Eka “Vuhundzuluxeri Bya Misava Leyintshwa Bya Matsalwa Yo Kwetsima” lebyi pfuxetiweke bya 2013 (leyi nga si humesiwaka hi Xitsonga), Pisalema 144:12-15 yi tirha eka vanhu va Xikwembu. Kambe eka vuhundzuluxeri bya misava leyintshwa bya khale tindzimana leti ti tirha eka vanhu vambe vo homboloka lava boxiweke eka ndzimana 11. Hikwalaho ka yini ku endliwe ku cinca loku?

Marito ya Xiheveru lama tirhisiweke ma pfumelela mavekelo wolawo hinkwawo. Hikwalaho, marito ya vuhundzuluxeri lebyi pfuxetiweke ma seketeriwe eka tinhla leti landzelaka:

  1. Marito lama pfuxetiweke ma fambisana ni ririmi ni grama ya kona. Leswaku hi twisisa leswaku Pisalema 144:12-15 yi hlangana njhani ni tindzimana leti nga endzhaku ka yona, hi fanele hi twisisa rito leri nga eku sunguleni ka ndzimana 12 leri humaka eka rito ra Xiheveru leri vuriwaka asher. Rito asher ri nga tirhisiwa hi tindlela to hambana. Hi xikombiso, ri nga tirhisiwa ku yimela riviti, ku fana na rito “loyi”. Eka vuhundzuluxeri lebya khale ku tirhisiwe rito, “loyi.” Hi swona leswi endleke leswaku swilo leswinene leswi boxiweke eka tindzimana 12 ku ya eka 14 swi tirhisiwa eka lowo homboloka loyi a boxiweke eka tindzimana leti nga endzhaku. Hambiswiritano, rito asher ri nga ha tlhela ri vula vuyelo kumbe switandzhaku naswona ri nga hundzuluxeriwa ri va, “leswi” kumbe “kutani.” Rito, “kutani” hi rona leri tirhisiweke eka vuhundzuluxeri lebyi pfuxetiweke bya 2013 ni le ka Tibibele tin’wana.

  2. Marito lama pfuxetiweke ma fambisana kahle na pisalema hinkwayo. Leswi ku tirhisiweke rito, “kutani” eka ndzimana 12, swi vula leswaku mikateko leyi landzelaka leyi boxiweke eka tindzimana 12 ku ya eka 14 yi tirha eka lavo lulama lava kombelaka ku ‘ntshunxiwa ni ku kutsuriwa’ eka lowo homboloka (ndzimana 11). Ku antswisiwa loku ku tlhele ku kombisiwa ni le ka ndzimana 15 laha ku humelelaka xiga lexi nge, “va tsaka” kambirhi. Hi marito man’wana, eka swiyimo leswi ha swimbirhi, loko yi vulavula hi vanhu lava tsakeke yi kombetela eka vanhu van’we, “lava Xikwembu xa vona ku nga Yehovha!” Nakambe tsundzuka leswaku Xiheveru xa khale a xi nga ri na swona swihikahato, swo fana ni mimfungho ya ntshaho. Hikwalaho, leswaku vahundzuluxeri va twisisa leswi ndzimana yi vulaka swona, a va fanele va ma tekela enhlokweni mavekelo ya swiphato swa Xiheveru, mongo swin’we ni tindzimana tin’wana ta Bibele leti yelanaka na yona.

  3. Marito ya vuhundzuluxeri lebyi pfuxetiweke ma pfumelelana ni tindzimana tin’wana ta Bibele leti boxaka mikateko leyi Xikwembu xi yi tshembisaka vanhu vo tshembeka. Leswi ku antswisiweke mavekelo ya rito asher, pisalema yoleyo yi kombisa ntshembo lowu Davhida a ri na wona wa leswaku endzhaku ka loko Xikwembu xi kutsule tiko ra Israyele eka valala, a xi ta va katekisa hi ntsako ni ku eneriseka. (Lev. 26:9, 10; Det. 7:13; Ps. 128:1-6) Hi xikombiso Deteronoma 28:4 yi ri: “Mbhandzu wa khwiri ra wena wu ta katekisiwa ni mbhandzu wa misava ya wena ni mbhandzu wa xifuwo xa wena, rhole ra tihomu ta wena ni swinyimpfana swa ntlhambi wa wena wa tinyimpfu.” Entiyisweni, hi nkarhi wa ku fuma ka Solomoni n’wana wa Davhida, tiko a ri tiphina hi ku rhula ni ntsako. Ku tlula kwalaho, swin’wana leswi a swi endleka hi nkarhi wa ku fuma ka Solomoni swi kombisa leswi nga ta endleka hi nkarhi wa ku fuma ka Mesiya.—1 Tih. 4:20, 21; Ps. 72:1-20.

Xo hetelela, marito lama antswisiweke eka Pisalema 144 a ma yi cinci ndlela leyi hi ti twisisaka ha yona tidyondzo ta Bibele. Hambiswiritano, ma endla leswaku pisalema yoleyo hinkwayo yi pfumelelana ni ntshembo lowu ku nga khale malandza ya Yehovha ma ri na wona, leswaku lavo homboloka va ta herisiwa kutani lavo lulama va tiphina hi ku rhula ni ntsako hilaha ku nga heriki.—Ps. 37:10, 11.