“Hambetani mi chavelelana, mi akana.”—1 TES. 5:11.

TINSIMU: 121, 75

1, 2. Hikwalaho ka yini hi fanele hi kambisisa ndlela leyi hi nga va chavelelaka ha yona lava feriweke? (Vona xifaniso lexi nga eku sunguleni ka xihloko lexi.)

SUSI u te: “Hambiloko se swi lava ku endla lembe n’wana wa hina a lovile a ha ha twa ku vava swinene.” Makwerhu un’wana u vule leswaku u “twe ku vava swinene” loko nsati wakwe a lova hi xitshuketa. Lexi twisaka ku vava a hi makwerhu loyi ntsena loyi a langutaneke ni gome ro fana ni leri. Swi nga endleka leswaku vamakwerhu vo tala a va nga swi langutelanga ku feriwa Armagedoni yi nga si fika. Ku nga khathariseki leswaku u feriwile kumbe u tiva un’wana loyi a feriweke, u nga tivutisa leswi: ‘Va nga chaveleriwa njhani lava feriweke?’

2 Swi nga endleka leswaku u tshame u twa ku vuriwa leswaku munhu u hlakarhela hi ku famba ka nkarhi. Kambe xana i mikarhi hinkwayo swi vaka tano? Noni yin’wana yi vula leswaku “leswi munhu a swi endlaka hi swona swi endlaka leswaku a hlakarhela.” Ku fana ni xilondza lexi holaka hi ku famba ka nkarhi, gome leri munhu a vaka na rona endzhaku ko feriwa, ri nga hela hakatsongotsongo. Kahlekahle lava feriweke va nga wu kuma kwihi nchavelelo?

 YEHOVHA I “XIKWEMBU XA NCHAVELELO HINKWAWO”

3, 4. Hi swi tiva njhani leswaku Yehovha wa ku twisisa ku vava loku vanhu lava feriweke va ku twaka?

3 Yehovha Tata wa hina wa le tilweni hi yena muchaveleri wa hinkwavo lava nga ni gome. (Hlaya 2 Vakorinto 1:3, 4.) Yehovha i xikombiso lexikulu xa twela vusiwana, u byela vanhu vakwe a ku: “Mina—hi mina Loyi a mi chavelelaka.”—Esa. 51:12; Ps. 119:50, 52, 76.

4 Tata wa hina loyi a nga ni tintswalo na yena u tshame a twa ku vava hikwalaho ko feriwa hi vanhu lava a a va rhandza vo tanihi Abrahama, Isaka, Yakobe, Muxe na Hosi Davhida. (Tinhl. 12:6-8; Mat. 22:31, 32; Mint. 13:22) Rito ra Xikwembu ra hi tiyisekisa leswaku Yehovha u wu rindzele hi mahlongati nkarhi lowu a nga ta pfuxa malandza yakwe. (Yobo 14:14, 15) Ma ta tiphina hi vutomi naswona ma ta va ni rihanyo lerinene. Tsundzuka leswaku N’wana wa Xikwembu loyi xi n’wi rhandzaka “hilaha ku hlawulekeke” u fe rifu ro vava swinene. (Swiv. 8:22, 30) Yehovha u twe ku vava swinene hikwalaho ka rifu ra Yesu.—Yoh. 5:20; 10:17.

5, 6. Yehovha a nga hi chavelela njhani?

5 Hi nga tiyiseka leswaku Yehovha u ta hi chavelela. Kutani loko hi feriwile a hi khongeleni eka Yehovha hi n’wi byela ndlela leyi hi titwaka ha yona. Swa chavelela ku tiva leswaku Yehovha wa ku twisisa ku vava loku hi ku twaka naswona wa hi chavelela! Kambe u hi chavelela njhani?

6 Ndlela yin’wana leyi Xikwembu xi hi chavelelaka ha yona i ku hi nyika “moya lowo kwetsima.” (Mint. 9:31) Moya wa Xikwembu lowo kwetsima wu hi chavelela hi ndlela leyikulu. Yesu u tshembise leswaku Tata wa hina wa le tilweni u ta va nyika “moya lowo kwetsima . . . lava n’wi kombelaka.” (Luka 11:13) Susi loyi ku vulavuriweke ha yena eku sunguleni u ri: “Mikarhi yo tala a hi kombela Yehovha hi xikhongelo leswaku a hi chavelela. Loko hi endla tano a hi titwa hi phyuphyile emianakanyweni.”—Hlaya Vafilipiya 4:6, 7.

YESU MUPRISTA LONKULU LA NGA NI NTWELAVUSIWANA

7, 8. I yini lexi hi tiyisekisaka leswaku Yesu u ta hi chavelela?

