Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) JANUARY 2016

Ku Tirha Swin’we Ni Xikwembu—Swi Tisa Ntsako

Ku Tirha Swin’we Ni Xikwembu—Swi Tisa Ntsako

“Leswi hi tirhaka na xona, ha mi kombela nakambe leswaku mi nga amukeli musa lowu nga faneriwiki wa Xikwembu kutani mi hupa xikongomelo xa wona.”—2 VAKORINTO 6:1.

TINSIMU: 75, 74

1. Hambileswi Yehovha a Tlakukeke, u rhambe van’wana leswaku va endla yini?

YEHOVHA u Tlakukile. U vumbe swilo hinkwaswo naswona vutlhari ni matimba ya yena a swi pimeki. Endzhaku ka loko a pfune Yobo ku twisisa mhaka leyi, Yobo u te: “Se ndza swi tiva leswaku wa swi kota ku endla swilo hinkwaswo, naswona a yi kona mianakanyo leyi u nga yi fikeleriki.” (Yobo 42:2) Yehovha a nga endla xin’wana ni xin’wana lexi a lavaka ku xi endla handle ko pfuniwa hi un’wana. Kambe u kombisa rirhandzu hi ku rhamba van’wana leswaku va tirha na yena leswaku a hetisisa xikongomelo xa yena.

2. I ntirho wihi wa nkoka lowu Yehovha a nyikeke Yesu leswaku a wu endla?

2 Xikwembu xi vumbe N’wana wa xona, Yesu, xi nga si vumba swilo leswin’wana hinkwaswo. Endzhaku, Yehovha u pfumelele N’wana wa yena leswaku a n’wi pfuna ku vumba swilo  leswin’wana hinkwaswo. (Yohane 1:1-3, 18) Muapostola Pawulo u tsale leswi hi Yesu: “Ha yena swilo hinkwaswo swi tumbuluxiwile ematilweni ni le henhla ka misava, swilo leswi vonakaka ni swilo leswi nga vonakiki, ku nga khathariseki leswaku i swiluvelo kumbe vuhosi kumbe tihulumendhe kumbe vulawuri. Swilo leswin’wana hinkwaswo swi tumbuluxiwe ha yena naswona swi tumbuluxeriwe yena.” (Vakolosa 1:15-17) Hikwalaho, Yehovha a nga nyikanga N’wana wa yena ntirho wa nkoka ntsena kambe u byele ni van’wana ha wona. Mawaku lunghelo ro tano!

3. I yini leswi Yehovha a rhambeke Adamu ku swi endla naswona ha yini?

3 Yehovha u tlhele a rhamba vanhu leswaku va tirha na yena. Hi xikombiso, u pfumelele Adamu ku thya swiharhi. (Genesa 2:19, 20) Anakanya ntsako lowu Adamu a veke na wona hi ku endla ntirho lowu! Hi vukheta u xiyisise ndlela leyi swiharhi swi langutekaka ha yona ni ndlela leyi swi hanyaka hi yona, kutani a swi thya mavito. Yehovha u vumbe swiharhi hinkwaswo, kutani a a ta va a swi thye mavito hi yexe. Kambe, u kombise Adamu ndlela leyi a n’wi rhandzaka ha yona hi ku n’wi pfumelela leswaku a swi thya. Nakambe Xikwembu xi nyike Adamu ntirho wo endla misava hinkwayo yi va paradeyisi. (Genesa 1:27, 28) Kambe hi ku famba ka nkarhi Adamu u hlawule ku tshika ku tirha ni Xikwembu, naswona vuyelo bya kona byi endle leswaku a xaniseka swinene swin’we ni vana va yena hinkwavo.—Genesa 3:17-19, 23.

4. Van’wana va tirhe njhani ni Xikwembu leswaku xi hetisisa xikongomelo xa xona?

4 Hi ku famba ka nkarhi, Xikwembu xi rhambe vanhu van’wana leswaku va tirha na xona. Nowa u ake ngalava leyi poniseke yena ni ndyangu wa yena hi nkarhi wa Ndhambi. Muxe u humese tiko ra Israyele aEgipta. Yoxuwa u rhangele Vaisrayele eTikweni leri Tshembisiweke. Solomoni u ake tempele eYerusalema. Mariya u ve mana wa Yesu. Hinkwawo malandza lawa yo tshembeka ni man’wana yo tala ma tirhe na Yehovha leswaku a hetisisa xikongomelo xa yena.

