Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza  |  No. 1 2016

 BIBELE YI HUNDZULA VUTOMI BYA VANHU

Ndzi Nyike Lembe Rin’we Ntsena Ra Ku Rhula Ni Ntsako

Ndzi Nyike Lembe Rin’we Ntsena Ra Ku Rhula Ni Ntsako
  • LEMBE RO VELEKIWA: 1971

  • TIKO LERI A HUMAKA EKA RONA: FURWA

  • MATIMU YAKWE: A NDZI RI XIGEVENGA XA MADZOLONGA, MAHANYELO YO BIHA NDZI TLHELA NDZI TIRHISA SWIDZIDZIHARISI

VUTOMI BYA MINA BYA KHALE:

Ndyangu wa ka hina a wu tshama eTellancourt, ku nga ximutana xa le n’walunguvuxa bya Furwa. Tatana a ri Mufurwa naswona manana i Muntariyana. Loko ndzi ri ni malembe ya nhungu, hi rhurhele exidorobanini xa Rome, le Italy laha ku tshamaka swisiwana. Vutomi bya le kaya byi sungule ku tika. Vatswari va mina a va tshamela ku lwa hikwalaho ka swiphiqo swa timali.

Loko ndzi ri ni malembe ya 15, manana u ndzi khutaze leswaku ndzi tikumela vanghana. Kutani ndzi sungule ku heta nkarhi wo tala ni vanghana va mina ekule ni le kaya. Hi ku hatlisa ndzi ve ni vanghana vo biha. Siku rin’wana, wanuna loyi a tikomba a ri ni xinghana u ndzi tshinelerile. U ndzi nyike swidzidziharisi, ndzi swi tekile hileswi a ndzi lava ku vonaka ndzi kurile. Hi ku hatlisa ndzi nghene hi nhloko eka swidzidziharisi ni le ka mahanyelo yo biha. Eka swiendlakalo swo tala, a ndzi pfinyiwa. Vutomi a byi nga ha ri bya nkoka eka mina; a ndzi nga ha ri na mhaka leswaku ndza hanya kumbe ndza fa. A ndzi ri ni xivundza. Loko ndzi ri ni malembe ya 16, ndzi ringete ku tidlaya hi ku nwa bodlela ra whiskey ivi ndzi tlulela enambyeni. Hikwalaho, ndzi hete masiku manharhu ndzi titivarile.

Ndzi sungule ku swi vona leswaku vutomi i bya nkoka, kambe ndzi sungule ku va ni madzolonga ndzi tlhela ndzi va mukanganyisi. A ndzi pfumela ku endla timhaka ta masangu ni vanhu emakaya ya vona, ndzi va nyika swidzidziharisi ivi ndzi yiva swilo swa vona swa nkoka. Mavandla lamakulu ya swigevenga ma ndzi tirhisile leswaku ndzi ngungumerisa swidzidziharisi etikweni hinkwaro ra Italy. A ndzi ri ekhombyeni ro tshamela ku laviwa hi maphorisa. Vutomi bya mina a byi nga ri na xikongomelo naswona a ndzi nga ha lawuleki. Hambiswiritano a ndzi tshemba leswaku ku fanele ku ri ni xivangelo xo va ndzi hanya. Ndzi khongele eka Xikwembu leswaku xi ndzi nyika lembe rin’we ntsena ra ku rhula ni ntsako.

NDLELA LEYI BIBELE YI HUNDZULEKE VUTOMBI BYA MINA HA YONA:

Loko ndzi ri ni malembe ya 24, ndzi endle xiboho xo ya eNghilandhi. Hikwalaho ko tirhisana ni vangungumerisi va swidzidziharisi vutomi bya mina a byi ri ekhombyeni. Ndzi nga si famba, ndzi endzele manana naswona ndzi hlamarisiwe hi ku vona wanuna loyi a vuriwaka Annunziato Lugarà a ri karhi a bula na manana hi Bibele. * Swi ndzi chavisile ku n’wi vona hikuva a ndzi n’wi tiva a ri xigevenga kutani  ndzi n’wi vutisile leswaku a a lava yini. U ndzi byele hi ku cinca lokukulu loku a ku endleke evuton’wini byakwe leswaku a va Mbhoni ya Yehovha naswona u ndzi kombele leswaku loko ndzi fika eNghilandhi ndzi vulavula ni Timbhoni. Ndzi pfumerile. Hambiswiritano, loko ndzi fikile ndzi tlhelele eka vutomi bya mina bya khale.

