Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NO. 6 2016

 NHLOKOMHAKA YA XIFUNENGETO | I VAMANI LAVA TSHAMAKA ETILWENI?

Swivono Leswi Vulavulaka Hi Lava Tshamaka eTilweni

Swivono Leswi Vulavulaka Hi Lava Tshamaka eTilweni

Bibele yi vulavula hi swivono swo tala leswi hlamarisaka leswi hi pfunaka leswaku hi twisisa swilo leswi endlekaka etilweni. A hi kambisiseni swin’wana swa swivono sweswo. Hambileswi swin’wana swa swona ku ngo va swikombiso ntsena, kambe swi ta ku pfuna leswaku u tiva lava tshamaka etilweni u tlhela u tiva ni ndlela leyi va byi khumbaka ha yona vutomi bya wena.

YEHOVHA U TLAKUKILE SWINENE

“A ku ri ni xiluvelo endhawini ya xona etilweni, naswona a ku ri ni loyi a tshameke exiluvelweni. Kutani loyi a tshameke a a languteka ku fana ni ribye ra yaspere ni ribye ra risima ra muhlovo wo tshwuka, naswona ku ni nkwangulatilo lowu rhendzeleke xiluvelo, lowu langutekaka ku fana ni emeralda.”Nhlavutelo 4:2, 3.

“A wu vangama matlhelo hinkwawo. A ku ri ni nchumu lowu langutekaka ku fana ni vurha, wu vonaka epapeni lerikulu loko mpfula yi na. Ku vangama ematlhelweni hinkwawo a ku languteka hi ndlela yoleyo. A ku ri ku languteka ka xivumbeko xa ku vangama ka Yehovha.”—Ezekiyele 1:27, 28.

Swivono sweswo, leswi kombiweke muapostola Yohane na muprofeta Ezekiyele, swi fanekisela ku vangama ka Yehovha Xikwembu Lexi Tlakukeke, hi swilo leswi hi nga kotaka ku swi vona swo tanihi ribye leri vangamaka, nkwangulatilo ni xiluvelo xa vuhosi. Swi hi byela leswaku ndhawu leyi Yehovha a tshamaka eka yona yi sasekile swinene, ya rhandzeka naswona yi rhulile.

Leswi swi pfumelelana ni marito ya mupisalema, lama nge: “Hikuva Yehovha i nkulu naswona u fanele a dzunisiwa swinene. Wa chaviseka ehenhla ka swikwembu leswin’wana hinkwaswo. Hikuva hinkwaswo swikwembu swa vanhu i swikwembu leswi nga pfuniki nchumu; kambe loko ku ri Yehovha, u endle matilo. Xindzhuti ni ku vangama swi le mahlweni ka yena; ntamu ni ku saseka swi le vukwetsimelweni byakwe.”—Pisalema 96:4-6.

Hambileswi Yehovha a Tlakukeke, wa hi rhamba leswaku hi tshinela eka yena hi xikhongelo naswona wa hi tiyisekisa leswaku u ta swi yingisa swikhongelo swa hina. (Pisalema 65:2) Xikwembu xa hi rhandza swinene naswona xa khathala ha hina lerova Yohane u susumeteleke ku tsala a ku: “Xikwembu i rirhandzu.”—1 Yohane 4:8.

YESU U TSHAMA NI XIKWEMBU

“Leswi yena [Mudyondzisiwa Stefano], a a tele moya lowo kwetsima, a languta etilweni kutani a vona ku vangama ka Xikwembu na Yesu a yime evokweni ra xinene ra Xikwembu, hiloko a ku: ‘Maswivo! Ndzi vona matilo ma pfulekile ni N’wana wa munhu a yime evokweni ra xinene ra Xikwembu.’”—Mintirho 7:55, 56.

Emahlweninyana ko va Stefano a vona xivono lexi, vanhu lava a vulavula na vona ku nga varhangeri va Vayuda hi vona lava hlohloteleke leswaku Yesu a dlayiwa.  Xivono xexo a xi tiyisekisa mhaka ya leswaku Yesu wa hanya hikuva u pfuxiwile naswona u nyikiwe xikhundlha. Muapostola Pawulo u tsale a ku: ‘[Xikwembu] xi pfuxe [Yesu] eka lava feke kutani xi n’wi tshamisisa evokweni ra xona ra xinene etindhawini ta le tilweni, ehenhla swinene ka hulumendhe yin’wana ni yin’wana ni vulawuri ni matimba ni vuhosi ni vito rin’wana ni rin’wana leri vitaniwaka, ku nga ri eka mafambiselo lawa ya swilo ntsena, kambe ni le ka lama taka.’—Vaefesa 1:20, 21.

