Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  No. 1 2017

Khombo Leri Vaka Kona Loko Vanhu Va Twisisa Bibele Hi Ndlela Leyi Hoxeke

Khombo Leri Vaka Kona Loko Vanhu Va Twisisa Bibele Hi Ndlela Leyi Hoxeke

Xinhwanyetana xin’wana xi vone musi lowu a wu huma eka tichimele ta le fektri, lowu a wu endla leswi a swi vonaka onge i mapapa. Xi gimete hi ku vula leswaku xikongomelo xa fektri yoleyo a ku ri ku endla mapapa. Ndlela leyi xinhwanyetana xexo a xi twisisa mhaka yoleyo ha yona, yi nga ha vonaka yi nga bihanga ngopfu. Kambe, ku twisisa swilo swin’wana swa nkoka hi ndlela leyi hoxeke, swi nga ha hoxa vutomi bya hina ekhombyeni. Hi xikombiso, ku twisisa swiletelo leswi nga ebodlheleni ra murhi hi ndlela leyi hoxeke, swi nga va ni khombo.

Ku twisisa Bibele hi ndlela leyi hoxeke swi nga va ni khombo swinene. Hi xikombiso, vanhu van’wana va twisise tidyondzo ta Yesu hi ndlela leyi hoxeke. (Yohane 6:48-68) Ematshan’weni yo dyondza leswi engetelekeke, va ale tidyondzo ta Yesu hinkwato. Hakunene va lahlekeriwile!

Xana u hlaya Bibele leswaku yi ku kongomisa evuton’wini? Loko swi ti tano, u endla kahle. Kambe, xana swi nga ha endleka leswaku u swi twisise hi ndlela leyi hoxeke leswi u swi hlayeke? Swi va endlekerile vanhu vo tala. Xiya swilo swinharhu leswi endlaka leswaku vanhu va twisisa Bibele hi endla leyi hoxeke.

  • Vanhu van’wana va xi twisise hi ndlela leyi hoxeke xileriso xa Bibele lexi nge, “chava Xikwembu xa ntiyiso.” Va anakanya leswaku Bibele yi vula leswaku va fanele va chava Xikwembu hi leswi xi nga ni tihanyi. (Eklesiasta 12:13) Kambe Xikwembu a xi lavi leswaku vanhu lava xi gandzelaka va titwa hi ndlela yoleyo. Xi ri: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna.” (Esaya 41:10) Ku chava Xikwembu swi vula ku xi xixima.

  • Xana misava yi ta herisiwa hi ndzilo?

    Vanhu van’wana va ma twisisa hi ndlela leyi hoxeke marito lama kumekaka eBibeleni lama nge: “Xin’wana ni xin’wana xi ni nkarhi wa xona lowu vekiweke, . . . nkarhi wa ku velekiwa ni nkarhi wa ku fa.” Va vula leswaku Xikwembu xi veke nkarhi lowu munhu un’wana ni un’wana a nga ta fa ha wona. (Eklesiasta 3:1, 2) Hambiswiritano, tsalwa leri ri vulavula hi ndzhendzeleko wa vutomi ni leswaku rifu ri hi wela hinkwerhu. Rito ra Xikwembu ri tlhela ri hi dyondzisa leswaku swiboho swa hina swi nga khumba vutomi bya hina. Hi xikombiso, ri ri: “Ku chava Yehovha ku ta engetela masiku.” (Swivuriso 10:27; Pisalema 90:10; Esaya 55:3) Njhani? Hi xikombiso, loko hi xixima Rito ra Xikwembu, swi ta endla leswaku hi papalata mikhuva leyi nga ha hoxaka vutomi bya hina ekhombyeni, yo tanihi vudakwa ni mahanyelo yo biha.—1 Vakorinto 6:9, 10.

