Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) NOVEMBER 2016

Xana Rito Ra Xikwembu I Ra Nkoka Swinene Eka Wena?

Xana Rito Ra Xikwembu I Ra Nkoka Swinene Eka Wena?

“Loko mi amukela rito ra Xikwembu, . . . mi ri amukerile . . . ku nga ri kukotisa rito ra vanhu, kambe, mi ri amukele hilaha ri nga hakona hakunene rito ra Xikwembu.”—1 TES. 2:13.

TINSIMU: 114, 113

1-3. I yini leswi nga ha vaka swi vange swiphiqo exikarhi ka Efodiya na Sintika naswona sweswo hi nga swi papalata njhani? (Vona xifaniso lexi nga eku sunguleni ka xihloko lexi.)

MALANDZA ya Yehovha ma yi xixima swinene Bibele leyi nga buku ya Xikwembu. Tanihi leswi hi nga hetisekangiki, minkarhi yin’wana hi nyikiwa ndzayo ya le Matsalweni. Xana hi endla yini loko hi tshinyiwa? Anakanya hi xikombiso xa Efodiya na Sintika Vakreste va le nkarhini wa vaapostola. Ku tshame ku va ni swiphiqo leswikulu exikarhi ka vavasati lava, lava totiweke. Xana hi swihi swiphiqo swa kona? Bibele a yi swi boxi. Kambe a hi xiyeni xikombiso xa leswi nga ha vaka swi endlekile.

2 A hi nge Efodiya u rhambe vamakwerhu vo karhi exinkhubyanini ekaya kakwe. Sintika a nga rhambiwanga, kambe u twile hi ta xinkhubyana lexi ni leswaku a xi tsakisa. Sintika a nga ha va a te: ‘A ndzi swi tshembi leswaku i Efodiya loyi a nga ndzi rhambangiki! A ndzi anakanya leswaku hi vanghana lavakulu.’ Sintika u sungule ku vona onge Efodiya a nga n’wi rhandzi naswona a n’wi papalata. Hilaha ku fanaka Sintika u endle xinkhubyana, laha na yena a rhambeke vamakwerhu  hinkwavo lava a va rhambiwe hi Efodiya kambe yena a nga n’wi rhambanga. Xiphiqo lexi veke kona exikarhi ka Efodiya na Sintika xi nga ha va xi endle leswaku ku nga vi na ku rhula evandlheni. Hambileswi Bibele yi nga boxiki leswi endlekeke kambe swi tikomba onge vamakwerhu lava va tirhise ndzayo ya rirhandzu leyi Pawulo a va nyikeke yona.—Filp. 4:2, 3

3 Swiyimo swo fana ni leswi swa endleka emavandlheni ya hina namuntlha naswona minkarhi yin’wana swi vanga swiphiqo. Hambiswiritano, swiphiqo swa muxaka lowu swi nga lulamisiwa kumbe ku papalatiwa loko hi tirhisa ndzayo leyi kumekaka eRitweni ra Xikwembu. Loko hi teka Rito ra Xikwembu ri ri ra nkoka swinene evuton’wini bya hina hi ta endla hinkwaswo leswi ri swi vulaka.—Ps. 27:11.

BIBELE YI HI DYONDZISA NDLELA YO LAWULA KU HLUNDZUKA KA HINA

4, 5. Hi yihi ndzayo leyi Rito ra Xikwembu ri yi nyikelaka mayelana ni ku hlundzuka?

4 A swi olovi ku lawula ku hlundzuka ka hina loko hi khomiwe hi ndlela yo biha. Hi nga ha twa ku vava swinene loko hi khomiwa hi ndlela yo biha hikwalaho ka ndhavuko wa hina, muvala wa hina kumbe ndlela leyi hi langutekaka ha yona. Swi nga hi twisa ku vava swinene ngopfungopfu loko ku ri makwerhu loyi a hi khomeke hi ndlela yo biha! Xana Rito ra Xikwembu ri nga hi pfuna loko vanhu van’wana va hi twisa ku vava?

