Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JULY 2016

Chumayela Mahungu Lamanene Ya Musa Lowu Nga Faneriwiki

Chumayela Mahungu Lamanene Ya Musa Lowu Nga Faneriwiki

“Nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu.”MINTIRHO 20:24.

TINSIMU: 101, 84

1, 2. Muapostola Pawulo u swi kombise njhani leswaku wa wu tlangela musa lowu nga faneriwiki wa Xikwembu?

MUAPOSTOLA PAWULO u vule a ku: “Musa wa [Xikwembu] lowu nga faneriwiki lowu ndzi kombiweke wona a wu kumekanga wu ri wa hava.” (Hlaya 1 Vakorinto 15:9, 10.) Pawulo a a swi tiva leswaku a nga endlanga nchumu lowu faneriwaka hi ku va a kombiwa musa lowukulu wa Xikwembu. A a xanisa Vakreste.

2 Loko a ku ri ekusuhi ni ku fa, Pawulo u tsalele Timotiya a ku: “Ndzi nkhensa Kreste Yesu Hosi ya hina, loyi a ndzi nyikeke matimba, hikuva u ndzi teke ndzi tshembekile hi ku ndzi avela evutirhelini.” (1 Timotiya 1:12-14) Hi byihi vutirheli lebyi a a vulavula ha byona? Pawulo u byele vakulu va le vandlheni ra le Efesa a ku: “Moya-xiviri wa mina a ndzi wu teki wu ri wa nkoka eka mina, onge hi loko wu ri lowu rhandzekaka eka mina, loko ntsena ndzo heta pfhumba ni vutirheli lebyi ndzi byi amukeleke bya Hosi Yesu, bya ku nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu.”Mintirho 20:24.

3. Hi wihi ntirho wo hlawuleka lowu Pawulo a a nyikiwe wona? (Vona xifaniso lexi nga eku sunguleni ka xihloko lexi.)

 3 Hi wahi “mahungu lamanene” lawa Pawulo a ma chumayeleke naswona ma wu kombise njhani musa wa Yehovha lowu nga faneriwiki? Pawulo u byele Vakreste va le Efesa a ku: “Mi twile hi ta vulanguteri bya musa lowu nga faneriwiki wa Xikwembu lebyi ndzi nyikiweke byona hikwalaho ka n’wina.” (Vaefesa 3:1, 2) Yesu a a byele Pawulo leswaku a chumayela mahungu lamanene eka vanhu lava nga riki Vayuda. Kutani sweswi a swi koteka leswaku vanhu va matiko man’wana va va xiphemu xa Mfumo lowu fumiwaka hi Mesiya. (Hlaya Vaefesa 3:5-8.) Pawulo u chumayele hi ku hiseka ni ku tlhela a vekela Vakreste xikombiso lexinene namuntlha. U kombise leswaku musa wa Xikwembu lowu nga faneriwiki a wu ‘vanga wa hava’ eka yena.

XANA MUSA LOWU NGA FANERIWIKI WA XIKWEMBU WU KU SUSUMETELA KU CHUMAYELA?

4, 5. Ha yini hi nga vulaka leswaku “mahungu lamanene . . . ya mfumo” ma fana ni mahungu lamanene ya “musa lowu nga faneriwiki wa Xikwembu”?

4 Enkarhini lowu wa makumu, vanhu va Yehovha va nyikiwe ntirho wo chumayela “mahungu lamanene . . . ya mfumo . . . emisaveni hinkwayo leyi akiweke leswaku byi va vumbhoni ematikweni hinkwawo.” (Matewu 24:14) Mahungu lamanene ya Mfumo ma fana ni “mahungu lamanene ya musa lowu nga faneriwiki wa Xikwembu.” Hi ndlela yihi? Mikateko hinkwayo leyi hi nga ta yi kuma eMfun’weni wa Xikwembu hi ta yi kuma hikwalaho ka musa wa Yehovha. (Vaefesa 1:3) Pawulo u kombise ku tlangela musa wa Yehovha lowu nga faneriwiki hi ku chumayela hi ku hiseka. Xana na hina hi tekelela xikombiso xa Pawulo?Hlaya Varhoma 1:14-16.