Siku rin’wana exitaratini lexi tshamaka xi tele hi vanhu xa le London, ndzi hlangane ni Mbhoni leyi a yi fambisa timagazini ta Xihondzo xo Rindza ni Xalamuka! Ndzi tsundzuke marito ya Annunziato ivi ndzi kombela Mbhoni yoleyo leswaku yi dyondza Bibele na mina.

Leswi ndzi swi dyondzeke eBibeleni swi ndzi hlamarise ngopfu. Hi xikombiso, ndzi khumbiwe hi rungula leri nga eka 1 Yohane 1:9, leri vulaka leswi hi Xikwembu: “Loko hi vula swidyoho swa hina, xa tshembeka naswona xi lulamile lerova xi nga hi rivalela swidyoho swa hina ni ku hi basisa evubihini hinkwabyo.” Ndzimana yoleyo ya Bibele yi ndzi pfune ngopfu hikuva a ndzi vona mahanyelo ya mina ma thyake ngopfu. Ndzi nambe ndzi sungula ku ya eminhlanganweni eHolweni ya Mfumo ya Timbhoni ta Yehovha. Timbhoni ti ndzi amukele hi musa. Loko ndzi vona xinghana xa vona lexikulu, ku nga nchumu lowu a ndzi wu lava—a ndzi lava ku va xirho xa vandlha ra vona leri fanaka ni ndyangu.

Hambileswi swi nga ndzi tikelangiki ngopfu ku tshika swidzidziharisi ni mahanyelo yo biha, ndzi tikeriwe hi ku antswisa vumunhu bya mina. Ndzi swi vonile leswaku a ndzi fanele ndzi khoma vanhu hi xichavo ni ku va anakanyela. Entiyisweni ndza ha lwisana ni mikhuva yin’wana yo biha. Kambe hi ku pfuniwa hi Yehovha ndzi endle nhluvuko. Ku nga si hela tin’hweti ta ntsevu ndzi ri karhi ndzi dyondza Bibele, ndzi khuvuriwile ndzi va Mbhoni ya Yehovha. A ku ri hi 1997.

NDLELA LEYI NDZI PFUNEKEKE HA YONA:

Endzhaku ka loko ndzi khuvuriwile, ndzi teke Barbara loyi na yena a ha ku vaka Mbhoni ya Yehovha. Loko un’wana wa vanghana va mina va khale a vona ndlela leyi ndzi cinceke vutomi bya mina ha yona na yena u sungule ku dyondza Bibele. Swi nga si ya kwihi, yena ni sesi wakwe va ve Timbhoni. Kokwana wa mina wa xisati, loyi a ri ni malembe yo tlula 80, u sungule ku dyondza Bibele naswona u khuvuriwile a nga si fa.

Sweswi ndzi tirha tanihi hi nkulu evandlheni naswona mina ni nkatanga hi vachumayeri va nkarhi hinkwawo, hi pfuna vanhu lava vulavulaka ririmi ra Xintariyana eLondon. Minkarhi yin’wana, ndza tshikileleka hikwalaho ka vutomi bya mina bya khale, kambe Barbara wa ndzi seketela swinene. Sweswi ndyangu wa mina wu hanya vutomi lebyi tsakisaka lebyi a ku ri khale ndzi byi lava naswona ndzi ni Tatana loyi a ndzi rhandzaka loyi a ku ri khale ndzi n’wi lava. Ndzi kombele Xikwembu leswaku xi ndzi nyika lembe rin’we ra ku rhula ni ntsako, kambe xi ndzi nyike yo tala!

Sweswi ndyangu wa mina wu hanya vutomi lebyi tsakisaka lebyi a ku ri khale ndzi byi lava naswona ndzi ni Tatana loyi a ndzi rhandzaka loyi a ku ri khale ndzi n’wi lava

^ ndzim. 10 Vona xihloko lexi nge “Bibele Yi Hundzula Vutomi Bya Vanhu—A Ndzi Tshama Ndzi Ri Ni Xibamu,” hi ku vula ka Annunziato Lugarà, eka Xihondzo xo Rindza xa July 1, 2014, matluka 8-9.

DYONDZA SWO TALA

XALAMUKA!

Ndza Ha Hanyela Yini?

I yini lexi nga endlaka leswaku munhu a teka rifu tanihi munghana?