Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! NO. 1 2016

Xana U Tiva Yini Hi Timbhoni Ta Yehovha?

Xana U Tiva Yini Hi Timbhoni Ta Yehovha?

U hi vona loko hi chumayela etindhawini ta mani na mani. U nga va u hlaye hi hina eka maphephahungu kumbe u twe van’wana va vula swo karhi hi hina. Kambe xana u tiva swo tala ku fika kwihi hi Timbhoni ta Yehovha?

KAMBELA VUTIVI BYA WENA

Eka swivulwa leswi landzelaka vula loko swi ri ntiyiso kumbe mavunwa.

NTIYISO MAVUNWA

  1.  Timbhoni ta Yehovha i Vakreste.

  2.  Timbhoni ta Yehovha ti pfumela eka tidyondzo ta vativi va swa ntumbuluko.

  3. Timbhoni ta Yehovha a ti amukeli vutshunguri bya madokodela.

  4.  Timbhoni ta Yehovha ti pfumela eka Bibele hinkwayo.

  5.  Timbhoni ta Yehovha ti tirhisa Bibele ya tona ntsena.

  6.  Timbhoni ta Yehovha ti cince Bibele ya tona leswaku yi fambisana ni leswi ti swi pfumelaka.

  7.  Timbhoni ta Yehovha a ti pfumeli ku pfuna vaakatiko.

  8.  Timbhoni ta Yehovha ti va langutela ehansi vanhu va vukhongeri byin’wana.

Leswaku u kuma tinhlamulo, vona matluka lama landzelaka.

  1.  1 I NTIYISO. Hi ringeta hi matimba ku landzela tidyondzo ni mahanyelo ya Yesu Kreste. (1 Petro 2:21) Kambe hi hambana eka swilo swo tala ni mintlawa yin’wana ya vukhongeri leyi tivulaka Vakreste. Hi xikombiso, hi xiye leswaku Bibele yi dyondzisa leswaku Yesu i N’wana wa Xikwembu a hi xiphemu xa Vunharhuun’we. (Marka 12:29) A hi pfumeli leswaku moyaxiviri a wu fi kumbe leswaku ku ni Matsalwa lama seketelaka leswaku Xikwembu xi xanisa vanhu hilaha ku nga heriki etiheleni. Nakambe a hi pfumeli leswaku lava rhangelaka eka vukhongeri va fanele vava ni swikhundlha kumbe swithopo leswi va endlaka va tlakuka ku tlula van’wana.—Eklesiasta 9:5; Ezekiyele 18:4; Matewu 23:8-10.

  2. 2 I MAVUNWA. Hi pfumela leswaku Xikwembu xi tumbuluxe swilo hinkwaswo. Kambe a hi pfumeli eka tidyondzo ta vativi va swa ntumbuluko. Ha yini? Hikuva leswi va swi pfumelaka swi lwisana ni Bibele. Hi xikombiso, van’wana va vona va vula leswaku misava yi tumbuluxiwe hi masiku ya tsevu lama nga ni tiawara ta 24. Kambe rito leri nge “siku” eBibeleni ri nga ha vula nkarhi wo leha. (Genesa 2:4; Pisalema 90:4) Nakambe vativi va ntumbuluko, va dyondzisa leswaku misava yo va ni magidi ma nga ri mangani ya malembe yi tumbuluxiwile. Hambiswiritano, Bibele yi kombisa leswaku misava ni xibakabaka swi ve kona khale, masiku ya tsevu ya ku tumbuluxa ma nga si va kona. 1Genesa 1:1.

  3. 3 I MAVUNWA. Ha byi amukela vutshunguri bya madokodela. Van’wana va hina i madokodela, hilaha a swi ri hakona enkarhini wa Yesu, Mukreste loyi a a vuriwa Luka a a ri dokodela. (Vakolosa 4:14) Kambe, a hi byi amukeli vutshunguri lebyi lwisanaka ni milawu leyi kongomisaka ya Bibele. Hi xikombiso, a hi wu amukeli mpompelo wa ngati hikuva Bibele yi yirisa ku tirhisiwa ka ngati.—Mintirho 15:20, 28, 29.

    Hambiswiritano, hina ni mindyangu ya hina hi lava vutshunguri lebyinene. Kahlekahle, vutshunguri lebyi nga tirhisiki mpompelo wa ngati lebyi a byi endleriwe ku pfuna vavabyi lava nga Timbhoni ta Yehovha, sweswi bya tirhisiwa ku pfuna vaakatiko hinkwavo. Sweswi eka matiko yo tala, vavabyi va nga tihlawulela loko va lava ku amukela vutshunguri lebyi nga tirhisiki mpompelo wa ngati, leswaku va ta papalata vuvabyi lebyi fambisanaka ni mpompelo wa ngati ni swihoxo leswi endliwaka hi vanhu.

  4. 4 I NTIYISO. Hi pfumela leswaku Bibele hinkwayo yi “huhuteriwe hi Xikwembu naswona [ya] pfuna.” (2 Timotiya 3:16) Leswi swi katsa Testamente ya Khale ni Testamente Leyintshwa, hilaha ti vitaniwaka hakona. Hi ntolovelo, tibuku leti ta Bibele hi tivitana Matsalwa ya Xiheveru ni ya Xigriki. Hi ndlela leyi, hi papalata ku endla leswaku Bibele yi vonaka onge swiphemu swin’wana swa yona swi hundzeriwe hi nkarhi kumbe a swi tirhi.

