Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  No. 4 2017

 NHLOKOMHAKA YA XIFUNENGETO | BIBELE YI RI YINI HI VUTOMI NI RIFU?

Leswi Bibele Yi Swi Vulaka Hi Vutomi Ni Rifu

Leswi Bibele Yi Swi Vulaka Hi Vutomi Ni Rifu

Loko hi hlaya buku ya Bibele ya Genesa, hi dyondza leswaku Xikwembu xi byele munhu wo sungula Adamu xi ku: “U nga ha tidyela u eneriseka eka murhi wun’wana ni wun’wana wa ntanga. Kambe loko ku ri murhi wa ku tiva leswinene ni leswo biha u nga tshuki u wu dya hikuva siku u nga ta wu dya, u ta fa hakunene.” (Genesa 2:16, 17) Marito lawa ma swi veka erivaleni leswaku loko Adamu a lo yingisa xileriso xa Xikwembu, a ta va a nga fanga kambe a ta ya emahlweni a hanya entangeni wa Edeni.

Lexi twisaka ku vava, ematshan’weni yo hlawula ku yingisa Xikwembu kutani a hanya hilaha ku nga heriki, Adamu u hlawule ku honisa xileriso xexo hi ku dya muhandzu lowu a nyikiweke wona hi nsati wakwe lowu Xikwembu a xi va byele leswaku va nga wu dyi. (Genesa 3:1-6) Ninamuntlha ha ha langutana ni vuyelo bya ku nga yingisi ka Adamu. Muapostola Pawulo u hlamusela mhaka leyi hi ndlela leyi: “Tanihi leswi xidyoho xi ngheneke emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” (Varhoma 5:12) “Munhu un’we” loyi a ku ri Adamu. Kambe, xana Adamu u dyohe hi ku endla yini naswona ha yini xigwevo xa kona ku ve rifu?

Adamu u dyohe loko a hlawula ku nga xi yingisi xileriso xa Xikwembu hi vomu. (1 Yohane 3:4) Naswona hakelo ya xidyoho i rifu, hilaha Xikwembu xi byeleke Adamu hakona. Loko Adamu ni vana vakwe lava a a ta na vona a va yingise xileriso xa Xikwembu, a va nga ta va ni xidyoho naswona a va nga ta fa. Xikwembu xi tumbuluxe vanhu leswaku va hanya hilaha ku nga heriki.

 A swi kanakanisi leswaku rifu ri “tlulele vanhu hinkwavo,” hilaha Bibele yi vulaka hakona. Kambe, xana ku ni nchumu wun’wana lowu yaka emahlweni wu hanya loko hi fa? Vanhu vo tala va nga vula leswaku nchumu wolowo, lowu vuriwaka moya a wu fi. Hambiswiritano, leswi swi fana ni loko hi vula leswaku Xikwembu xi hembele Adamu. Hi ndlela yihi? Hikuva loko nchumu wo karhi wu ya emahlweni wu hanya loko hi file, swi vula leswaku rifu a hi hakelo ya xidyoho, hilaha Xikwembu xi vuleke hakona. Bibele yi ri: “[A swi koteki] leswaku Xikwembu xi hemba.” (Vaheveru 6:18) Entiyisweni, i Sathana loyi a hembeke loko a byela Evha a ku: “Entiyisweni mi nga ka mi nga fi.”—Genesa 3:4.

Sweswo swi endla leswaku hi tivutisa xivutiso lexi nge, loko dyondzo ya leswaku moya a wu fi ku ri mavunwa, kahlekahle ku endleka yini loko munhu a file?

BIBELE YI VEKA TIMHAKA ERIVALENI

Rungula leri nga eka Genesa ri ri: “Yehovha Xikwembu a vumba munhu hi ntshuri wa misava ni ku huhutela ku hefemula ka vutomi etinhompfini takwe, hiloko munhu a va moya-xiviri lowu hanyaka.” Xiga lexi nge “moya-xiviri lowu hanyaka” xi hundzuluxeriwe ku suka eka rito ra Xiheveru leri nge ne’phesh, * leri hi ku kongoma ri vulaka “xivumbiwa lexi hefemulaka.”—Genesa 2:7.

Bibele yi swi veka erivaleni leswaku vanhu a va vumbiwanga va ri ni moya lowu nga fiki. Ku ri na sweswo, munhu un’wana ni un’wana i “moya-xiviri lowu hanyaka.” Hi yona mhaka, hambiloko wo lava eBibeleni yin’wana ni yin’wana a wu nge ku kumi laha yi tirhisaka xiga lexi nge “moya lowu nga fiki.”

Leswi Bibele yi nga vuliki leswaku vanhu va ni moya lowu nga fiki, ha yini vukhongeri byo tala byi dyondzisa leswi hambaneke? Leswaku hi kuma nhlamulo ya xivutiso lexi a hi kambisiseni leswi endlekeke le Egipta.