  • Vanhu van’wana va teka mhaka yo fanekisela ya le Bibeleni, leyi vulaka leswaku tilo ni misava swi “hlayiseriwe ndzilo,” yi ri mhaka leyi nga ta humelela hi ku kongoma. (2 Petro 3:7) Kambe Xikwembu xi tshembisa leswaku a xi nge pfuki xi pfumelele leswaku misava leyi yi herisiwa. Xikwembu xi ‘simeke misava etindhawini leti xi ti endleleke tona; a yi nge tsekatsekisiwi hilaha ku nga riki na makumu, kumbe hi masiku.’ (Pisalema 104:5; Esaya 45:18) Mafambiselo ya misava leyi yo homboloka hi wona lama nga ta heriseriwa makumu, onge hiloko ma herisiwa hi ndzilo, ku nga ri pulanete leyi hi tshamaka eka yona. Kasi matilo wona i ndhawu leyi Yehovha a tshamaka eka yona.

HIKOKWALAHO KA YINI MINKARHI YIN’WANA BIBELE YI TWISISIWA HI NDLELA LEYI HOXEKE?

Hilaha u swi voneke hakona eka swikombiso leswi, hakanyingi vanhu va twisisa rungula ra le Bibeleni hi ndlela leyi hoxeke. Hikokwalaho ka yini Xikwembu xi pfumelela sweswo? Van’wana va nga ha ku: ‘Loko Xikwembu a xi tlharihile naswona xi tiva swilo hinkwaswo, a xi ta va xi hi nyike buku leyi tsariweke hi ndlela leyi vanhu hinkwavo a va ta yi twisisa hi ku olova. Hikokwalaho ka yini xi nga endlanga tano?’ Xiya swivangelo swinharhu leswi endlaka leswaku vanhu va twisisa Bibele hi ndlela leyi hoxeke.

  1. Bibele yi tsariwe hi ndlela leyi yi nga twisisiwaka hi vanhu lava titsongahataka va tlhela va tiyimisela ku dyondza. Yesu u byele Tata wakwe a ku:  “Ndza ku dzunisa erivaleni, Tatana, Hosi ya tilo ni misava, hikuva swilo leswi u va fihlele hi vukheta lavo tlhariha ni lava va nga ni ku twisisa, kutani u swi hlavutele swihlangi.” (Luka 10:21) Bibele yi tsariwe hi ndlela yo hlamarisa lerova i vanhu lava titsongahataka ntsena lava nga kotaka ku yi twisisa. Vanhu lava tikukumuxaka, ku nga “lavo tlhariha ni lava va nga ni ku twisisa,” hakanyingi va twisisa Bibele hi ndlela le yi hoxeke. Kambe vanhu lava hlayaka Bibele ni ku titsongahata ku fana ni “swihlangi,” naswona va tiyimiseleke ku dyondza, hakanyingi va ri twisisa ku antswa rungula ra Xikwembu ra le Bibeleni. Hakunene Xikwembu xi tirhise vutlhari loko xi tsala Bibele!

  2. Bibele yi tsaleriwe vanhu lava lavaka ku pfuniwa hi Xikwembu leswaku va yi twisisa. Yesu u vule leswaku vanhu a va ta lava ku pfuniwa leswaku va swi twisisa kahle leswi a a swi dyondzisa. A va ta pfuniwa hi mani? Yesu u te: “Mupfuni, la nga moya lowo kwetsima, loyi Tatana a nga ta n’wi rhumela hi vito ra mina, u ta mi dyondzisa swilo hinkwaswo.” (Yohane 14:26) Xikwembu xi tirhisa moya wa xona lowo kwetsima leswaku xi pfuna vanhu va twisisa rungula leri va ri hlayaka eBibeleni. Kambe Xikwembu a xi wu tirhisi moya wa xona leswaku xi pfuna vanhu lava nga swi laviki ku pfuniwa hi xona, hi yona mhaka leyi swi va tikelaka ku twisisa leswi Bibele yi swi dyondzisaka. Moya lowo kwetsima wu tlhela wu kongomisa Vakreste lava yi twisisaka kahle Bibele leswaku va pfuna vanhu lava lavaka mpfuno.—Mintirho 8:26-35.

