Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza (Nkandziyiso Wa Vandlha)  |  January 2018

Xitsundzuxo Xi Endla Leswaku Hi Va Ni Vun’we

Xitsundzuxo Xi Endla Leswaku Hi Va Ni Vun’we

“Mawaku ndlela leyi swi nga swinene ha yona . . . Loko vamakwavo va tshama swin’we hi vun’we!”—PS. 133:1.

TINSIMU: 149, 99

1, 2. Hi xihi xiendlakalo xa 2018 lexi nga ta endla leswaku hi va ni vun’we, naswona xi ta swi endla njhani? (Vona xifaniso lexi nga eku sunguleni ka xihloko lexi.)

HI TI 31 ta March 2018, loko dyambu ri ri karhi ri pela Timbhoni ta Yehovha ni lava swi tsakelaka va ta hlengeletana leswaku va tlangela Xilalelo xa Hosi xa lembe ni lembe. Hi siku rero vanhu va timiliyoni va ta hlengeletana leswaku va Tsundzuka rifu ra Kreste. Xiendlakalo lexi xa lembe ni lembe, hi xona lexi endlaka leswaku vanhu va Xikwembu va va ni vun’we byo hlamarisa eka pulanete leyi ya Misava!

2 Anakanya ndlela leyi Yehovha na Yesu va tsakaka ha yona loko va vona timiliyoni ta vanhu emisaveni ti khitikana leswaku ti va kona eka xiendlakalo lexi xo hlawuleka kukondza siku ri hela. Bibele yi profete leswaku ku ta va ni “ntshungu lowukulu, lowu [ku nga riki] na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato” naswona wu ta huwelela wu ku: “Ku ponisiwa hi ku kolota Xikwembu xa hina, lexi tshameke exiluvelweni, ni le ka Xinyimpfana.” (Nhlav. 7:9, 10) Swa tsakisa leswi Xitsundzuxo xa lembe ni lembe xi endlaka leswaku Yehovha na Yesu va dzunisiwa hi ndlela yoleyo!

3. Hi swihi swivutiso leswi nga ta hlamuriwa eka xihloko lexi?

 3 Xihloko lexi, xi ta hlamula swivutiso swo fana ni leswi landzelaka. (1) Xana ha un’we wa hina a nga xi lunghiselela njhani Xitsundzuxo leswaku a ta vuyeriwa? (2) Xitsundzuxo xi endla leswaku hi va ni vun’we hi tindlela tihi? (3) Xana wena u nga endla yini leswaku u kondletela vun’we? (4) Xana hi ta kala hi va ni xitsundzuxo xo hetelela? Loko swi ri tano, rini?

KU LUNGHISELELA HI NDLELA LEYI NGA TA ENDLA LESWAKU HI VUYERIWA

4. Ha yini swi ri swa nkoka ku va kona eXitsundzuxweni mikarhi hinkwayo handle ka loko swi boha ntswii ku xwa?

4 Anakanyisisa hi nkoka wo va kona eXitsundzuxweni. Tsundzuka leswaku minhlangano ya vandlha i xiphemu xa vugandzeri bya hina. Phela Yehovha na Yesu va va vona lava endlaka matshalatshala ya ku va kona eka nhlangano lowu wa nkoka swinene elembeni. Hi lava va swi vona leswaku a hi nge xwi eXitsundzuxweni handle ka loko hi vabya swinene kumbe swiyimo swa hina swi boha tswii! Loko hi kombisa hi swiendlo leswaku minhlangano i ya nkoka eka hina hi endla leswaku Yehovha a vona swi fanerile ku hlayisa mavito ya hina ‘ebukwini ya xitsundzuxo’ ku nga ‘buku ya vutomi’ leyi nga ni mavito ya vanhu lava nga ta kuma vutomi lebyi nga heriki.—Mal. 3:16; Nhlav. 20:15.

