Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) MAY 2016

Vuyeriwa Swinene Eka Malunghiselelo Ya Yehovha

Vuyeriwa Swinene Eka Malunghiselelo Ya Yehovha

“Mina Yehovha, ndzi Xikwembu xa wena, Loyi a ku dyondziselaka ku ku pfuna.”—ESAYA 48:17.

TINSIMU: 117, 114

1, 2. (a) Timbhoni ta Yehovha ti yi teka njhani Bibele? (b) Hi xihi xiyenge lexi u xi rhandzaka ngopfu eBibeleni?

HINA Timbhoni ta Yehovha hi rhandza Bibele. Ya hi chavelela, yi hi nyika ntshembo ni ku hi nyika switsundzuxo leswi hi nga swi tshembaka. (Varhoma 15:4) A ko va buku leyi tsariweke hi vanhu kambe i “rito ra Xikwembu.”—1 Vatesalonika 2:13.

2 Hakanyingi, hinkwerhu hi ni swiyenge leswi hi swi rhandzaka eBibeleni. Van’wana va rhandza tibuku leti vulavulaka hi Evhangeli hikuva ti vulavula hi ndlela leyi Yesu a kombiseke vumunhu bya Yehovha ha yona. (Yohane 14:9) Van’wana va rhandza tibuku ta vuprofeta to fana ni ya Nhlavutelo leyi hi byelaka “swilo leswi faneleke ku endleka hi ku hatlisa.” (Nhlavutelo 1:1) Van’wana va chaveleleka loko va hlaya buku ya Tipisalema kasi van’wana va tiphina hi ku hlaya switsundzuxo leswi pfunaka leswi nga eka buku ya Swivuriso. Swi le rivaleni leswaku Bibele i buku ya vanhu hinkwavo.

3, 4. (a) Hi yi teka njhani minkandziyiso ya hina? (b) Hi yihi minkandziyiso yin’wana leyi nga kona leyi endleriweke vanhu vo karhi?

3 Leswi hi rhandzaka Bibele, hi tlhela hi rhandza minkandziyiso  ya hina hi leswi yi sekeriweke eRitweni ra Xikwembu. Tibuku hinkwato, tibroxara, timagazini ni minkandziyiso yin’wana leyi hi yi kumaka i malunghiselelo lama humaka eka Yehovha. Ma hi pfuna leswaku hi tshama hi ri ekusuhi na yena ni ku tiyisa ripfumelo ra hina.—Tito 2:2.

4 Minkandziyiso ya hina yo tala yi tsaleriwe ku tirhisiwa hi Timbhoni ta Yehovha ta swiyimo hinkwaswo. Hambiswiritano, ku ni minkandziyiso leyi tsaleriweke vanhu vo karhi vo tanihi hi vantshwa kumbe vatswari. Swihloko swo tala ni tivhidiyo leti nga eka website ya hina swi endleriwe vanhu lava nga riki Timbhoni ta Yehovha. Switirhisiwa leswi swo hambanahambana swi kombisa leswaku Yehovha u hetisisa xitshembiso xakwe xo nyikela swileriso swo tala eka vanhu hinkwavo.—Esaya 25:6.

5. I yini leswi hi tiyisekaka ha swona leswaku Yehovha wa swi tlangela?

5 Vo tala va hina hi nga tsakela ku va ni nkarhi wo tala wo hlaya Bibele ni minkandziyiso ya hina. A hi nge heti nkarhi lowu fanaka eka nkandziyiso wun’wana ni wun’wana lowu hi wu hlayaka. Kambe hi nga tiyiseka leswaku Yehovha wa tsaka loko hi tirhisa nkarhi wa hina hi vutlhari ku hlaya ni ku dyondza Bibele ni minkandziyiso ya hina. (Vaefesa 5:15, 16) Hambiswiritano, ku ni khombo leri hinkwerhu ka hina hi faneleke hi ri papalata. Hi rihi khombo ra kona?

