Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NO. 4 2016

 BIBELE YI HUNDZULA VUTOMI BYA VANHU

Ndzi we ndzi pfuka ndzi kala ndzi hlula

Ndzi we ndzi pfuka ndzi kala ndzi hlula
  • LEMBE RO VELEKIWA: 1953

  • TIKO LERI A HUMAKA EKA RONA: AUSTRALIA

  • MATIMU YAKWE: A NDZI GODZOMBERIWE HI KU HLALELA SWIFANISO SWA TIMHAKA TA MASANGU

VUTOMI BYA MINA BYA KHALE:

Tata wa mina u suke eJarimani a rhurhela eAustralia hi 1949. A a lava ntirho wa le mugodini ni wa le switichini swa gezi naswona u tshame etikoxikaya ra Victoria. Kwalaho, u tekane ni mana wa mina naswona ndzi velekiwe hi 1953.

Endzhaku ka malembenyana, mana wa mina u sungule ku dyondza Bibele ni Timbhoni ta Yehovha, naswona ndza ha tsundzuka tin’wana ta tidyondzo ta Bibele. Hambiswiritano, tata wa mina a a nga byi rhandzi vukhongeri. U sungule ku va ni madzolonga ni ku chavisa vanhu van’wana naswona manana a a n’wi chava. Manana u hambete a dyondza Bibele exihundleni naswona u sungule ku rhandza tidyondzo ta yona. Loko tatana a nga ri kona, manana a a bula na mina ni ndzisana ya mina ya nhwanyana hi leswi a swi dyondzeke eBibeleni. U hi byele hi misava ya paradeyisi leyi nga ta va kona kwala misaveni ni ndlela leyi hi nga ta tsaka ha yona loko hi tirhisa milawu ya Bibele ya mahanyelo.Pisalema 37:10, 29; Esaya 48:17.

Loko ndzi ri ni malembe ya 18, ndzi titwe ndzi boheka ku famba ekaya hikwalaho ka madzolonga lawa tatana a a ri na wona. Hambileswi a ndzi tshemba leswi manana a ndzi dyondziseke swona eBibeleni, a ndzi nga swi teki swi ri swa nkoka. Ndzi tsandzeke ku swi tirhisa. Ndzi sungule ku tirha tanihi mutivi wa gezi emugodini wa malahla. Loko ndzi ri ni malembe ya 20, ndzi teke nsati. Endzhaku ka malembe manharhu hi ve ni n’wana wa nhwanyana naswona ndzi sungule ku anakanyisisa hi swilo swa nkoka evuton’wini bya mina. A ndzi swi tiva leswaku Bibele yi nga swi kota ku pfuna ndyangu wa hina, kutani ndzi sungule ku dyondza ni un’wana wa Timbhoni ta Yehovha. Nsati wa mina a a nga ti rhandzi Timbhoni. Loko ndzi sungule ku hlanganyela na tona, nsati wa mina u ndzi byele leswaku ndzi hlawula eka ku tshika ku dyondza Bibele kumbe ndzi famba. Leswi a ndzi tsanile ndzi hlawule ku tshika ku hlanganyela ni Timbhoni. Endzhakunyana ndzi tisorile hileswi ndzi tsandzekeke ku hlawula ntiyiso.

Siku rin’wana vatirhikulorhi va ndzi kombe swifaniso swa timhaka ta masangu. A swi tsakisa swi tlhela swi siringa, naswona ndzi kingindziwe hi ripfalo. Leswi a ndzi tsundzuka leswi ndzi swi dyondzeke eBibeleni, a ndzi tshemba leswaku Xikwembu xi ta ndzi xupula. Kambe ndlela leyi a ndzi languta swifaniso leswi ha yona yi cincile. Hi ku famba ka nkarhi swi ndzi godzomberile.

Eka malembe lama tlulaka 20, ndzi endle leswi hambaneke ni leswi manana a ringeteke ku ndzi dyondzisa swona. Mahanyelo ya mina a ya kombisa leswi a ndzi tshamela ku ehleketa hi swona. Mabulo ya mina  a ya talele hi nhlambha ni mafenya lama thyakeke. A ndzi ri ni langutelo leri hoxeke hi timhaka ta masangu. Hambileswi a ndzi tshama ni nsati wa mina a ndzi rhandzana ni vavasati van’wana. Siku rin’wana ndzi tilangute eka xivoni, ivi ndzi ku: ‘Ndza ku venga.’ Ndzi sungule ku nga ha tixiximi.

Ndzi hambane ni nsati wa mina naswona a ndzi nga ha tsakanga evuton’wini. Kutani ndzi khongele eka Yehovha hi mbilu hinkwayo. Ndzi tlhele ndzi sungula ku dyondza Bibele, hambileswi a ndzi hete malembe ya 20 ndzi nga dyondzi. Hi nkarhi wolowo tatana se a a lovile, naswona manana a a khuvuriwe a va Mbhoni ya Yehovha.

