Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JULY 2016

“U Nga Chavi. Mina Ndzi Ta Ku Pfuna”

“U Nga Chavi. Mina Ndzi Ta Ku Pfuna”

EHLEKETA u ri karhi u famba exitarateni nivusiku. Hi ku hatlisa u xiya leswaku ku ni munhu loyi a ku landzelelaka. Loko u yima, na yena wa yima. Loko u ganyula na yena wa ganyula. U sungula ku tsutsumela ekaya ra munghana wa wena leri nga ekusuhi. Loko munghana wa wena a ku pfulela leswaku u nghena, u wa mbilu hikuva se wa swi tiva leswaku u hlayisekile.

Kumbexana a wu si tshama u va eka xiyimo lexi boxiweke laha henhla. Kambe swi nga ha endleka ku ri ni swiyimo swo karhi leswi ku vilerisaka. Hi xikombiso, xana ku ni xidyoho xo karhi lexi u tshamelaka ku xi endla hi ku phindhaphindha kambe u lavaka ku xi hlula? Xana se u ni nkarhi wo leha u ri karhi u tikarhatela ku kuma ntirho wo tihanyisa kambe ko fana ni kwala? Xana wa karhateka hi leswaku u le ku dyuhaleni ni leswaku u ta langutana ni swiphiqo swa rihanyo enkarhini lowu taka? Kumbe xana u vilerisiwa hi swin’wana?

Ku nga khathariseki xiphiqo xa kona, i swinene ku va ni munghana loyi u nga ta n’wi chululela ta le mbilwini ni loyi a tiyimiseleke ku ku pfuna. Xana u na yena munghana wo tano? Ina, u na yena! Yehovha i munghana wo tano, hilaha a ri hakona eka Abrahama munhu wo tshembeka, hilaha swi tsariweke hakona eka Esaya 41:8-13. Eka ndzimana 10 na 13, Yehovha u hi tshembisa leswi: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama. Hikuva mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’”

“KUNENE NDZI TA KU KHOMA”

Marito ya Yehovha ma chavelela swinene. Ringeta ku ehleketa hi leswi Yehovha a hi tshembisaka swona. Ndzimana leyi a yi vuli swona leswaku u famba etlhelo ka Yehovha u khome voko rakwe. Loko a wu famba etlhelo ka yena, Yehovha a ta va a khome voko ra wena ra ximatsi hi voko rakwe ra xinene. Ku ri na sweswo, Yehovha u yisa “voko [rakwe] ra xinene ra ku lulama” kutani a khoma “voko ra wena ra xinene,” onge hiloko a ku humesa eka xiyimo xo tika. Loko Yehovha a khoma voko ra wena ra xinene, u ku tiyisa hi ku vula a ku: “U nga chavi. Mina ndzi ta ku pfuna.”

Xana u teka Yehovha tanihi Tatana la nga ni rirhandzu tlhelo Munghana wa wena? Xana wa tshemba leswaku u ta ku pfuna loko u langutane ni swiyimo swo tika? Yehovha wa khathala swinene ha wena naswona u lava ku ku pfuna. Loko u ri ni swiphiqo, Yehovha u lava leswaku u titwa u sirhelelekile. Ha yini? Hikuva wa ku rhandza swinene. Hakunene i “mpfuno lowu kumekaka hi ku hatlisa hi nkarhi wa maxangu.”—Pisalema 46:1.

 LOKO HI TITWA NANDZU HIKWALAHO KA SWIDYOHO SWA KHALE

Van’wana va tshamela ku ehleketa hi swidyoho swa vona swa khale ni ku tivutisa loko Xikwembu xi va rivalerile. Loko u titwa hi ndlela yoleyo, ehleketa hi Yobo wo tshembeka. U pfumerile leswaku u dyohile loko a ha ri muntshwa. (Yobo 13:26) Mupisalema Davhida na yena u titwe hi ndlela leyi fanaka naswona u kombele Yehovha a ku: “U nga swi tsundzuki swidyoho swa le vuntshweni bya mina ni leswi ndzi ku pfukeleke ha swona.” (Pisalema 25:7) Leswi hi nga hetisekangiki, hinkwerhu ka hina ‘ha dyoha, naswona hi kayivela ku vangama ka Xikwembu.’—Varhoma 3:23.