6. I yini lexi nga endlaka leswaku hi nga vuyeriwi eka malunghiselelo man’wana ya Yehovha?

6 Loko hi nga tivoneli, hi nga ha ehleketa leswaku swiyenge swo karhi swa le Bibeleni kumbe minkandziyiso yo karhi a swi hi khumbi. Hi xikombiso, ku vuriwa yini hi loko xiyenge xo karhi xa le Bibeleni xi vonaka xi nga tirhi eka xiyimo xa hina? Kumbe loko nkandziyiso wo karhi wu nga tsaleriwanga hina? Xana hi hlaya rungula rolero hi ku hatlisa kumbe hi ri papalata hi ku helela? Loko swi ri tano, hi nga ha hundziwa hi rungula ra nkoka leri nga hi pfunaka. Hi nga ri papalata njhani khombo rero? Hi fanele hi tsundzuka leswaku rungula hinkwaro leri hi ri kumaka ri huma eka Yehovha. Hi hlaya leswi eBibeleni: “Mina Yehovha, ndzi Xikwembu xa wena, Loyi a ku dyondziselaka ku ku pfuna.” (Esaya 48:17) Exihlokweni lexi, hi ta kambisisa swiringanyeto swinharhu leswi nga ta hi pfuna leswaku hi vuyeriwa eka malunghiselelo hinkwawo lawa Yehovha a hi nyikaka wona.

SWIRINGANYETO LESWI PFUNAKA KU VA NI DYONDZO YA BIBELE LEYI VUYERISAKA

7. Ha yini hi fanele hi hlaya Bibele hi xikongomelo xo dyondza swo karhi?

7 Yi hlaye hi xikongomelo xo dyondza swo karhi. I ntiyiso leswaku swiphemu swin’wana swa le Bibeleni swi tsaleriwe munhu kumbe ntlawa wo karhi. Hambiswiritano, Bibele yi swi veka erivaleni leswaku “Matsalwa hinkwawo ma huhuteriwe hi Xikwembu naswona ma pfuna.” (2 Timotiya 3:16) Hi yona mhaka hi faneleke hi tiyimisela ku dyondza swo karhi loko hi hlaya Bibele. Makwerhu wo karhi u titsundzuxa leswaku a nga kuma tinhla to hlayanyana eka rungula ro karhi ra le Bibeleni. Leswi swi n’wi pfuna ku dyondza tinhla leti nga riki erivaleni. Kutani loko hi nga si hlaya Bibele, hi fanele hi kombela Yehovha leswaku a hi pfuna hi dyondza swo karhi ni vutlhari byo twisisa tidyondzo leti a lavaka leswaku hi ti dyondza.—Ezra 7:10; hlaya Yakobo 1:5.

Xana u ringeta hi matimba leswaku u vuyeriwa swinene loko u hlaya Bibele? (Vona ndzimana 7)

8, 9. (a) Loko hi hlaya Bibele, i swivutiso swihi leswi hi nga tivutisaka swona? (b) Timfanelo leti vakulu va faneleke va va na tona ti hi byela yini hi Yehovha?

8 Tivutise. Loko u hlaya Bibele, yima kutani  u tivutisa leswi landzelaka: ‘Rungula leri ri ndzi byela yini hi Yehovha? Ndzi nga ri tirhisa njhani rungula leri evuton’wini bya mina? Ndzi nga ri tirhisa njhani leswaku ndzi pfuna van’wana?’ Loko hi anakanyisisa hi swivutiso leswi, hi ta vuyeriwa ngopfu eka dyondzo ya hina ya Bibele. A hi kambisiseni xikombiso xin’wana. Bibele yi hlamusela timfanelo to karhi leti vakulu va faneleke va va na tona. (Hlaya 1 Timotiya 3:2-7.) Leswi vo tala va hina hi nga riki vakulu, hi nga anakanya leswaku rungula leri a ri nge hi pfuni. Hambiswiritano, a hi kambisiseni swivutiso swinharhu leswi boxiweke eku sunguleni leswaku hi vona ndlela leyi timfanelo teto ti nga hi pfunaka ha yona hinkwerhu ka hina.

