Swiphiqo swin’wana swi nga ha phikelela, mikarhi yin’wana swi nga teka nkarhi wo leha naswona swi nga ha dzima timitsu hi nga swi xiyanga. Xana Bibele yi nga hi nyika switsundzuxo leswi nga hi pfunaka leswaku hi tlhantlha swiphiqo swo tano leswi phikelelaka ni ku hi heta matimba? Xiya swikombiso swin’wana.

KU VILELA NGOPFU

Rosie u ri: “A ndzi tshamela ku vilela na swona mikarhi yin’wana, a ndzi vilerisiwa hi nchumu wutsongo lowu a wu hundzuka nchumu lowukulu emiehleketweni ya mina.” Hi tihi tindzimana ta Bibele leti n’wi pfuneke? Yin’wana ya tona i Matewu 6:34 leyi nge: “Mi nga tshuki mi vilela hi siku leri tlhandlamaka, hikuva siku leri tlhandlamaka ri ta va ni mivilelo ya rona. Vubihi bya siku rin’wana ni rin’wana byi enele rona.” Sweswi Rosie u vula leswaku marito wolawo ya Yesu, ma n’wi pfunile leswaku a tshika ku vilela hi swilo leswi nga ha endlekaka mundzuku. U engetela a ku: “A ndzi ri ni swiphiqo swo tala lerova a ndzi nga fanelanga ndzi swi engetela hi ku vilerisiwa hi swilo leswi nga si humelelaka, leswi kumbexana swi nga taka swi nga humeleli.”

Yasmine, na yena u xiye leswaku a karhatiwa hi ku vilela ngopfu. U ri: “A ndzi tshamela ku rila naswona mikarhi yin’wana ni vurhongo a byi nga phahi nivusiku. A ndzi tshamela ku anakanya hi swilo swo biha leswi nga ha ndzi humelelaka naswona sweswo a swi ndzi tekela ntsako.” Hi rihi tsalwa leri n’wi pfuneke? U vula leswaku i 1 Petro 5:7 leri nge: “Mi lahlela ku vilela hinkwako ka n’wina eka [Xikwembu], hikuva xa mi khathalela.” Yasmine u ri: “A ndzi tshamela ku khongela eka Yehovha naswona u hlamule swikhongelo swa mina. Ndzi titwe onge ndzi rhuliwe ndzhwalo wo tika emakatleni ya mina. Mikarhi yin’wana ndzi pfa ndzi anakanya swilo swo biha leswi nga ha ndzi humelelaka, kambe se ndza yi tiva ndlela yo lwisana na swona.”

 KU VEKETELA MITIRHO

Muntshwa loyi a vuriwaka Isabella u ri: “Ndzi anakanya leswaku ku veketela mitirho i xitekela hikuva na tatana u tano. Ndzi veketela ku endla mitirho ya nkoka hambiloko ndzi nga endli nchumu handle ko hlalela TV. I mukhuva wo biha hikuva wu endla leswaku munhu a va ni ntshikilelo naswona a nga wu endli kahle ntirho.” Nsinya wa nawu lowu n’wi pfuneke wu kumeka eka 2 Timotiya 2:15 leyi nge: “Endla hinkwaswo leswi u nga swi kotaka leswaku u tivonakarisa u amukeleka eka Xikwembu, u ri mutirhi la nga riki na nchumu wo khomiwa hi tingana ha wona.” Isabella u ri: “A ndzi nga swi lavi ku khomisa Yehovha tingana hi ntirho wa mina hileswi a ndzi veketela.” Sweswi Isabella u endla mitirho ka ha ri ni nkarhi.

Kelsey, na yena u ri: “Loko ndzi nyikiwe ntirho, a ndzi wu veka naswona a ndzi ta wu endla loko se wu laveka. Kutani a ndzi ta rila, ndzi heleriwa hi vurhongo ndzi tlhela ndzi vilela. A swi vava.” Kelsey u pfuniwe hi Swivuriso 13:16 leyi nge: “Un’wana ni un’wana wo tlhariha u ta endla swilo hi ku tiva, kambe xihunguki xi ta hangalasa vuphukuphuku hinkwako-nkwako.” Loko a hi byela leswi a swi dyondzeke loko a anakanyisisa hi tsalwa rero u ri: “I vutlhari ku kunguhata swilo nkarhi wa ha ri kona. Sweswi ndzi ni buku leyi tshamaka etafuleni ra mina, leyi ndzi tsalaka ntirho lowu landzelaka lowu ndzi faneleke ndzi wu endla naswona sweswo swi ndzi endla leswaku ndzi hleleka ni ku endla swilo hi nkarhi.”