5 Eka xihloko lexi hundzeke, hi dyondze ndlela leyi hina tanihi vanhu lava dyohaka hi vuyeriwaka ha yona hi tindlela to tala hikwalaho ka musa wa Yehovha lowu nga faneriwiki. Leswi hi vuyeriweke swinene, hi ni vutihlamuleri byo dyondzisa van’wana ndlela leyi Yehovha a kombisaka rirhandzu ni ndlela leyi va nga vuyeriwaka hikwalaho ka rona. Hi nga pfuna van’wana hi tindlela tihi leswaku va kombisa ku tlangela musa lowu nga faneriwiki wa Xikwembu?

CHUMAYELA MAHUNGU LAMANENE YA GANDZELO RA NKUTSULO

6, 7. Loko hi hlamusela vanhu hi nkutsulo, hi ma chumayela njhani mahungu lamanene ya musa lowu nga faneriwiki wa Xikwembu?

6 Namuntlha vanhu vo tala a va biwi hi ripfalo loko va dyoha, kutani a va swi twisisi leswaku ha yini vanhu va lava nkutsulo. Hi nkarhi lowu fanaka, vanhu vo tala va swi xiya leswaku ndlela leyi va hanyaka ha yona a yi va endli va tsaka. Va va va nga swi tivi leswaku xidyoho i yini, ndlela leyi xi hi khumbaka ha yona ni leswi hi swi lavaka leswaku hi ntshunxeka eka xona ku kondza va vulavula ni Timbhoni ta Yehovha. Loko va sungula ku swi twisisa leswaku xidyoho i yini, vanhu va timbilu letinene va swi tlangela ku dyondza hi leswaku Yehovha u rhumele N’wana wakwe emisaveni leswaku a ta hi ntshunxa eka xidyoho ni rifu. Yehovha u endle tano hikwalaho ka leswi a nga ni rirhandzu lerikulu ni hi kwalaho ka musa wakwe lowu nga faneriwiki.1 Yohane 4:9, 10.

7 Xiya leswi Pawulo a swi vuleke hi N’wana wa Yehovha loyi a rhandzekaka loko a ku: “Ha yena hi ni ku ntshunxiwa hi nkutsulo hi ngati ya yena, ina, ku rivaleriwa ka swivi swa hina, hi ku ya hi rifuwo ra musa wa [Yehovha]  lowu nga faneriwiki.” (Vaefesa 1:7) Gandzelo ra nkutsulo ra Kreste i xikombiso lexikulu xa ndlela leyi Xikwembu xi hi rhandzaka ha yona ni ku kombisa vukulu bya musa wa xona lowu nga faneriwiki. Swa chavelela ku dyondza leswaku loko hi kombisa ripfumelo eka gandzelo ra Yesu, hi ta rivaleriwa swidyoho naswona hi ta va ni ripfalo leri baseke! (Vaheveru 9:14) Hakunene lawa i mahungu lamanene lawa hi faneleke hi ma byela van’wana!

