Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  No. 4 2017

 LESWI BIBELE YI SWI VULAKA | NDZINGO

Ndzingo

Ndzingo

Vuyelo byin’wana bya ku pfumelela ku hluriwa hi ndzingo i ku dlaya vukati, mavabyi ni ku kingindziwa hi ripfalo. Hi nga wu papalata njhani ntlhamu lowu?

I yini ndzingo?

Loko u ringeka hi loko u navela ku endla nchumu lowu nga riki wunene. A hi nge u le xitolo kutani u vona nchumu wo karhi ivi u wu navela. Kutani u tela hi miehleketo ya leswaku u wu yiva naswona u vona onge a wu nge voniwi hi munhu. Hambiswiritano, ripfalo ra wena ra ku alela! Endzhaku u rivala hi swona kutani u tifambela. Hi ndlela yoleyo u va u hlule ndzingo.

LESWI BIBELE YI SWI VULAKA

 

Loko u ringeka a swi vuli swona leswaku u munhu wo biha. Bibele yi vula leswaku hinkwerhu hi langutana ni miringo. (1 Vakorinto 10:13) Xa nkoka hi leswaku hi endla yini loko hi ringiwa. Van’wana va anakanyisisa hi ndzingo kutani wu va hlula. Kasi van’wana va hatla va wu papalata.

“Kambe un’wana ni un’wana u ringiwa hi ku kokiwa ni ku wongiwa hi ku navela ka yena n’wini.”—Yakobo 1:14.

Ha yini ku ri vutlhari ku teka goza hi xihatla loko u ringiwa?

Bibele yi hlamusela leswi endlaka munhu a hetelela a dyohile. Yakobo 1:15 yi ri: “Ku navela [ko biha], loko ku xurhe, ku veleka xidyoho.” Leswi vulaka leswaku loko hi anakanyisisa hi ku navela ko biha, hi hetelela hi va eka xiyimo lexi hi tsandzekaka ku tilawula, ku fana ni wansati loyi a tikeke loyi nkarhi wakwe wa ku veleka wu nga fika. Hambiswiritano hi nga swi kota ku papalata ku lawuriwa hi ku navela ko biha.

NDLELA LEYI BIBELE YI NGA PFUNAKA HA YONA

 

Tanihi leswi hi kotaka ku anakanya hi swilo swo biha, swi vula leswaku hi nga swi kota ni ku swi bakanya. Njhani? Hikuva hi nkarhi wolowo hi endla swilo swin’wana, ku nga va ntirho wo karhi, ku vulavula ni munghana kumbe ku anakanyisisa hi swilo leswinene. (Vafilipiya 4:8) Swa pfuna ku anakanyisisa hi vuyelo lebyi tisiwaka hi ku hluriwa hi xidyoho, ku nga va ku kingindziwa hi ripfalo, ku vabya kumbe loko vuxaka bya wena ni Xikwembu byi onhakile. (Deteronoma 32:29) Xikhongelo xi nga pfuna swinene. Yesu Kreste u te: “Mi hambeta mi khongela, leswaku mi nga ngheni endzingweni.”—Matewu 26:41.

“Mi nga tshuki mi hambukisiwa: Xikwembu a hi xa ku vungunyiwa. Hikuva xin’wana ni xin’wana lexi munhu a xi byalaka, u ta tlhela a tshovela xona.”—Vagalatiya 6:7.

 U nga endla yini leswaku u kota ku lwisana ni miringo?

NTIYISO WA MHAKA

 

Teka ndzingo tanihi ntlhamu lowu nga phasaka xiphukuphuku xi wela ekhombyeni. (Yakobo 1:14) Leswi i ntiyiso ngopfungopfu loko ku ri ndzingo wa ku endla vuoswi lowu nga vaka ni vuyelo byo vava swinene.—Swivuriso 7:22, 23.

NDLELA LEYI BIBELE YI NGA PFUNAKA HA YONA

 

Yesu Kreste u te: “Kutani, loko tihlo rero ra wena ra xinene ri ku khunguvanyisa, ri xokole u ri cukumeta ekule na wena.” (Matewu 5:29) I ntiyiso leswaku Yesu a a nga vuli swona leswaku munhu a endla sweswo hi ku kongoma! Ku ri na sweswo, a a vula leswaku loko hi lava ku tsakisa Xikwembu ni ku kuma vutomi lebyi nga heriki, a hi fanelanga hi pfumelela swirho swa miri wa hina swi hi dyohisa. (Vakolosa 3:5) Sweswo swi vula leswaku hi fanele hi teka goza hi xihatla hi papalata ndzingo. Wanuna wo tshembeka wa Xikwembu u khongele a ku: “Endla leswaku mahlo ya mina ma hundza ma nga swi voni swilo leswi nga pfuniki nchumu.”—Pisalema 119:37.

I ntiyiso leswaku a swi olovi ku tikhoma. Phela “nyama yi tsanile.” (Matewu 26:41) Hi ta swi endla swihoxo. Kutani loko hi tisola hi mbilu hinkwayo ni ku nga swi endli mukhuva ku dyoha, Yehovha Xikwembu, Muvumbi wa hina u ta hi komba “tintswalo ni nsovo.” (Pisalema 103:8) Hakunene swa chavelela.

“Loko a wu languta swihoxo, Wena Yah, Oho Yehovha, i mani loyi a a ta yima?”—Pisalema 130:3.