KU VA NI XIVUNDZA

Kirsten u ri: “Nuna wa mina u ndzi tshikile, a ndzi siya ni vana va mune.” Kambe hi rihi tsalwa leri n’wi pfuneke? Swivuriso 17:17 yi ri: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” Kirsten u endle xinghana ni vanhu lava gandzelaka Yehovha ku fana na yena. U vuyeriwe njhani? U ri: “Vanghana va mina va ndzi seketele hi tindlela to tala. Van’wana a va ndzi tisela swakudya ni swiluva. Van’wana va ndzi pfunile ni vana va mina loko hi rhurha, kanharhu loku! Un’wana u ndzi pfune leswaku ndzi kuma ntirho. Vanghana va mina a va tshama va lunghekele ku ndzi pfuna.”

Delphine loyi hi buleke ha yena eka swihloko leswi hundzeke na yena a karhatiwa hi xivundza. Loko a hlamusela ndlela leyi a titwa ha yona endzhaku ka maxangu hinkwawo lama n’wi weleke u ri: “A swi fana ni loko ndzi pfaleriwile exiyindlwanini xo karhi ndzi ri ndzexe ndzi lo goo, loko vanhu van’wana hinkwavo va ri karhi va tiphina hi vutomi. Loko hi hala tlhelo ndzi nga ri ni ntsako naswona ndzi ri ni xivundza.” Tsalwa rin’wana leri n’wi pfuneke i Pisalema 68:6 leri nge: “Xikwembu xi endla leswaku lava tshamaka va ri voxe va tshama endlwini.” U hlamusela a ku: “A ndzi swi tiva leswaku ndzimana yoleyo a yi vulavuli hi kaya ra xiviri. Kambe, ndzi swi twisisile leswaku Xikwembu xi hi nyika ndhawu yo tumbela yo fanekisela loko hi va ni vuxaka na xona. Hi ti kuma hi ri endhawini leyi hlayisekeke laha hi nga ni vanghana lava hi seketelaka lava na vona va rhandzaka Yehovha. Kambe a ndzi fanele ndzi rhanga ndzi va ni vuxaka lebyinene na Yehovha leswaku ndzi ta kota ku va ni vuxaka lebyinene ni vamakwerhu. Kutani u pfuniwe hi Pisalema 37:4 leyi nge: ‘Kuma ntsako lowu heleleke eka Yehovha, kutani u ta ku nyika leswi komberiwaka hi mbilu ya wena.’”

U gimete hi ku vula a ku: “Ndzi xiye leswaku a ndzi fanele ndzi titshega hi Yehovha. I munghana lonene ku tlula hinkwavo. Kutani ndzi tsale mintlango leyi a ndzi ta yi tlanga ni van’wana leswaku ndzi ta va ni vanghana lava rhandzaka Yehovha. Ndzi dyondze ku xiya timfanelo letinene eka van’wana, ku va khoma kahle ni ku tlhela ndzi swi ba hi makatla swihoxo swa vona.”

I ntiyiso leswaku vanghana lava tirhelaka Xikwembu a va hetisekangi. Ku fana ni vanhu van’wana, Timbhoni ta Yehovha na tona ti ni swiphiqo. Hambiswiritano, leswi va leteriweke hi Bibele va susumeteleka ku pfuna vanhu loko swi ri ematimbeni ya vona. I vutlhari ku va ni vanghana vo tano. Nilokoswiritano, xana Bibele yi nga tlhela yi ku pfuna loko u langutana ni swiyimo leswi u nga ta ka u nga swi koti ku swi cinca namuntlha, swo tanihi mavabyi lama nga tshungulekiki kumbe gome leri vangiwaka hi ku feriwa?

Ku landzela switsundzuxo swa le Bibeleni swi nga ku pfuna leswaku u kuma vanghana lavanene lava nga ta ku seketela