Ku engetela eka leswi Matsalwa ma swi hlamuselaka hi xikhundlha lexi tlakukeke lexi Yesu a nga na xona, ma tlhela ma kombisa leswaku wa khathala hi vanhu ku fana na Yehovha. Loko Yesu a ha ri laha misaveni, u horise vanhu lava a va vabya, lava lamaleke a tlhela a pfuxa lava feke. Hi ku nyikela hi vutomi byakwe, u kombise leswaku u rhandza Xikwembu ni vanhu hi mbilu hinkwayo. (Vaefesa 2:4, 5) Leswi a nga le vokweni ra Xikwembu ra xinene, ku nga ri khale u ta tirhisa vulawuri byakwe leswaku a katekisa vanhu hinkwavo lava yingisaka Xikwembu.

TINTSUMI TI TIRHELA XIKWEMBU

“[Mina muprofeta Daniyele] ndzi ya emahlweni ndzi languta kukondza ku vekiwa swiluvelo kutani Nkulukumba wa Masiku [Yehovha] a tshama ehansi. . . . A ku ri ni magidigidi lawa a ma hambeta ma n’wi tirhela, ni va 10 000 va andzisiwe ka 10 000 lava a va tshama va yime emahlweni ka yena.”—Daniyele 7:9, 10.

Eka xivono lexi xa le tilweni, Daniyele u vone tintsumi to tala swinene. Hakunene xexo a ku ri xivono lexi hlamarisaka! Tintsumi i swivumbiwa swa moya, leswi tlhariheke naswona swi nga ni matimba swinene. Tin’wana ta tona i tiserafi ni makerubu. Bibele yi vulavula hi tintsumi minkarhi leyi tlulaka 250.

Tintsumi a hi vanhu lava feke lava a va hanya laha misaveni. Xikwembu xi rhange xi vumba tintsumi xi nga si vumba vanhu. Loko ku tumbuluxiwa misava, tintsumi a ku ri khale ti ri kona, ti ri karhi ti huwelela hi ku tsaka.—Yobo 38:4-7.

Ndlela yin’wana leyi tintsumi ti tirhelaka Xikwembu ha yona namuntlha, i ku pfuneta eku chumayeleni ka mahungu lamanene ya Mfumo wa Xikwembu. (Matewu 24:14) Ndlela leyi tintsumi ti hoxaka xandla ha yona eka ntirho lowu, yi voniwe hi muapostola Yohane eka xivono xakwe, loyi a tsaleke a ku: “Ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni,  ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo.” (Nhlavutelo 14:6) Hambileswi tintsumi ti nga ha vulavuriki ni vanhu namuntlha ku fana ni khale, ti kongomisa vanhu lava chumayelaka mahungu lamanene eka vanhu lava nga ni timbilu letinene.

SATHANA U XISA VANHU VO TALA

“Ku tlhekeka nyimpi etilweni: Mikayele [Yesu Kreste] ni tintsumi ta yena va lwa ni dragona, dragona yona yi lwa yi ri ni tintsumi ta yona kambe a yi hlulanga, naswona ndhawu ya vona a ya ha kumekanga etilweni. Hiloko dragona leyikulu yi lahleriwa ehansi, nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke; yi lahleriwa ehansi emisaveni, ni tintsumi ta yona ti lahleriwa ehansi na yona.”—Nhlavutelo 12:7-9.

Etilweni ku tshame ku va ni nkwetlembetano. Endzhaku ka loko ku vumbiwe vanhu, ntsumi yin’wana yi sungule ku navela ku gandzeriwa, kutani yi xandzukele Yehovha ivi yi hundzuka Sathana, leswi vulaka “Mukaneti.” Hi ku famba ka nkarhi, tintsumi tin’wana na tona ti xandzukile naswona namuntlha ti vitaniwa madimona. Madimona lawa, ma lwisana ni vulawuri bya Yehovha naswona ma kucetele vanhu votala leswaku na vona va endla hilaha ku fanaka.