7 Ntwelavusiwana lowu Yehovha a nga na wona wu vonake kahle eka marito ni swilo leswi N’wana wakwe Yesu a swi endleke loko a ha ri laha misaveni. (Yoh. 5:19) Yesu a a rhumeriwe ku ta chavelela “lava vavisekeke mbilu” ni “hinkwavo lava rilaka.” (Esa. 61:1, 2; Luka 4:17-21) Ku engetela kwalaho, a ri ni ntwelavusiwana, a twa ku vava swinene loko a vona vanhu va xaniseka naswona a tiyimisele ku va pfuna.—Hev. 2:17.

8 A swi kanakanisi leswaku Yesu loko a ha ri ntsongo, u langutane ni gome ro feriwe hi maxaka ni vanhu lava a a va tiva. Swi tikomba onge tata wakwe wa muwundli Yosefa u fe loko Yesu a ha ri muntshwa. * Anakanya ndlela leyi Yesu loyi a ri ni ntwelavusiwana a titweke ha yona loko a vona mana wakwe ni vamakwavo vakwe va ri ni gome hi nkarhi lowu na yena a ri ni gome.

9. Yesu u wu kombise njhani ntwelavusiwana endzhaku ka rifu ra Lazaro?

9 Loko Yesu a sungula ntirho wakwe wo chumayela u swi kombise erivaleni leswaku wa va twela vanhu lava nga ni gome. Hi xikombiso, anakanya hi leswi a swi endleke endzhaku ko fa ka munghana wakwe lonkulu Lazaro. Hambileswi Yesu  a a swi tiva leswaku u ta pfuxa Lazaro, u twe ku vava swinene hilaha Mariya na Marta a va titwa hakona. U twe ku vava swinene lerova a kala a rila.—Yoh. 11:33-36.

10. Hi nga tiyiseka njhani leswaku ninamuntlha Yesu wa ku twa ku vava loku hi ku twaka?

10 Ntwelavusiwana lowu Yesu a wu kombiseke wu hi chavelela njhani namuntlha? Matsalwa ma vula leswaku “Yesu Kreste wa ha ri yena tolo ni namuntlha, ni hi masiku.” (Hev. 13:8) Leswi a nga “Murhangeri Lonkulu wa vutomi” u swi tiva kahle leswaku swi njhani ku va ni gome naswona “wa swi kota ku . . . pfuna lava ringiwaka.” (Mint. 3:15; Hev. 2:10, 18) Kutani hi nga tiyiseka leswaku ninamuntlha Kreste wa ha va twela vusiwana lava nga ni gome naswona u va chavelela ‘hi nkarhi lowu faneleke.’—Hlaya Vaheveru 4:15, 16.

“NCHAVELELO LOWU HUMAKA EMATSALWENI”

11. Hi wahi matsalwa lama ku chavelelaka swinene?

11 Rungula leri vulavulaka hi gome leri Yesu a veke na rona endzhaku ka ku fa ka Lazaro, ko va rin’wana ra marungula lama chavelelaka lama kumekaka eBibeleni ku nga Rito ra Xikwembu leri chavelelaka. A swi hlamarisi leswi “swilo hinkwaswo leswi tsariweke enkarhini lowu hundzeke swi [tsaleriweke] ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Rhom. 15:4) Loko u ri ni gome hileswi u feriweke, na wena matsalwa yo tanihi lama landzelaka ma nga ku chavelela:

  • “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”Ps. 34:18, 19.

  • “Loko miehleketo ya mina leyi ndzi karhataka yi tele endzeni ka mina, Nchavelelo wa wena [Yehovha] wu sungule ku vukarha moyaxiviri wa mina.”—Ps. 94:19.

  • “Onge Hosi ya hina Yesu Kreste hi byakwe ni Xikwembu Tata wa hina, lava hi rhandzeke naswona va hi nyikeke nchavelelo lowu nga heriki ni ntshembo lowunene hi musa lowu nga faneriwiki, va nga chavelela timbilu ta n’wina ni ku mi tiyisa.”2 Tes. 2:16, 17. *

VANDLHA RI NGA VA CHAVELELA NJHANI LAVA FERIWEKE?