Marito lama chavelelaka lama nga eka Esaya ndzima 41 a ma tsaleriwe Vaisrayele. Swidyoho swa vona a swi ri swikulu swinene lerova Yehovha u vule leswaku a a ta va xupula hi ku va yisa evuhlongeni eBabilona. (Esaya 39:6, 7) Nakambe Xikwembu xi tshembise leswaku xi ta ntshunxa lava nga ta hundzuka ni ku tlhelela eka xona! (Esaya 41:8, 9; 49:8) Yehovha wa ha endla leswi fanaka eka lava hundzukaka ni lava lavaka ku n’wi tsakisa.—Pisalema 51:1.

Anakanya hi Takuya, * loyi a a lwisana ni mikhuva leyi thyakeke ya ku hlalela swifaniso swo navetisa timhaka ta masangu ni ku tikhomakhoma swirho swa rimbewu leswaku a enerisa ku navela ka yena. Minkarhi yo tala, a a hluriwa hi mikhuva leyi. A a titwa njhani? “A ndzi titwa ndzi nga pfuni nchumu, kambe loko ndzi khongela eka Yehovha ndzi kombela leswaku a ndzi rivalela, a a ndzi chavelela.” Yehovha u swi endlise ku yini sweswo? Vakulu va le vandlheni ra Takuya va n’wi byele leswaku a va fonela loko a hluriwa hi mikhuva leyi. U ri: “A swi nga olovi ku va fonela, kambe endzhaku ko endla tano, a ndzi chaveleleka.” Kutani vakulu va hlele leswaku Takuya a endzeriwa hi mulanguteri wa muganga. Mulanguteri wa muganga u te: “A ndzi ku endzelanga hi xihoxo. Ndzi ku endzele hileswi vakulu va lavaka leswaku ndzi ku endzela. Va hlawule wena leswaku u kuma riendzo leri ra vurisi.” Takuya u ri: “Hi mina a ndzi dyoha, kambe Yehovha u ye emahlweni a ndzi pfuna hi ku tirhisa vakulu.” Hi ku famba ka nkarhi, Takuya u tshike mikhuva yakwe yo biha, a va phayona naswona sweswi u tirha erhavini. Hilaha Xikwembu xi pfuneke makwerhu loyi hakona, na wena xi ta ku pfuna loko u endla swihoxo.

LOKO HI VILERISIWA HI NTIRHO WO TIHANYISA

Vanhu van’wana va vilela hileswi va heleriweke hi ntirho naswona swi va tikelaka ku kuma wun’wana. Ehleketa ndlela leyi swi twisaka ku vava ha yona ku ka u nga wu kumi ntirho. Van’wana loko va langutana ni xiyimo lexi xo tika, va titwa va nga pfuni nchumu. Yehovha a nga ku pfuna njhani? Swi nga endleka a nga ku nyiki ntirho lowu u wu lavaka hi nkarhi wolowo, kambe u ta ku pfuna leswaku u tsundzuka marito ya Davhida lama nge: “A ndzi ri jaha, kambe se ndzi dyuhele, kambe a ndzi si tshama ndzi vona munhu la lulameke a tshikiwa hi ku helela, hambi ku ri vana vakwe va lava xinkwa.” (Pisalema 37:25) Yehovha u ku teka u ri wa nkoka naswona u ku nyika “voko [rakwe] ra xinene ra ku lulama” leswaku u kuma leswi u swi lavaka ku u ya emahlweni u n’wi tirhela.

Yehovha a nga ku pfuna njhani loko u heleriwa hi ntirho?