Sathana ni madimona yakwe va ni tihanyi. Va venga vanhu naswona hi vona lava va vangeleke vanhu maxangu. Hi xikombiso, Sathana u dlaye swifuwo ni malandza ya wanuna wo tshembeka loyi a a vuriwa Yobo. Endzhaku ka sweswo, u dlaye vana hinkwavo va khume va Yobo hi ku vanga “mheho leyikulu,” leyi fikeke yi hirimuxa yindlu leyi a va ri eka yona. Endzhakunyana, Sathana u be Yobo hi “marhumba lama nga ni khombo ku sukela enkondzweni wakwe ku ya ethavathaveni.”—Yobo 1:7-19; 2:7.

Hambiswiritano, ku nga ri khale Sathana u ta herisiwa. Leswi se a lahleriweke laha misaveni, wa swi tiva leswaku “u ni nkarhi wo koma.” (Nhlavutelo 12:12) Lexi tsakisaka hi leswaku ku lovisiwa kakwe a nge ku balekeli!

LAVA YAKA ETILWENI

“[Yesu] u xavele Xikwembu vanhu lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo, naswona u va endle va va mfumo ni vaprista eka Xikwembu xa hina, va ta va tihosi emisaveni.”—Nhlavutelo 5:9, 10.

Van’wana loko va pfuxiwa, ku fana na Yesu na vona va ta ya hanya etilweni. Yesu u byele vaapostola vakwe vo tshembeka a ku: “Ndzi ya mi lunghiselela ndhawu. Nakambe, . . . ndzi ta tlhela ndzi vuya kutani ndzi ta mi amukela ekaya mi va na mina, leswaku laha ndzi nga kona na n’wina mi va kona.”—Yohane 14:2, 3.

 Lava yaka etilweni va ya hi xikongomelo xo karhi. Vona swin’we na Yesu va ta simeka Mfumo lowu nga ta fuma misava hinkwayo naswona Mfumo wolowo wu ta tisela vanhu mikateko yo tala swinene. Lowu i Mfumo lowu Yesu a leriseke valandzeri vakwe leswaku va wu khongelela eka xikhongelo xakwe xa xikombiso. U te: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:9, 10.

LESWI LAVA NGA ETILWENI VA NGA TA SWIENDLA

“[Mina muapostola Yohane] ndzi twa rito lerikulu ri huma exiluvelweni ri ku: ‘Waswivo! Ntsonga wa Xikwembu wu le vanhwini, . . . kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.’”—Nhlavutelo 21:3, 4.

Xivono lexi xi kombetela eka nkarhi lowu Mfumo wa Xikwembu, lowu vumbiwaka hi Yesu ni lava pfuxeriweke ku ya hanya etilweni, va nga ta herisa mfumo wa Sathana kutani va endla misava yi va paradeyisi. Maxangu hinkwawo ma ta herisiwa, ku katsa ni rifu.

Xana ku ta endleka yini hi vanhu lavan’wana hinkwavo lava feke lava nga ta ka va nga yi etilweni? Vona va ta pfuxiwa leswaku va ta hanya hilaha ku nga heriki laha misaveni, loko misava leyi se yi ri Paradeyisi.—Luka 23:43.

Swivono leswi, swi tiyisekisa leswaku Yehovha Xikwembu ni N’wana wakwe Yesu Kreste ku katsa ni tintsumi to tshembeka swin’we ni lava nga ta ya hanya etilweni, va khathala swinene ha hina. Leswaku u twa leswi engetelekeke malunghana ni lewi va nga ta hi endlela swona, hi kombela u tihlanganisa ni Timbhoni ta Yehovha kumbe u nghena eka website ya hina ya, www.jw.org/ts u tlhela u kopa buku leyi nge Xana Bibele Yi Dyondzisa Yini Hakunene?

DYONDZA SWO TALA

Ha Yini Ndzi Fanele Ndzi Khongela? Xana Xikwembu Xi Ta Ndzi Hlamula?

Loko swi ta emhakeni ya xikhongelo, swi titshege hi wena leswaku Xikwembu xi hlamula swikhongelo swa wena.

Xana Yesu A A Ri Munhu Lonene Ntsena?

Leswi endleke leswaku Yesu wa le Nazareta a va wanuna la veke ni nkucetelo lowukulu emisaveni.

I Yini Leswi Mfumo Wa Xikwembu Wu Nga Ta Swi Endla?

Twana leswi u nga swi langutelaka loko hulumendhe ya Xikwembu se yi fuma emisaveni.

Xana Diyavulosi I Wa Xiviri?

Xana Sathana ko va nsusumeto wo biha lowu nga endzeni ka munhu kumbe u kona hakunene?