9 “Rungula leri ri ndzi byela yini hi Yehovha?” Yehovha u hi nyike nxaxamelo wa timfanelo leti vakulu va faneleke va va na tona. U vekele vavanuna lava khathalelaka vandlha milawu leyi tlakukeke. Leswi swi kombisa leswaku vandlha i ra risima eka Yehovha. Bibele yi vula leswaku u ri xave hi “ngati ya N’wana [wakwe.]” (Mintirho 20:28) Yehovha u lava leswaku vakulu va va swikombiso leswinene naswona va ta tihlamulela eka yena hikwalaho ka ndlela leyi va swi khomaka ha yona swirho swa vandlha. U lava leswaku hi titwa hi sirhelelekile hikwalaho ka nkhathalelo wa vona. (Esaya 32:1, 2) Loko hi hlaya hi timfanelo leti, hi vona ndlela leyi Yehovha a hi khathalelaka ha yona hakunene.

Yehovha u lava leswaku un’wana ni un’wana wa hina a anakanyela ni ku va ni langutelo lerinene

10, 11. (a) Loko hi hlaya hi timfanelo ta vakulu, hi nga ri tirhisa njhani rungula leri evuton’wini bya hina? (b) Hi nga ri tirhisa njhani rungula leri leswaku hi pfuna van’wana?

 10 “Ndzi nga ri tirhisa njhani rungula leri evuton’wini bya mina?” Loko u ri nkulu, nkarhi ni nkarhi u fanele u kambisisa nxaxamelo lowu wa timfanelo naswona u ringeta ku antswisa. Loko u “lwela ku fikelela ntirho wa ku va mulanguteri,” u fanele u ringeta ku fikelela timfanelo leti hilaha u nga kotaka hakona. (1 Timotiya 3:1) Kambe Vakreste hinkwavo va nga dyondza eka timfanelo leti. Hi xikombiso, Yehovha u lava leswaku un’wana ni un’wana wa hina a anakanyela ni ku va ni langutelo lerinene. (Vafilipiya 4:5; 1 Petro 4:7) Loko vakulu va ri “swikombiso entlhambini,” hi nga dyondza ni ku “tekelela ripfumelo ra vona.”—1 Petro 5:3; Vaheveru 13:7.

11 “Ndzi nga ri tirhisa njhani rungula leri leswaku ndzi pfuna van’wana?” Hi nga tirhisa nxaxamelo lowu wa vakulu ku pfuna swichudeni swa Bibele ni vanhu lava tsakelaka leswaku va twisisa ndlela leyi vakulu va hambaneke ha yona ni vafundhisi. Nxaxamelo lowu wu nga tlhela wu hi pfuna ku tsundzuka ntirho lowu vakulu va tikarhatelaka ku wu endla evandlheni ra hina. Leswi swi ta hi pfuna leswaku hi xixima vamakwerhu lava. (1 Vatesalonika 5:12) Loko hi ya hi va xixima, swi ta endla leswaku va va ni ntsako exiavelweni xa vona.—Vaheveru 13:17.

12, 13. (a) Hi wihi ndzavisiso lowu hi nga wu endlaka hi ku tirhisa switirhisiwa leswi hi nga na swona? (b) Kombisa ndlela leyi rungula leri hi nga na rona ri nga hi pfunaka ha yona ku twisisa tidyondzo leti tumbeleke.

12 Endla ndzavisiso. Loko hi dyondza Bibele, hi nga lava ku kuma tinhlamulo ta swivutiso leswi landzelaka:

  • I mani loyi a tsaleke buku leyi ya Bibele?

  • Ri tsariwe kwihi naswona rini?

  • I swiendlakalo swihi swa nkoka leswi veke kona loko buku leyi yi tsariwa?

Rungula ro tano ri nga hi pfuna ku xiya tidyondzo leti hi nga ti dyondzaka leti swi nga oloviki ku ti twisisa.

