Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NO. 2 2017

 NHLOKOMHAKA YA XIFUNENGETO | XANA U TA YI AMUKELA NYIKO YA RISIMA LEYI HUMAKA EKA XIKWEMBU?

Lexi Endlaka Nyiko Leyikulu Leyi Humaka Eka Xikwembu Yi Va Ya Risima?

Lexi Endlaka Nyiko Leyikulu Leyi Humaka Eka Xikwembu Yi Va Ya Risima?

I yini lexi endlaka nyiko yi va ya risima eka wena? Ku ni swilo swa mune leswi endlaka nyiko yi va ya risima: (1) munhu loyi a ku nyikeke nyiko ya kona, (2) xivangelo lexi endleke a ku nyika yona, (3) matshalatshala lawa a ma endleke leswaku a kota ku ku nyika yona, (4) loko nyiko ya kona yi ta ku pfuna hi swo karhi. Ku anakanyisisa hi swilo sweswo swi ta endla leswaku hi wu tlangela swinene nkutsulo, ku nga nyiko ya risima leyi humaka eka Xikwembu.

I MANI MUNYIKI WA YONA?

Tinyiko tin’wana i ta risima eka hina hikuva hi nyikiwe tona hi munhu wo karhi loyi hi n’wi xiximaka swinene. Kambe tinyiko tin’wana hambileswi ti nga durhiki, ta tlangeriwa hileswi ti humaka eka xaka kumbe eka munghana wo tshembeka. Swi ve tano ni hi nyiko leyi Jordan a yi nyikiweke hi Russell, loyi ku vulavuriweke ha yena eka xihloko lexi hundzeke. Xana leswi swi fana njhani ni nyiko ya nkutsulo?

Xo sungula, Bibele yi vula leswaku i “Xikwembu xi rhumeke N’wana wa xona la tswariweke a ri swakwe emisaveni leswaku hi ta kuma vutomi ha yena.” (1 Yohane 4:9) Sweswo swi endla leswaku nyiko leyi yi va ya risima swinene. A nga kona munhu loyi a tlakukeke ku tlula Xikwembu. Loko mupisalema a vulavula hi xona, u te: “Wena loyi vito ra wena u nga Yehovha, wena u ri wexe u la nge Henhlahenhla emisaveni hinkwayo.” (Pisalema 83:18) A ku na nyiko yin’wana ya risima ku tlula leyi humaka eka Xikwembu.

Xa vumbirhi, Xikwembu i “Tata wa hina.” (Esaya 63:16) Hi ndlela yihi? Hikuva xi hi nyike vutomi. Ku engetela kwalaho, xa hi khathalela ku fana ni tatana loyi a rhandzaka vana vakwe naswona a khathalaka ha vona. Loko Xikwembu xi vulavula hi vanhu van’wana va xona va khale vo tanihi Efrayimi, xi vutise xi ku: “Xana Efrayimi i jaha ra risima eka mina, kumbe i n’wana la khomiwaka hi rirhandzu? . . . Marhumbu ya mina ma [tlhaveke] hikwalaho ka yena. Kunene ndzi ta n’wi twela vusiwana.” (Yeremiya 31:20) Ninamuntlha Xikwembu xa ha titwa hi ndlela leyi fanaka hi vagandzeri va xona. Xikwembu a xo va Muvumbi wa hina loyi a nga ni matimba ntsena, kambe i Tata wa  hina tlhelo Munghana wo tshembeka. Sweswo hi swona leswi endlaka leswaku hi yi tlangela swinene nyiko ya risima leyi xi hi nyikeke yona.

HIKOKWALAHO KA YINI XI HI NYIKE NYIKO LEYI?

Tinyiko tin’wana i ta risima hikuva munyiki wa tona u nyika hi ku swi rhandza, ku nga ri hi leswaku wa boheka ku endla tano. Munhu loyi a nyikaka hi ku swi rhandza a nga languteli ku tlheriseriwa nchumu.

Xikwembu xi nyikele hi N’wana wa xona hileswi xi hi rhandzeke. Bibele yi ri: “Rirhandzu ra Xikwembu ri kombisiwile eka hina, hileswi Xikwembu xi rhumeke N’wana wa xona la tswariweke a ri swakwe.” Hikwalaho ka yini xi endle tano? “Leswaku hi ta kuma vutomi ha yena.” (1 Yohane 4:9) Xana Xikwembu a xi boheka ku endla tano? Doo! “Nkutsulo lowu hakeriweke hi Kreste Yesu” i xikombiso xa “musa lowu nga faneriwiki” wa Xikwembu.—Varhoma 3:24.

Hikokwalaho ka yini nyiko leyi ya Xikwembu ku ri xiendlo xa “musa lowu nga faneriwiki”? Bibele yi ri: “Xikwembu xi tiyisekisa rirhandzu ra xona n’wini eka hina, hileswi Kreste a hi feleke, loko ha ha ri vadyohi.” (Varhoma 5:8) Rirhandzu ri susumetele Xikwembu leswaku xi kutsula vanhu eka xidyoho. A swi nga bohi leswaku xi hi komba rirhandzu ro tano naswona a hi nge swi koti ku xi hakela. Nyiko leyi Xikwembu xi hi nyikeke yona, i xikombiso lexikulu xa rirhandzu ku tlula hinkwaswo leswi tshameke swi va kona.