5. I ntirho wihi lowu hi nga katsekaka eka wona naswona xana a swi boha leswaku Yehovha a hi katsa eka wona? (Vona xifaniso lexi nga eku sunguleni ka xihloko lexi.)

5 Namuntlha, Yehovha wa hi rhamba leswaku hi endla xin’wana ni xin’wana lexi hi nga xi kotaka leswaku hi seketela Mfumo wa yena. Ku ni tindlela to tala leti hi nga tirhelaka Xikwembu ha tona. Hambiswiritano, a hi hinkwerhu hi nga xi tirhelaka hi ndlela leyi fanaka, hinkwerhu hi nga chumayela mahungu lamanene ya Mfumo. Yehovha a a ta va a ti endlele wona ntirho lowu. A ta vulavula ni vanhu hi ku kongoma a ri etilweni. Yesu u vule leswaku Yehovha a nga endla leswaku maribye ma byela van’wana hi Hosi ya Mfumo wa Yena. (Luka 19:37-40) Kambe Yehovha u hi pfumelela leswaku hi va “vatirhi-kulobye” na yena. (1 Vakorinto 3:9) Muapostola Pawulo u tsale a ku: “Leswi hi tirhaka na xona, ha mi kombela nakambe leswaku mi nga amukeli musa lowu nga faneriwiki wa Xikwembu kutani mi hupa xikongomelo xa wona.” (2 Vakorinto 6:1) I lunghelo ku rhamberiwa ku tirha ni Xikwembu. A hi xiyeni swivangelo swin’wana leswi endlaka leswi swi hi tisela ntsako.

KU TIRHA NI XIKWEMBU SWI ENDLA HI TSAKA

6. N’wana wa Xikwembu wa mativula u yi hlamusele njhani ndlela leyi a titweke ha yona loko a tirha ni Tata wa yena?

6 Minkarhi hinkwayo ku tirha ni Xikwembu swi endle leswaku malandza ya Yehovha ma tsaka. Loko a nga si ta laha misaveni, N’wana  wa mativula wa Xikwembu u te: “Yehovha u ndzi humesile ndzi ri masungulo ya ndlela yakwe . . . a ndzi ri etlhelo ka yena ndzi ri mutirhi la nga ni vuswikoti. A ndzi ri munhu loyi a n’wi rhandzaka hilaha ku hlawulekeke siku ni siku, mina ndzi tsakile emahlweni ka yena nkarhi hinkwawo.” (Swivuriso 8:22, 30) Loko Yesu a tirha ni Tata wa yena, a a tsakile hikuva u hetisise swilo swo tala naswona a a swi tiva leswaku Yehovha wa n’wi rhandza. Kambe ku vuriwa yini hi hina?

Hi yini lexi nga hi endlaka hi eneriseka swinene ku tlula ku dyondzisa van’wana ntiyiso? (Vona ndzimana 7)

7. Ha yini ntirho wo chumayela wu hi tisela ntsako?

7 Yesu u vule leswaku hi ta kuma ntsako loko hi nyika ni loko hi amukela. (Mintirho 20:35) Swa hi tsakisa loko hi kuma ntiyiso, kambe ha yini swi tlhela swi hi tisela ntsako loko hi wu byela van’wana? Hikuva hi va vona va tsaka swinene loko va twisisa leswi Bibele yi swi dyondzisaka ni ku sungula ku va ni vuxaka ni Xikwembu. Swa hi tsakisa loko hi va vona va cinca ndlela leyi va anakanyaka hi yona ni ndlela leyi va hanyaka hi yona. Ntirho wo chumayela i wa nkoka swinene naswona i ntirho lowu enerisaka swinene lowu hi faneleke hi wu endla. Wu endla swi koteka eka lava va vaka vanghana va Xikwembu leswaku va kuma vutomi lebyi nga heriki.—2 Vakorinto 5:20.

