Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NO. 6 2016

 NHLOKOMHAKA YA XIFUNENGETO | I VAMANI LAVA TSHAMAKA ETILWENI?

Xana Wa Tivutisa Leswaku I Vamani Lava Tshamaka eTilweni?

Xana Wa Tivutisa Leswaku I Vamani Lava Tshamaka eTilweni?

Xana u tshama u tivutisa leswaku ku endleka yini etilweni ni leswaku ku tshama va mani? Loko swi ri tano, a wu wexe. Se swi ni magidi ya malembe vanhu va ri karhi va tivutisa xivutiso lexi. Van’wana va tshemba leswaku etilweni ku tshama vakokwana lava nga fa, lava faneleke va xiximiwa. Van’wana va anakanya leswaku etilweni i ndhawu yo tsakisa swinene leyi eka yona ku tshamaka tintsumi ni vanhu lavanene lava feke. Van’wanyana va anakanya leswaku etilweni ku ni swikwembu swo tala swinene.

Vanhu vo tala va vula leswaku a hi nge swi koti ku tiva leswi endlekaka etilweni hikuva a ku na munhu loyi a humaka kona loyi a tshameke a hi byela hi leswi endlekaka kwale. Kambe mhaka yoleyo a hi ntiyiso. Yesu Kreste a tshama etilweni loko a nga si ta laha misaveni. Loko a vulavula ni varhangeri va vukhongeri u te: “Hikuva ndzi xike hi le tilweni ku ta endla ku rhandza ka loyi a ndzi rhumeke, kambe ku nga ri ka mina.” Yesu u byele vaapostola vakwe hi ku kongoma a ku: “Endlwini ya Tatana ku ni vutshamo byo tala.”—Yohane 6:38; 14:2.

Tata wa Yesu i Xikwembu, lexi vito ra xona ku nga Yehovha naswona xi tshama etilweni. (Pisalema 83:18) Hikokwalaho, a nga kona loyi a nga hi hlamuselaka kahle leswi endlekaka etilweni handle ka Yehovha Xikwembu na Yesu Kreste ntsena. Va hi hlamusele swilo swo tala swinene leswi endlekaka etilweni hi ku tirhisa swivono swo hlamarisa leswi va swi kombeke vanhu vo tshembeka.

Xihloko lexi landzelaka xi vulavula hi marungula ya le Bibeleni lama boxaka swivono swo hambanahambana leswi vanhu va swi voneke. Loko u ri karhi u hlaya hi swivono sweswo, tsundzuka leswaku a hi nge swi koti ku vona swilo leswi endlekaka etilweni kumbe ku swi khoma. Kambe Xikwembu xi hi hlamusele swivono sweswo hi ndlela leyi twisiseka hi ku tirhisa swilo leswi hi nga kotaka ku swi vona. Swivono sweswo swi ta ku pfuna leswaku u twisisa leswaku i vamani lava tshamaka eka “vutshamo byo tala” bya le tilweni.