5. Loko siku ra Xitsundzuxo ri ri karhi ri tshinela, hi nga tikambela njhani ‘ku vona loko ha ha ri eripfumelweni’?

5 Loko siku ra Xitsundzuxo ri ri karhi ri tshinela hi nga tivekela nkarhi wo khongela ni ku kambisisa vuxaka bya hina na Yehovha hi vukheta. (Hlaya 2 Vakorinto 13:5.) Hi nga swi endla njhani sweswo? Hi ku ‘tikambela ku vona loko ha ha ri eripfumelweni.’ Loko hi ri karhi hi endla tano swi ta va swinene ku tivutisa leswi: ‘Xana ndza kholwa hakunene leswaku ndzi le xikarhi ka nhlengeletano leyi nga yona ntsena leyi Yehovha a yi tirhisaka ku hetisisa xikongomelo xakwe? Xana ndzi endla leswi ndzi nga swi kotaka leswaku ndzi chumayela ni ku dyondzisa mahungu lamanene ya Mfumo? Xana swiendlo swa mina swa kombisa leswaku ndza tshemba leswaku hi hanya emasikwini ya makumu ni leswaku Mfumo wa Sathana wu le kusuhi ni ku herisiwa? Xana ndza ha tshemba Yehovha na Yesu Kreste hi ndlela leyi a ndzi va tshemba ha yona loko ndza ha ku khuvuriwa? (Mat. 24:14; 2 Tim. 3:1; Hev. 3:14) Ku anakanyisisa hi tinhlamulo ta swivutiso leswi, swi ta hi pfuna ku vona leswi hi nga swona hakunene.

6. (a) Hi yihi ndlela yin’we ntsena yo kuma vutomi? (b) Nkulu un’wana u xi lunghiselela njhani Xitsundzuxo lembe ni lembe naswona u nga n’wi tekelela njhani?

6 Hlaya u tlhela u anakanyisisa hi mikandziyiso leyi vulavulaka hi nkoka wa Xitsundzuxo. (Hlaya Yohane 3:16; 17:3.) Hi ta kuma vutomi lebyi nga heriki ntsena loko hi ‘nghenisa vutivi’ hi Yehovha ni ku ‘kombisa ripfumelo’ eka Yesu N’wana Wakwe loyi a tswariweke a ri swakwe. Loko u ri karhi u tilunghiselela Xitsundzuxo, hlawula tinhlokomhaka leti nga ta ku pfuna ku tshinela ekusuhi na Yehovha na Yesu. Xiya leswi makwerhu un’wana la nga ni malembe a ri nkulu a swi endlaka. Se u ni malembe a ri karhi a hlengeleta tinhlokomhaka ta Xihondzo xo Rindza leti vulavulaka hi Xitsundzuxo ni rirhandzu leri Yehovha na Yesu va hi kombeke rona. Loko ku sale mavhiki leswaku Xitsundzuxo xi va kona u hlaya tinhlokomhaka leti a tlhela a anakanyisisa hi nkoka wa Xitsundzuxo. Hi ku famba ka nkarhi, u engetela nhlokomhaka yin’we kumbe timbirhi. Nkulu loyi u kume leswaku hi ku tlhela a hlaya swihloko leswi ni ku anakanyisisa hi ku hlaya ka Bibele ka Xitsundzuxo u dyondza swilo leswintshwa lembe ni lembe. Xa nkoka swinene u xiye leswaku ndlela leyi a rhandzaka Yehovha na Yesu ha yona ya kula lembe ni lembe. Na wena loko wo endla tano u ta antswisa ndlela leyi u rhandzaka Yehovha na Yesu ha yona, naswona sweswo swi ta endla leswaku u vuyeriwa swinene eXitsundzuxweni.

 NDLELA LEYI XITSUNDZUXO XI ENDLAKA LESWAKU HI VA NA VUN’WE HA YONA

7. (a) I yini leswi Yesu a swi khongeleleke hi vusiku bya Xilalelo xa Hosi xo sungula? (b) I yini lexi kombisaka leswaku Yehovha u xi hlamurile xikhongelo xa Yesu?

7 Hi vusiku bya Xilalelo xa Hosi xo sungula Yesu u khongelele leswaku vadyondzisiwa va yena va va ni vun’we a tlhela a va navelela ku tiphina hi vun’we lebyi yena ni Tata wakwe va nga na byona. (Hlaya Yohane 17:20, 21.) Yehovha u xi hlamurile xikhongelo xexo xo hlawuleka xa n’wana wa yena la rhandzekaka naswona sweswi vanhu va timiliyoni va pfumela leswaku Yesu a rhumiwe hi Yehovha. Eka minhlangano hinkwayo ya Timbhoni ta Yehovha, Xitsundzuxo hi xona xi nyikelaka vumbhoni lebyi nga kanakanisiki bya leswaku ti ni vun’we. Vanhu va tinxaka to tala ni va nhlonge yo hambanahambana va hlangana swin’we etindhawini ta vugandzeri emisaveni hinkwayo. Etindhawini tin’wana a swi tolovelekanga kumbe swi languteriwa ehansi ku va vanhu va tinxaka to hambana va hlangana leswaku va ta gandzela swin’we. Kambe vun’we byebyo byi xongile emahlweni ka Yehovha na Yesu!