NDLELA LEYI BIBELE YI HUNDZULEKE VUTOMI BYA MINA HA YONA:

A ku ri ni ku hambana lokukulu exikarhi ka ndlela leyi a ndzi hanya ha yona, ni leswi milawu leyi tlakukeke ya Bibele yi vulaka swona. Kambe sweswi a ndzi tiyimisele ku kuma ku rhula ka mianakanyo loku Bibele yi ku tshembisaka. A ndzi tiyimisele ku basisa mavulavulelo ya mina ndzi tlhela ndzi antswisa ndlela leyi ndzi hlundzukaka ha yona. Ndzi endle xiboho xo tshika mahanyelo yo biha, ku gembula, vudakwa ni ku yivela muthori wa mina.

Vatirhikulorhi a va nga swi twisisi leswaku ha yini a ndzi lava ku endla ku cinca loku. Ku ringana malembe manharhu a va ndzi kucetela leswaku ndzi tlhelela eka vutomi bya mina bya khale. Loko ndzo tshuka ndzi tsandzeka ku tikhoma ivi ndzi hlundzuka kumbe ndzi rhukana, a va ta ku: “Joe loyi hi n’wi tivaka hi loyi!” Marito wolawo a ma ndzi twisa ku vava! Hi minkarhi yo tala a ndzi tivona ndzi ri mutsandzeki.

Entirhweni wa mina a ku tele swifaniso swa timhaka ta masangu eka tibuku ni le ka switirhisiwa swa elektroniki. Vatirhikulorhi a va ndzi rhumela swifaniso leswi thyakeke hi khompyuta tanihi leswi khale na mina a ndzi endla tano. A ndzi ringeta ku hlula ku godzomberiwa ka mina kambe a va tiyimisele ku ndzi endla ndzi tsandzeka. Ndzi kombele mpfuno eka munhu loyi a ndzi dyondza na yena Bibele. U ndzi yingiserile loko ndzi ri karhi ndzi n’wi phofulela. Hi ku tirhisa matsalwa ya Bibele, u ndzi kombe ndlela yo hlula ku godzomberiwa ka mina, ni ku hambeta ndzi lava mpfuno wa Yehovha hi xikhongelo.Pisalema 119:37.

Siku rin’wana ndzi kombele vatirhikulorhi leswaku hi hlangana. Loko va hlengeletanile, ndzi va byele leswaku va teka byala va nyika vavanuna vambirhi lava byi va godzombeleke. Ntlawa wolowo wu huwelele wu ku: “U nga swi endli sweswo! Vavanuna lava va ringeta ku hlula ku godzomberiwa ka vona!” Ndzi hlamule ndzi ku: “Na mina ndzi ringeta ku endla tano.” Ku sukela siku rero vavanuna volavo va yi xiyile ndlela leyi a ndzi lava ku hlula ha yona ku godzomberiwa ka mina hi swifaniso swa timhaka ta masangu naswona a va ha ndzi sindzisanga leswaku ndzi tlhelela eka vutomi bya mina bya khale.

Hi ku famba ka nkarhi, ni hi mpfuno wa Yehovha ndzi kote ku hlula ku godzomberiwa hi swifaniso swa timhaka ta masangu. Hi 1999, ndzi khuvuriwile ndzi va Mbhoni ya Yehovha, ndzi tsakile hi leswi ndzi kumeke lunghelo ro tlhela ndzi hanya vutomi lebyi tsakisaka.

Sweswi ndza swi twisisa leswaku ha yini Yehovha a venga swilo leswi a ndzi swi rhandza ku ringana nkarhi wo leha. Tanihi Tatana la nga ni rirhandzu a a lava ku ndzi sirhelela eka makhombo lama vangiwaka hi swifaniso swa timhaka ta masangu. Ma tiyisile marito lama nga eka Swivuriso 3:5, 6! Ndzimana yoleyo yi ri: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” Milawu ya Bibele a yi vanga leyi sirhelelaka ntsena kambe yi tlhela yi pfuna leswaku munhu a humelela.Pisalema 1:1-3.

NDLELA LEYI NDZI PFUNEKEKE HA YONA:

Enkarhini lowu hundzeke, vutomi bya mina a byi ndzi nyangatsa, kambe sweswi ndza tixixima naswona ndzi ni ku rhula. Ndzi hanya vutomi lebyi baseke naswona ndza swi xiya leswaku Yehovha u ndzi rivalerile naswona wa ndzi seketela. Hi lembe ra 2000 ndzi tekane na Karolin nsati wo xonga, loyi a rhandzaka Yehovha swinene ku fana na mina. Hi hanyisana hi ku rhula ekaya. Hi titwa ku ri lunghelo ku va exikarhi ka vamakwerhu va ntiyiso emisaveni hinkwayo.

DYONDZA SWO TALA

Leswi Endlekaka Eka Dyondzo Ya Bibele

Emisaveni hinkwayo, Timbhoni ta Yehovha ti tiviwa hi ku fambisela vanhu dyondzo ya Bibele ya mahala. Hlalela ndlela leyi yi fambisiwaka ha yona.

Milawu Ya Xikwembu Yi Hi Pfuna Njhani?

Yesu u hlamusele leswaku ha yini hi lava nkongomiso ni leswaku hi yihi milawu ya Bibele leyi nga ya nkoka.

U Nga Swi Kota Ku Hlula Ndzingo!

Magoza manharhu lama nga ku pfunaka ku hlula ndzingo.