  5.  5 I MAVUNWA. Loko hi dyondza Bibele hi tirhisa vuhundzuluxeri byo tala. Kambe hi tirhisa Vuhundzuluxeri Bya Misava Leyintshwa Bya Matsalwa Yo Kwetsima hi tindzimi leti yi kumekaka ha tona hikuva yi tirhisa vito ra Xikwembu, ya pakanisa naswona ya twisiseka. Xiya ndlela leyi vito ra Xikwembu, leri nge Yehovha ri tirhisiwaka ha yona. Eka xingheniso xa vuhundzuluxeri byin’wana bya Bibele, ku xaxametiwe mavito ya 79 ya vanhu lava hoxeke xandla eka ku humesiwa ka yona. Kambe Bibele leyi, a yi ri boxi vito ra Mutsari wa Bibele, ku nga Yehovha Xikwembu! Ku hambana ni sweswo, Vuhundzuluxeri Bya Misava Leyintshwa byi tlherisele vito ra Xikwembu etindhawini ta madzana laha a ri kumeka kona eka matsalwa yo sungula. 2

  6. 6 I MAVUNWA. Loko hi kume leswaku leswi hi swi pfumelaka a swi fambisani hi ku helela ni leswi Bibele yi swi dyondzisaka, hi antswise matwisiselo ya hina. Hi va 1950, loko Vuhundzuluxeri Bya Misava Leyintshwa Bya Matsalwa Yo Kwetsima byi nga si va kona, a hi tirhisa Tibibele leti a ti kumeka kutani hi pfumelelana na tona.

  7. 7 I MAVUNWA. Ntirho wa hina wo chumayela wu pfuna vaakatiko vo tala. Hi pfune vanhu vo tala lava a va godzomberiwe hi swilo swo fana ni swidzidziharisi ni byala. Titlilasi ta hina to dyondzisa ku hlaya ni ku tsala ti pfuna vanhu va magidi emisaveni hinkwayo. Hi tlhela hi pfuna hi ku phalala Timbhoni ni lava nga riki Timbhoni loko va weriwe hi timhangu. Ha va seketela hi tlhela hi va chavelela, lava weriweke hi timhangu. 3

  8. 8 I MAVUNWA. Hi landzela xitsundzuxo xa Bibele lexi nge “xiximani vanhu hinkwavo,” ku nga khathariseki leswaku va le ka vukhongeri byihi. (1 Petro 2:17, BibeleMahungu Lamanene) Hi xikombiso, hambileswi ematikweni man’wana ku nga ni Timbhoni to tala, a hi va sindzisi van’watipolitiki kumbe vaveki va milawu leswaku va sivela ntirho wa mintlawa ya vukhongeri byin’wana. Nakambe a hi kuceteli vaveki va milawu leswaku va pasisa milawu ya hina ya mahanyelo etikweni kumbe leswi hi pfumelaka eka swona. Ematshan’weni ya sweswo, hi lehisela van’wana mbilu tanihi leswi na hina hi lavaka sweswo.—Matewu 7:12.

Xihloko lexi xi ni rungula leri kumekaka eka website ya hina ya le nawini ya jw.org/ts. Leswaku u dyondza swo tala nghena eka MALUNGHANA NA HINA > SWIVUTISO LESWI TALAKA KU VUTISIWA.

^ 1. Van’wasayense va endle ndzavisiso lowu tshembekaka lowu kombisaka leswaku misava yi nga va yi ri ni malembe ya tibiliyoni kutani na hina ha pfumela, ku hambana ni vativi van’wana va ntumbuluko.

^ 2. Vuhundzuluxeri Bya Misava Leyintshwa byi hlawulekile: A byi xavisiwi. Hikwalaho ka sweswo, vanhu va timiliyoni va hlaya Bibele hi tindzimi ta vona. Nakambe se bya kumeka hi tindzimi ta kwalomu ka 130. U nga tlhela u byi hlaya eka website ya www.jw.org/ts.

^ 3. Ndlela yin’wana leyi hi tirhisaka minyikelo ya hina ha yona i ku phalala lava weriweke hi timhangu. (Mintirho 11:27-30) Leswi ntirho wa hina wu endliwaka hi vatirhi va ku tirhandzela lava nga hakeriwiki, mali leyi nyikeriwaka yi tirhiseriwa ku phalala, ku nga ri ku hakela vatirhi.

DYONDZA SWO TALA

Ku Endliwa Yini eHolweni Ya Mfumo?

Nghena endzeni u vona leswi endliwaka.

Leswi Endlekaka Eka Dyondzo Ya Bibele

Emisaveni hinkwayo, Timbhoni ta Yehovha ti tiviwa hi ku fambisela vanhu dyondzo ya Bibele ya mahala. Hlalela ndlela leyi yi fambisiwaka ha yona.

Ha Yini Hi Vitaniwa Timbhoni Ta Yehovha?

Xiya swivangelo swinharhu swa leswaku ha yini hi amukele vito leri.