8. Hi swihi leswi van’wana va swi vuleke hi ntsako lowu va wu kumaka hi ku tirha na Yehovha?

8 Loko hi pfuna vanhu leswaku va dyondza hi Xikwembu, ha swi tiva leswaku hi tsakisa Yehovha naswona wa ma tsakela matshalatshala ya hina yo n’wi tirhela. Leswi swi tlhela swi hi nyika ntsako. (Hlaya 1 Vakorinto 15:58.) Marco, loyi a tshamaka eItaly, u ri: “Ndza tsaka swinene hi ku tiva leswaku ndzi tirhela Yehovha hilaha ndzi nga kotaka hakona ku nga ri munhu loyi a hatlaka a rivala leswi ndzi swi endleke.” Hilaha ku fanaka, Franco, loyi na yena a tshamaka eItaly, u ri: “Hi ku tirhisa Rito ra yena ni lunghiselelo ra yena ra swilo swa moya, siku ni siku Yehovha u hi tsundzuxa leswaku wa hi rhandza ni leswaku xin’wana ni xin’wana lexi hi n’wi endlelaka xona i xa nkoka, hambiloko matshalatshala ya hina  ma vonaka ma nga vuli nchumu eka hina. Leswi hi swona swi endlaka leswaku ku tirha ni Xikwembu swi ndzi endla ndzi tsaka ni ku endla leswaku vutomi bya mina byi va ni xikongomelo.”

KU TIRHA NI XIKWEMBU SWI HI TSHINETA EKUSUHI NA XONA NI LE KA VAN’WANA

9. Hi byihi vuxaka lebyi nga kona exikarhi ka Yehovha na Yesu naswona ha yini?

9 Loko hi tirha ni lava hi va rhandzaka, hi va ekusuhi na vona. Hi byi tiva kahle vumunhu bya vona ni timfanelo ta vona. Hi tiva tipakani ta vona ni leswi va swi endlaka leswaku va ti fikelela. Yesu u hete malembe yo tala a tirha na Yehovha. Ndlela leyi va rhandzanaka ha yona yi kurile lerova a xi kona lexi nga va hambanisaka. Yesu u hlamusele ndlela leyi vuxaka byebyo byi nga xiswona loko a ku: “Mina na Tatana hi un’we.” (Yohane 10:30) Va ni vun’we hakunene naswona va tirhisana.

Ku chumayela swi tiyisa ripfumelo ra hina hikuva ku hi tsundzuxa hi switshembiso swa Xikwembu ni hi milawu ya xona

10. Ha yini ntirho wo chumayela wu hi tshineta ekusuhi ni Xikwembu ni le ka van’wana?

10 Yesu u kombele Yehovha leswaku a sirhelela vadyondzisiwa va yena. Ha yini? U khongele a ku: “Leswaku va va un’we ku fana na hina.” (Yohane 17:11) Loko hi hanya hi milawu ya Xikwembu ni ku katseka eka ntirho wo chumayela, hi ti twisisa kahle timfanelo ta xona to hlamarisa. Hi dyondza leswaku ha yini ku ri vutlhari ku tshembela eka xona ni ku hanya hi ku landza nkongomiso wa xona. Naswona loko hi tshinela eka Xikwembu, na xona xi ta tshinela eka hina. (Hlaya Yakobo 4:8.) Hi tshinela ni le ka vamakwerhu hikuva hi langutana ni swiphiqo leswi fanaka ni ntsako ni hi leswi hi nga ni tipakani leti fanaka. Hi tirha swin’we, hi tsaka swin’we ni ku tiyisela swin’we. Octavia, loyi a tshamaka eBritain, u ri: “Ku tirha na Yehovha swi endla leswaku ndzi tshinela ekusuhi ni van’wana.” U tlhela a vula leswaku vunghana bya yena sweswi byi sekeriwe eka “tipakani ni nkongomiso lowu fanaka.” Na hina hi titwa hi ndlela leyi fanaka. Loko hi vona matshalatshala lawa vamakwerhu va ma endlaka leswaku va tsakisa Yehovha, swi endla leswaku hi tshinela eka vona.

