Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA (NKANDZIYISO WA VANDLHA) APRIL 2016

Xana Ntirho Wa Wena Wo Chumayela Wu Fana Ni Mberha?

Xana Ntirho Wa Wena Wo Chumayela Wu Fana Ni Mberha?

NTIRHO wa hina wo chumayela i wa nkoka naswona wa pfuna. Kambe vanhu van’wana lava hi va chumayelaka a va swi twisisi leswi. Hambiloko vanhu va swi tsakela leswi Bibele yi swi vulaka, a hi minkarhi hinkwayo va swi vonaka swi ri swa nkoka ku dyondza na hina Rito ra Xikwembu.

Hi xikombiso, Gavin a a ya eminhlanganweni eHolweni ya Mfumo kambe a a nga swi lavi ku dyondzeriwa Bibele. U vula leswaku a a nga tivi swo tala hi Bibele naswona a nga lavi leswaku van’wana va tiva mhaka leyi. A a chava leswaku a nga kuceteriwa ku nghena eka vukhongeri byo karhi naswona a a nga lavi ku kanganyisiwa. U ehleketa yini? Xana a swi ta koteka ku pfuna Gavin? Anakanya hi ndlela leyi Bibele yi nga pfunaka munhu ha yona. Yehovha u byele Vaisrayele leswi: “Marito ya mina ma ta huma ku fana ni mberha, ku fana ni mpfula leyi naka kahle ehenhla ka byanyi.” (Deteronoma 31:19, 30; 32:2) A hi dyondzeni swin’wana hi mberha kutani hi yi fananisa ni ntirho wa hina wo chumayela leswaku hi ta kota ku pfuna “vanhu va mixaka hinkwayo.”—1 Timotiya 2:3, 4.

 NTIRHO WA HINA WO CHUMAYELA WU NGA FANISIWA NJHANI NI MBERHA?

Mberha ya olova. Mberha yi va kona hakatsongotsongo loko nkahelo wu endla mathonsi ya mati. Marito ya Yehovha a ma “huma ku fana ni mberha” hi ndlela yihi? U vulavule ni vanhu vakwe hi ndlela ya musa, yo olova ni ya rirhandzu. Ha n’wi tekelela loko hi xixima leswi van’wana va pfumelaka eka swona. Hi va khutaza leswaku va anakanyisisa kahle kutani va tiendlela swiboho. Loko hi va anakanyela hi ndlela yoleyo, va ta yingisa leswi hi swi vulaka naswona ntirho wa hina wo chumayela wu ta va ni vuyelo lebyinene.

Mberha ya phyuphyisa. Ntirho wa hina wo chumayela wu ta phyuphyisa van’wana loko hi endla matshalatshala yo va pfuna ku dyondza swo tala hi ntiyiso. Makwerhu loyi a vitaniwaka Chris, ku nga yena wo sungula ku kombela ku dyondza Bibele na Gavin a nga n’wi sindzisanga leswaku a pfumela. Ematshan’weni ya sweswo, u endle matshalatshala ya leswaku Gavin a titwa a ntshunxekile loko va ri karhi va bula hi Bibele. Chris u byele Gavin leswaku Bibele yi ni rungula ra nkoka ni leswaku loko a dyondza hi rona ri ta n’wi pfuna leswaku a yi twisisa ku antswa minhlangano. Kutani Chris u n’wi hlamusele leswaku vuprofeta bya Bibele hi byona lebyi n’wi khorwiseke leswaku leswi nga eBibeleni i ntiyiso. Xisweswo, va bule hi vuprofeta byo tala malunghana ni ndlela leyi byi hetisekeke ha yona. Bulo rero ri phyuphyise Gavin naswona eku heteleleni u amukele dyondzo ya Bibele.

Mberha i ya nkoka evuton’wini. Hi ximumu, loko ku ri ni dyandza eIsrayele, mpfula a yi nga ni ku ringana tinh’weti to hlayanyana. Loko ndzhongo lowu vangiwaka hi mberha wu nga ri kona, swimilana swa oma ivi swi fa. Yehovha u vule ka ha ri emahlweni leswaku enkarhini wa hina swi ta fana ni loko ku ri ni dyandza, leswi vulaka leswaku vanhu a va ta khomiwa hi torha “ra ku twa marito ya Yehovha.” (Amosi 8:11) U tshembise leswaku vatotiwa a va ta “fana ni mberha leyi humaka eka Yehovha” loko va ri karhi va chumayela mahungu lamanene ya Mfumo, va seketeriwa hi “tinyimpfu tin’wana.” (Mikiya 5:7; Yohane 10:16) Rungula leri hi ri chumayelaka i xiphemu xa lunghiselelo ra Yehovha ro nyika vanhu vutomi lava nga ni torha ra ntiyiso. Xana rungula leri hi ri teka ri ri ra nkoka?

Mberha i nkateko lowu humaka eka Yehovha. (Deteronoma 33:13) Ntirho wa hina wo chumayela wu nga va nkateko kumbe nyiko eka lava va yingisaka. Dyondzo ya Bibele yi ve nkateko eka Gavin hikuva yi n’wi pfune leswaku a kuma tinhlamulo ta swivutiso swakwe hinkwaswo. U endle nhluvuko hi ku hatlisa ivi a khuvuriwa naswona sweswi u tiphina hi ku chumayela mahungu lamanene ya Mfumo swin’we ni nghamu yakwe, Joyce.

Timbhoni ta Yehovha ti chumayela mahungu lamanene ya Mfumo emisaveni hinkwayo

TEKA NTIRHO WA WENA WO CHUMAYELA WU RI WA NKOKA

Loko hi fanisa ntirho wa hina wo chumayela ni mberha swi nga tlhela swi hi pfuna ku twisisa leswaku matshalatshala lawa un’wana ni un’wana wa hina a ma endlaka ensin’wini i ya nkoka. Njhani? Thonsi rin’we ra mati a ri pfuni ngopfu kambe loko mathonsi ma tele ma endla leswaku misava yi va ni ndzhongo. Hilaha ku fanaka, leswi ha un’we wa hina a swi endlaka ensin’wini swi nga ha vonaka swi ri switsongo eka hina. Kambe hikwalaho ka matshalatshala lama endliwaka hi malandza ya Yehovha ya timiliyoni, vumbhoni bya nyikeriwa “ematikweni hinkwawo.” (Matewu 24:14) Xana ntirho wa hina wo chumayela wu ta va nkateko lowu humaka eka Yehovha eka van’wana? Rungula ra hina ri ta fana ni mberha leyi olovaka, yi phyuphyisaka yi tlhela yi va ya nkoka evuton’wini!