5 Ku sukela eku sunguleni, Yehovha u vone ndlela leyi vanhu va hanyisanaka ha yona. U xiya ndlela leyi hi titwaka ha yona swin’we ni leswi hi swi endlaka. Loko hi khunguvanyekile hi nga vula ni ku endla swilo leswi hi nga tisolaka ha swona enkarhini lowu taka. Ku ta va ku ri vutlhari loko hi tirhisa ndzayo ya le Bibeleni leswaku yi hi pfuna ku lawula ku hlundzuka ka hina ni ku papalata ku hatlisela ku hlundzuka! (Hlaya Swivuriso 16:32; Eklesiasta 7:9.) A swi kanakanisi leswaku hinkwerhu ka hina hi fanele hi tikarhatela ku rivalela van’wana ni ku nga hatliseli ku hlundzuka. Yehovha na Yesu va swi teka swi ri nkoka ku rivalela van’wana. (Mat. 6:14, 15) Xana u fanele u antswisa ndlela leyi u rivalelaka van’wana ha yona ni ku lawula ndlela leyi u titwaka ha yona?

6. Ha yini hi fanele hi tivonela malunghana ni ku kariha?

6 Vanhu lava tsandzekaka ku tikhoma loko va hlundzukile minkarhi yo tala va kariha ngopfu. Hikwalaho ka sweswo vanhu van’wana a va swi tsakeli ku va na vona. Munhu loyi a kariheke a nga va ni nkucetelo wo biha evandlheni. A nga ha ringeta ku fihla ku kariha kumbe rivengo rakwe kambe mianakanyo yakwe yo biha yi “ta fununguriwa enhlengeletanweni.” (Swiv. 26:24-26) Kambe vakulu va nga swi kota ku pfuna makwerhu yoloye ku xiya leswaku ku kariha, rivengo ni xikhomela a swi amukeleki enhlengeletanweni ya Xikwembu. Rito ra Xikwembu ri swi veka erivaleni sweswo. (Lev. 19:17, 18; Rhom. 3:11-18) Xana wa ri pfumelela leswaku ri ku kongomisa?

YEHOVHA WA HI KONGOMISA

7, 8. (a) Yehovha u yi kongomisa njhani nhlengeletano yakwe ya laha misaveni? (b) Hi swihi swileriso swin’wana leswi kumekaka eRitweni ra Xikwembu naswona ha yini hi fanele hi swi yingisa?

7 Yehovha u kongomisa ni ku phamela lava nga enhlengeletanweni yakwe ya laha misaveni hi ku tirhisa “hlonga ro tshembeka ni ro tlhariha” leri kongomisiwaka hi Kreste “nhloko ya vandlha.” (Mat. 24:45-47; Efe. 5:23) Ku fana ni huvo leyi fumaka ya le nkarhini wa vaapostola, hlonga leri ra swi xiya leswaku rungula leri nga eBibeleni i ra nkoka swinene. (Hlaya 1 Vatesalonika 2:13.) Hi swihi swiletelo kumbe nkongomiso lowu nga eBibeleni lowu nga hi pfunaka?

8 Bibele yi vula leswaku hi fanele hi va kona eminhlanganweni nkarhi ni nkarhi. (Hev. 10:24, 25) Nakambe yi vula leswaku hi fanele hi pfumela eka tidyondzo leti fanaka. (1 Kor. 1:10) Rito ra Xikwembu ri hi byela leswaku hi rhangisa  Mfumo evuton’wini bya hina. (Mat. 6:33) Matsalwa ma tlhela ma kandziyisa leswaku i vutihlamuleri bya hina ku chumayela hi yindlu ni yindlu, etindhawini ta mani na mani ni hi xitshuketa. (Mat. 28:19, 20; Mint. 5:42; 17:17; 20:20) Bibele yi byela vakulu leswaku va fanele va endla leswaku nhlengeletano ya Yehovha yi tshama yi basile. (1 Kor. 5:1-5, 13; 1 Tim. 5:19-21) Yehovha u lava leswaku hinkwavo lava nga enhlengeletanweni yakwe va tshama va basile emirini naswona va gandzela yena ntsena.—2 Kor. 7:1.

9. I mani loyi Yesu a n’wi hlawuleke leswaku a hi pfuna ku twisisa Rito ra Xikwembu?

9 Vanhu van’wana va vona onge va nga swi kota ku twisisa Bibele hi voxe. Hambiswiritano, Yesu u hlawule “hlonga ro tshembeka” leswaku ku va rona ntsena leri hi phamelaka swakudya swa moya. Ku sukela hi 1919, Yesu Kreste u hlawule hlonga rolero leswaku ri pfuna valandzeri vakwe ku yi twisisa kahle Bibele ni ku yingisa nkongomiso wa yona. Loko hi yingisa swiletelo leswi kumekaka eBibeleni hi ta endla leswaku vandlha ri tshama ri basile, ri ri ni ku rhula ni vun’we. Hinkwerhu hi ta va hi endla kahle loko hi tivutisa leswi, ‘Xana ndza wu yingisa nkongomiso lowu Yesu a hi nyikaka wona hi ku tirhisa hlonga ro tshembeka ni ro tlhariha?’

