Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NO. 6 2016

Ntavila

Leswi Hi Swi Dyondzaka Eka Swinyenyana

Leswi Hi Swi Dyondzaka Eka Swinyenyana

“Ndzi kombela u vutisa . . . swivumbiwa swa matilo leswi nga ni timpiko [swinyenyana], swi ta ku byela. I mani la nga swi tiviki exikarhi ka leswi hinkwaswo leswaku swilo leswi swi endliwe hi voko ra Yehovha?”—Yobo 12:7, 9.

EKA malembe yo tlula 3 000 lama hundzeke, Yobo u xiye leswaku hi nga dyondza swo tala hi ntumbuluko wa Xikwembu eka swinyenyana. Ndlela leyi swi hanyaka ha yona yi endla leswaku swi tirhisiwa eka swiga ririmi. EBibeleni swinyenyana swi hi dyondzisa tidyondzo ta nkoka malunghana ni vutomi ni hi vuxaka bya hina ni Xikwembu. A hi kambisiseni swikombiso swi nga ri swingani.

LAHA MBEWULANA YI AKAKA KONA XISAKA

Mbewulana

Vanhu va le Yerusalema a va ti tiva kahle timbewulana, leti hakanyingi ti akaka swisaka swa tona emakorhweni ya malwangu ya miako. Tin’wana a ti aka swisaka etempeleni leyi akiweke hi Solomoni. Swi nga ha endleka leswaku timbewulana leti a ti aka swisaka swa tona etempeleni lembe ni lembe, a ti kota ku kurisa mavondlo ya tona handle ko kavanyetiwa.

Mutsari wa Pisalema 84, ku nga un’wana wa vana va Kora, loyi a a tirha etempeleni vhiki rin’we endzhaku ka tin’hweti ta tsevu, u vone swisaka wa timbewulana etempeleni. A a navela ku tshama endlwini ya Yehovha vutomi byakwe hinkwabyo ku fana na tona. U yimbelerile a ku: “Mawaku ku xonga ka tabernakela ya wena leyikulu, Oho Yehovha wa mavuthu! Moya-xiviri wa mina a wu navela ni ku hisekela swivava swa Yehovha. . . . Ni nyenyana yi kume yindlu, ni nyenga [mbewulana] yi tikumele xisaka, laha yi vekeke mavondlo ya yona—Alitari ya wena leyikulu, wena Yehovha wa mavuthu, Hosi yanga ni Xikwembu xanga!” (Pisalema 84:1-3) Xana hina ni vana va hina hi kombisa leswaku hi swi navela hi mbilu hinkwayo ku ti hlanganisa ni vanhu va Xikwembu evandlheni minkarhi hinkwayo?Pisalema 26:8, 12.

NTAVILA YI WU TIVA KAHLE NKARHI WA YONA

Muprofeta Yeremiya u tsale a ku: “Ntavila ematilweni—yi yi tiva kahle minkarhi ya yona.” A swi kanakanisi leswaku a a yi tiva kahle minkarhi leyi tintavila ti rhurhaka ha yona. Ku xiyiwe leswaku hi ximun’wana, tintavila to basa leti tlulaka 300 000 ta rhurha e-Afrika ti famba hi Nambu wa Yordani ti ya eYuropa N’walungu. Hi ntumbuluko ta swi tiva loko ximumu se xi ri ekusuhi, ku nga nkarhi lowu ti sungulaka ku tshikela ha wona. Ku fana ni swinyenyana swin’wana leswi rhurhaka ti “wu hlayisa khwatsi nkarhi wa ku fika ka” tona.—Yeremiya 8:7.

Buku leyi nge Collins Atlas of Bird Migration yi ri: “Lexi hlamarisaka ngopfu hi ku rhurha ka swinyenyana, hi leswaku ko tiendlekela hi ntumbuluko.” Yehovha Xikwembu u nyike swinyenyana leswi rhurhaka vutlhari byo tiva nkarhi lowu swi faneleke swi rhurha ha wona, kambe vanhu u va nyike vuswikoti byo hambanisa minkarhi ni tinguva. (Luka 12:54-56) Ku hambana ni vutlhari lebyi Xikwembu xi byi nyikeke ntavila, vutivi lebyi xi hi nyikeke byona byi hi pfuna leswaku hi kota ku xiya swilo leswi endlekaka enkarhini lowu hi hanyaka eka wona. Vaisrayele va le nkarhini wa Yeremiya, va honise ku xiya swiendlakalo swa nkarhi lowu a va hanya eka wona. Loko Xikwembu xi hlamusela leswaku hikwalaho ka yini va endle  tano, xi te: “Rito ra Yehovha va ri bakanyile, xana va ni vutlhari byihi?”—Yeremiya 8:9.

Namuntlha ku ni vumbhoni byo tala lebyi kombisaka leswaku hi hanya “emasikwini yo hetelela” hilaha Bibele yi vulaka ha kona. (2 Timotiya 3:1-5) Onge hi nga dyondza swo tala eka ntavila, leswaku hi ta kota ku xiyisisa minkarhi leyi hi hanyaka eka yona.