 DYONDZO YA VUHEDENI YI HANGALAKA

Herodotus, n’wamatimu wa Mugriki loyi a hanyeke eka lembexidzana ra vuntlhanu B.C.E., u vule leswaku Vaegipta i vanhu “vo sungula lava teke ni mhaka ya leswaku moya wa munhu a wu fi.” Kasi Vababilona va khale na vona va seketele mhaka ya leswaku moya wa munhu a wu fi. Loko Alexander Lonkulu a hlule matiko ya le Middle East hi 332 B.C.E., tidyondzo ta Magriki se a ti dumile naswona hi ku hatlisa ti hangalake ni Mfumo hinkwawo wa Magriki.

A wu nge yi kumi ndzimana ya Bibele leyi tirhisaka xiga lexi nge “moya lowu nga fiki”

Hi lembexidzana ro sungula C.E., mintlawa yimbirhi ya vukhongeri ya mimpambukwa ya Vayuda, ku nga Vaessene ni Vafarisi, yi dyondzise leswaku moya wa munhu wu ya emahlweni wu hanya loko miri wu fa. The Jewish Encyclopedia yi ri: “Vayuda va sungule ku tshemba dyondzo ya leswaku moya a wu fi loko va sungule ku dyondza tidyondzo ta Magriki leti a ti sekeriwe eka dyondzo ya Plato.” Hilaha ku fanaka, n’wamatimu wa Muyuda Josephus, la hanyeke eka lembexidzana ro sungula u hlamusele leswaku dyondzo leyi a yi humi eka Matsalwa yo Kwetsima kambe eka “tidyondzo ta Magriki,” ku nga dyondzo leyi Josephus a yi tekeke yi sekeriwe eka mintsheketo.

Loko tidyondzo leti ta Magriki ti ya ti duma, vanhu lava a va tivula Vakreste na vona va sungule ku pfumela eka tidyondzo leti. N’wamatimu Jona Lendering, u vule leswaku “dyondzo ya Plato ya leswaku moya wa hina wu tshame wu hanya endhawini yo antswa naswona sweswi wu hanya endhawini leyi biheke swinene yi ve xiphemu xa dyondzo ya Vukreste.” Kutani, dyondzo leyi ya vuhedeni ya leswaku moya a wu fi yi sungule ku dyondzisiwa etikerekeni ta “Vukreste” naswona yi ve dyondzo ya nkoka eka ripfumelo ra vona.

 “NTIYISO WU TA MI NTSHUNXA”

Hi lembexidzana ro sungula, muapostola Pawulo u nyikele xitsundzuxo lexi nge: “Marito lama huhuteriweke ma vula hilaha ku tiyeke leswaku eminkarhini yo hetelela van’wana va ta wa eripfumelweni, va nyikela nyingiso eka marito yo hambukisa lama huhuteriweke ni le tidyondzweni ta madimona.” (1 Timotiya 4:1) Hakunene marito lawa i ntiyiso! Dyondzo ya leswaku moya wa munhu a wu fi i yin’wana ya “[tidyondzo] ta madimona.” Bibele a yi yi seketeli dyondzo leyi naswona yi huma eka tidyondzo ta vuhedeni ta vukhongeri bya khale.

Lexi tsakisaka, Yesu u te: “Mi ta tiva ntiyiso, kutani ntiyiso wu ta mi ntshunxa.” (Yohane 8:32) Loko hi va ni vutivi lebyi kongomeke bya ntiyiso wa Bibele, ha ntshunxeka eka tidyondzo leti hlundzukisaka Xikwembu ni mikhuva leyi endliwaka hi vukhongeri byo tala namuntlha. Ku engetela kwalaho, ntiyiso lowu nga eRitweni ra Xikwembu wu ta hi ntshunxa eka mindhavuko ni mihivahivani leyi fambisanaka ni rifu.—Vona bokisi leri nge “ Lava Feke Va Kwihi?

Muvumbi wa hina a a nga hi vumbelanga leswaku hi hanya malembe ya 70 kumbe 80 emisaveni kutani hi hundzela ku ya hanya endhawini yin’wana hilaha ku nga heriki. Xikongomelo xakwe a ku ri leswaku vanhu va hanya hilaha ku nga heriki laha misaveni tanihi vana vakwe lava yingisaka. Xikongomelo lexi xi kombisa ndlela leyi Xikwembu xi hi rhandzaka ha yona naswona xi ta hetiseka. (Malakiya 3:6) Mupisalema loyi a huhuteriweke u te: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

 

^ ndzim. 9 Tibibele tin’wana to tanihi ya Mahungu lamanene, ti hundzuluxele rito ne’phesh hi marito lama nge “xivumbiwa lexi hanyaka.”