PFUNA VANHU LESWAKU VA VA VANGHANA VA XIKWEMBU

8. Ha yini vanhu lava dyohaka va fanele va vuyelelana ni Xikwembu?

8 Loko vanhu va nga kombisi ripfumelo eka gandzelo ra Yesu, Xikwembu xi va teka va ri valala va xona. Hikwalaho hi ni vutihlamuleri byo va byela leswaku swi nga koteka leswaku va va vanghana va Xikwembu. Muapostola Yohane u tsale a ku: “Un’wana ni un’wana loyi a kombisaka ripfumelo eka N’wana u ni vutomi lebyi nga heriki; loyi a nga yingisiki N’wana a nge byi kumi vutomi, naswona vukarhi bya Xikwembu byi tshama eka yena.” (Yohane 3:36) Ha tsaka ku tiva leswaku gandzelo ra Kreste ri endla swi koteka leswaku hi va vanghana va Xikwembu. Pawulo u hlamusele mhaka leyi hi ndlela leyi: “N’wina lava khale a mi hambanisiwile naswona mi ri valala hikwalaho ka leswi mianakanyo ya n’wina a yi ri emintirhweni leyi hombolokeke, sweswi xi tlhele xi vuyelelana na n’wina hi miri wa nyama wa yoloye hi rifu rakwe.”Vakolosa 1:21, 22.

Hi ni vutihlamuleri byo byela vanhu leswaku swi nga koteka leswaku va va vanghana va Xikwembu

9, 10. (a) Hi byihi vutihlamuleri lebyi Kreste a byi nyikeke vamakwavo vakwe lava totiweke? (b) “Tinyimpfu tin’wana” ti va pfuna njhani vatotiwa?

9 Kreste u nyike vamakwavo vakwe lava totiweke lava ha riki laha misaveni “vutirheli bya ku vuyelelana.” Pawulo u va byele leswi: “Swilo hinkwaswo swi huma eka Xikwembu, lexi endleke leswaku hi vuyelelana na xona ha Kreste xi tlhela xi hi nyika vutirheli bya ku vuyelelana, hileswaku, Xikwembu ha Kreste xi endle leswaku misava yi vuyelelana na xona, a xi yi hlayeli swivi swa yona, naswona xi hi nyike rito ra ku vuyelelana. Hikokwalaho hi vayimeri lava khomelaka Kreste, onge hi loko Xikwembu xi endla xikombelo ha hina. Leswi hi nga vakhomeri va Kreste ha kombela hi ku: ‘Vuyelelanani ni Xikwembu.’”2 Vakorinto 5:18-20.

10 “Tinyimpfu tin’wana” ti ni lunghelo ro pfuna vatotiwa eka vutirheli bya vona. (Yohane 10:16) “Tinyimpfu tin’wana” leti nga “vayimeri” kumbe varhumiwa va Kreste ti endla ntirho lowukulu entirhweni wo chumayela, ti dyondzisa vanhu ntiyiso ti tlhela ti va pfuna leswaku va va ni vuxaka lebyikulu na Yehovha. Lexi i xiphemu xa nkoka eku chumayeleni ka mahungu lamanene ya musa lowu nga faneriwiki wa Xikwembu.

DYONDZISA VANHU LESWAKU XIKWEMBU XA SWI YINGISA SWIKHONGELO

11, 12. Ha yini ku ri mahungu lamanene eka vanhu ku tiva leswaku va nga khongela eka Yehovha?

11 Vanhu vo tala va khongela hikuva xikhongelo  xi va endla va tsaka, kambe entiyisweni a va pfumeli leswaku Xikwembu xa swi yingisa swikhongelo swa vona. Va fanele va swi tiva leswaku Yehovha i “Mutwi wa xikhongelo.” Mupisalema Davhida u tsale a ku: “Oho Mutwi wa xikhongelo, vanhu hinkwavo va ta ta eka wena. Swilo leswi nga ni xidyoho swi tikombe swi ri ni matimba ku ndzi tlula. Loko ku ri ku tlula ka hina nawu, wena u ta ku funengeta.”Pisalema 65:2, 3.