HI WAHI MATSHALATSHALA LAMA ENDLIWEKE?

Tinyiko tin’wana i ta risima hikuva ti kombisa matshalatshala lawa munyiki wa tona a ma endleke. Loko munhu a hi nyika nchumu lowu a wu tekaka wu ri wa nkoka eka yena, nyiko yoleyo ha yi tlangela swinene hikwalaho ka leswi munyiki wa yona a endleke matshalatshala lamakulu.

Xikwembu xi nyikele hi “ N’wana wa xona la tswariweke a ri swakwe.” (Yohane 3:16) Xi nyikele hi N’wana wa xona loyi xi n’wi rhandzaka swinene. Eka malembe yo tala swinene lama hundzeke loko Xikwembu xi ri karhi xi tumbuluxa vuako hinkwabyo, Yesu a tirha na xona naswona u ve “munhu loyi [xi] n’wi rhandzaka hilaha ku hlawulekeke.” (Swivuriso 8:30) Yesu i ‘N’wana wa Xikwembu loyi a rhandzekaka’ naswona i “xifaniso xa Xikwembu lexi nga vonakiki.” (Vakolosa 1:13-15) Yesu ni Xikwembu a va ri ni vuxaka lebyikulu swinene.

Kambe Xikwembu a ‘xi n’wi tsetselelanga hambi ku ri N’wana wa xona.’ (Varhoma 8:32) Yehovha u nyikele hi nchumu lowu a wu ri wa nkoka swinene eka yena hikwalaho ka hina. A ku na nyiko yin’wana leyi n’wi koxeke ku tlula leyi.

NDLELA LEYI NYIKO YOLEYO YI HI PFUNAKA HA YONA

Tinyiko tin’wana i ta risima hikuva ti hi pfuna hi swilo swo karhi kumbexana hi swilo swa xihatla. Hi xikombiso, a wu ta titwa njhani loko munhu un’wana hi ku tirhandzela a vula leswaku u ta ku hakelela swikoxo swa vutshunguri lebyi poniseke vutomi bya wena leswi a wu nga ta swi kota ku swi hakelela! Handle ko kanakana, a wu ta yi tlangela swinene nyiko yoleyo.

“Tanihi leswi hinkwavo va faka eka Adamu, kutani hinkwavo va ta hanyisiwa eka Kreste.” (1 Vakorinto 15:22) Leswi hi nga vatukulu va Adamu, hinkwerhu ha “fa” naswona a hi swi koti ku balekela mavabyi ni rifu kumbe ku lulamisa vuxaka bya hina ni Xikwembu. Leswi hi nga vanhu lava nga hetisekangiki, a hi nge swi koti ku tihanyisa kumbe ku “hanyisa” munhu un’wana. Bibele yi ri: “A nga kona ni wun’we eka vona la nga kutsulaka makwavo, hambi ku ri ku nyika Xikwembu nkutsulo wakwe.” (Pisalema 49:7) Hakunene hi lava mpfuno hikuva a hi nge swi koti hakela nyiko ya nkutsulo. Handle ko pfuniwa, a hi nga ta swi kota hi hexe.

Hikwalaho ka leswi a hi rhandzaka, Yehovha u hi hakelele swikoxo swa “vutshunguri,” leswi ponisaka vutomi  leswaku ha Yesu vanhu “hinkwavo va ta hanyisiwa.” Xana nkutsulo wu swi endlisa ku yini leswi? “Ngati ya Yesu N’wana wa xona ya hi basisa eswidyohweni hinkwaswo.” Loko hi kombisa ripfumelo eka ngati ya Yesu leyi halatiweke, swi ta endla leswaku hi rivaleriwa swidyoho ni ku va ni ntshembo wa vutomi lebyi nga heriki. (1 Yohane 1:7; 5:13) Xana nkutsulo wu ta ma endlela yini maxaka ya hina lama feke? ‘Tanihi leswi rifu ri veke kona hikwalaho ka munhu, ni ku pfuka ka vafi ku va kona hikwalaho ka munhu Yesu.’—1 Vakorinto 15:21. *

A ku na nyiko leyi humaka eka xihloko lexi tlakuke kumbe leyi nyikeriweke hi kwalaho ka rirhandzu ku fana ni xitlhavelo xa Yesu. A ku na munhu ni un’we loyi a tshameke a nyikeleke hi nchumu lowu nga wa risima eka yena ku fana ni ndlela leyi Yehovha Xikwembu a endleke hakona. Nkutsulo i nyiko yi ri yoxe leyi endlaka leswaku hi kota ku kutsuriwa eka xidyoho ni rifu. Hakunene, a yi kona nyiko ni yin’we leyi nga ringanisiwaka ni nkutsulo!

 

^ ndzim. 19 Loko u lava ku twa swo tala malunghana ni xikongomelo xa Xikwembu xo pfuxa vafi, hlaya ndzima 7, ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha naswona ya kumeka eka www.jw.org/ts.

DYONDZA SWO TALA

“Hi xona xi nga sungula xi hi rhandza”

Xana marito lama nge “Xikwembu i rirhandzu” ma vula yini hakunene?