Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JUNE 2016

Wanuna loyi a nga ni rimhondzo ra matsalana ro chela inki, u yimela Yesu Kreste. Hi yena a nga ta fungha lava nga ta pona

Swivutiso Swa Vahlayi

Swivutiso Swa Vahlayi

Exivonweni xa Ezekiyele, wanuna loyi a ri ni rimhondzo ra matsalana ro chela inki ni vavanuna va tsevu lava khomeke matlhari yo pfotlosa va yimela yini?

Va yimela mavuthu ya le tilweni lama katsekeke loko ku lovisiwa Yerusalema naswona ma ta katseka loko ku herisiwa misava yo homboloka ya Sathana hi nkarhi wa Armagedoni. Leyi i nhlamuselo leyintshwa. Ha yini yi ri ya nkoka?

Emahlweni ka lembe ra 607 B.C.E., Yehovha u kombe Ezekiyele xivono xa leswi a swi ta endleka eka muti wa Yerusalema loko wu nga si lovisiwa. Exivonweni xexo, Ezekiyele u vone swilo swo tala swo biha leswi a swi ri karhi swi endleka emutini wolowo. U vone vavanuna va tsevu laha “un’wana ni un’wana a khome tlhari ra ku pfotlosela.” Nakambe a ku ri ni wanuna loyi a a ri na vona loyi a “ambaleke ntsembyana” naswona a a ri ni “rimhondzo ra matsalana ro chela inki.” (Ezekiyele 8:6-12; 9:2, 3) Wanuna loyi a a byeriwe ku tsemakanya exikarhi ka muti, “a fungha mimombo ya vanhu lava va nga ni nhlomulo, lava va konyaka hikwalaho ka swilo hinkwaswo leswi nyenyetsaka leswi endliwaka exikarhi ka wona.” Kutani vavanuna va tsevu lava nga ni matlhari va byeriwe ku dlaya hinkwavo lava nga emutini lava nga riki na mfungho. (Ezekiyele 9:4-7) Hi nga dyondza yini eka xivono lexi, naswona i mani wanuna loyi a ri ni rimhondzo ra matsalana ro chela inki?

Ezekiyele u vone xivono lexi hi 612 B.C.E. Vuprofeta lebyi byi hetiseke ro sungula endzhaku ka malembe ya ntlhanu loko Yehovha a pfumelele vuthu ra Vababilona leswaku ri lovisa Yerusalema. Hi ndlela yoleyo, Yehovha u tirhise Vababilona leswaku a xupula vanhu vakwe lava a va nga yingisi. (Yeremiya 25:9, 15-18) Kambe ku vuriwa yini hi Vayuda vo lulama lava a va nga pfumelelani ni swilo swo biha  leswi a swi endleka emutini wolowo? Yehovha u va ponisile.

Exivonweni lexi, Ezekiyele a nga funghanga vanhu lava hinkwavo hi ku kongoma kumbe a katseka eku loviseni ka muti lowu. Ku ri na sweswo, a ku ri tintsumi leti kongomiseke leswaku ku lovisiwa muti wa Yerusalema. Kutani eka vuprofeta lebyi hi kota ku twisisa leswi humelelaka etilweni. Yehovha u byele tintsumi takwe leswaku ti lunghiselela ku ya lovisa vanhu vo homboloka ni ku ponisa lavo lulama. *

Vuprofeta lebyi byi ta tlhela byi hetiseka enkarhini lowu taka. Enkarhini lowu hundzeke a hi vula leswaku wanuna loyi a ri ni rimhondzo ra matsalana ro chela inki, a a fanekisela vatotiwa lava ha riki laha misaveni. Nakambe a hi vula leswaku loko vanhu va yingisa ni ku amukela mahungu lamanene lawa hi ma chumayelaka va funghiwa leswaku va ta pona. Sweswinyana, swi ve erivaleni leswaku hi fanele hi cinca ndlela leyi hi hlamuselaka vuprofeta lebyi ha yona. Eka Matewu 25:31-33 hi dyondze leswaku Yesu hi yena a avanyisaka vanhu. U ta endla leswi enkarhini lowu taka hi nkarhi wa nhlomulo lowukulu. Hi nkarhi wolowo, lava nga ta avanyisiwa tanihi tinyimpfu va ta pona kasi lava nga ta avanyisiwa tanihi timbuti va ta lovisiwa.