Loko hi dyondzisa vanhu ndlela yo khongela, hi va pfuna leswaku va va vanghana va Yehovha

12 Yesu u byele vadyondzisiwa vakwe a ku: “Loko mi kombela xin’wana ni xin’wana hi vito ra mina, ndzi ta xi endla.” (Yohane 14:14) Leswi swi vula leswaku hi nga khongelela “xin’wana ni xin’wana” lexi fambisanaka ni ku rhandza ka Yehovha. Yohane u tsale a ku: “Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” (1 Yohane 5:14) I swinene ku pfuna vanhu ku twisisa leswaku xikhongelo a ko va nchumu lowu va endlaka va tsaka ntsena kambe i ndlela yo tshinelela “xiluvelo [xa Yehovha] xa musa lowu nga faneriwiki”! (Vaheveru 4:16) Loko hi dyondzisa vanhu ndlela leyinene yo khongela, ni ku khongela eka Munhu la faneleke naswona va khongelela swilo leswi faneleke, hi va pfuna leswaku va va vanghana va Yehovha ni ku va va chaveleleka loko va xaniseka.Pisalema 4:1; 145:18.

MUSA LOWU NGA FANERIWIKI EMAFAMBISELWENI LAMANTSHWA YA SWILO

13, 14. (a) Hi rihi lunghelo lerikulu leri vatotiwa va nga ta va na rona enkarhini lowu taka? (b) Hi wihi ntirho wo tsakisa lowu vatotiwa va nga ta wu endlela vanhu?

13 Yehovha u ta kombisa musa lowu nga faneriwiki hi ndlela leyikulu “eka mafambiselo ya swilo lama taka.” Njhani? Xikwembu xi ta nyika lava 144 000 lava nga ta fuma na Kreste etilweni lunghelo lerikulu. Pawulo u vulavule hi lunghelo rolero loko a tsala a ku: “Xikwembu, lexi fuweke hi tintswalo, hikwalaho ka rirhandzu ra xona lerikulu leri xi hi rhandzeke ha rona, xi hi hanyise swin’we na Kreste, hambileswi a hi file eswivini—hi musa lowu nga faneriwiki mi ponisiwile—kutani xi hi pfuxe swin’we, xi hi tshamisisa swin’we etindhawini ta le tilweni evun’weni na Kreste Yesu, leswaku eka mafambiselo ya swilo lama taka ku kombisiwa rifuwo lerikulu ra musa wa xona lowu nga faneriwiki hi nsovo wa xona evun’weni na Kreste Yesu.”Vaefesa 2:4-7.

14 Swa tika ku anakanya hi swilo swo hlamarisa leswi Yehovha a swi lunghiseleleke Vakreste lava totiweke loko se va fuma na Kreste etilweni. (Luka 22:28-30; Vafilipiya 3:20, 21; 1 Yohane 3:2) Yehovha u ta ‘kombisa rifuwo lerikulu ra musa wa yena lowu nga faneriwiki’ eka vona hi ndlela leyi hlawulekeke. Va ta va “Yerusalema Lowuntshwa,” mutekiwa wa Kreste. (Nhlavutelo 3:12; 17:14; 21:2, 9, 10) Va ta tirha na Yesu eku ‘hanyiseni ka matiko.’ Va ta pfuna vanhu leswaku va ntshunxeka eka xidyoho ni rifu naswona va ta va pfuna leswaku va va lava hetisekeke.Hlaya Nhlavutelo 22:1, 2, 17.

15, 16. Yehovha u ta wu kombisa njhani musa wa yena lowu nga faneriwiki eka “tinyimpfu tin’wana” enkarhini lowu taka?

 15 Vaefesa 2:7 yi vula leswaku Xikwembu xi ta kombisa musa lowu nga faneriwiki “eka mafambiselo ya swilo lama taka.” Hi nkarhi wolowo, vanhu hinkwavo laha misaveni va ta kombisiwa “rifuwo lerikulu ra musa wa xona lowu nga faneriwiki.” (Luka 18:29, 30) Ndlela yin’wana leyikulu leyi Yehovha a nga ta wu kombisa ha yona musa wa yena lowu nga faneriwiki laha misaveni i ku va a pfuxa vanhu “eka masirha-bako.” (Yobo 14:13-15; Yohane 5:28, 29) I vamani lava nga ta pfuxiwa? I vavanuna ni vavasati vo tshembeka lava feke Kreste a nga si fa ni lava “tinyimpfu tin’wana” lava feke va tshembekile eka Yehovha emasikwini lawa ya makumu. Vanhu lava hinkwavo vo tshembeka va ta pfuxiwa eku feni leswaku va ta ya emahlweni va tirhela Yehovha.

