Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NO. 2 2017

 NHLOKOMHAKA YA XIFUNENGETO | XANA U TA YI AMUKELA NYIKO YA RISIMA LEYI HUMAKA EKA XIKWEMBU?

Nyiko Ya Risima Ku Tlula Hinkwato

Nyiko Ya Risima Ku Tlula Hinkwato

MUCHINI wo vatla pensele lowu fanaka ni xikepe lowu nyikiweke Jordan, wu vonaka wu ri nchumu lowu nga nyawuriki. Kambe eka yena i wa risima swinene. Jordan u ri: “Loko ndza ha ri ntsongo, kokwana Russel loyi a a ri munghana wa kokwa wa mina, u ndzi nyike muchini.” Endzhaku ka loko Russell a file, Jordan u byeriwe leswaku Russell u pfune kokwa wakwe ni vatswari vakwe loko va langutane ni xiyimo xo tika swinene evuton’wini. Jordan u ri: “Leswi sweswi ndzi tivaka swo tala hi kokwana Russell, nyiko leyi leyitsongo leyi a ndzi nyikeke yona i ya risima eka mina ku tlula eku sunguleni.”

Hilaha hi swi voneke ha kona eka Jordan, nyiko yi nga ha tikomba yi nga ri ya nkoka kumbe yi nga nyawuli eka van’wana. Kambe munhu loyi a tlangelaka, u yi teka yi ri nchumu wo hlawuleka kumbe ya risima. Loko Bibele yi hlamusela nyiko ya risima ku tlula hinkwato yi ri: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:16.

Nyiko yoleyo yi nga endla leswaku munhu loyi a yi amukelaka a kuma vutomi lebyi nga heriki! Xana yi kona nyiko yin’wana ya risima ku tlula leyi? Hambiloko vanhu van’wana va nga wu voni nkoka wa nyiko yoleyo, Vakreste va ntiyiso va yi teka yi ri ya “risima.” (Pisalema 49:8; 1 Petro 1:18, 19) Hikwalaho ka yini Xikwembu xi nyikele hi vutomi bya N’wana wa xona?

Muapostola Pawulo u hlamusela xivangelo xa kona loko a ku: “Xidyoho xi [nghene] emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo.” (Varhoma 5:12) Munhu wo sungula Adamu, u dyohele Xikwembu hi vomu hikwalaho ka sweswo u kume vuyelo bya xidyoho ku nga rifu. Hikwalaho ka Adamu, rifu ri tlulele vanhu hinkwavo laha misaveni.

“Hakelo leyi tisiwaka hi xidyoho i rifu, kambe nyiko  leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Xikwembu xi rhumele N’wana wa xona la nga swakwe, ku nga Yesu Kreste leswaku a nyikela hi vutomi byakwe lebyi hetisekeke leswaku a ta kutsula vanhu eka rifu. Hikwalaho ka gandzelo rero ra “nkutsulo,” vanhu hinkwavo lava kombisaka ripfumelo eka Yesu va ta kuma vutomi lebyi nga heriki.—Varhoma 3:24.

Loko Pawulo a vulavula hi mikateko hinkwayo leyi Xikwembu xi yi nyikaka vagandzeri va xona hi ku tirhisa Yesu Kreste, u te: “A ku nkhensiwe Xikwembu hikwalaho ka nyiko ya xona ya mahala leyi nga hlamuselekiki.” (2 Vakorinto 9:15) Hakunene nkutsulo i nyiko yo hlawuleke swinene leyi nga hlamuselekiki. Hikokwalaho ka yini nkutsulo ku ri nyiko ya risima swinene ku tlula tinyiko hinkwato leti Xikwembu xi ti nyikeke vanhu? Xana wu hambana njhani ni tinyiko letin’wana? * Xana hi fanele hi wu teka njhani nkutsulo? Leswaku u kuma tinhlamulo ta swivutiso leswi, leti sekeriweke eBibeleni hi kombela u hlaya swihloko swimbirhi leswi landzelaka.

^ ndzim. 8 Yesu hi ku swi rhandza “u nyikete moyaxiviri wakwe a wu nyiketela hina.” (1 Yohane 3:16) Kambe leswi xitlhavelo xexo ku nga xiphemu xa xikongomelo xa Xikwembu, swihloko leswi swi vulavula ngopfu hi Xikwembu tanihi Munyiki wa nkutsulo wolowo.