Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NO. 1 2017

 NHLOKOMHAKA YA XIFUNENGETO | NDLELA LEYI U NGA PFUNEKAKA HA YONA LOKO U HLAYA BIBELE

Hikokwalaho Ka Yini U Fanele U Hlaya Bibele?

Hikokwalaho Ka Yini U Fanele U Hlaya Bibele?

“A ndzi anakanya leswaku swi ta ndzi tikela ku yi twisisa.”—Jovy

“A ndzi ehleketa leswaku ndzi ta phirheka loko ndzi yi hlaya.”—Queennie

“Loko ndzi vona ndlela leyi Bibele yi nga yikulu ha kona a ndzi nga naveli ku yi hlaya.”—Ezekiel

Xana u tshama u lava ku hlaya Bibele kambe u titwa ku fana ni vanhu lava boxiweke laha henhla? Vo tala va teka ku hlaya Bibele ku ri ndzhwalo. Ku vuriwa yini loko ku ri leswaku ku hlaya Bibele swi nga ku pfuna leswaku u va ni ntsako ni ku hanya vutomi lebyi enerisaka? Ku ni tindlela tin’wana leti nga ku pfunaka leswaku u tsakela ku hlaya Bibele. Xana u nga swi tsakela ku twa tindlela leti Bibele yi nga ku pfunaka ha tona?

Twana leswi vanhu van’wana lava pfunekeke hi ku hlaya Bibele va swi vulaka.

Ezekiel, wa malembe ya kwalomu ka 20, u ri: “Khale a ndzi hanya vutomi lebyi nga riki na xikongomelo, kambe ku hlaya Bibele swi ndzi pfune swinene evuton’wini. Yi ni switsundzuxo leswi pfunaka, leswi ndzi nga swi tirhisaka siku ni siku.”

Frieda, ku nga nhwanyana wa malembe ya kwalomu ka 20, u ri: “Khale a ndzi ri xipandzanhloko, kambe Bibele yi ndzi pfunile leswaku ndzi kota ku tikhoma. Yi tlhele yi ndzi pfuna leswaku ndzi kota ku hanyisana ni vanhu van’wana, naswona sweswi ndzi ni vanghana vo tala.”

Eunice, loyi a nga ni malembe ya kwalomu ka 50, loko a vulavula hi Bibele, u ri: “Yi ndzi pfuna leswaku ndzi antswisa vumunhu bya mina ni ku tshika mikhuva yo biha.”

Ku fana ni vanhu lava ha ha ku vulavulaka ha vona, swin’we ni van’wana va timiliyoni lava Bibele yi va pfuneke, ku yi hlaya swi nga ku pfuna leswaku u tiphina evuton’wini. (Esaya 48:17, 18) Yi nga tlhela yi ku pfuna leswaku u (1) Endla swiboho leswinene, (2) u kuma vanghana lavanene, (3) u kota ku langutana ni ntshikilelo, (4) naswona xa nkoka swinene u dyondza ntiyiso malunghana ni Xikwembu. Nkongomiso lowu nga eBibeleni wu huma eka Xikwembu, hikokwalaho a wu nge tisoli loko u wu yingisa. Xikwembu a xi nge pfuki xi hi hambukisile.

Xa nkoka swinene i ku kota ku sungula ku yi hlaya. Hi swihi swilo leswi nga ku pfunaka leswaku u kota ku sungula ku yi hlaya u tlhela u tiphina evuton’wini?