Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XIHONDZO XO RINDZA NOVEMBER 2015

Xana A Wu Swi Tiva?

Xana A Wu Swi Tiva?

Ha yini Yosefa a byevurile a nga si ya vona Faro?

Xifaniso xa khale xa le Egipta lexi nga le khumbini, lexi kombisaka munhu la tsemetaka misisi

Hi ku ya hi rungula leri kumekaka eka buku ya Genesa, Faro u rhumele rito leswaku ku ya vitaniwa Yosefa lowa Muheveru, leswaku a ta emahlweni ka yena ku ta n’wi hlamusela norho wakwe. Hi nkarhi wolowo Yosefa se a khotsiwe malembe yo tala. Hambileswi xirhambo xa Faro a ku ri xa xihatla, Yosefa u rhange hi ku byevula. (Genesa 39:20-23; 41:1, 14) Swi le rivaleni leswaku mutsari wa mhaka leyi a a tiva mindhavuko ya Vaegipta, hikuva u tsale ni vuxokoxoko lebyi nga ha vonakaka byi nga ri bya nkoka.

Ku tshika malepfu ya kula, a swi tolovelekile eka vanhu va khale, ku katsa ni Vaheveru. Eka buku leyi nge Cyclopedia of Biblical, Theological, and Ecclesiastical Literature McClintock na Strong yi ri: “Vanhu va khale va le Egipta a ku ri vona ntsena lava a va byevula malepfu.”

Xana a ku byevuriwa malepfu ntsena? Magazini lowu vuriwaka Biblical Archaeology Review wu ringanyeta leswaku hi ku ya hi ndhavuko wa Vaegipta loko munhu a nga si ya vona Faro a fanele a ti lunghiselela ku fana ni loko a ya nghena etempeleni. Kutani loko swi ri tano, Yosefa a a fanele a byevula misisi hinkwayo enhlokweni ni le mirini.

Buku ya Mintirho yi vula leswaku tata wa Timotiya a a ri Mugriki. Xana leswi swi vula leswaku a huma eGreece?

A swi tano. EBibeleni, muapostola Pawulo minkarhi yin’wana a a tala ku hambanisa Vayuda ni Magriki, a tirhisa rito Mugriki ku yimela vanhu hinkwavo lava nga riki Vayuda. (Varhoma 1:16; 10:12) Leswi a swi vangiwa hileswi ririmi ni ndhavuko wa Magriki a swi tirhisiwa ngopfu eka tindhawu leti Pawulo a a chumayela eka tona.

Xana i vamani lava a va tekiwa va ri Magriki hi minkarhi yoleyo? Isocrates xivulavuri xa ndhuma xa Muatena lexi hanyeke hi va 300 B.C.E, a xi tala ku tibuma hileswi ndhavuko wa Magriki a wu tiviwa hi vanhu vo tala emisaveni. U vule leswaku, “lava a va tiva ni ku tirhisa mindhavuko ya Magriki a va ri ni lunghelo ro dyondza swo tala naswona a va tlula Magriki hi woxe.” Kutani, swi nga endleka leswaku tata wa Timotiya loyi Pawulo a vulavuleke ha yena ni van’wana a va ri Magriki hileswi a va hanya hi ndhavuko wa vona, ku nga ri hi ku velekiwa.—Mintirho 16:1.

DYONDZA SWO TALA

“Ndzi Kombela Mi Yingisa Norho Lowu”

Mindyangu ya vukati bya vumbirhi yi nga dyodza swo tala eka ndyangu wa ka va Yosefa lowu a wu nga ri na vun’we.

“N’wana Wa Mina Loyi A Rhandzekaka Ni Loyi A Tshembekaka eHosini”

I yini leswi pfuneke Timotiya leswaku a nga ha vi muntshwa loyi a khomiwaka hi tingana ivi ava mulanguteri la nga Mukreste?