  3. Rungula rin’wana ra le Bibeleni ri nga ha twisisiwa hi nkarhi lowu faneleke. Hi xikombiso, muprofeta Daniyele u byeriwe leswaku a tsala rungula leri a ri vulavula hi swilo swa nkarhi lowu taka. Ntsumi yi n’wi byele yi ku: “Wena Daniyele, endla marito lawa ma va xihundla, u lemela buku, ku fika enkarhini wa makumu.” Vanhu vo tala va hete malembe yo tala va ri karhi va hlaya buku ya Bibele ya Daniyele, kambe a va nga swi twisisi leswi yi swi vulaka. Hambi ku ri Daniyele na yena a a nga ri twisisi rungula rin’wana leri a ri tsaleke. Hi ku titsongahata u te: “Ndzi swi twile, kambe a ndzi nga swi twisisi.” Vanhu a va ta hetelela va byi twisisile vuprofeta bya Xikwembu lebyi tsariweke hi Daniyele, kambe ntsena hi nkarhi lowu Xikwembu xi wu vekeke. Ntsumi yoleyo yi te: “Famba, Daniyele, hikuva marito lawa ma endliwe xihundla, ma lemeriwa ku fikela enkarhini wa makumu.” I va mani lava nga ta twisisa rungula ra Xikwembu? “A va kona vo homboloka lava va nga ta twisisa; kambe lava va nga ni vutlhari va ta twisisa.” (Daniyele 12:4, 8-10) Xisweswo, Xikwembu xi endla leswaku rungula ro karhi ra le Bibeleni ri twisisiwa hi nkarhi wa xona lowu faneleke.

Xana Timbhoni ta Yehovha ti tshame ti twisisa rungula ro karhi ra Bibele hi ndlela leyi hoxeke? Ina. Kambe loko nkarhi wa Xikwembu wa leswaku rungula rero ri twisisiwa wu fikile, Timbhoni ti antswise ndlela leyi a ti ri twisisa ha yona rungula rero. Ti tshemba leswaku loko ti endla tano ti va ti tekelela vaapostola va Kreste, lava hi ku titsongahata va antswiseke matwisiselo ya vona loko Yesu a va lulamisa.—Mintirho 1:6, 7.

Ndlela leyi hoxeke leyi xinhwanyetana a xi ehleketa ha yona malunghana ni ndlela leyi mapapa ma endlekaka ha yona, a yi nga ri na khombo ngopfu. Kambe leswi Bibele yi swi dyondzisaka i swa nkoka swinene leswaku u swi tiva. Rungula ra Bibele i ra nkoka swinene lerova a swi olovi ku va munhu a ri twisisa loko a ti hlayela a ri yexe. Hikokwalaho ka sweswo, kombela mpfuno leswaku u ta kota ku twisisa leswi u swi hlayaka. Kombela vanhu lava dyondzaka Bibele hi ku titsongahata, lava titshegaka hi moya lowo kwetsima wa Xikwembu leswaku va twisisa Bibele naswona va tiyisekaka leswaku hi hanya enkarhini lowu Xikwembu xi lavaka leswaku hi twisisa Bibele ku tlula rini na rini. Vulavurisana ni Timbhoni ta Yehovha kumbe u hlaya rungula ra tona leri kumekaka eka website ya jw.org/ts. Bibele yi tshembisa leswi: “Loko u vitana ku twisisa . . . , u ta kuma vutivi bya Xikwembu.”—Swivuriso 2:3-5.

DYONDZA SWO TALA

SWIVUTISO LESWI HLAMURIWAKA HI BIBELE

Xana Bibele Ya Tikaneta?

Kambisisa laha Bibele yi tikombaka yi tikaneta ni tindlela leti u nga ti tirhisaka leswaku mongo wu twala kahle.