8. I yini leswi Yehovha a swi byeleke Ezekiyele mayelana ni vun’we?

8 Tanihi leswi hi nga Timbhoni ta Yehovha, a byi hi hlamarisi vun’we lebyi hi tiphinaka hi byona. Phela Yehovha u vule leswaku swi ta endleka. Xiya leswi a swi byeleke muprofeta Ezekiyele mayelana ni ku hlanganisiwa ka minkhavi yimbirhi ‘nkhavi wa Yuda’ ni ‘nkhavi wa Yosefa.’ (Hlaya Ezekiyele 37:15-17.) Eka “Swivutiso Swa Vahlayi,” Xihondzo xo Rindza xa July 2016 xi vula leswi: “Hi ku tirhisa muprofeta wakwe Ezekiyele, Yehovha u vule ka ha ri mahlweni leswaku vanhu vakwe a va ta tlhelela eTikweni leri Tshembisiweke naswona a va ta va ni vun’we tanihi tiko ku fana ni le ku sunguleni. Vuprofeta byebyo byi tlhele byi vula leswaku lava gandzelaka Xikwembu enkarhini wa makumu a va ta va ni vun’we.”

9. Xana ku hetiseka ka vuprofeta bya Ezekiyele ku vonaka njhani lembe ni lembe eXitsundzuxweni?

9 Ku sukela hi lembe ra 1919 ku ya emahlweni, Yehovha u hlele ni ku tlhela a endla leswaku vatotiwa va va ni vun’we hakatsongotsongo kutani ‘nkhavi wa Yuda a wu yimela vatotiwa.’ Hikwalaho loko nkarhi wu ya wu famba lava nga ni ntshembo wo hanya laha misaveni lava fanekiseriwaka hi ‘nkhavi wa Yosefa’ va hlanganisiwile ni vatotiwa kutani mintlawa leyimbirhi yi ve “ntlhambi wun’we.” (Yoh. 10:16; Zak. 8:23) Yehovha u tshembise ku hlanganisa minkhavi leyimbirhi kutani a yi endla nchumu wun’we evokweni rakwe. (Ezek. 37:19) Sweswi mintlawa leyi, yi tirha swin’we hi vun’we ehansi ka Hosi Yesu Kreste loyi hi ku ya hi vuprofeta a vitaniwaka ‘Davhida nandza wa Xikwembu.’ (Ezek. 37:24, 25) Vun’we lebyi hlamuseriweke eka vuprofeta bya Ezekiyele bya vonaka lembe ni lembe loko “tinyimpfu tin’wana” ni masalela ya vatotiwa va hlangana leswaku va tlangela Xitsundzuxo xa rifu ra Kreste! Hambiswiritano, i yini leswi ha un’we wa hina a nga swi endlaka leswaku a hlayisa ni ku kondletela vun’we lebyi?

TINDLELA LETI HI NGA KONDLETELAKA VUN’WE HA TONA

10. Hi nga byi kondletela njhani vun’we evandlheni?

10 Ndlela yin’wana leyi hi nga kondletelaka vun’we ha yona i ku tikarhatela ku titsongahata. Loko Yesu a ri laha misaveni u khutaze vadyondzisiwa va yena leswaku va titsongahata. (Mat. 23:12) Loko hi titsongahata, a hi nge hluriwi hi moya wa misava wa ku tikukumuxa. Ku ri na sweswo, hi ta susumeteleka ku yingisa lava rhangelaka naswona sweswo swi ta endla leswaku vandlha ri va ni vun’we. Ku tlula kwalaho ku titsongahata ka hina ku ta tsakisa Xikwembu hikuva “xi lwisana ni lava titlakusaka, kambe lava titsongahataka xi va nyika musa lowu nga faneriwiki.”—1 Pet. 5:5.

