Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  No. 4 2016

Vona Loko Leswi U Swi Pfumelaka Swi Fana Ni Leswi Bibele Yi Swi Dyondzisaka

Vona Loko Leswi U Swi Pfumelaka Swi Fana Ni Leswi Bibele Yi Swi Dyondzisaka

XANA u ti teka u ri Mukreste? Loko swi ri tano u un’wana wa vanhu lava tlulaka tibiliyoni timbirhi emisaveni hinkwayo lava vulaka leswaku va landzela Kreste. Namuntlha ku ni magidi ya mintlawa ya vukhongeri leyi tivitanaka Vakreste, kambe yi hambana hikwalaho ka tidyondzo leti kanetanaka ni mavonelo lama nga faniki. Kutani leswi u swi pfumelaka swi nga hambana ni leswi van’wana lava va tivitanaka Vakreste va swi pfumelaka. Xana i swa nkoka leswaku u pfumela yini? Ina, i swa nkoka, loko u lava ku va Mukreste wa ntiyiso hilaha Bibele yi hlamuselaka hakona.

Valandzeri vo sungula va Yesu Kreste a va vitaniwa “Vakreste.” (Mintirho 11:26) A ku nga ri na xivangelo xa leswaku va va ni vito rin’wana tanihi leswi hi nkarhi wolowo a ku ri ni vukhongeri byin’we bya Vukreste. Vakreste hinkwavo a va yingisa tidyondzo ni swileriso swa loyi a sunguleke Vukreste ku nga Yesu Kreste. Ku vuriwa yini hi kereke ya wena? Xana u tshemba leswaku yi dyondzisa leswi Kreste a swi dyondziseke ni leswi valandzeri vakwe vo sungula a va pfumela eka swona? U nga tiyiseka njhani? Ku ni ndlela yin’we ntsena ku nga ku tirhisa Bibele.

Anakanya hi leswi: Yesu Kreste a a xixima Matsalwa swinene tanihi Rito ra Xikwembu. Yesu u sole lava a va nga ti tekeli enhlokweni tidyondzo ta Bibele  kambe va rhangisa mindhavuko ya vanhu. (Marka 7:9-13) Hi nga pfumela leswaku valandzeri va Yesu va ntiyiso hi lava tidyondzo ta vona ti sekeriweke eBibeleni. Mukreste un’wana ni un’wana u fanele a tivutisa leswi, ‘Xana tidyondzo ta kereke ya mina ta pfumelelana ni Bibele?’ Leswaku u kota ku hlamula xivutiso lexi, ha yini u nga pimanisi leswi kereke ya wena yi swi dyondzisaka ni leswi Bibele yi swi dyondzisaka?

Yesu u vule leswaku vugandzeri bya hina eka Xikwembu byi fanele byi va byi sekeriwe eka ntiyiso naswona ntiyiso wolowo wu kumeka eBibeleni. (Yohane 4:24; 17:17) Naswona muapostola Pawulo u vule leswaku ku pona ka hina ku titshege hi ku “fikelela vutivi lebyi kongomeke bya ntiyiso.” (1 Timotiya 2:4) I swa nkoka leswaku ripfumelo ra hina ri va ri sekeriwe eka ntiyiso wa Bibele. Loko swi nga ri tano a hi nge ponisiwi!

NDLELA YO VONA LOKO LESWI HI SWI PFUMELAKA SWI FAMBISANA NI BIBELE

Hi ku rhamba leswaku u hlaya swivutiso swa tsevu leswi fambisanaka ni mhaka leyi u tlhela u xiya tinhlamulo leti humaka eBibeleni. Hlaya Matsalwa lama kombisiweke u tlhela u anakanyisisa hi tinhlamulo leti. Kutani tivutise, ‘Xana tidyondzo ta kereke ya mina ta fambisana ni leswi Bibele yi swi vulaka?’

Swivutiso leswi swi nga ku pfuna leswaku u kuma tinhlamulo ta nkoka. Xana u tiyimiserile ku vona loko tidyondzo tin’wana ta kereke ya wena ti fambisana ni leswi Bibele yi swi vulaka. Timbhoni ta Yehovha ti nga swi tsakela ku ku pfuna leswaku u kambisisa ntiyiso lowu nga erivaleni wa Bibele. Ha yini u nga kombeli ku dyondzeriwa Bibele mahala hi un’wana wa Timbhoni? Kumbe u nghena eka website ya hina ya jw.org/ts.

 

DYONDZA SWO TALA

SWIVUTISO LESWI HLAMURIWAKA HI BIBELE

Xana Vukhongeri Bya Fana? Xana Hinkwabyo Bya Amukelaka Eka Xikwembu?

Tinhla timbirhi leti ku vulavuriwaka ha tona eBibeleni ti hi nyika nhlamulo.