KALICHI YA YEHOVHA YI LE KU TSUTSUMENI SWINENE!

10. Nhlengeletano ya Yehovha ya le tilweni yi hlamuseriwa njhani ebukwini ya Ezekiyele?

10 Bibele yi hi hlamusela hi xiphemu xa nhlengeletano ya Yehovha ya le tilweni. Hi xikombiso, muprofeta Ezekiyele u vone kalichi ya Yehovha leyi yimelaka xiphemu xa nhlengeletano Yakwe ya le tilweni exivonweni. (Ezek. 1:4-28) Yehovha hi yena loyi a fambisaka kalichi leyi, naswona yi ya laha moya wakwe wu lavaka leswaku yi ya kona. Hilaha ku fanaka, nhlengeletano yakwe ya le tilweni yi kongomisa nhlengeletano yakwe ya laha misaveni. Handle ko kanakana kalichi leyi yi le ku tsutsumeni! Anakanya hi ku cinca lokukulu loku veke kona eka nhlengeletano ya Yehovha eka malembe ya khume lama hundzeke, nakambe tsundzuka leswaku hi yena loyi a endlaka leswaku ku va ni ku cinca koloko. Ku nga ri khale Kreste ni tintsumi va ta herisa misava leyi yo homboloka naswona a ku nge he vi na munhu loyi a nga ta thyakisa vito ra Yehovha kumbe a sola ndlela leyi a fumaka ha yona!

Ha va nkhensa swinene vatirhi va ku tirhandzela lava tirhaka hi matimba eka matsima yo aka! (Vona ndzimana 11)

11, 12. Nhlengeletano ya Yehovha yi endle yini?

11 Anakanyisisa hi leswi nhlengeletano ya Yehovha ya laha misaveni yi swi endlaka enkarhini lowu hi hanyaka eka wona. Ntirho wo aka. Vatirhi va madzana a va pfuneta eku akeni ka ntsindza wa Timbhoni ta Yehovha eWarwick, New York le U.S.A. Hi ku kongomisiwa hi Ndzawulo Yo Pulana Ni Ku Aka Ya Misava Hinkwayo, vatirhi vo tala va ku tirhandzela va tirha hi matimba leswaku va aka Tiholo ta Mfumo ni ku engetela miako emarhavini ya hina emisaveni hinkwayo. Ha ma tlangela matshalatshala lama endliwaka hi vatirhi lava va ku tirhandzela lava tirhaka hi ku tiyimisela! Tsundzuka leswaku Yehovha u katekisa vachumayeri va Mfumo emisaveni hinkwayo lava hi ku titsongahata ni ku tshembeka va nyikelaka  hi mali leswaku va seketela matsima lawa.—Luka 21:1-4.

12 Dyondzo. Anakanya hi swikolo swo hambanahambana leswi dyondzisaka dyondzo leyi tlakukeke ya Xikwembu. (Esa. 2:2, 3) Hi ni Xikolo xa Ntirho wa Vuphayona, Xikolo xa Vachumayeri va Mfumo, Xikolo xa Giliyadi, Xikolo xa Lava ha ku Fikaka eBethele, Xikolo xa Valanguteri va Miganga ni Vasati va Vona, Xikolo xa Vakulu va Vandlha, Xikolo xa Vutirheli bya Mfumo ni Xikolo xa Swirho swa Komiti ya Rhavi ni Vasati va Swona. Ha swi xiya leswaku Yehovha wa swi rhandza ku hi dyondzisa! Nakambe tidyondzo ta Bibele ta kumeka ni le ka website ya hina ya jw.org, laha ku nga ni minkandziyiso leyi kumekaka hi tindzimi ta madzana. Website leyi, yi ni tidyondzo leti endleriweke ku pfuna vana ni mindyangu ni xiphemu lexi katsaka swiviko swo hambanahambana leswi khumbaka Timbhoni ta Yehovha. Xana wa yi tirhisa jw.org ensin’wini ni le ka vugandzeri bya ndyangu?