Kutani hi dyondza yini eka xivono xa Ezekiyele? Ku ni tinhla ta ntlhanu leti hi ti dyondzaka:

  1.  Loko muti wa Yerusalema wu nga si lovisiwa, Ezekiyele, Yeremiya na Esaya va lemukise vanhu hi leswi a swi ta humelela emutini lowu. A va fana ni varindzi. Namuntlha, Yehovha u tirhisa ntlawa lowutsongo wa vatotiwa leswaku a dyondzisa vanhu vakwe ni ku lemukisa van’wana nhlomulo lowukulu wu nga si sungula. Entiyisweni, vanhu hinkwavo va Xikwembu, ku nga valandzeri va Kreste, va katseka eka ntirho lowu wo lemukisa vanhu.—Matewu 24:45-47.

  2.  Ezekiyele a nga va funghanga vanhu lava a va ta pona. Swi tano ni hi vanhu va Xikwembu namuntlha. Va chumayela vanhu ni ku va lemukisa hi leswi nga ta endleka enkarhini lowu taka. Hi ku pfuniwa hi tintsumi ntirho lowu wo chumayela wu endliwa emisaveni hinkwayo.Nhlavutelo 14:6.

  3.  Lava poneke enkarhini wa Ezekiyele, a va nga ri na mfungho emimombyeni ya vona. Ninamuntlha lava nga ta pona na vona a va nge vi na mfungho wo karhi. Vanhu va fanele va endla yini leswaku va pona nhlomulo lowukulu? Loko va twa xilemukiso, va fanele va dyondza ku tekelela Kreste, va tinyiketela eka Xikwembu ni ku seketela vamakwavo va Kreste hi ku chumayela mahungu lamanene. (Matewu 25:35-40) Hi nkarhi wa nhlomulo lowukulu, vanhu lava va ta nyikiwa mfungho, leswi vulaka leswaku va ta va va hlawuriwe leswaku va pona.

  4.  Wanuna loyi a ri ni rimhondzo ro chela inki u yimela Yesu. Hi nkarhi wa nhlomulo lowukulu, Yesu u ta fungha ntshungu lowukulu loko a wu avanyisa tanihi tinyimpfu. Kutani va ta va ni lunghelo ro hanya laha misaveni hilaha ku nga heriki.Matewu 25:34, 46. *

  5.  Namuntlha vavanuna va tsevu lava khomeke matlhari yo pfotlosa, va yimela mavuthu ya le tilweni lama rhangeriwaka hi Yesu. Ku nga ri khale ma ta lovisa matiko ni vanhu hinkwavo vo homboloka.Ezekiyele 10:2, 6, 7; Nhlavutelo 19:11-21.

Leswi hi swi dyondzaka eka xivono lexi swi hi pfuna ku tiyiseka leswaku Yehovha a nge va lovisi vanhu vakwe vo lulama loko a lovisa lavo homboloka. (2 Petro 2:9; 3:9) Nakambe swi hi pfuna ku tiva leswaku ntirho wo chumayela i wa nkoka swinene enkarhini lowu hi hanyaka eka wona. Vanhu hinkwavo va fanele va lemukisiwa makumu ma nga si fika!Matewu 24:14.

^ ndzim. 6 Lava poneke, vo tanihi Baruku (matsalana wa Yeremiya), Ebedi-meleke lowa Muetiyopiya ni Varekabi, a va nga ri na mfungho wa xiviri emimombyeni ya vona. (Yeremiya 35:1-19; 39:15-18; 45:1-5) Mfungho wo fanekisela a wu kombisa leswaku va ta pona.

^ ndzim. 12 Vatotiwa vo tshembeka a swi nge bohi leswaku va kuma mfungho lowu leswaku va pona. Ku ri na sweswo, va ta funghiwa ro hetelela loko va nga si fa kumbe loko nhlomulo lowukulu wu nga si sungula.Nhlavutelo 7:1, 3.