Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) NOVEMBER 2016

Rito Leri Vuleke Swo Tala!

Rito Leri Vuleke Swo Tala!

“WANSATI.” Leri i rito leri Yesu a a ri tirhisa loko a vitana vavasati minkarhi yin’wana. Hi xikombiso, loko Yesu a tshungula munhu loyi a a goveke nhlana ku ringana malembe ya 18 u te: “Wansati, u ntshunxiwile eku tsaneni ka wena.” (Luka 13:10-13) Yesu u tlhele a tirhisa rito leri, leri tolovelekeke loko a vulavula ni mana wakwe tanihi leswi a ri tekiwa ri ri leri amukelekaka eminkarhini ya Bibele hileswi a ri kombisa ku xixima. (Yoh. 19:26; 20:13) Kambe a ku ri ni rito rin’wana leri a ri amukeleka ni ku khumba mbilu ku tlula leri.

EBibeleni Yesu u tirhise rito leri kombisaka musa ni ntwelavusiwana loko a vulavula ni wansati loyi a a ri ni vuvabyi byo khuluka ngati ku ringana malembe ya 12. Nawu wa Xikwembu a wu vula leswaku munhu loyi a nga ni vuvabyi byebyo a nga tenganga, leswi vulaka leswaku a a fanele a nga yanga eka Yesu hambi ku ri eka vanhu van’wana. (Lev. 15:19-27) Kambe a a lava ku pfuniwa. Entiyisweni, “a a vangeriwe switlhavi swo tala hi tin’anga to tala, [a a tirhise] xuma xakwe hinkwaxo, kambe a nga pfunekanga, ematshan’weni ya sweswo, ku vava ku nyanyile.”—Mar. 5:25, 26.

Wansati u nghene exikarhi ka ntshungu, a tshinelela Yesu kutani a khumba dziva ra nguvu ya yena ya le handle. Hi ku hatlisa, u horile! Wansati loyi a ehleketa leswaku a nga voniwanga kambe Yesu u vutise a ku: “I mani loyi a nga ndzi khumba?” (Luka 8:45-47) Loko a twa sweswo, wansati loyi u nkhinsame eka Yesu a chuhile “kutani a n’wi byela ntiyiso hinkwawo.”—Mar. 5:33.

Yesu u rhurise mbilu ya wansati loyi hi ku n’wi byela a ku: “Tiya mbilu, n’wananga.” (Mat. 9:22) Hi ku ya hi swidyondzi swa Bibele, rito leri nge “n’wananga,” hi Xiheveru ni Xigriki ri nga tirhisiwa hi ndlela yo gega ku kombisa “musa ni ntwelavusiwana.” Yesu u ye emahlweni a n’wi tiyisekisa a ku: “Ripfumelo ra wena ri ku hanyisile. Famba hi ku rhula, naswona u hanya swinene evuvabyini bya wena bya khombo.”—Mar. 5:34.

“N’wananga.” Leyi i ndlela leyi Bowasi, Muisrayele loyi a fuwile a vitaneke Rhuti lowa Mumowabu ha yona. Rhuti a a ri ni xivangelo xo chava hikuva a a tshovela ensin’wini ya wanuna loyi a nga n’wi tivi. Bowasi u te: “U swi twile n’wananga.” Kutani u byele Rhuti leswaku a ya emahlweni a tshovela ensin’wini yakwe. Hiloko Rhuti a nkhinsama eka Bowasi kutani a n’wi vutisa leswaku ha yini a ve ni tintswalo eka yena hambileswi a nga ri Muisrayele. Bowasi u ye emahlweni a n’wi tiyisekisa a ku: “Ndzi vikeriwe hinkwaswo leswi u swi endleleke n’wingi wa wena [Nawomi la nga noni] . . . Onge Yehovha a nga hakela ndlela leyi u endlaka ha yona.”—Rhu. 2:8-12.

Hakunene Yesu na Bowasi i swikombiso leswinene leswi vakulu va nga swi tekelelaka! Minkarhi yin’wana, vakulu vambirhi va nga endzela makwerhu wa xisati loyi a lavaka ku tsundzuxiwa ni ku khutaziwa hi Matsalwa. Endzhaku ko khongela eka Yehovha va kombela ku kongomisiwa hi yena ni ku yingiserisisa makwerhu loyi hi vurhon’wana, va ta swi kota ku n’wi tiyisa ni ku n’wi chavelela hi Rito ra Xikwembu.—Rhom. 15:4.

DYONDZA SWO TALA

XIHONDZO XO RINDZA

Xana Hakunene Xikwembu Xa Khathala Hi Vavasati?

Xana u anakanya onge Bibele yi langutela vavasati ehansi? Kuma ndlela leyi Xikwembu xi langutaka vavasati ha yona hakunene.