Sara, loyi a tshamaka eColombia, u vone ndlela leyi Yehovha a n’wi pfuneke ha yona. A a hola mali yo tala loko a ha tirhela khampani yin’wana leyi  dumeke. Kambe a a lava ku endla swo tala entirhweni wa Yehovha, kutani u tshike ntirho a sungula ku phayona. Kambe, a swi n’wi tikela ku kuma ntirho lowu a ta tirha masiku yo karhi. U sungule ku xavisa ice-cream kambe hi ku famba ka nkarhi u heleriwe hi mali kutani a boheka ku tshika. U te: “Ku hundze malembe manharhu yo tika, kambe ndzi khensa Yehovha leswi ndzi koteke ku tiyisela.” U kote ku vona leswaku hi swihi swilo swa nkoka leswi a faneleke ku va na swona ni ku tshika ku vilela hi siku leri landzelaka. (Matewu 6:33, 34) Eku heteleleni, khale ka muthori wakwe u n’wi fonerile a n’wi byela leswaku a nga vuyela eka ntirho wakwe wa khale. U vule leswaku u ta vuyela ntsena loko a ta tirha masiku yo karhi ni ku pfumeleriwa ku ya minhlanganweni ni le tinhlengeletanweni. Sweswi, Sara a nga ha holi mali leyi a yi kuma, kambe u kota ku ya emahlweni a phayona. U vula leswaku hi nkarhi lowu xiyimo a xi tika, u vone ndlela leyi Yehovha a n’wi khathaleleke ha yona.

LOKO HI VILERISIWA HI KU DYUHALA

Vanhu vo tala va vilela hileswi va nga le ku dyuhaleni naswona va nga le kusuhi ni ku huma penceni. Va tivutisa loko va ta va ni mali leyi eneleke leswaku va kota ku tihanyisa. Va tlhela va vilerisiwa hi swiphiqo swa rihanyo leswi nga ha vaka kona enkarhini lowu taka. Kumbexana a ku ri Hosi Davhida loyi a kombeleke Yehovha a ku: “U nga ndzi cukumeti emalembeni ya vudyuhari; loko matimba ya mina ma hela, u nga ndzi siyi.”—Pisalema 71:9, 18.

Vadyuhari va nga swi kotisa ku yini ku langutana ni vumundzuku handle ko vilela? Va fanele va va ni ripfumelo leri tiyeke eka Xikwembu ni ku tshemba leswaku xi ta va nyika swilo hinkwaswo leswi va swi lavaka. Hambiswiritano, van’wana va tiphine hi ku hanya emafurheni loko va ha ri ni mali, kutani va nga ha boheka ku hanya vutomi byo olova ni ku eneriseka hi ku va ni swilo switsongo. Va nga ha vona swi antswa ku dya “matsavu” ku ri ni ku dya “nkunzi leyi [wundliweke]” naswona i swinene ni le ka rihanyo ra vona! (Swivuriso 15:17) Loko u tiyimisele ku tirhela Yehovha, u ta tiyiseka leswaku u kuma swilo hinkwaswo leswi u swi lavaka loko u dyuharile.

José na Rose va ri na Tony na Wendy

Anakanya hi José na Rose, lava tirheleke Yehovha eka ntirho wa nkarhi hinkwawo ku tlula malembe ya 65. Hi nkarhi wolowo, va langutane ni swiphiqo swo tala. Va khathalele tata wa Rose, vusiku ni nhlikanhi. Nakambe, José a a fanele a tiyisela ku endliwa vuhandzuri bya khensa ku katsa ni vutshunguri bya yona bya tikhemikhali. Yehovha u wu khome njhani mpatswa lowu hi voko rakwe ra xinene? U tirhise Tony na Wendy ku nga mpatswa lowu nga Timbhoni. A va ri ni ndhawu leyi a va lava ku yi nyika maphayona leswaku ma tshama eka yona mahala. Tony u vula leswaku loko a ha ri exikolweni, minkarhi yo tala loko a languta hi fasitere a a vona José na Rose va ri eku chumayeleni. Tony u tsakisiwe hi ndlela leyi a va hiseka ha yona, naswona swi n’wi khumbile swinene. Leswi José na Rose va heteke vutomi bya vona hinkwabyo va tirhela Yehovha, Tony na Wendy va va nyike ndhawu yo tshama. Va pfune José na Rose ku ringana malembe ya 15 naswona sweswi va ni malembe ya kwalomu ka 85. José na Rose va vula leswaku Tony na Wendy i nyiko leyi humaka eka Yehovha.

Yehovha u ku tshembisa a ku: “U nga chavi. Mina ndzi ta ku pfuna.” U ku nyika “voko [rakwe] ra xinene ra ku lulama.” Xana u ta ri khoma?

^ ndzim. 11 Mavito man’wana ma cinciwile.