11. Ku anakanyisisa hi leswi swifanekiselo swa Xitsundzuxo swi yimelaka swona swi hi pfuna njhani hi va ni vun’we?

11 Ndlela ya vumbirhi yo kondletela vun’we i ku anakanyisisa hi leswi swifanekiselo leswi tirhisiwaka  eXitsundzuxweni swi vulaka swona. Hi siku ra Xitsundzuxo ngopfungopfu madyambu ya kona, anakanyisisa hi nkoka wa xinkwa lexi nga riki na comela ni vhinyo yo tshwuka. (1 Kor. 11:23-25) Xinkwa xi yimela miri wa Yesu lowu nga riki na xidyoho lowu nyikeriweke wu va xitlhavelo kasi vhinyo yi yimela ngati yakwe leyi halatiweke. Kambe xa nkoka a hi fanelanga hi tiva ntsena ku hlamusela leswi swifanekiselo swi vulaka swona. Tsundzuka leswaku nkutsulo wa xitlhavelo xa Kreste hi wu kume hikwalaho ka rirhandzu lerikulu ra vanhu vambirhi, rirhandzu leri Yehovha a hi kombeke rona hi ku nyikela hi N’wana wa yena ni rirhandzu leri Yesu a hi kombeke rona hi ku pfumela ku hi fela. Ku anakanyisisa hi rirhandzu leri va hi kombeke rona swi ta hi susumetela ku va rhandza. Ndlela leyi hina ni vamakwerhu emisaveni hinkwayo hi rhandzaka Yehovha ha yona yi tiyisa vun’we bya hina.

Loko hi rivalela van’wana hi va hi kondletela vun’we (Vona tindzimana 12, 13)

12. Eka xifaniso xakwe xa hosi ni malandza Yesu u swi kombisa njhani leswaku Yehovha u langutele leswaku hi rivalela van’wana?

12 Ndlela ya vunharhu leyi hi nga vaka na vun’we ha yona i ku rivalela van’wana hi mbilu hinkwayo. Loko hi rivalela lava hi khunguvanyiseke hi kombisa leswaku ha wu tlangela nkutsulo wa xitlhavelo xa Kreste lowu endleke swi koteka ku va hi rivaleriwa swidyoho swa hina. Anakanya hi xikombiso xa Yesu lexi kumekaka eka Matewu 18:23-34. Tivutise leswi: ‘Xana ndza swi tirhisa leswi Yesu a swi dyondziseke? Xana loko ndzi tirhisana na vamakwerhu ndzi tikarhatela ku va twisisa kumbe ndzi hatla ndzi va helela mbilu? Xana ndzi tiyimiserile ku rivalela lava ndzi khunguvanyiseke?’ I ntiyiso leswaku loko munhu a ku endlele swihoxo leswikulu swi nga ha ku tikela ku va u n’wi rivalela hileswi u nga hetisekangiki. Kambe xifaniso lexi xa Yesu xi hi dyondzisa leswi Yehovha a swi languteleke eka hina. (Hlaya Matewu 18:35.) Yesu u swi veke erivaleni leswaku Yehovha a nge hi rivaleli loko hina hi nga va rivaleli vamakwerhu loko va hi khunguvanyisile. Hakunene leyi i mhaka ya nkoka swinene! Loko hi rivalela van’wana hilaha Yesu a hi dyondziseke hakona hi tiyisa vun’we bya hina.

13. Xana ku tikarhatela ku va ni ku rhula ni vamakwerhu swi byi kondletela njhani vun’we?

13 Loko hi rivalela van’wana hi kombisa leswaku hi lava ku kondletela ku rhula. Tsundzuka  xitsundzuxo xa muapostola Pawulo xa leswaku hi fanele hi “tiyimisela hi mbilu hinkwayo ku hlayisa vun’we bya moya exibohweni lexi hlanganisaka xa ku rhula.” (Efe. 4:3) Hi nguva leyi ya Xitsundzuxo, ngopfungopfu madyambu wolawo ehleketisisa swinene hi ndlela leyi u khomaka van’wana ha yona. Tivutise leswi: ‘Xana swa tikomba leswaku mina a ndzi munhu wo rhandza ku khoma vanhu hi mbilu? Xana ndzi tiveka tanihi munhu la kondletelaka ku rhula ni vun’we hambiloko sweswo swi ta ndzi koxa swo karhi?’ Leswi i swivutiso swa nkoka leswi u faneleke u anakanyisisa ha swona hi nkarhi lowu wa Xitsundzuxo.