11. Ha yini hi ta tshinela swinene eka Yehovha ni le ka vamakwerhu emisaveni leyintshwa?

11 Sweswi ndlela leyi hi xi rhandzaka ha yona Xikwembu ni vamakwerhu yi tiyile, kambe yi ta tiya swinene emisaveni leyintshwa. Anakanya hi mintirho hinkwayo yo tsakisa leyi hi nga ta yi endla enkarhini lowu taka! Hi ta hoyozela hinkwavo lava nga ta pfuxiwa eku feni ni ku va dyondzisa hi Yehovha. Hi ta tlhela hi tirha leswaku hi endla misava yi va paradeyisi. Swi ta tsakisa ku tirha swin’we ni ku hetiseka hakatsongotsongo loko Kreste a fuma. Vanhu hinkwavo va ta va ekusuhi swinene naswona va ta tlhela va va ekusuhi na Yehovha, loyi hakunene a nga ta “enerisa ku navela ka xilo xin’wana ni xin’wana lexi hanyaka.”—Pisalema 145:16.

KU TIRHA NI XIKWEMBU SWA HI SIRHELELA

12. Ntirho wo chumayela wu hi sirhelela njhani?

12 Hi fanele hi sirhelela vuxaka bya hina na Yehovha. Hi hanya emisaveni ya Sathana naswona a hi hetisekanga, hikwalaho swa olova  ku sungula ku anakanya ni ku hanya ku fana ni vanhu va misava leyi. Swi fana ni loko hi hlambela enambyeni ivi nambu wu hi kokela laha hi nga laviki ku ya kona. Hikokwalaho hi fanele hi tirhisa matimba ya hina hinkwawo leswaku hi hlambela hi ya eka tlhelo rin’wana. Hilaha ku fanaka, hi fanele hi tirha hi matimba leswaku hi papalata nkucetelo wa misava ya Sathana. Ntirho wa ku chumayela wu hi sirhelela njhani? Loko hi vulavula hi Yehovha ni hi Bibele, hi dzikisa mianakanyo ya hina eka swilo swa nkoka ni leswinene, ku nga ri eka swilo leswi nga ta tsanisa ripfumelo ra hina. (Vafilipiya 4:8) Ku chumayela ku tiyisa ripfumelo ra hina hikuva ku hi tsundzuxa hi switshembiso swa Xikwembu ni hi milawu ya xona. Ku tlhela ku hi pfuna leswaku hi hlakulela timfanelo leti hi ti lavaka leswaku ti hi sirhelela eka Sathana ni misava yakwe.—Hlaya Vaefesa 6:14-17.

Loko hi tshama hi khomekile hi ku endla ntirho wa Yehovha, a hi vi na wona nkarhi wo vilerisiwa hi swiphiqo swa hina

13. Mbhoni yin’wana ya le Australia yi titwa njhani hi ku chumayela?

13 Loko hi tshama hi khomekile hi ku chumayela, hi dyondza ni ku endlela van’wana leswinene evandlheni, swa hi sirhelela hikuva a hi na nkarhi wo vilela hi swiphiqo swa hina. Joel, loyi a tshamaka eAustralia, u ri: “Ntirho wo chumayela wu ndzi pfuna leswaku ndzi anakanya hi swilo swa xiviri. Wu ndzi tsundzuxa hi swiphiqo leswi vanhu va langutanaka na swona ni vuyelo lebyi ndzi veke na byona loko ndzi tirhisa milawu ya Bibele evuton’wini bya mina. Ntirho wo chumayela wu ndzi pfuna leswaku ndzi ringeta ku tshama ndzi titsongahata; wu ndzi nyika nkarhi wo titshega hi Yehovha ni hi vamakwerhu.”

14. Ku tiyisela ka hina entirhweni wo chumayela ku swi kombisa njhani leswaku moya wa Xikwembu wu na hina?

14 Nakambe ku chumayela ku hi endla hi tiyiseka swinene leswaku moya wa Xikwembu wu na hina. Hi xikombiso: A hi nge i ntirho wa wena ku nyika vanhu va le tikweni ra ka n’wina xinkwa. A wu hakeriwi loko u endla ntirho lowu naswona u fanele u tihakelela xo famba. Nakambe, vanhu vo tala a va xi lavi xinkwa naswona van’wana va ku venga hi leswi u va yiselaka xona. A wu ta wu endla ku fikela rini ntirho wolowo? A wu ta hatla u hela matimba naswona a wu ta wu tshika. Kambe, vo tala va hina hi ya emahlweni ni ntirho wo chumayela lembe ni lembe, hambileswi wu koxaka nkarhi ni mali ya hina ni leswi vanhu va hi hlekulaka kumbe ku hi hlundzukela. Leswi swi kombisa leswaku moya wa Xikwembu wa hi pfuna.