TSHEMBEKA EKA YEHOVHA NI KU SEKETELA NHLENGELETANO YAKWE

13. Hi byihi vutihlamuleri lebyi hi nga na byona tanihi vagandzeri va Yehovha vo tshembeka?

13 Mawaku lunghelo leri hi nga na rona ro va xiphemu xa nhlengeletano ya Yehovha! Leswi hi tivaka leswi Xikwembu xi swi languteleke eka hina swin’we ni milawu ya xona hi ni vutihlamuleri byo xi tsakisaka ni ku seketela vuhosi bya xona. Hambileswi vanhu vo tala va rhandzaka ku endla swilo swo biha kambe hina hi fanele hi ‘venga leswo biha,’ ku fana na Yehovha. (Ps. 97:10) A hi fanelanga hi fana ni vanhu lava nge “leswinene swi bihile nileswaku leswo biha i swinene.” (Esa. 5:20) Leswi hi lavaka ku tsakisa Xikwembu, hi fanele hi lwela ku tshama hi basile emirini, emahanyelweni ni ku tshama hi ri ni vuxaka lebyinene na xona. (1 Kor. 6:9-11) Ha n’wi rhandza Yehovha ni ku titshega ha yena naswona hi kombisa ku tshembeka eka yena hi ku hlawula ku hanya hi milawu yakwe leyi nga le Bibeleni. Nakambe hi endla leswi hi nga swi kotaka leswaku hi hanya hi milawu leyi loko hi ri ekaya, evandlheni, entirhweni, exikolweni ni kun’wana ni kun’wana laha hi nga kona. (Swiv. 15:3) Xiya tindlela tin’wana leti hi nga kombisaka ku tshembeka eka Xikwembu ha tona.

14. Vatswari lava nga Vakreste va nga swi kombisa njhani leswaku va tshembeka eka Xikwembu?

14 Ku kurisa vana. Vatswari lava nga Vakreste va kombisa leswaku va tshembeka eka Yehovha hi ku letela vana va vona hi ku tirhisa Bibele. Vatswari lava chavaka Xikwembu a va kuceteriwi hi mindhavuko ya laha va tshamaka kona loko va kurisa vana va vona. A va endli swilo hilaha vanhu lava nga riki Timbhoni va endlaka hakona. (Efe. 2:2) Nhloko ya ndyangu leyi nga Mukreste a yi nge vuli yi ku: ‘Laha tikweni ra hina, vavasati hi vona va dyondzisaka vana.’ Bibele yi veka mhaka leyi erivaleni loko yi ku: ‘Vatatana, hambetani mi kurisa vana va n’wina hi ku va tshinya ni ku va kongomisa hi mianakanyo ya Yehovha.’ (Efe. 6:4) Vatatana ni vamanana lava chavaka Xikwembu va lava leswaku vana va vona va fana na Samuwele, hikuva Yehovha u n’wi seketerile ku sukela loko a ha ri ntsongo.—1 Sam. 3:19.

15. Hi swi kombisa njhani leswaku ha tshembeka eka Yehovha loko hi endla swiboho leswikulu?

15 Ku endla swiboho. Ndlela yin’wana yo kombisa leswaku ha tshembeka eka Xikwembu i ku lava nkongomiso lowu kumekaka eBibeleni ni le ka nhlengeletano ya xona loko hi endla swiboho leswikulu evuton’wini. Hi xikombiso, xiya mhaka yin’wana leyi khumbaka vatswari vo tala. Swi tolovelekile leswaku vatswari lava tirhaka ematikweni man’wana va rhumela vana lavatsongo leswaku va ya kurisiwa hi maxaka ya vona, leswaku va kota ku ya emahlweni va tirha ni ku endla mali yo tala etikweni leri va nga eka rona. I ntiyiso leswaku lexi i xiboho xa munhu hi yexe, kambe hi fanele hi tsundzuka leswaku Xikwembu xi ri hi ta tihlamulela eka swiboho leswi hi swi endlaka. (Hlaya Varhoma 14:12.) Xana ku ta va ku ri vutlhari  ku endla swiboho leswi khumbaka mindyangu ya hina swin’we ni ntirho wo tihanyisa handle ko rhanga hi kambisisa Bibele? Doo! Hi lava nkongomiso wa Tata wa hina wa le tilweni hikuva hina a hi swi koti ku kongomisa mikondzo ya hina.—Yer. 10:23.

16. Hi xihi xiboho lexi manana un’wana a a fanele a xi endla loko a ha ku veleka n’wana naswona i yini lexi n’wi pfuneke ku endla xiboho lexinene?

