Nghena endzeni

Hundzela eka leswi nga endzeni

Timbhoni Ta Yehovha

Hlawula ririmi Xitsonga

Ndlela Leyi Bibele Yi Nga Ku Pfunaka Ha Yona Leswaku U Va Ni Vumundzuku Lebyinene

Ndlela Leyi Bibele Yi Nga Ku Pfunaka Ha Yona Leswaku U Va Ni Vumundzuku Lebyinene

TIVONE u ri karhi u famba endleleni ni vusiku, ku lo dzwii! Hambileswi ku nga ni munyama, u kota ku vona ndlela hileswi u khomeke thoci leri voningaka kahle. Loko u ri kombetela ehansi, u kota ku vona kahle laha u kandziyaka kona. Naswona loko u ri kombetela emahlweni, rivoni ra rona leri voningaka swinene ri ku voningela ni le mahlweni laha wa ha yaka kona.

Hi ndlela yo karhi, Bibele yi fana ni thoci rolero. Hilaha hi dyondzeke hakona eka swihloko leswi nga hundza, Rito ra Xikwembu ri nga hi pfuna leswaku hi kota ku langutana ni swilo leswi hi karhataka sweswi, ku nga swiphiqo swa siku na siku leswi hinkwerhu hi langutanaka na swona emisaveni leyi yo biha. Kambe Bibele yi endla leswi tlulaka sweswo. Yi tlhela yi hi voningela leswaku hi kota ku tiva vumundzuku, ni ku hi pfuna leswaku hi kota ku landzela ndlela leyi nga ta endla leswaku hi kuma ntsako wa hilaha ku nga heriki. (Pisalema 119:105) Hi ndlela yihi?

A hi kambisiseni tindlela timbirhi leti Bibele yi nga hi pfunaka ha tona leswaku hi va ni ntshembo hi vumundzuku: 1 yi hi pfuna leswaku hi hanya vutomi lebyi nga ni xikongomelo 2 ni ku hi dyondzisa ndlela yo va ni vunghana lebyi nga heriki ni Muvumbi wa hina.

1 KU HANYA VUTOMI LEBYI NGA NI XIKONGOMELO

Bibele yi tamele switsundzuxo leswi tshembekaka leswi nga hi pfunaka loko hi ri ni swiphiqo, kambe yi endla leswi tlulaka sweswo. Ematshan’wini yo hi khutaza ku khathala hi hina vini ntsena, Bibele yi hi pfuna ku xiya leswaku ku ni swilo swa nkoka leswi hi nga khathalaka ha swona ku tlula ku khathala hi hina vini ntsena. Loko hi endla tano, hi ta hanya vutomi lebyi nga ni xikongomelo.

Hi xikombiso, anakanya hi nsinya lowu wa nawu: “Ku nyika swi tisa ntsako lowukulu ku tlula ku amukela.” (Mintirho 20:35) Xana wa ha wu tsundzuka nkarhi lowu u tshameke u pfuna munhu la pfumalaka? Kumbe, xana u tinyike nkarhi wo yingisela munghana loko a ri karhi a tiphofula swa le xifuveni? Xana a wu nga tsakanga hi leswi u pfuneke munhu un’wana?

 Hi va ni ntsako lowukulu loko hi nyika van’wana hi nga langutelanga leswaku na vona va hi nyika xo karhi. Mutsari un’wana u te: “Loko u hanana handle ko langutela ku vuyeriwa hi swo karhi u ta va ni ntsako.” Loko hi pfuna van’wana ngopfungopfu lava nga ta ka va nga swi koti ku hi hakela, hi ta vuyeriwa. Hi sungula ku vona nkoka wa vutomi bya hina. Entiyisweni hi va hi tirhisana ni muvumbi loyi a nga ta hi tlherisela swiendlo swa hina swa musa. (Swivuriso 19:17) Muvumbi wa hina wa tsaka loko hi pfuna swisiwana, naswona u hi tshembisa vutomi lebyi nga heriki emisaveni ya paradeyisi, ku nga ntshembo lowu hlamarisaka wa vumundzuku!—Pisalema 37:29; Luka 14:12-14. *

