Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA DECEMBER 2015

Xana A Wu Swi Tiva?

Xana A Wu Swi Tiva?

Xana hakunene Vayuda a va suka “eka matiko hinkwawo” va ya eYerusalema hi Pentekosta ya 33 C.E.?

Xitarata lexi a xi tele hi vanhu eYerusalema hi Pentekosta ya 33 C.E.

Ku engetela eka rungula ra Bibele leri nga eka Mintirho 2:5-11, Philo, mutsari wa Muyuda wa nkarhi wolowo u tsale rungula leri a ri vulavula hi ntshungu wa vanhu lava a va khitikanela eYerusalema hi Pentekosta ya 33 C.E.

Loko Philo a tsala hi vanhu lava a va ya eYerusalema, u te: “Mitshungu leyi nga hlayekiki a yi suka eka matiko yo tala, van’wana a va suka entsungeni wa tiko, van’wana entsungeni wa lwandle, evuxeni ni le vupela dyambu, en’walungu ni le dzongeni, va ta eka khuvo wun’wana ni wun’wana.” U tlhele a tshaha eka papila leri a ri ya eka Mufumi wa le Rhoma Caligula, ri huma eka Agripa I, ku nga ntukulu wa Heroda Lonkulu. Eka rona, Agripa u tsale leswi mayelana na Yerusalema: “Muti wo Kwetsima . . . a hi ntsindza wa Yuda ntsena kambe ni wa matiko man’wana yo tala, sweswo swi vangiwa hileswi nkarhi ni nkarhi tikoloni a ti rhumeriwa ematikweni lama akelaneke na wona.”

Agripa u xaxamete matiko lama simekiweke hi tikoloni ta Vayuda, ku katsa ni matiko ya le kule yo tanihi Mesopotamiya, Afrika N’walungu, Asia Minor, Greece ni le swihlaleni swa Mediteraniya. Xidyondzeki Joachim Jeremias u ri: “Hambileswi nxaxamelo lowu wu nga hlamuselangiki nchumu hi maendzo yo ya eYerusalema, mhaka leyi a yi hlamuseriwanga hi vuenti, tanihi leswi a ku ri vutihlamuleri bya Vayuda hinkwavo ku ya endla magandzelo eYerusalema.”—Deteronoma 16:16.

Xana magidi ya vanhu lava a va ya eYerusalema eka minkhuvo ya Vayuda a va etlela kwihi?

Bavhu ro hlambela leri onhakeke leri kumiweke eYerusalema

A ku endliwa minkhuvo yinharhu hi lembe eYerusalema, Paseka, Pentekosta ni Nkhuvo wa Mitsonga. Hi va 100 BCE, vanhu va kwalomu ka madzana ya magidi va ye eYerusalema leswaku va ya tlangela swiendlakalo sweswo, a va suka eIsrayele ni le matikweni man’wana laha Vayuda a va tshama kona. (Luka 2:41, 42; Mintirho 2:1, 5-11) Vaendzi lava hinkwavo a va fanele va kuma ndhawu yo tshama.

Van’wana a va tshama ni vanghana va vona; van’wana va rhurheriwa etindlwini ta vaendzi. Vo tala a va tshama ematendeni emutini wolowo kumbe ematlhelo ka wona. Loko Yesu a ya eYerusalema ro hetelela, u rhurheriwe ekusuhi ni muti wa Betaniya.Matewu 21:17.

Ku kumiwe miako yo tala yi ri ni mabavhu yo hlambela ekusuhi ni tempele. Ku vuriwa leswaku emiakweni leyi, hi laha vaendzi a va tshama kona va tlhela va hlambela kona, va nga si nghena etempeleni. Tsalwa leri kumiweke eka yin’wana ya miako leyi ri kombisa leswaku Theodotus, muprista ni murhangeri esinagogeni ra kwalaho u “ake sinagoga leswaku ku ta hlayiwa Torah eka yona . . . u tlhele a aka ndhawu yo rhurhela vaendzi lava nga swisiwana, a hoxa ni tiphayiphi ta mati eka yona.”