GAMA RI KOTA KU VONA SWILO LESWI NGA EKULE SWINENE

Gama

Bibele yi vulavula hi gama minkarhi yo tala naswona vanhu lava a va tshama eTikweni leri Tshembisiweke a va ri tiva kahle. Loko gama riri exisakeni endhawini leyi nga ehenhla swinene ri kota ku ‘lava swakudya ekule laha mahlo ya rona ma vonaka kona.’ (Yobo 39:27-29) Matihlo ya rona ma vona swinene, ku vuriwa leswaku gama ri kota ku vona mpfundla lowu nga ekule hi khilomitara yin’we.

Ku fana ni gama leri kotaka ku ‘vonaka ekule,’ Yehovha u kota ku vona leswi nga ta endleka enkarhini lowu taka. Hikokwalaho, Yehovha u “vule ka ha ri eku sunguleni leswi nga ta humelela emakumu, ku sukela khale swinene a vula leswi nga si tshamaka swi endliwa.” (Esaya 46:10) Loko hi yingisa swileriso swa Yehovha, hi ta vuyeriwa eka vutlhari ni vutivi lebyi a nga na byona.—Esaya 48:17, 18

Loko Bibele yi fanisa vanhu lava tshembaka Xikwembu ni gama yi ri: “Lava tshembaka Yehovha va ta tlhela va kuma matimba. Va ta tlakuka hi timpapa ku fana ni magama.” (Esaya 40:31) Loko gama ri kavata timpapa loko ri ri eku haheni, ri humesa moya wo kufumela lowu endleka leswaku ri kota ku hahela ehenhla swinene. Leswaku gama ri kota ku haha, a ri titsheganga hi matimba ya rona. Hilaha ku fanaka, vanhu lava tshembaka Yehovha va nga tiyiseka leswaku u ta va pfuna tanihi leswi a va tshembisaka ku va nyika “matimba lama tlulaka lama tolovelekeke.”—2 Vakorinto 4:7, 8.

“NDLELA LEYI MBHAHA WU HLENGELETAKA HA YONA SWICIWANA SWA WONA”

Huku ni swiciwana swa yona

Emahlweninyana ko va Yesu a dlayiwa, u langutise ntsindza wa Vayuda ivi a ku: “Yerusalema, Yerusalema, mudlayi wa vaprofeta ni loyi a va khandleke hi maribye lava rhumiweke eka yena,—i ko tala ndzi lava ku hlengeleta vana va wena, hi ndlela leyi mbhaha wu hlengeletaka ha yona swiciwana swa wona ehansi ka timpapa ta wona! Kambe n’wina a mi swi lavanga.”—Matewu 23:37.

Lexi tsakisaka swinene hi swinyenyana i ndlela leyi swi sirhelelaka vana va swona ha yona. Swinyenyana leswi nga akiki swisaka ehenhla ka misinya, swo tanihi tihuku swi fanele swi tshama swi xalamukile leswaku swi ta kota ku sirhelela swiciwa. Loko huku yi vona xikhozana, hi ku hatlisa yi vitana swiciwana swa yona yi swi funengeta hi timpiko. Loko ku hisa ngopfu kumbe loko ku ri ni mpfula, swiciwana swi tumbela ehansi ka timpapa ta mbhaha. Hilaha ku fanaka, Yesu a a lava ku pfuna vanhu va Yerusalema leswaku va sirhelela vuxaka bya vona ni Xikwembu. Ninamuntlha, Yesu wa hi rhamba leswaku hi ya eka yena a ta hi phyuphyisa ni ku hi sirhelela eka swiphiqo ni maxangu lawa hi langutanaka na wona siku ni siku.—Matewu 11:28, 29.

Hakunene swi tele swilo leswi hi nga swi dyondzaka eka swinyenyana. Loko u ri karhi u xiyisisa ndlela leyi swi hanyaka ha yona, tsundzuka Matsalwa lama vulavulaka hi swona. Onge mbewulana yi nga ku pfuna leswaku u tlangela yindlu ya Yehovha yo gandzela eka yona. Onge u nga titshega hi Yehovha loyi a tshembisaka leswaku u ta ku nyika matimba ku fana ni gama. Onge u nga tshinela eka Yesu leswaku a ta ku sirhelela ku fana ni ndlela leyi mbhaha wu sirhelelaka swiciwana swa wona ha yona. Onge ntavila yi nga ku tsundzuxa leswaku u tshama u xalamukile enkarhini lowu hi hanyaka eka wona.

DYONDZA SWO TALA

U Nga Tshinela Njhani Eka Xikwembu?

Kumisisa loko Xikwembu xi yingisela swikhongelo hinkwaswo, ndlela leyi hi faneleke hi khongela ha yona, ni leswi hi nga swi endlaka leswaku hi tshinela eka Xikwembu.