14. Hi nga swi kombisa njhani leswaku hi “lehiselana mbilu hi rirhandzu”?

14 Ndlela ya vumune yo kondletela vun’we i ku tekelela Yehovha Xikwembu xa rirhandzu, hi rhandza vamakwerhu. (1 Yoh. 4:8) A hi nge vuli leswi hi makwerhu: “Ndzo n’wi rhandza hi ku ndzi to yini kambe a ndzi n’wi koti”! Ku ehleketa hi ndlela yoleyo swi hambana ni xitsundzuxo xa Pawulo lexi nge, “mi lehiselana mbilu hi rirhandzu.” (Efe. 4:2) Xiya leswaku a nga vulanga ntsena a ku: “mi lehiselana mbilu.” U vule leswaku hi endla tano hi “rirhandzu.” Swivulwa leswimbirhi swa hambana. Emavandlheni ya hina hi na vamakwerhu vo hambanahambana lava Yehovha a va kokeke. (Yoh. 6:44) Leswi Yehovha a nga va koka swi vula leswaku wa va rhandza. Kutani xana hi nga vurisa ku yini leswaku makwerhu wo karhi a hi n’wi koti? A hi fanelanga hi tsona vamakwerhu rirhandzu leri Yehovha a lavaka hi va komba rona!—1 Yoh. 4:20, 21.

XANA XITSUNDZUXO XO HETELELA XI TA VA KONA RINI?

15. Hi swi tiva njhani leswaku ku ta va ni Xitsundzuxo xo hetelela?

15 Siku rin’wana Xitsundzuxo hi ta xi khoma ro hetelela. Hi swi tiva njhani sweswo? Eka papila ra yena ro sungula leri yaka eka Vakorinto, Pawulo u tsalele Vakreste lava totiweke a vula leswaku loko va tsundzuka rifu ra Yesu lembe ni lembe ‘va hambeta va huwelela rifu ra Hosi, yi kondza yi fika.’ (1 Kor. 11:26) Rito leri nge “fika” ri vulavula hi xiendlakalo lexi fanaka xa ku “humelela” ka Yesu lexi boxiweke eka vuprofeta byakwe mayelana ni masiku ya makumu. Loko a vulavula hi nhlomulo lowukulu lowu nga kwala nyongeni Yesu u te: “Xikombiso xa N’wana wa munhu xi ta humelela etilweni, endzhaku ka sweswo tinyimba hinkwato ta misava ti ta tiba hi xirilo, kutani ti ta vona N’wana wa munhu a ta a ri emapapeni ya tilo hi matimba ni ku vangama lokukulu. [Yesu] u ta rhuma tintsumi takwe hi mpfumawulo lowukulu wa mhalamhala, ti ta hlengeleta vahlawuriwa va yena va huma etimhehweni ta mune, ku suka emakun’wini man’wana ya matilo ku ya emakun’wini man’wanyana.” (Mat. 24:29-31) Ku ‘hlengeletiwa loku ka vahlawuriwa’ ku kombetela eka nkarhi lowu Vakreste hinkwavo lava totiweke lava ha riki laha misaveni va nga ta kuma hakelo ya vona ya le tilweni. Sweswo swi ta endleka endzhaku ka xiphemu xo sungula xa nhlomulo lowukulu kambe ku nga si sungula nyimpi ya Armagedoni. Hikwalaho, lava 144 000 hinkwavo va ta va va ri na Yesu loko a hlula tihosi ta misava. (Nhlav. 17:12-14) Xitsundzuxo lexi endzhaku ka xona ku nga ta va ni ku hlengeletiwa loku, ka vatotiwa ka le tilweni xi ta va xi ri xo hetelela hikuva Yesu u ta va a ‘fikile.’

16. Ha yini u tiyimisele ku va kona eXitsundzuxweni xa lembe leri?

16 Onge hi nga tiyimisela ku va kona eXitsundzuxweni hi ti 31 ta March 2018 leswaku hi ta vuyeriwa. Naswona a hi kombeleni Yehovha leswaku a hambeta a hi pfuna hi va ni vun’we! (Hlaya Pisalema 133:1.) U nga rivali leswaku siku rin’wana Xitsundzuxo lexi hi xi tlangelaka xi ta va xo hetelela. Loko swa ha ri tano, onge hi nga endla hinkwaswo leswi hi nga swi kotaka leswaku hi va kona, hi tlhela hi tiphina hi vun’we lebyi hi vaka na byona eXitsundzuxweni.