13 Hi xikombiso, Ezekiyele 14:13, 14 yi ri: “Loko tiko rin’wana ri nga tshuka ri ndzi dyohela hi ku ka ri nga tshembeki, kutani ndzi tlakusa voko ra mina ndzi ba tiko rero, ndzi herisa swakudya swa rona, ndzi ri vangela tindlala ni ku fa ka vanhu ni swifuwo, mina [Yehovha] N’wini wa hinkwaswo ndzi ri: ‘Hambiloko vavanuna lava vanharhu, Nowa na Daniele na Yobo, a vo va kona etikweni rero, ku lulama ka vona a ku ta ponisa vona [vini] ntsena.’” (Bibele—Mahungu Lamanene) Loko hi endla ndzavisiso, hi dyondza leswaku Ezekiyele u tsale marito wolawo kwalomu ka malembe ya 612 Kreste a nga si velekiwa. Se a ku hundze malembe ya madzana Nowa na Yobo va file, kambe Yehovha a ha tsundzuka ku tshembeka ka vona. Nilokoswiritano, Daniyele a ha hanya. Swi vonaka onge a ri ni malembe ya 20 loko Yehovha a vula leswaku u lulamile ku fana na Nowa na Yobo. Hi dyondza yini? Yehovha u vona ni ku ma teka ma ri ya nkoka malandza yakwe yo tshembeka, ku katsa ni vantshwa.—Pisalema 148:12-14.

 VUYERIWA EKA MINKANDZIYISO YO HAMBANAHAMBANA

14. Rungula leri tsaleriweke vantshwa ri va pfuna njhani naswona ri nga va pfuna njhani van’wana? (Vona xifaniso lexi nga eku sunguleni ka xihloko lexi.)

14 Minkandziyiso leyi tsaleriweke vantshwa. Hi dyondze leswaku hi nga vuyeriwa eka swiphemu hinkwaswo swa Bibele. Hilaha ku fanaka, hi nga vuyeriwa eka minkandziyiso ya hina hinkwayo. A hi kambisiseni swikombiso swi nga ri swingani. Emalembeni lama ha ku hundzaka, Yehovha u nyike vantshwa rungula ro tala. [1] (Vona nhlamuselo ya le hansi.) Rungula leri ri va pfuna ku lwisana ni ntshikilelo exikolweni ni swiphiqo leswi va langutanaka na swona loko va kula. Kambe hina van’wana hi nga vuyeriwa njhani hi ku hlaya swihloko sweswo swin’we ni tibuku leti endleriweke vantshwa? Loko hi hlaya rungula leri, hi dyondza hi swiphiqo leswi vantshwa va nga na swona naswona hi ta swi kota ku va pfuna ni ku va khutaza.

Vakreste lava kuleke a va fanelanga va honisa ku hlaya rungula leri tsaleriweke vantshwa

15. Ha yini Vakreste lava kuleke va fanele va hlaya rungula leri tsaleriweke vantshwa?

15 Vakreste lava kuleke a va fanelanga va honisa ku hlaya rungula leri tsaleriweke vantshwa. Swiphiqo swo tala leswi ku vulavuriwaka ha swona eka swihloko sweswo swi khumba Vakreste hinkwavo. Hi xikombiso, hinkwerhu ka hina hi fanele hi lwela ripfumelo ra hina, hi lawula ndlela leyi hi titwaka ha yona, hi lwisana ni ntshikilelo wa tintangha ni ku papalata vanghana ni vuhungasi byo biha. Hambileswi minkandziyiso leyi yi tsaleriweke vantshwa, rungula ra yona ri huma eBibeleni naswona Vakreste hinkwavo va nga vuyeriwa.

