Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza (Nkandziyiso Wa Vandlha)  |  August 2016

Johannes Rauthe a ri ensin’wini, kumbexana hi va-1920

 TA KHALE

“Ndzi Kume Vuyelo Lebyinene Hikwalaho Ko Dzunisa Yehovha”

“Ndzi Kume Vuyelo Lebyinene Hikwalaho Ko Dzunisa Yehovha”

“TINYIMPI hinkwato leti tshameke ti lwiwa . . . a hi nchumu loko ti ringanisiwa ni ku xaniseka lokukulu loku nga eYuropa.” Xisweswo Xihondzo xo Rindza xa September 1, 1915, xi hlamusele nyimpi yo sungula ya misava, leyi eku heteleleni yi hlaseleke matiko ya kwalomu ka 30. Hikwalaho ka nyimpi, Xihondzo xo Rindza xi vike xi ku: “Ntirho wa [Mfumo] wu siveriwile hi tindlela to karhi, ngopfungopfu eJarimani ni le Furwa.”

Loko Swichudeni swa Bibele swi langutane ni ndzingo wo katseka enyimpini tanihi leswi matiko emisaveni hinkwayo a ma lwa, a swi nga wu twisisi hilaha ku heleleke nsinya wa nawu wa ku va Vakreste va nga katseki enyimpini. Hambiswiritano, a swi tiyimisele ku chumayela mahungu lamanene. Wilhelm Hildebrandt loyi a a lava ku endla swo tala entirhweni wa Mfumo, u endle xikombelo xa swiphephana leswi vuriwaka The Bible Students Monthly hi Xifurwa. A a nga yanga eFurwa hi leswi a ri phayona kambe hileswi a ri socha ra Mujarimani. Tanihi leswi a a ri nala, a a ambale yunifomo ya vusocha, a chumayela vahundzi va ndlela lava nga Mafurwa lava a va hlamarile.

Mapapila lama kandziyisiweke eka Xihondzo xo Rindza ma vule leswaku ku ni Swichudeni swo hlayanyana swa Bibele swa Majarimani leswi a swi lava ku chumayela mahungu lamanene ya Mfumo loko swi ri evusocheni. Makwerhu Lemke, loyi a ri socha ra le matini, u vule leswaku u kume vanhu lava tsakelaka eka lava ntlhanu lava a a tirha na vona. U tsale a ku: “Hambi ndzi ri laha xikepeni, ndzi kume vuyelo lebyinene hikwalaho ko dzunisa Yehovha.”

Georg Kayser u ye enyimpini tanihi socha kambe u vuye ekaya a ri mugandzeri wa Xikwembu xa ntiyiso. Ku humelele yini? U kume nkandziyiso wa Swichudeni swa Bibele, ivi a amukela ntiyiso wa Mfumo hi mbilu hinkwayo naswona u tshike ku lwa. Endzhaku ka sweswo, u tirhe ntirho lowu nga katsiki ku lwa. Endzhaku ka nyimpi, u ve phayona ro hiseka malembe yo tala.

Hambileswi Swichudeni swa Bibele a swi nga yi twisisi hi ku helela mhaka ya ku nga katseki enyimpini, langutelo ni swiendlo swa swona a swi hambanile ni swiendlo swa vanhu lava a va lava ku lwa. Loko van’watipolitiki ni vafundhisi va seketela nyimpi, Swichudeni swa Bibele swi seketele “Hosana ya Ku Rhula.” (Esa. 9:6) Hambileswi van’wana a va nga khomi swi tiya loko swi ta  emhakeni ya ku nga katseki enyimpini, a va ri ni vumbhoni lebyi nga erivaleni lebyi kombisiweke hi Xichudeni xa Bibele lexi vuriwaka Konrad Mörtter lexi nga vula xi ku, “A ndzi swi tiva leswaku Rito ra Xikwembu ri vula leswaku Mukreste a nga fanelanga a dlaya.”—Eks. 20:13. *

Hans Hölterhoff a ri karhi a fambisa xikalichana leswaku va navetisa The Golden Age