KU TIRHA NI XIKWEMBU SWI KOMBISA NDLELA LEYI HI XI RHANDZAKA HA YONA KU KATSA NI VAN’WANA

15. Ku chumayeriwa ka mahungu lamanene ku fambisana njhani ni xikongomelo xa Xikwembu hi vanhu?

15 Ntirho wo chumayela wu fambisana njhani ni xikongomelo xa Yehovha hi vanhu? Xikwembu xi lava leswaku vanhu va hanya hilaha ku nga heriki naswona xikongomelo xa xona a xi cincanga loko Adamu a dyoha. (Esaya 55:11) Xikwembu xi endle malunghiselelo yo hi ntshunxa eka xidyoho ni rifu. Njhani? Yesu u te laha misaveni a ta nyikela hi vutomi bya yena. Kambe leswaku hi vuyeriwa eka rifu  ra yena, hi fanele hi yingisa Xikwembu. Yesu u dyondzise vanhu leswi Xikwembu xi swi languteleke eka vona naswona u lerise vadyondzisiwa va yena ku endla leswi fanaka. Loko hi chumayela ni ku pfuna van’wana leswaku va va vanghana va Xikwembu namuntlha, hi tirha hi ku kongoma na xona eka lunghiselelo ra xona ra rirhandzu ro ponisa vanhu eka xidyoho ni rifu.

16. Ntirho wa hina wo chumayela wu fambisana njhani ni swileriso swa Xikwembu?

16 Loko hi pfuna van’wana leswaku va kuma ndlela leyi yisaka evuton’wini lebyi nga heriki, hi kombisa leswaku ha va rhandza ni leswaku hi rhandza Yehovha. U ‘rhandza leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.’ (1 Timotiya 2:4) Loko Vafarisi va vutisa Yesu leswaku hi wihi nawu lowukulu wa Xikwembu, u te: “‘U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.’ Lexi hi xona xileriso lexikulu ni xo sungula eka hinkwaswo. Xa vumbirhi, lexi fanaka na xona, xi ri, ‘U fanele u rhandza warikwenu kukota loko u tirhandza.’” (Matewu 22:37-39) Hi ku chumayela mahungu lamanene, hi yingisa milawu leyi.—Hlaya Mintirho 10:42.

17. U titwa njhani hi lunghelo ro chumayela mahungu lamanene?

17 Hakunene hi katekile! Yehovha u hi nyike ntirho lowu hi endlaka hi tsaka, lowu endlaka leswaku hi tshinela ekusuhi na yena ni vamakwerhu ni lowu sirhelelaka vuxaka bya hina na yena. Wu tlhela wu hi nyika lunghelo ro kombisa ndlela leyi hi xi rhandzaka ha yona Xikwembu ni van’wana. Yehovha u ni malandza ya timiliyoni emisaveni hinkwayo naswona hinkwawo ka wona ma ni swiyimo leswi nga faniki. Kambe ku nga khathariseki leswaku ha ha ri vatsongo kumbe se hi dyuharile, hi fuwile kumbe hi swisiwana, hi ni matimba kumbe hi tsanile, hi endla hinkwaswo leswi hi nga swi kotaka leswaku hi chumayela van’wana. Hi titwa ku fana na Chantel wa le Furwa, loyi a nga te: “Munhu la tlakukeke emisaveni hinkwayo, Muvumbi wa swilo hinkwaswo, Xikwembu lexi tsakeke, xi ri eka mina: ‘Famba! Vulavula! Vulavula hi mina hi mbilu ya wena hinkwayo. Ndzi ku nyika matimba, Rito ra mina ku nga Bibele, nseketelo lowu humaka etilweni, vamakwenu lava u tirhaka na vona, ndzetelo lowu vuyerisaka ni swiletelo swo hlawuleka hi nkarhi lowu faneleke.’ Mawaku lunghelo ronghasi ro endla leswi Yehovha a hi kombelaka leswaku hi swi endla ni ku tirha na yena!”