16. Hi yihi ndlela yin’wana leyi minkandziyiso ya hina yi pfunaka vantshwa ha yona?

16 Minkandziyiso leyi tsaleriweke vantshwa yi nga tlhela yi va pfuna leswaku va tiyisa vuxaka bya vona na Yehovha. (Hlaya Eklesiasta 12:1, 13.) Vanhu lavakulu va nga vuyeriwa na vona. Hi xikombiso, Xalamuka! ya April 2009 a yi ri ni xihloko lexi nge “Vantshwa Va Vutisa . . . Ndzi Nga Endla Yini Leswaku Ndzi Tsakela Ku Hlaya Bibele?” Xihloko lexi a xi ri ni swiringanyeto swo hlayanyana leswi pfunaka ni bokisi leri munhu a nga ri tsemaka ni ku ri hlayisa leswaku a ri tirhisa loko a dyondza. Xana vanhu lavakulu va vuyeriwile eka xihloko xexo? Wansati un’wana loyi a tekiweke tlhelo mutswari u vule leswaku minkarhi hinkwayo a swi n’wi tikela ku hlaya Bibele. Kambe u tirhise swiringanyeto leswi nga eka xihloko xexo naswona sweswi u swi langutela hi mahlongati ku hlaya Bibele. U vula leswaku u tiphina hi ku vona ndlela leyi tibuku ta Bibele ti fambisanaka ha yona naswona u kota ku hlanganisa rungula ra tona, kutani a ku, “A ndzi si tshama ndzi tsakisiwa hi ku hlaya Bibele ku fana ni sweswi.”

17, 18. Hi nga vuyeriwa njhani hi ku hlaya rungula leri tsaleriweke vanhu va le nsin’wini? Vula xikombiso.

17 Minkandziyiso leyi tsaleriweke vanhu va le nsin’wini. Ku sukela hi 2008 hi tiphine hi ku hlaya nkandziyiso wa vandlha wa Xihondzo xo Rindza. Nkandziyiso lowu wu tsaleriwe Timbhoni ta Yehovha, kambe hi ni timagazini tin’wana leti tsaleriweke vanhu va le nsin’wini. Hi nga vuyeriwa njhani ni le ka  tona? Hi xikombiso, loko ku ta munhu loyi u n’wi rhambeke eHolweni ya Mfumo wa tsaka swinene. Loko xivulavuri xi ri karhi xi nyikela nkulumo, u anakanyisisa hi munhu loyi u n’wi rhambeke. Wa tivutisa leswaku u titwa njhani hi swilo leswi a nga le ku swi tweni ni ndlela leyi rungula rero ri nga cincaka vutomi byakwe ha yona. Kutani, u sungula ku khumbeka naswona u ya u yi tlangela swinene nkulumo leyi nga eku nyikeriweni.

18 Ku nga ha endleka leswi fanaka eka hina loko hi hlaya nkandziyiso lowu tsaleriweke vanhu va le nsin’wini. Hi xikombiso, nkandziyiso wa vanhu hinkwavo wa Xihondzo xo Rindza ni swihloko leswi nga eka jw.org swi hlamusela Bibele hi ku tirhisa marito lama twisisekaka hi ku olova. Loko hi hlaya rungula leri, hi antswisa ndlela leyi hi yi twisisaka ha yona Bibele ni ku ya hi rhandza ntiyiso lowu se hi wu tivaka kahle. Nakambe, hi nga dyondza tindlela letintshwa to hlamusela leswi hi pfumelaka eka swona ensin’wini. Hilaha ku fanaka, magazini wa Xalamuka! wu hi tiyisekisa leswaku ku ni Muvumbi. Wu tlhela wu hi dyondzisa ndlela leyi hi nga lwelaka ripfumelo ra hina ha yona.—Hlaya 1 Petro 3:15.

19. Hi nga swi kombisa njhani leswaku hi nkhensa Yehovha hikwalaho ka malunghiselelo lawa a hi endleleke wona?

19 Swi le rivaleni leswaku Yehovha u hi nyike switsundzuxo ni swiletelo swo tala leswaku hi ta vuyeriwa. (Matewu 5:3) A hi yeni emahlweni hi hlaya ni ku tirhisa rungula hinkwaro leri a hi nyikeke rona. Loko hi endla tano, hi ta vuyeriwa naswona hi ta va hi kombisa Yehovha leswaku ha ma tlangela malunghiselelo hinkwawo lawa a hi endlelaka wona.—Esaya 48:17.

^ [1] (ndzimana 14) Rungula ro tano ri katsa tibuku leti nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1 na 2, ni swihloko swa ntlhandlamano leswi nge “Vantshwa Va Vutisa,” leswi sweswi swi kumekaka eka jw.org ntsena.