16 Wansati un’wana loyi a velekeke n’wana wa jaha loko a ri etikweni rin’wana a a lava ku rhumela n’wana wakwe ekaya, leswaku vatswari vakwe va n’wi kurisa. Loko a ha tikile, Mbhoni yin’wana yi sungule ku dyondza na yena Bibele. U endle nhluvuko hi ku hatlisa naswona u xiye leswaku Xikwembu xi n’wi nyike vutihlamuleri byo kurisa n’wana wakwe ni ku n’wi dyondzisa leswaku a gandzela Yehovha. (Ps. 127:3; Swiv. 22:6) Wansati loyi u phofulele Yehovha, hilaha Matsalwa ma vulaka hakona. (Ps. 62:7, 8) U tlhele a phofulela loyi a a dyondza na yena Bibele ni ku vulavula ni van’wana evandlheni. Ku nga khathariseki ndlela leyi maxaka ni vanghana vakwe a va n’wi tshikilela ha yona leswaku a rhumela n’wana eka vatswari vakwe, u vone swi ri swinene ku va a tikurisela yena. Leswi vandlha ri n’wi seketeleke, swi n’wi tsakise swinene nuna wakwe lerova na yena u sungule ku dyondza Bibele ni ku tlhela a sungula ku ya eminhlanganweni ni nsati swin’we ni n’wana wa vona. Xana u anakanya leswaku manana loyi u swi xiyile leswaku Yehovha u hlamule xikhongelo xakwe lexi humaka embilwini? Hakunene u swi xiyile.

17. Hi wihi nkongomiso lowu hi nyikiweke wona malunghana ni swichudeni swa hina swa Bibele?

17 Yingisa nkongomiso. Ndlela leyinene leyi hi kombisa ku tshembeka eka Xikwembu ha yona i ku yingisa nkongomiso lowu hi nyikiwaka wona hi nhlengeletano ya xona. Hi xikombiso, anakanya hi swiringanyeto leswi hi nyikiweke swona mayelana ni swichudeni swa hina swa Bibele. Ku ringanyetiwe leswaku loko ha ha ku sungula ku dyondza ni munhu buku leyi nge, Xana Bibele Yi Dyondzisa Yini Hakunene? endzhaku ka dyondzo hi fanele hi tirhisa timinete titsongo ku pfuna xichudeni xa hina leswaku xi tolovelana ni nhlengeletano ya Yehovha. Hi nga endla sweswo hi ku tirhisa vhidiyo leyi nge, Ku Endliwa Yini eHolweni Ya Mfumo? ni broxara leyi nge, I Vamani Lava Endlaka Ku Rhandza Ka Yehovha Namuntlha? Ku tlhele ku ringanyetiwa leswaku loko hi heta ku dyondza buku leyi nge Leswi Bibele Yi Swi Dyondzisaka ni xichudeni lexi endlaka nhluvuko, hi fanele hi dyondza na xona buku leyi nge, Tihlayiseni eRirhandzwini Ra Xikwembuhambiloko se xi khuvuriwile. Nhlengeletano yi hi nyike nkongomiso lowu ku endlela leswaku vadyondzisiwa lavantshwa va “tiyisiwa eripfumelweni.” (Kol. 2:7) Xana wa swi yingisa swiringanyeto leswi humaka eka nhlengeletano ya Yehovha?

18, 19. Hi swihi swivangelo swin’wana leswi endlaka hi nkhensa Yehovha?

18 Hi ni swivangelo swo tala swo nkhensa Yehovha! Hi n’wi kolota vutomi bya hina hikuva handle ka yena a hi ta va hi nga ri kona. (Mint. 17:27, 28) U hi nyike nyiko ya risima swinene ku nga Bibele. Ha ri tlangela swinene rungula leri nga eBibeleni naswona hambi ku ri Vakreste va le Tesalonika va ri amukerile Rito ra Xikwembu.—1 Tes. 2:13.

19 Hikwalaho ka Rito ra Xikwembu, hi kote ku tshinela eka Yehovha naswona na yena u tshinela eka hina. (Yak. 4:8) Tata wa hina wa le tilweni u hi nyike lunghelo lerikulu swinene ro va xiphemu xa nhlengeletano yakwe. Ha ri tlangela swinene lunghelo leri! Hi titwa ku fana ni mupisalema loyi a yimbeleleke a ku: “Nkhensani Yehovha, hikuva hi lonene: Hikuva musa wakwe wa rirhandzu i wa hilaha ku nga riki na makumu.” (Ps. 136:1) Eka Pisalema 136, marito lama nge “musa wakwe wa rirhandzu i wa hilaha ku nga riki na makumu” ya humelela ka 26. Loko hi tshembeka eka Yehovha ni nhlengeletano yakwe, hi ta swi xiya leswaku marito lawa i ya ntiyiso hikuva hi ta hanya hilaha ku nga heriki!