12. Hi yihi ndlela yin’wana ya nkoka leyi hi nga va chavelelaka ha yona lava feriweke?

12 Lava feriweke va nga chaveleriwa hi vandlha ra Vukreste. (Hlaya 1 Vatesalonika 5:11.) U nga va chavelela ni ku va tiyisa njhani lava moya wa vona wu “tshovekeke”? (Swiv. 17:22) Tsundzuka leswaku ku ni “nkarhi wa ku miyela ni nkarhi wa ku vulavula.” (Ekl. 3:7) Dalene loyi a nga noni u ri: “Lava feriweke va lava ku phofula ndlela leyi va titwaka ha yona. Kutani ndlela ya nkoka leyi u nga va chavelelaka ha yona, i ku va yingisa loko va vulavula handle ko va nghena enon’wini.” Junia loyi buti wakwe a tisungeke u ri: “Hambileswi u nga ta ka u nga yi twisisi hi ku helela ndlela leyi lava feriweke va khumbekeke ha yona, xa nkoka hileswaku u lava ku twisisa ndlela leyi va titwaka ha yona.”

13. I yini leswi hi faneleke hi swi tsundzuka hi vanhu lava feriweke?

13 Tsundzuka leswaku loko vanhu va feriwile, ndlela leyi va titwaka ha yona a yi fani. Mikarhi yin’wana swa tika ku va munhu a phofula ndlela leyi a khumbekeke ha yona. Rito ra Xikwembu ri ri: “Mbilu ya wu lemuka mbitsi wa moyaxiviri wa munhu, naswona a nga kona mufambi la nga nghenaka eku tsakeni ka yona.” (Swiv. 14:10) Hambiloko munhu la feriweke a phofula ndlela leyi a titwaka ha yona,  mikarhi yo tala a swi olovi ku twisisa leswi a swi vulaka.

14. Hi nga va chavelela njhani lava feriweke hileswi hi swi vulaka?

14 Mikarhi yin’wana swi nga tika ku tiva leswi u nga swi vulaka loko u chavelela munhu la feriweke. Nilokoswiritano, Bibele yi vula leswaku “ririmi ra lavo tlhariha ra horisa.” (Swiv. 12:18) Vo tala va kume marito lawa va nga chavelelaka lava feriweke ha wona eka broxara leyi nge, Loko U Feriwa Hi Loyi U N’wi Rhandzaka. * Kambe hakanyingi lexi pfunaka ngopfu i ku “rila ni vanhu lava rilaka.” (Rhom. 12:15) Gaby la loveriweke hi nuna u ri: “Loko ndzi ku swi khumbu, a ndzi rila naswona loko vamakwerhu va rila na mina a ndzi chaveleleka. Sweswo swi endle ndzi xiya leswaku vamakwerhu va twa ku vava ku fana na mina.”

15. Hi nga va chavelela njhani lava feriweke loko swi hi tikela ku va chavelela hi ku kongoma? (Nakambe vona bokisi leri nge, “ Marito Lama Chavelelaka.”)

15 Loko swi ku tikela ku vulavula ni munhu la feriweke hi ku kongoma, u nga n’wi chavelela hi ku n’wi tsalela khadi, imeyili, u n’wi rhumela rungula hi selifoni kumbe u n’wi tsalela papila. U nga ha n’wi tshahela tsalwa leri chavelelaka, u n’wi tsalela leswi a swi ku tsakisa hi mufi kumbe leswi u swi tsundzukaka leswi mi tshameke mi tiphina ha swona. Junia u ri: “Rungula ro koma leri khutazaka ni ku rhambiwa hi Vakrestekulorhi swi ndzi chavelerile swinene. Sweswo hinkwaswo swi ndzi endle ndzi xiya leswaku va ndzi rhandza naswona va khathala hi mina.”

16. Hi yihi ndlela yin’wana leyi hi nga va chavelelaka ha yona lava feriweke?

16 Ndlela yin’wana leyi hi nga va chavelelaka  ha yona lava feriweke, i ku khongela na vona kumbe ku va katsa eswikhongelweni. Hambileswi swi nga ku tikelaka ku khongela ni loyi a feriweke hi nkarhi wolowo wo tika, kambe loko u khongela swi huma embilwini hambi u ri karhi u rila kumbe u mpfikula, xikhongelo xexo xi nga n’wi chavelela swinene. Dalene u ri: “Mikarhi yin’wana loko vamakwerhu va xisati va ta ndzi chavelela, a ndzi va kombela leswaku va khongela na mina. Hakanyingi loko va sungula ku khongela marito ya vona a ma nga humi kahle hikwalaho ka leswi a va twa ku vava kambe loko va ya emahlweni ni xikhongelo leswi a va swi vula a swi ndzi chavelela swinene. Ripfumelo, rirhandzu ni ndlela leyi a va ndzi twela ha yona swi tiyise ripfumelo ra mina.”