EJarimani, a ku nga ri na lunghiselelo ro karhi leri endleriweke vanhu lava alaka ku ya enyimpini hikwalaho ka ripfalo ra vona, kutani Swichudeni swa Bibele swo tlula 20 swi ale ku katseka evusocheni. Swin’wana swa swona swo tanihi Gustav Kujath a ku vuriwa leswaku wa penga naswona u yisiwe endhawini ya vanhu lava pengaka ivi a nyikiwa swidzidziharisi. Hans Hölterhoff, loyi na yena a aleke ku ya evusocheni, u khotsiwile laha na kona a aleke ku endla mintirho hinkwayo leyi fambisanaka ni nyimpi. Varindzi va n’wi ambarise jazi leri a ri endliwe hi ndlela leyi munhu a nga kotiki ku tshukatshuka leswaku va n’wi bohelela ha rona kukondza mavoko ya yena ma oma. Loko sweswo swi nga n’wi tshikisanga ku tshembeka, varindzi va sungule ku n’wi hlekula. Hambiswiritano, Hans u tshame a tshembekile.

Vamakwerhu van’wana va lerisiwe ku ya evusocheni kambe va ale ku khoma swibamu kutani va kombela ku endla mintirho leyi nga katsiki ku lwa. * Johannes Rauthe na yena u endle leswi fanaka kutani u tekiwile leswaku a ya tirha eswiporweni. Konrad Mörtter u nyikiwe ntirho wo tirha exibedlhele xa masocha, kasi Reinhold Weber u tirhe tanihi muongori wa masocha. August Krafzig a a tsakile hileswi a nga boheki ku lwa entirhweni wakwe. Swichudeni leswi swa Bibele ni van’wana lava fanaka na swona a va tiyimisele ku tirhela Yehovha hi ku ya hi ndlela leyi va n’wi rhandzaka ha yona ni leswi va tshembekaka eka yena.

Hikwalaho ka ndlela leyi Swichudeni swa Bibele a swi tikhome ha yona hi nkarhi wa nyimpi, swi konanisiwile. Eka malembe lama landzeleke, Swichudeni swa Bibele swa le Jarimani swi boheke ku tiyimela etihubyeni ko tala hikwalaho ka ntirho wa swona wo chumayela. Rhavi ra le Jarimani ri vumbe ndzawulo ya nawu eBethele eMagdeburg leswaku ri swi pfuna.

Hakatsongotsongo, Timbhoni ta Yehovha ti ye ti yi twisisa ku antswa mhaka ya leswaku Vakreste a va katseki enyimpini. Loko ku sungula nyimpi ya vumbirhi ya misava, a ti katsekanga enyimpini hilaha ku heleleke. Hikwalaho ka sweswo, ti tekiwe ti ri valala va Tiko ra Jarimani naswona ti xanisiwe hi ndlela ya tihanyi. Kambe mhaka leyi yi ta hlamuseriwa hi xitalo eka xihloko xin’wana xa “Ta Khale.”—Ta khale eYuropa Xikarhi.

^ ndzim. 7 Vona rungula ra Swichudeni swa Bibele swa le Britain hi nkarhi wa Nyimpi yo Sungula ya Misava exihlokweni lexi nge “Tolo A Nga Ha Vuyi—Va Yime Va Tiyile ‘eNkarhini Wa Ndzingo’” eka Xihondzo xo Rindza xa May 15, 2013.

^ ndzim. 9 Leswi va swi endleke swi tsariwe eka Vholumo ya Vutsevu ya ntlhandlamano wa tibuku ta Millennial Dawn (1904) ni le ka nkandziyiso wa Zion’s Watch Tower wa August 1906 wa Xijarimani. Xihondzo xo Rindza xa September 1915 xi lulamise langutelo ra hina ni ku vula leswaku Swichudeni swa Bibele a swi fanelanga swi joyina nyimpi. Hambiswiritano, xihloko lexi a xi vanga kona eka nkandziyiso wa Xijarimani.

DYONDZA SWO TALA

SWIVUTISO LESWI TALAKA KU VUTISIWA

Ha Yini Timbhoni Ta Yehovha Ti Nga Hlanganyeli Eka Tipolitiki?

Xana ti xungeta vuhlayiseki bya tiko?