16 Vanhu va timiliyoni lava feke va nga tivi Xikwembu, na vona va ta pfuxiwa. Yohane u tsale a ku: “Ndzi vona vafi, lavakulu ni lavatsongo, va yime emahlweni ka xiluvelo, kutani ku pfuriwa tibuku-nsongwa. Kambe ku pfuriwa buku-nsongwa yin’wanyana; i buku-nsongwa ya vutomi. Vafi va avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona. Kutani lwandle ri humesa vafi lava nga eka rona, rifu ni Hayidesi swi humesa vafi lava nga eka swona, kavaloko munhu ni munhu a avanyisiwa hi ku ya hi swiendlo swa yena.” (Nhlavutelo 20:12, 13) Lava pfuxiweke eku feni va ta nyikiwa nkarhi wo dyondza hi Yehovha ni  wo pfumela ku fumiwa hi yena. Va ta dyondza milawu ya Bibele va tlhela va yi tirhisa ku katsa ni swiletelo leswintshwa leswi kumekaka “eka tibuku-nsongwa.” Swiletelo swoleswo leswintshwa ku ta va ku ri ndlela yin’wana leyi Yehovha a nga ta kombisa musa wakwe lowu nga faneriwiki.

YANA EMAHLWENI U CHUMAYELA MAHUNGU LAMANENE

17. I yini leswi hi faneleke hi swi tsundzuka loko hi chumayela mahungu lamanene?

17 I swa nkoka swinene ku tlula rini na rini leswaku hi chumayela mahungu lamanene ya Mfumo, hikuva makumu ma tshinele! (Marka 13:10) Hi fanele hi tsundzuka leswaku xikongomelo xa hina loko hi chumayela i ku dzunisa Yehovha. Hi nga swi endlisa ku yini sweswo? Hi fanele hi byela vanhu leswaku mikateko hinkwayo leyi hi nga ta yi kuma emisaveni leyintshwa hi ta yi kuma ntsena hikwalaho ka musa lowukulu wa Yehovha.

Tirhelani Yehovha hi ku hiseka tanihi “valanguteri lavanene va musa lowu nga faneriwiki wa Xikwembu.”—1 Petro 4:10 (Vona tindzimana 17-19)

18, 19. Hi wu vangamisa njhani musa lowu nga faneriwiki wa Yehovha?

18 Loko hi chumayela vanhu, hi nga va hlamusela leswaku loko Mfumo wa Kreste wu fuma, vanhu va ta vuyeriwa hikwalaho ka nkutsulo naswona va ta ya va hetiseka hakatsongotsongo. Bibele yi ri: “Ntumbuluko hi woxe na wona wu ta ntshunxiwa evuhlongeni bya ku onhaka kutani wu va ni ntshunxeko lowu vangamaka wa vana va Xikwembu.” (Varhoma 8:21) Sweswo swi ta koteka ntsena hikwalaho ka musa lowu nga faneriwiki wa Yehovha.

19 Hi ni lunghelo ro byela vanhu hinkwavo hi xitshembiso lexi tsakisaka lexi nga eka Nhlavutelo 21:4, 5 leyi nge: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” Kutani Yehovha, loyi a tshameke exiluvelweni a ku: “Waswivo, ndzi endla swilo hinkwaswo swi va leswintshwa.” A tlhela a ku: “Tsala, hikuva marito lawa ma tshembekile, i ya ntiyiso.” Loko hi chumayela van’wana mahungu lawa lamanene hi ku hiseka, hakunene hi vangamisa musa lowu nga faneriwiki wa Yehovha!