Xa nkoka swinene, Bibele yi dyondzisa leswaku hi ta hanya vutomi lebyi nga ni xikongomelo loko hi gandzela Xikwembu xa ntiyiso, ku nga Yehovha. Rito rakwe ri hi khutaza leswaku hi n’wi dzunisa, hi n’wi xixima ni ku n’wi yingisa. (Eklesiasta 12:13; Nhlavutelo 4:11) Loko hi endla tano, hi ta va hi endla nchumu lowukulu swinene, hi ta va hi tsakisa mbilu ya Muvumbi wa hina. Entiyisweni u hi khutaza a ku: “Tlhariha u tsakisa mbilu yanga.” (Swivuriso 27:11) Loko hi endla swiboho swa vutlhari leswi sekeriweke eBibeleni, hi tsakisa mbilu ya tata wa hina wa le tilweni. Hikwalaho ka yini? Hikuva wa khathala hi hina naswona u lava leswaku ku pfuneka hina loko hi landzelela nkongomiso wakwe. (Esaya 48:17, 18) Hakunene, a yi kona ndlela yin’wana yo hanya vutomi lebyi nga ni xikongomelo handle ka loko hi gandzela Hosi ya vuako hinkwabyo ni ku tlhela hi hanya hi ndlela leyi n’wi tsakisaka.

2 KU VA MUNGHANA WA MUVUMBI WA HINA

Bibele yi tlhela yi hi dyondzisa leswaku hi fanele hi aka vuxaka ni Muvumbi wa hina. Bibele yi ri: “Tshinelani eka Xikwembu, kutani xi ta tshinela eka n’wina.” (Yakobo 4:8) Mikarhi yin’wana hi nga ha anakanya leswaku a swi koteki ku va munghana wa Xikwembu xa Matimba hinkwawo. Kambe Bibele ya hi tiyisekisa leswaku loko hi “lava Xikwembu,” hi ta “xi kuma hakunene,” hikuva ‘a xi le kule ngopfu ni un’wana ni un’wana wa hina.’ (Mintirho 17:27) Bibele yi hi tsundzuxa leswaku ku va munghana wa Xikwembu swi ta endla leswaku hi va ni vumundzuku lebyinene. Hi ndlela yihi?

Anakanya hi mhaka leyi: Ku nga khathariseki matshalatshala lama hi ma endlaka, a hi nge swi koti ku balekela nala wa hina lonkulu ku nga rifu. (1 Vakorinto 15:26) Nilokoswiritano, Xikwembu i xa hilaha ku nga riki na makumu. A xi nge pfuki xi file naswona xi lava leswaku vanghana va xona na vona va hanya hilaha ku nga heriki. Hi ku tirhisa marito lama khumbaka mbilu, Bibele yi hi byela leswi Yehovha a swi navelelaka lava n’wi lavaka, loko a ku: ‘Onge mi nga hanya hi masiku.’—Pisalema 22:26.

Xana u nga swi kotisa ku yini ku va ni vunghana byo tano lebyi nga heriki na Xikwembu? Yana emahlweni u dyondza ha yena eRitweni rakwe ku nga Bibele. (Yohane 17:3; 2 Timotiya 3:16) Kombela van’wana va ku pfuna u twisisa Matsalwa. Bibele ya hi tiyisekisa leswaku loko hi ‘hambeta hi kombela Xikwembu’ hi mbilu hinkwayo leswaku xi hi nyika vutlhari, xi ta hi nyika byona. * (Yakobo 1:5) Xo hetelela, tikarhatele ku hanya hi leswi u swi dyondzaka ni ku pfumelela rito ra Xikwembu ri tirha tanihi ‘rivoni enengeni wa wena, ni ku vonakala endleleni ya wena,’ sweswi ni hilaha ku nga heriki.—Pisalema 119:105.

^ ndzim. 8 Leswaku u kuma rungula leri engetelekeke mayelana ni xitshembiso xa Xikwembu xa vutomi lebyi nga heriki eParadeyisini, vona ndzima 3 ya buku leyi nge, I Yini Leswi Hi Nga Swi Dyondzaka eBibeleni? leyi kandziyisiweke hi Timbhoni ta Yehovha.

^ ndzim. 13 Timbhoni ta Yehovha ti nga swi tsakela ku dyondza Bibele na wena mahala leswaku u ta kota ku twisisa Matsalwa. Leswaku u tiva ndlela leyi dyondzo ya Bibele yi fambisiwaka ha yona, hi kombela u vona vhidiyo leyi nge, Leswi Endlekaka Eka Dyondzo Ya Bibele? Nghena eka website ya www.jw.org/ts. (Languta eka MINKANDZIYISO > TIVHIDIYO).

Xikwembu i xa hilaha ku nga riki na makumu, naswona xi lava leswaku vanghana va xona na vona va hanya hilaha ku nga heriki