi bya Yehovha hi ku tshama hi tshembekile, hi ku n’wi tirhela ni hi ku tikarhatela ku n’wi tekelela eka hinkwaswo leswi hi swi endlaka.