U NGA TSHIKI KU CHAVELELA LAVA FERIWEKE

17-19. Hikwalaho ka yini hi nga fanelanga hi tshika ku chavelela lava feriweke?

17 Van’wana ku hundza nkarhi wo leha va ha ri ni gome kasi van’wana va hatla va hlakarhela. Hambeta u va chavelela niloko maxaka ni vanghana va mukile, niloko se ku hundze tin’hweti va feriwile. “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” (Swiv. 17:17) Vamakwerhu va nga n’wi chavelela swinene makwerhu la feriweke ku nga khathariseki nkarhi lowu a wu hetaka a ri ni gome.—Hlaya 1 Vatesalonika 3:7.

18 Tsundzuka leswaku lava feriweke va nga va ni mabibi ya mbilu loko ku fika siku leri va cateke ha rona, va twa vuyimbeleri byo karhi, va vona swinepe, va endla mitirho yo karhi, va twa nun’hwelo ni mpfumawulo wo karhi kumbe loko ku fika nguva yo karhi. Lava feriweke va nga ha twa ku vava loko va ya enhlengeletanweni kumbe eXitsundzuxweni ro sungula endzhaku ko feriwa hi vanghana va vona va vukati. Makwerhu un’wana wa xinuna u ri: “A swi nga ndzi dyisi byi rhelela ku ehleketa leswaku loko siku leri hi cateke ha rona ri fika ndzi ta va ndzi ri ndzexe. Kambe vamakwerhu va nga ri vangani va ndzi endlele xinkhubyana leswaku ndzi nga tikumi ndzi ri ndzexe.”

19 Kambe u nga rivali leswaku lava feriweke va lava ku tshama va ri karhi va khutaziwa ku nga ri ntsena hi masiku yo hlawuleka. Junia u ri: “Ku endzeriwa hi vamakwerhu nkarhi ni nkarhi ku nga ri ntsena hi masiku yo hlawuleka yo tanihi siku leri u cateke ha rona swa chavelela swinene. Ku endzeriwa hi vamakwerhu u nga swi rindzelanga i swa nkoka naswona swa chavelela.” Ntiyiso wa mhaka hileswaku a hi nge swi koti ku herisa ku vava loku munhu la feriweke a ku twaka, kambe hi nga n’wi chavelela hi ku endla matshalatshala lawa hi nga ma kotaka leswaku hi n’wi seketela. (1 Yoh. 3:18) Gaby u ri: “Ndzi nkhensa Yehovha leswi a tirhiseke vakulu leswaku va ndzi seketela hi nkarhi wolowo wo tika. Va endle ndzi swi xiya leswaku Yehovha wa ndzi rhandza hakunene.”

20. Ha yini switshembiso leswi Yehovha a hi tshembiseke swona swi chavelela?

20 Hakunene swa chavelela ku tiva leswaku Yehovha Xikwembu xa nchavelelo hinkwawo, u ta herisa gome leri vangiwaka hi ku feriwa kutani a hi chavelela hilaha ku nga heriki loko “hinkwavo lava nga eka masirha-bako ya xitsundzuxo va . . . twa rito ra [Kreste] kutani va huma”! (Yoh. 5:28, 29) Xikwembu xi hi tshembisa leswaku xi “ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.” (Esa. 25:8) Kutani ematshan’weni yo “rila ni vanhu lava rilaka” vanhu hinkwavo emisaveni va ta “[tsaka] ni vanhu lava tsakaka.”—Rhom. 12:15.

^ ndzim. 8 Ro hetelela laha ku vulavuriweke hi Yosefa hiloko Yesu a ri ni malembe ya 12. Loko Yesu a endla singita rakwe ro sungula, a cinca mati ma va vhinyo, vito ra Yosefa a ri boxiwanga naswona a ka ha tlhelanga ku vulavuriwa ha yena. Loko Yesu a beleriwe emhandzini, u kombele muapostola Yohane leswaku a sala a hlayisa Mariya, ku nga marito lawa Yesu a a nga ta ma vula loko Yosefa a ha hanya.—Yoh. 19:26, 27.

^ ndzim. 11 Matsalwa man’wana lama chaveleleke vanhu vo tala hi lama landzelaka: Pisalema 20:1, 2; 31:7; 38:8, 9, 15; 55:22; 121:1, 2; Esaya 57:15; 66:13; Vafilipiya 4:13; na 1 Petro 5:7.

^ ndzim. 14 Nakambe vona xihloko lexi nge, “Chavelela Lava Feriweke Hilaha Yesu A Endleke Hakona” eka Xihondzo xo Rindza xa November 1, 2010.